𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃 𐴏𐴥𐴡𐴌𐴝𐴘 𐴎𐴝𐴌𐴒𐴥𐴡𐴘𐴊𐴠 𐴁𐴙𐴝𐴌𐴝𐴔𐴡𐴌𐴠 𐴑𐴡𐴕𐴄𐴡𐴌𐴟𐴓 𐴒𐴡𐴌𐴦𐴡𐴕 𐴁𐴠𐴐𐴥𐴞 𐴎𐴡𐴌𐴟𐴌𐴞 𐴀𐴥𐴡𐴘𐴧𐴠 𐴱𐴱

𐴑𐴡𐴖𐴥𐴞𐴋 – 𐴹 𐴱 𐴁𐴙𐴝𐴌𐴝𐴔 𐴀𐴞𐴁𐴥𐴝 𐴘𐴠 𐴌𐴟𐴇𐴝𐴙𐴚𐴒𐴙𐴝 𐴀𐴝𐴁𐴝𐴊𐴞 𐴌𐴠 𐴈𐴥𐴝𐴔𐴝𐴈𐴥𐴝 𐴃𐴡𐴁𐴤𐴝 𐴒𐴡𐴌𐴞𐴃 𐴉𐴝𐴌𐴠 𐴱 𐴑𐴡𐴑𐴆 𐴁𐴝𐴎𐴝𐴌 𐴀𐴠𐴓𐴝𐴑𐴝𐴌 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃 𐴑𐴡𐴖𐴥𐴞𐴋 – 𐴹 𐴱 𐴉𐴝𐴒𐴞𐴘𐴠 𐴊𐴠 𐴘𐴥𐴝𐴕 𐴈𐴥𐴝𐴄𐴞 𐴀𐴥𐴡𐴘𐴧𐴠 𐴱 𐴎𐴠𐴙𐴕𐴋𐴞𐴓𐴧𐴝 𐴃𐴡𐴌𐴝 𐴃𐴡𐴌𐴞 𐴀𐴝𐴌 𐴏𐴝𐴓𐴝𐴑𐴞 𐴒𐴡𐴌𐴞 𐴉𐴝𐴌𐴠 𐴌𐴟𐴑𐴥𐴞𐴁𐴝𐴌 𐴏𐴠𐴐𐴃𐴝 𐴒𐴡𐴌𐴡𐴕 𐴁𐴦𐴝𐴊𐴠 𐴀𐴝𐴌 𐴈𐴡𐴕𐴥𐴡 𐴀𐴟𐴉𐴥𐴝𐴘 𐴕𐴦𐴝𐴘 𐴱 𐴁𐴙𐴝𐴌𐴝𐴙𐴔𐴧𐴙𐴝 𐴀𐴥𐴡𐴑𐴧𐴡𐴓𐴡𐴌𐴠 𐴊𐴝𐴁𐴝𐴘 𐴒𐴡𐴌𐴞 𐴁𐴡𐴌 𐴓𐴝 ( 𐴘𐴟𐴕𐴞𐴏𐴠𐴉𐴠 ) 𐴰 𐴱 𐴲 𐴏𐴥𐴞𐴄 𐴀𐴡𐴓𐴝 𐴀𐴝𐴘𐴏𐴡𐴓𐴡𐴆𐴥𐴠𐴕 (𐴃𐴦𐴡𐴙𐴃𐴧𐴝 𐴋𐴝𐴑𐴄𐴡𐴌𐴞 𐴅𐴙𐴥𐴡𐴓 ) 𐴁𐴝𐴕𐴝𐴘𐴧𐴠 𐴊𐴠 𐴘𐴥𐴝𐴕 𐴁𐴦𐴝𐴊𐴠 𐴐𐴥𐴠𐴐𐴢𐴈𐴝𐴍𐴝𐴓𐴠 𐴀𐴝𐴌 𐴑𐴠𐴙𐴏𐴧𐴟 𐴊𐴠𐴈𐴥𐴝 𐴕𐴡𐴎𐴝𐴌 𐴱 𐴎𐴦𐴝𐴣 𐴇𐴥𐴡𐴑 , 𐴁𐴠𐴐𐴥𐴞 𐴃𐴡𐴌𐴝 𐴃𐴡𐴌𐴞 𐴒𐴡𐴌𐴞 𐴔𐴠 𐴔𐴝𐴐𐴡𐴌 𐴲 𐴲 𐴃𐴝𐴌𐴞𐴑𐴡𐴌 𐴁𐴥𐴟𐴃𐴡𐴌𐴠 𐴰 𐴹 𐴘𐴥𐴝𐴕 𐴏𐴥𐴞𐴄 𐴃𐴡𐴘𐴧𐴝𐴌 𐴀𐴥𐴡𐴘 𐴎𐴝𐴘 𐴁𐴡𐴒𐴦𐴡𐴘 𐴱 𐴁𐴝𐴑𐴞 𐴰 𐴲 𐴱 𐴘𐴥𐴝𐴕 𐴔𐴠 𐴔𐴝𐴐𐴡𐴌 𐴰 𐴳 𐴃𐴝𐴌𐴞𐴑𐴡𐴌 𐴁𐴥𐴟𐴃𐴡𐴌𐴠 𐴕𐴝𐴓 𐴀𐴥𐴡𐴘𐴁𐴡 𐴱 𐴇𐴝𐴓𐴡𐴃𐴠 𐴁𐴟𐴎𐴥𐴝 𐴎𐴝𐴌 𐴊𐴠 𐴑𐴡𐴖𐴥𐴞𐴋 – 𐴹 𐴱 𐴌𐴟𐴇𐴝𐴙𐴚𐴒𐴙𐴝𐴌 𐴀𐴝𐴁𐴝𐴊𐴞 𐴌𐴠 𐴈𐴥𐴝𐴔𐴝𐴈𐴥𐴝 𐴓𐴟𐴏𐴧𐴝𐴕 𐴒𐴡𐴌𐴞𐴁𐴡 𐴱 𐴀𐴥𐴠𐴃𐴡𐴓𐴧𐴝 𐴀𐴝𐴣𐴀𐴌𐴝 𐴎𐴠𐴃𐴡 𐴁𐴠𐴐𐴥𐴞 𐴉𐴝𐴌𐴞 𐴀𐴥𐴞𐴃𐴝𐴌𐴝𐴌𐴠 𐴈𐴥𐴝𐴔𐴝𐴈𐴥𐴝 𐴁𐴝𐴏𐴝𐴘 𐴉𐴝𐴌𐴞 𐴁𐴡𐴓𐴧𐴝 𐴎𐴡𐴌𐴟𐴌𐴡𐴃 𐴀𐴥𐴡𐴘𐴁𐴡𐴊𐴠 𐴈𐴝𐴔 𐴀𐴥𐴡𐴑𐴧𐴡𐴓 𐴒𐴡𐴌𐴦𐴞𐴌 𐴱𐴱

𐴀𐴥𐴠𐴃𐴡𐴓𐴧𐴝 𐴀𐴠𐴈𐴥𐴡𐴕 𐴀𐴥𐴡𐴘𐴃𐴠 𐴄𐴝𐴙𐴔 𐴄𐴞𐴁𐴡𐴓 𐴔𐴡𐴎𐴞𐴕 𐴈𐴝𐴔 𐴁𐴠𐴙𐴒𐴧𐴞𐴕 𐴕𐴝𐴓 𐴒𐴡𐴌𐴦𐴡𐴕 𐴁𐴠𐴐𐴥𐴞 𐴎𐴡𐴌𐴡𐴌𐴞 𐴀𐴥𐴡𐴘𐴧𐴠 𐴱 𐴀𐴝𐴌 𐴀𐴝𐴣𐴀𐴌𐴝 𐴀𐴝𐴐𐴥𐴝 𐴒𐴡𐴌𐴞𐴌 𐴊𐴠 , 𐴃𐴡𐴙𐴃𐴧𐴝 𐴋𐴝𐴑𐴄𐴡𐴌 𐴈𐴥𐴝𐴕𐴝 𐴀𐴝𐴌 𐴊𐴝𐴁𐴝𐴘 𐴀𐴡𐴐𐴥𐴟𐴃 𐴀𐴝𐴌 𐴔𐴡𐴊𐴡𐴊 𐴎𐴞𐴀𐴕 𐴎𐴠𐴃𐴥𐴡𐴑𐴧𐴡𐴕𐴡𐴃 𐴓𐴝𐴒𐴠 𐴀𐴥𐴠𐴃𐴥𐴡𐴑𐴧𐴡𐴕𐴡𐴃 𐴊𐴠𐴌𐴞 𐴕𐴡 𐴀𐴥𐴡𐴉𐴝𐴕 𐴉𐴝𐴘𐴧𐴟𐴔 𐴁𐴡𐴓𐴞 𐴘𐴟𐴕𐴞𐴏𐴠𐴉𐴠 𐴈𐴡𐴘𐴧𐴠 𐴱 𐴘𐴥𐴝𐴌 𐴁𐴝𐴊𐴠 𐴘𐴟𐴕𐴞𐴏𐴠𐴉𐴠 𐴀𐴥𐴞𐴃𐴝𐴌𐴝𐴌 𐴐𐴥𐴡𐴌𐴞𐴑 𐴀𐴥𐴡𐴑𐴧𐴡𐴓𐴡𐴌𐴠 𐴀𐴝𐴌 𐴁𐴝𐴎𐴥𐴝 𐴀𐴝𐴏𐴠𐴊𐴠 𐴇𐴥𐴡𐴑𐴟𐴔𐴡𐴃𐴡 𐴌𐴠 𐴉𐴥𐴟𐴣𐴖𐴝𐴣𐴃𐴞 𐴓𐴡𐴘 𐴱 𐴌𐴟𐴇𐴝𐴙𐴚𐴒𐴙𐴝𐴌 𐴃𐴟 𐴓𐴝𐴒𐴠𐴊𐴠 𐴏𐴞𐴏𐴢 𐴀𐴥𐴡𐴑𐴧𐴡𐴓 𐴓𐴝𐴒𐴝𐴃𐴝𐴌 𐴉𐴦𐴡𐴣𐴏𐴝𐴃 𐴃𐴥𐴝𐴑𐴝 𐴉𐴡𐴌𐴞𐴁𐴡 𐴱 𐴏𐴝𐴁𐴟𐴕 𐴀𐴝𐴌 𐴉𐴝𐴕𐴞 , 𐴀𐴥𐴞𐴔𐴧𐴡𐴃 𐴊𐴦𐴡𐴙𐴕𐴧𐴝 , 𐴀𐴠𐴓𐴡𐴔 𐴊𐴝𐴌 𐴔𐴝𐴕𐴟𐴙𐴐𐴢 𐴀𐴝𐴌 𐴏𐴠𐴇𐴠𐴃𐴡𐴌 𐴔𐴝𐴇𐴠𐴌 𐴀𐴝𐴌 𐴁𐴙𐴝𐴌𐴝𐴔 𐴏𐴥𐴝𐴌𐴝 𐴀𐴝𐴌 𐴏𐴝𐴉𐴢 𐴏𐴥𐴡𐴃𐴥𐴟𐴌𐴝 𐴏𐴞𐴏𐴢 𐴀𐴥𐴡𐴑𐴧𐴡𐴓 𐴑𐴠𐴀𐴠𐴔𐴡𐴃 𐴊𐴞𐴘𐴝 𐴉𐴡𐴌𐴞𐴁𐴡 𐴱 𐴀𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴑𐴠𐴀𐴠𐴔𐴡𐴃 𐴀𐴝𐴒𐴠 𐴓𐴥𐴡𐴃𐴞 𐴐𐴥𐴞𐴔𐴝 𐴏𐴥𐴝𐴌𐴝 𐴀𐴡𐴐𐴥𐴝𐴕𐴃𐴞𐴃 𐴀𐴝𐴌 𐴁𐴠𐴐𐴥𐴞 𐴊𐴟𐴑𐴧𐴡𐴌 𐴎𐴞𐴕𐴊𐴞𐴒𐴞 𐴓𐴝𐴒𐴝𐴃𐴝𐴌 𐴈𐴝𐴍𐴝𐴃 𐴀𐴝𐴏𐴥𐴠 𐴱 𐴀𐴝𐴣𐴀𐴌𐴝 𐴀𐴠𐴕𐴋𐴞𐴓𐴧𐴝 𐴈𐴥𐴡𐴌𐴝𐴁 𐴇𐴥𐴝𐴓𐴡𐴃𐴡𐴃 𐴌𐴟𐴇𐴝𐴙𐴚𐴒𐴙𐴝 𐴌𐴠 𐴁𐴙𐴝𐴌𐴝𐴔 𐴀𐴞𐴁𐴥𐴝𐴌 𐴃𐴟 𐴁𐴝𐴏𐴝𐴘𐴁𐴝𐴌 𐴑𐴟𐴐𐴞𐴐𐴢 𐴒𐴡𐴌𐴝𐴃 𐴀𐴝𐴏𐴥𐴞 𐴱𐴱

Sources : https://www.dhakatribune.com/opinion/editorial/2020/05/16/containing-the-spread-in-rohingya-camps-will-be-crucial