𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴀𐴥𐴡𐴑𐴧𐴡𐴓𐴡𐴌𐴠 𐴊𐴟𐴣𐴌𐴝𐴘 𐴊𐴦𐴡𐴕 𐴀𐴞𐴕𐴏𐴝𐴕𐴞𐴘𐴡𐴃𐴞 𐴕𐴡 𐴀𐴥𐴡𐴘𐴁𐴡/ 𐴋𐴝𐴑𐴄𐴡𐴌 𐴔𐴡𐴇𐴝𐴃𐴞𐴌 𐴱𐴱

𐴔𐴡𐴓𐴠𐴆𐴙𐴥𐴝𐴌 𐴀𐴝𐴒𐴡𐴌 𐴁𐴡𐴌 𐴀𐴟𐴎𐴞𐴌 / 𐴋𐴑 𐴔𐴡𐴇𐴝𐴃𐴞𐴌 𐴔𐴟𐴇𐴝𐴔𐴧𐴡𐴊𐴠 𐴱 𐴔𐴡𐴓𐴠𐴆𐴙𐴥𐴝𐴃 𐴌𐴟𐴇𐴝𐴙𐴚𐴒𐴙𐴝 𐴕𐴡 𐴏𐴦𐴝𐴘 𐴈𐴦𐴡𐴘 𐴀𐴝𐴁𐴝𐴏𐴢 𐴀𐴟𐴒𐴧𐴗𐴝 𐴒𐴥𐴟𐴌𐴠𐴌𐴊𐴠 𐴀𐴥𐴞𐴁𐴝𐴃 𐴐𐴡𐴌𐴞𐴑 𐴀𐴥𐴡𐴘 𐴱 𐴌𐴟𐴇𐴝𐴙𐴚𐴒𐴙𐴝 𐴕𐴡 𐴏𐴦𐴝𐴘 𐴈𐴦𐴡𐴌𐴊𐴠 𐴀𐴥𐴠 𐴎𐴝𐴒𐴝𐴃 𐴱 𐴔𐴡𐴓𐴠𐴆𐴙𐴥𐴝 𐴇𐴥𐴡𐴑𐴟𐴔𐴡𐴃𐴡𐴌 𐴰 𐴰 𐴴 𐴎𐴡𐴕 𐴓𐴡𐴃 𐴌𐴟𐴇𐴝𐴙𐴚𐴒𐴙𐴝 𐴁𐴤𐴡𐴌𐴝𐴘𐴧𐴝 𐴁𐴟𐴄 𐴉𐴥𐴞𐴌𐴝𐴘 𐴊𐴡𐴕𐴡𐴌 𐴉𐴥𐴝𐴘𐴏𐴠𐴓𐴝 𐴌𐴠 𐴀𐴞𐴕𐴏𐴝𐴕𐴞𐴘𐴡𐴃𐴞 𐴕𐴡 𐴀𐴥𐴡𐴘𐴁𐴡 𐴁𐴡𐴓𐴞 𐴈𐴡𐴘𐴧𐴠 𐴱 𐴔𐴡𐴇𐴝𐴃𐴞𐴌𐴠 𐴀𐴟𐴒𐴧𐴗𐴝 𐴖𐴞𐴁𐴏𐴥𐴝𐴙𐴍𐴡𐴃 𐴈𐴡𐴘𐴧𐴠𐴊𐴠 , 𐴘𐴥𐴝𐴕𐴡𐴌 𐴁𐴡𐴊𐴡𐴓𐴝 𐴇𐴥𐴡𐴑𐴟 𐴔𐴡𐴃𐴡𐴌𐴃𐴟 𐴱 𐴀𐴥𐴠 𐴁𐴟𐴄 𐴉𐴟𐴌𐴝𐴘𐴧𐴝 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴓𐴡𐴌𐴠 𐴱 𐴀𐴥𐴞𐴃𐴝𐴌𐴝 𐴕𐴞𐴎𐴡𐴌 𐴊𐴠𐴐𐴢 𐴁𐴡𐴌𐴔𐴝 𐴘𐴥𐴝 𐴀𐴝𐴌 𐴈𐴡𐴕𐴥𐴡 𐴊𐴠𐴐𐴡𐴃 𐴉𐴦𐴡𐴣𐴏𐴞 𐴉𐴝𐴌𐴠𐴉𐴦𐴝𐴕 𐴃𐴠𐴙𐴓 𐴀𐴝𐴌 𐴈𐴥𐴝𐴕𐴝 𐴊𐴦𐴡𐴕 𐴀𐴝𐴐𐴧𐴞𐴀𐴓 𐴱𐴱

𐴀𐴠 𐴔𐴝𐴐𐴡𐴌 𐴐𐴥𐴟𐴌𐴟𐴃 𐴀𐴥𐴡 𐴖𐴝𐴙𐴆𐴧𐴝𐴀 𐴃𐴞𐴌𐴝𐴙𐴆𐴧𐴝𐴇 𐴌𐴟𐴇𐴝𐴙𐴚𐴒𐴙𐴝𐴌 𐴁𐴟𐴄 𐴀𐴠𐴑𐴧𐴝𐴕 𐴁𐴥𐴞𐴌𐴞𐴃𐴡 𐴕𐴦𐴡 𐴊𐴠𐴊𐴠 𐴘𐴥𐴝𐴕𐴡𐴃 𐴈𐴥𐴝𐴕𐴝 𐴉𐴝𐴕𐴥𐴞 𐴕𐴡 𐴉𐴦𐴡𐴕𐴠 𐴰 𐴳 𐴎𐴡𐴕 𐴓𐴡𐴃𐴞 𐴌𐴟𐴇𐴝𐴙𐴚𐴒𐴙𐴝 𐴔𐴡𐴌𐴞𐴒𐴞𐴘𐴦𐴡𐴘 𐴱 𐴀𐴟𐴒𐴧𐴗𐴝 𐴌𐴟𐴇𐴝𐴙𐴚𐴒𐴙𐴝 𐴃𐴡𐴕𐴎𐴞𐴔𐴡𐴌 𐴓𐴞𐴋𐴝𐴌𐴠 𐴔𐴡𐴓𐴠𐴆𐴙𐴥𐴝𐴌𐴃𐴟 𐴇𐴥𐴡𐴑 𐴔𐴝𐴙𐴒𐴧𐴙𐴠 𐴁𐴡𐴓𐴞 𐴈𐴦𐴡𐴘 𐴒𐴡𐴓𐴧𐴡𐴃 𐴈𐴥𐴡𐴁𐴡𐴌 𐴀𐴠𐴑𐴧𐴝𐴕𐴡𐴌𐴠 𐴀𐴝𐴏𐴥𐴡𐴓 𐴁𐴝𐴕𐴝𐴘 𐴱 𐴕𐴦𐴠𐴍𐴡𐴃 𐴔𐴝𐴎𐴠 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞𐴌 𐴀𐴟𐴓𐴋𐴝 𐴀𐴥𐴞𐴕𐴆𐴝 𐴈𐴡𐴃𐴥𐴝 , 𐴕𐴞𐴉𐴡𐴌𐴡𐴃𐴞 𐴈𐴡𐴃𐴥𐴝 𐴀𐴡𐴑𐴧𐴡𐴓 𐴓𐴡𐴘 𐴎𐴠 𐴇𐴥𐴝𐴔𐴓𐴝 𐴒𐴡𐴌𐴥𐴝 𐴒𐴞𐴓𐴦𐴡 𐴱 𐴔𐴡𐴇𐴝𐴃𐴞𐴌𐴠 𐴀𐴝𐴌𐴀𐴥𐴡 𐴈𐴡𐴘𐴧𐴠𐴊𐴠 , 𐴔𐴡𐴓𐴝𐴘 𐴀𐴥𐴡𐴑𐴧𐴡𐴓𐴠 𐴐𐴥𐴟𐴌𐴟𐴃 𐴔𐴝𐴎𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴓𐴡𐴘 𐴇𐴥𐴝𐴔𐴊𐴡𐴌𐴡𐴊𐴞 𐴒𐴡𐴙𐴅𐴧𐴙𐴠𐴊𐴠 𐴀𐴥𐴠𐴃𐴡𐴓𐴧𐴝 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴠 𐴃𐴦𐴡𐴙𐴃𐴧𐴝 𐴏𐴥𐴝𐴀𐴝𐴌𐴝 𐴓𐴡𐴘𐴁𐴡𐴌𐴓𐴝 𐴔𐴡𐴓𐴠𐴆𐴙𐴥𐴝𐴃 𐴀𐴝𐴙𐴐𐴧𐴙𐴠𐴊𐴠 𐴱𐴱

𐴔𐴡𐴕𐴃𐴡𐴌 𐴑𐴠𐴙𐴏𐴧𐴟 𐴒𐴡𐴓𐴡𐴃 𐴔𐴝𐴙𐴕𐴐𐴡𐴌 𐴈𐴝𐴔𐴡𐴌 𐴎𐴡𐴌𐴞𐴘𐴝 𐴔𐴡𐴓𐴝𐴘 𐴀𐴥𐴡𐴑𐴧𐴡𐴓𐴡𐴌 𐴀𐴝𐴊𐴡𐴌 𐴕𐴞𐴉𐴡𐴌𐴡𐴃 𐴓𐴡𐴘 𐴁𐴡𐴊𐴡𐴓𐴞 𐴒𐴞𐴘𐴦𐴡𐴘 𐴱 𐴔𐴡𐴇𐴝𐴃𐴞𐴌𐴠 𐴀𐴝𐴌𐴀𐴥𐴡 𐴈𐴡𐴘𐴧𐴠𐴊𐴠 , 𐴔𐴡𐴓𐴠𐴆𐴙𐴥𐴝 𐴘𐴠 𐴀𐴥𐴞𐴃𐴝𐴌𐴝𐴌𐴠 𐴁𐴠𐴐𐴥𐴞 𐴔𐴡𐴊𐴡𐴃 𐴒𐴡𐴙𐴅𐴧𐴙𐴠 𐴎𐴦𐴠𐴕 𐴕𐴞𐴑𐴞 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴀𐴡𐴙𐴕𐴧𐴡 𐴊𐴠𐴐𐴢 𐴀𐴥𐴡𐴑𐴧𐴡𐴓𐴡𐴃 𐴎𐴝𐴘 𐴒𐴥𐴡𐴘 𐴉𐴝𐴌𐴠 𐴉𐴦𐴝𐴕 𐴌𐴝𐴏𐴧𐴝 𐴑𐴤𐴟𐴓𐴞 𐴊𐴞 𐴌𐴝𐴙𐴑𐴧𐴙𐴠 𐴱 𐴁𐴡𐴌𐴔𐴝 𐴇𐴥𐴡𐴑𐴟𐴔𐴡𐴃 𐴀𐴝𐴌 𐴀𐴡𐴚 𐴏𐴝𐴚 𐴏𐴥𐴟𐴀𐴑𐴞 𐴌𐴠 𐴌𐴟𐴇𐴝𐴙𐴚𐴒𐴙𐴝𐴌𐴠 𐴎𐴟𐴓𐴟𐴔 𐴒𐴡𐴌𐴠𐴌𐴊𐴠 𐴘𐴥𐴝𐴕𐴡𐴃 𐴔𐴡𐴇𐴝𐴃𐴞𐴌𐴠 𐴕𐴞𐴕𐴊𐴝 𐴒𐴡𐴙𐴅𐴧𐴙𐴠 𐴱 𐴀𐴝𐴌 ( 𐴘𐴟 𐴀𐴠𐴕 ) 𐴀𐴝𐴌 ( 𐴀𐴡 𐴀𐴝𐴘 𐴏𐴞 ) 𐴌𐴠 𐴌𐴟𐴇𐴝𐴙𐴚𐴒𐴙𐴝 𐴌𐴠 𐴁𐴡𐴌𐴔𐴝 𐴘𐴠 𐴎𐴟𐴓𐴟𐴔 𐴒𐴡𐴌𐴠𐴌𐴊𐴠 𐴀𐴥𐴞𐴕𐴡𐴌𐴠 𐴌𐴟𐴑𐴞𐴁𐴡𐴌𐴓𐴝 𐴀𐴝𐴌𐴎 𐴒𐴡𐴙𐴅𐴧𐴙𐴠 ” 𐴐𐴥𐴠𐴐𐴡𐴃𐴧𐴟 𐴔𐴡𐴓𐴝𐴘 𐴀𐴥𐴡𐴑𐴧𐴡𐴓𐴡 𐴌𐴠 𐴈𐴡𐴘𐴧𐴠𐴊𐴠 𐴃𐴟𐴣𐴖𐴝𐴣𐴌𐴝 𐴔𐴡𐴎𐴓𐴟𐴔 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴠 𐴕𐴞𐴉𐴡𐴌𐴡𐴃 𐴕𐴡 𐴒𐴡𐴙𐴅𐴧𐴡𐴀 ” 𐴱𐴱

sources : https://www.freemalaysiatoday.com/category/nation/2020/04/29/inhumane-to-turn-away-rohingya-refugees-says-dr-m/