𐴌𐴡𐴇𐴝𐴙𐴚𐴒𐴙𐴝 𐴑𐴠𐴀𐴠𐴔𐴡𐴃 𐴀𐴠𐴑𐴡𐴔 𐴑𐴡𐴖𐴞𐴥𐴋 – 𐴹 𐴱 𐴑𐴠𐴙𐴏𐴢 𐴱𐴱

𐴀𐴝𐴎𐴞𐴘𐴝 𐴁𐴞𐴐𐴞𐴃 𐴁𐴝𐴌𐴠 𐴑𐴡𐴌𐴟𐴕𐴝 𐴉𐴝𐴒𐴞𐴘𐴠𐴊𐴠 𐴔𐴝𐴕𐴟𐴙𐴐𐴢 𐴀𐴥𐴞𐴁𐴝𐴌𐴠 𐴑𐴡𐴌𐴠𐴕𐴄𐴥𐴝𐴙𐴕𐴡𐴃 𐴉𐴦𐴡𐴣𐴏𐴝𐴘 𐴊𐴙𐴝 𐴒𐴞𐴘𐴠 𐴱 𐴒𐴤𐴡𐴌𐴒𐴟𐴐𐴧𐴞 𐴀𐴥𐴞𐴁𐴝𐴌 𐴋𐴥𐴝𐴑𐴠 𐴎𐴡𐴕𐴡𐴌 𐴃𐴟 𐴐𐴥𐴟𐴑𐴧𐴟𐴌 𐴁𐴝𐴌𐴠 𐴏𐴥𐴝𐴁𐴒𐴡𐴌𐴞 𐴁𐴡𐴕 𐴒𐴡𐴌𐴞 𐴊𐴙𐴝 𐴎𐴝𐴘𐴁𐴡 𐴁𐴡𐴓𐴞 ( 𐴀𐴝𐴌 𐴀𐴝𐴌 𐴀𐴝𐴌 𐴏𐴞 ) 𐴘𐴠 𐴈𐴡𐴘𐴧𐴠 𐴱 𐴑𐴡𐴑𐴆 𐴁𐴝𐴎𐴝𐴌 𐴀𐴠𐴓𐴝𐴑𐴝𐴃 𐴀𐴝𐴏𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃 𐴀𐴝𐴙𐴅𐴧𐴙𐴝 𐴴 𐴱 / 𐴵 / 𐴰 𐴲 𐴰 𐴲 𐴀𐴞𐴚 𐴰 𐴳 / 𐴲 / 𐴲 𐴳 𐴲 𐴱 𐴌𐴟𐴇𐴝𐴙𐴚𐴒𐴙𐴝 𐴁𐴞𐴐𐴞𐴃 𐴁𐴝𐴌𐴠 𐴀𐴠𐴑𐴡𐴔 𐴑𐴡𐴌𐴟𐴕𐴝 𐴑𐴠𐴙𐴏𐴢 𐴉𐴝𐴒𐴞𐴘𐴠 𐴊𐴠 𐴘𐴥𐴝𐴕 𐴈𐴡𐴀𐴠𐴑 𐴃𐴡𐴌𐴉𐴡𐴌 𐴃𐴟 𐴈𐴥𐴡𐴁𐴡𐴌 𐴉𐴝𐴘𐴧𐴠 𐴁𐴡𐴓𐴞 𐴋𐴤𐴝𐴑𐴝 𐴄𐴠𐴌𐴞𐴁𐴙𐴟𐴕𐴡𐴃 𐴓𐴠𐴙𐴑𐴧𐴙𐴠 𐴱 𐴁𐴡𐴌𐴔𐴝𐴌 𐴅𐴠𐴕𐴟𐴏𐴥𐴝𐴙𐴋 𐴈𐴥𐴝𐴘𐴧𐴝 𐴈𐴡𐴔𐴐𐴡𐴙𐴚𐴒𐴙𐴝 𐴑𐴡𐴖𐴔 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴃𐴥𐴝𐴑𐴠𐴊𐴠 𐴴 𐴳 𐴐𐴥𐴝𐴕 𐴑𐴠𐴀𐴠𐴔𐴡𐴌 𐴁𐴥𐴟𐴃𐴡𐴌 𐴃𐴟 𐴀𐴠𐴑𐴧𐴝𐴕 𐴑𐴠𐴀𐴠𐴔𐴡𐴃 𐴱 𐴉𐴝𐴒𐴞𐴘𐴠𐴊𐴠 𐴁𐴙𐴝𐴌𐴝𐴙𐴔𐴧𐴙𐴝 𐴀𐴥𐴞𐴁𐴝𐴌𐴠 𐴑𐴡𐴌𐴠𐴄𐴥𐴝𐴙𐴕𐴡𐴃 ( 𐴋𐴝𐴑𐴄𐴡𐴌𐴞 𐴎𐴙𐴡𐴓 ) 𐴉𐴦𐴡𐴣𐴏𐴝𐴘 𐴊𐴞𐴘𐴠 𐴱 𐴑𐴡𐴑𐴆 𐴁𐴝𐴎𐴝𐴌 𐴋𐴝𐴑𐴄𐴡𐴌𐴞 𐴑𐴦𐴡𐴓𐴠𐴅 𐴎𐴠𐴍𐴠 𐴁𐴙𐴝𐴌𐴝𐴔 𐴏𐴠𐴑 𐴒𐴡𐴌𐴤𐴝 𐴎𐴝𐴌 𐴱 𐴀𐴥𐴠𐴍𐴠 𐴐𐴥𐴟𐴌𐴟𐴌 𐴄𐴦𐴠𐴏𐴡𐴃 𐴲 𐴎𐴡𐴕 𐴉𐴝𐴒𐴞𐴘𐴠 𐴁𐴡𐴓𐴞 ( 𐴀𐴝𐴌 𐴀𐴝𐴌 𐴀𐴝𐴌 𐴏𐴞 ) 𐴘𐴠 𐴈𐴡𐴘𐴧𐴠 𐴱 𐴉𐴥𐴞𐴃𐴞𐴕 𐴊𐴗𐴝𐴌𐴝 𐴒𐴡𐴌𐴞 𐴃𐴝𐴑𐴞𐴊 𐴒𐴡𐴙𐴅𐴧𐴙𐴠𐴊𐴠 𐴀𐴥𐴠𐴍𐴠 𐴱 𐴉𐴝𐴒𐴞𐴘𐴠𐴊𐴠 𐴀𐴥𐴠 𐴊𐴟𐴘 𐴎𐴡𐴕𐴡𐴌 𐴁𐴥𐴟𐴃𐴡𐴌𐴠 𐴀𐴠𐴑 𐴎𐴡𐴕 𐴁𐴝𐴚𐴓𐴝 𐴊𐴠𐴐𐴡𐴌 𐴔𐴝𐴕𐴟𐴙𐴐𐴢 𐴱𐴱

𐴌𐴟𐴇𐴝𐴙𐴚𐴒𐴙𐴝 𐴁𐴙𐴝𐴌𐴝𐴙𐴔𐴧𐴙𐴝 𐴀𐴥𐴞𐴁𐴝𐴌𐴠 𐴑𐴡𐴌𐴠𐴕 𐴄𐴥𐴝𐴙𐴕𐴡𐴃 𐴉𐴦𐴡𐴣𐴏𐴝𐴘 𐴊𐴞𐴘𐴠 𐴱 ( 𐴀𐴝𐴌 𐴀𐴝𐴌 𐴀𐴝𐴌 𐴏𐴞 ) 𐴌 𐴑𐴡𐴔𐴞𐴆𐴕𐴝𐴌 𐴔𐴝𐴇𐴁𐴟𐴁 𐴀𐴝𐴓𐴡𐴔 𐴃𐴝𐴀𐴓𐴧𐴟𐴑𐴊𐴝𐴌𐴠 𐴋𐴤𐴝𐴑𐴝 𐴄𐴠𐴌𐴞𐴁𐴙𐴟𐴕𐴡𐴌𐴠 𐴈𐴡𐴘𐴧𐴠𐴊𐴠 , 𐴁𐴙𐴝𐴌𐴝𐴔 𐴉𐴝𐴒𐴞𐴘𐴠𐴊𐴠 𐴔𐴝𐴕𐴟𐴙𐴐𐴢 𐴀𐴥𐴞𐴁𐴝 𐴔𐴡𐴌𐴡𐴊 𐴁𐴡𐴐𐴢 𐴵 𐴳 𐴁𐴡𐴏𐴡𐴌 𐴒𐴦𐴝𐴌 𐴏𐴥𐴟𐴐𐴃𐴡𐴌 𐴇𐴝𐴓𐴡𐴃 𐴄𐴤𐴞𐴑 𐴀𐴝𐴏𐴠 𐴱 𐴀𐴝𐴣𐴀𐴌𐴝 𐴀𐴝𐴌𐴀𐴥𐴡 𐴈𐴥𐴝𐴄𐴞 𐴒𐴡𐴌𐴞 𐴉𐴝𐴌𐴞𐴉𐴦𐴝𐴕 𐴱 𐴀𐴥𐴞𐴃𐴠 𐴊𐴡𐴓𐴝 𐴀𐴥𐴡𐴘𐴧𐴠𐴊𐴠 𐴔𐴝𐴕𐴟𐴙𐴐𐴢 𐴀𐴝𐴌 𐴀𐴥𐴞𐴃𐴝𐴌 𐴒𐴤𐴡𐴌𐴒𐴟𐴐𐴧𐴞𐴌𐴠 𐴏𐴥𐴞𐴌𐴝 𐴒𐴡𐴙𐴅𐴧𐴙𐴠 𐴱 𐴀𐴠𐴑 𐴔𐴡𐴓𐴞𐴘𐴟𐴕𐴡𐴌 𐴁𐴠𐴐𐴥𐴞 𐴔𐴝𐴙𐴕𐴐𐴡𐴌 𐴁𐴥𐴟𐴃𐴡𐴌𐴠 𐴀𐴠𐴑 𐴎𐴡𐴕 𐴉𐴝𐴒𐴞𐴘𐴠𐴊𐴠 𐴘𐴥𐴝𐴕 𐴀𐴥𐴠𐴃𐴡 𐴁𐴥𐴝𐴉𐴝 𐴉𐴡𐴌𐴠𐴉𐴦𐴝𐴕 𐴕𐴦𐴡 𐴀𐴝𐴌 𐴕𐴡𐴋𐴡𐴌𐴝𐴙𐴌 𐴱 𐴔𐴡𐴕𐴃𐴡𐴌 𐴀𐴠𐴕𐴋𐴞𐴓𐴧𐴝 𐴄𐴝𐴓𐴝𐴘𐴧𐴝 𐴀𐴝𐴁𐴡𐴏𐴃𐴝𐴃 𐴔𐴦𐴟𐴔𐴧𐴞𐴑𐴧𐴙𐴝 𐴈𐴡𐴕 𐴎𐴦𐴟 𐴀𐴥𐴡𐴘𐴁𐴡𐴊𐴠 𐴘𐴥𐴝𐴕𐴡𐴌𐴠 𐴏𐴞𐴕𐴃𐴝 𐴒𐴡𐴌𐴞𐴌 𐴊𐴠 𐴁𐴡𐴓𐴞 𐴃𐴝𐴀𐴓𐴧𐴟𐴑𐴊𐴝𐴌𐴠 𐴈𐴡𐴘𐴧𐴠 𐴱 𐴃𐴝𐴀𐴓𐴧𐴟𐴑𐴊𐴝𐴌𐴠 𐴀𐴝𐴌𐴀𐴥𐴡 𐴈𐴡𐴘𐴧𐴠𐴊𐴠 𐴐𐴥𐴡𐴃 𐴈𐴝𐴣𐴏𐴝𐴈𐴥𐴝𐴣𐴏𐴞 𐴌𐴟𐴇𐴝𐴙𐴚𐴒𐴙𐴝 𐴀𐴠𐴈𐴥𐴡𐴕 𐴉𐴡𐴙𐴅𐴧𐴡𐴕𐴃𐴡 𐴑𐴠𐴀𐴠𐴔𐴡𐴌 𐴁𐴦𐴝𐴌𐴠 𐴑𐴡𐴌𐴠𐴕𐴄𐴥𐴝𐴙𐴕𐴡𐴃 𐴀𐴝𐴏𐴦𐴠 𐴱 𐴑𐴡𐴑𐴆 𐴁𐴝𐴎𐴝𐴌𐴡𐴌 𐴋𐴝𐴑𐴄𐴡𐴌 / 𐴔𐴝𐴇𐴁𐴟𐴁𐴟𐴌 𐴌𐴝𐴇𐴔𐴝𐴕𐴠 𐴈𐴡𐴘𐴧𐴠𐴊𐴠 , 𐴀𐴠𐴈𐴥𐴡𐴕 𐴉𐴡𐴙𐴅𐴧𐴡𐴕𐴃𐴡 𐴰 𐴵 𐴱 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴄𐴠𐴙𐴏𐴄 𐴒𐴡𐴌𐴝𐴒𐴞𐴘𐴠 𐴱 𐴀𐴥𐴡𐴊𐴡𐴌 𐴁𐴦𐴝𐴌𐴥𐴝 𐴄𐴝𐴓𐴝𐴘𐴧𐴝 𐴀𐴝𐴏𐴠𐴊𐴠 𐴔𐴝𐴙𐴕𐴐𐴡𐴌 𐴁𐴥𐴟𐴃𐴡𐴌𐴠 𐴀𐴝𐴓𐴧𐴝𐴇𐴢 𐴕𐴡𐴒𐴡𐴌𐴥𐴡𐴑 𐴎𐴡𐴊𐴞 𐴀𐴝𐴃𐴥𐴞𐴑𐴧𐴙𐴝 𐴐𐴥𐴟𐴌𐴟 𐴀𐴥𐴡𐴘𐴓𐴠 𐴌𐴟𐴑𐴦𐴡𐴕 𐴔𐴡𐴐𐴑𐴞𐴓 𐴀𐴥𐴡𐴘𐴁𐴡𐴊𐴠 𐴘𐴥𐴝𐴕𐴡𐴌 𐴏𐴞𐴕𐴃𐴝 𐴒𐴡𐴌𐴠𐴌𐴊𐴠 𐴁𐴡𐴓𐴞 𐴈𐴡𐴘𐴧𐴠 𐴱𐴱

Sources : https://www.dhakatribune.com/health/coronavirus/2020/05/14/2-rohingya-refugees-test-covid-19-positive-in-cox-s-bazar