𐴔𐴡𐴓𐴠𐴆𐴙𐴥𐴝 𐴘𐴠 𐴌𐴟𐴇𐴝𐴙𐴚𐴒𐴙𐴝 𐴌𐴠 𐴎𐴞𐴌𐴝𐴘𐴁𐴝𐴌 𐴃𐴥𐴡𐴌 𐴊𐴞𐴘𐴠𐴊𐴠 𐴘𐴥𐴝𐴕𐴡𐴃 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴠 𐴔𐴡𐴓𐴠𐴆𐴙𐴥𐴝𐴌 𐴐𐴥𐴟𐴑𐴟𐴌𐴞𐴘𐴝 𐴒𐴡𐴌𐴠𐴌 𐴱𐴱

𐴔𐴡𐴓𐴠𐴆𐴙𐴥𐴝𐴌 𐴏𐴟𐴆𐴠𐴙𐴓 𐴔𐴠𐴋𐴞𐴘𐴝 𐴈𐴡𐴊𐴦𐴟𐴕𐴠 𐴱 𐴉𐴡𐴌𐴝𐴕 𐴁𐴝𐴏𐴝𐴘𐴁𐴝𐴌 𐴕𐴙𐴡𐴃𐴠 𐴔𐴡𐴓𐴠𐴆𐴙𐴥𐴝𐴃 𐴏𐴥𐴝𐴀𐴌𐴝 𐴓𐴡𐴘𐴧𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴀𐴟𐴓𐴋𐴝 𐴁𐴠𐴐𐴥𐴞 𐴈𐴥𐴡𐴌𐴝𐴂𐴢 𐴓𐴠𐴑𐴤𐴝 𐴓𐴠𐴑𐴤𐴞 𐴈𐴗𐴝 𐴈𐴦𐴡𐴘 𐴒𐴡𐴌𐴠𐴌𐴊𐴠 𐴱 𐴘𐴥𐴝𐴕𐴡𐴌 𐴅𐴟𐴖𐴝𐴁𐴡𐴃 𐴈𐴡𐴊𐴦𐴟𐴕 𐴌𐴟𐴇𐴝𐴙𐴚𐴒𐴙𐴌 𐴃𐴡𐴕𐴎𐴞𐴔 𐴀𐴥𐴡𐴑𐴧𐴡𐴓𐴠 𐴔𐴞𐴓𐴞 𐴀𐴠𐴑𐴧𐴝𐴕 𐴀𐴠𐴏𐴄𐴠𐴙𐴄𐴔𐴥𐴠𐴕𐴄 𐴁𐴦𐴝𐴙𐴌 𐴒𐴡𐴙𐴅𐴧𐴙𐴠 𐴱 𐴎𐴙𐴝𐴕𐴡𐴃 𐴓𐴠𐴙𐴑𐴧𐴙𐴠𐴊𐴠 , 𐴁𐴡𐴌𐴔𐴝 𐴇𐴥𐴡𐴑𐴟𐴔𐴡𐴃𐴠 𐴅𐴠𐴕𐴟𐴏𐴥𐴝𐴙𐴋 𐴒𐴡𐴌𐴠𐴌𐴊𐴠 𐴀𐴥𐴠𐴃𐴧𐴟 𐴈𐴡𐴕𐴥𐴡𐴁𐴡𐴃𐴠 𐴉𐴡𐴌𐴝𐴕 𐴁𐴝𐴏𐴦𐴝𐴘 𐴄𐴠𐴔𐴉𐴡𐴌𐴝𐴓𐴞 𐴏𐴥𐴝𐴀𐴌𐴝 𐴀𐴝𐴌 𐴇𐴠𐴉𐴝𐴎𐴡𐴃𐴡𐴌𐴓𐴝 𐴔𐴡𐴓𐴠𐴆𐴙𐴥𐴝𐴃 𐴀𐴝𐴙𐴐𐴧𐴙𐴠𐴊𐴠 𐴀𐴥𐴞𐴃𐴝𐴌𐴝𐴌𐴠 𐴱 𐴔𐴡𐴓𐴠𐴆𐴙𐴥𐴝 𐴘𐴠 𐴌𐴝𐴇𐴝𐴔𐴡𐴃𐴡𐴌 𐴊𐴞𐴓𐴠 𐴀𐴝𐴒𐴁𐴝𐴌𐴥𐴝𐴘 𐴓𐴡𐴘𐴧𐴠𐴊𐴠 𐴘𐴥𐴝𐴕𐴡𐴃 , 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴠 𐴔𐴡𐴓𐴠𐴆𐴙𐴥𐴝 𐴇𐴥𐴡𐴑𐴟𐴔𐴡𐴃 𐴀𐴝𐴌 𐴂𐴝𐴂𐴓𐴞𐴑𐴡𐴌 𐴊𐴞𐴓𐴠 𐴎𐴝𐴕𐴠 𐴐𐴥𐴟𐴑𐴟𐴌𐴞𐴘𐴝 𐴀𐴝𐴊𐴝𐴘 𐴒𐴡𐴌𐴠𐴌𐴥𐴠 𐴱 𐴘𐴦𐴝𐴌 𐴁𐴝𐴃𐴠 ( 𐴀𐴞 , 𐴀𐴠𐴓 , 𐴀𐴡 , 𐴀𐴠𐴔 / 𐴀𐴝𐴌 , 𐴋𐴝𐴁𐴡𐴓𐴘𐴟 , 𐴋𐴞 , 𐴀𐴠𐴕 ) 𐴀𐴠 𐴃𐴡𐴕𐴎𐴞𐴔 𐴊𐴟𐴕𐴥𐴟𐴖𐴝𐴘𐴧𐴠 𐴔𐴞𐴓𐴞 𐴀𐴠𐴑𐴧𐴝𐴕 𐴀𐴠𐴏𐴄𐴠𐴙𐴄𐴔𐴥𐴠𐴕 𐴕𐴠𐴓𐴝𐴘𐴧𐴠 𐴱𐴱

𐴀𐴥𐴠 𐴕𐴠𐴓𐴝𐴘𐴧𐴠𐴊𐴠 𐴀𐴠𐴏𐴄𐴠𐴙𐴄𐴔𐴥𐴠𐴕 𐴘𐴥𐴝𐴕𐴡𐴃 𐴓𐴠𐴙𐴑𐴧𐴙𐴠𐴊𐴠 , 𐴕𐴞𐴎𐴡𐴌𐴠 𐴕𐴞𐴎𐴠 𐴓𐴞𐴋𐴝𐴌 𐴁𐴝𐴕𐴝𐴘𐴧𐴠𐴊𐴠 / 𐴔𐴝𐴐𐴄𐴡𐴌 𐴎𐴝𐴉𐴡𐴌 𐴀𐴝𐴇𐴔𐴡𐴊 𐴁𐴝𐴉𐴢 𐴀𐴝𐴁𐴊𐴟𐴓 𐴒𐴡𐴕𐴞 𐴱 𐴀𐴞𐴁𐴝 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴀𐴥𐴡𐴑𐴧𐴓𐴡𐴌 𐴓𐴞𐴋𐴝𐴌 𐴀𐴝𐴌 𐴕𐴡𐴔𐴝𐴙𐴕𐴊𐴝 𐴕𐴦𐴡 𐴎𐴝𐴌 𐴀𐴠𐴏𐴄𐴠𐴙𐴄𐴔𐴥𐴠𐴕𐴡𐴌𐴠 𐴁𐴞𐴐𐴧𐴝𐴐𐴢 𐴒𐴡𐴌𐴞 𐴑𐴟𐴓𐴠 𐴌𐴟𐴇𐴝𐴙𐴚𐴒𐴙𐴝𐴌 𐴀𐴟𐴓𐴋𐴝 𐴏𐴟𐴆𐴠𐴙𐴓 𐴔𐴠𐴋𐴞𐴘𐴝 𐴀𐴥𐴡𐴑𐴧𐴡𐴓𐴡𐴌𐴃𐴟 𐴒𐴡𐴌𐴡𐴔 𐴖𐴥𐴝𐴉𐴡𐴌𐴞𐴁𐴡𐴕𐴠؟ 𐴱 𐴁𐴝𐴊𐴠 𐴀𐴥𐴞𐴁𐴝 𐴘𐴠 𐴒𐴡𐴓𐴧𐴡𐴃 𐴒𐴡𐴙𐴅𐴧𐴙𐴠 𐴁𐴡𐴓𐴞 𐴈𐴦𐴡𐴘 𐴏𐴥𐴝𐴉𐴢 𐴒𐴡𐴌𐴞 𐴁𐴟𐴎𐴥𐴝𐴘𐴧𐴡 𐴊𐴞𐴘𐴠 𐴱 𐴈𐴡𐴊𐴦𐴟𐴕 𐴔𐴝𐴙𐴕𐴐𐴠 𐴁𐴟𐴎𐴠𐴌𐴊𐴠 , 𐴒𐴡𐴓𐴧𐴡𐴃 𐴀𐴠𐴏𐴄𐴠𐴙𐴄𐴔𐴥𐴠𐴕 𐴕𐴠𐴓𐴝𐴘𐴧𐴠𐴊𐴠 𐴘𐴥𐴝𐴕𐴡𐴃 𐴏𐴠𐴓𐴝𐴘𐴝𐴚𐴡𐴌 𐴌𐴞𐴉𐴟𐴎𐴞 𐴓𐴠𐴙𐴑𐴧𐴙𐴠𐴊𐴠 𐴀𐴥𐴠𐴃𐴡𐴓𐴧𐴝 𐴱 𐴏𐴠𐴓𐴝𐴘𐴝𐴚 𐴉𐴝𐴘𐴑𐴝𐴌𐴞 𐴁𐴝𐴎𐴝𐴌 𐴘𐴦𐴝𐴕 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴀𐴥𐴡𐴑𐴧𐴡𐴓𐴡𐴌 𐴑𐴡𐴁𐴎𐴝𐴃 𐴱 𐴇𐴥𐴝𐴓𐴠𐴑𐴥𐴠 𐴀𐴥𐴠𐴍𐴠 𐴀𐴡𐴙𐴕𐴧𐴡 𐴑𐴡𐴖𐴔 𐴀𐴥𐴞𐴏𐴝𐴉𐴠 𐴏𐴝𐴘𐴓𐴠 𐴌𐴟𐴇𐴝𐴙𐴚𐴒𐴙𐴝 𐴁𐴠𐴐𐴥𐴞 𐴈𐴡𐴔 𐴱𐴱

𐴘𐴥𐴝𐴌 𐴁𐴝𐴊𐴠 𐴁𐴡𐴌𐴔𐴝𐴌 𐴔𐴟𐴏𐴡𐴓𐴔𐴝𐴕 𐴁𐴠𐴙𐴒𐴧𐴟𐴕 𐴌𐴟𐴇𐴝𐴙𐴚𐴒𐴙𐴝 𐴕𐴦𐴡 𐴱 𐴀𐴝𐴌 𐴀𐴥𐴠 𐴏𐴞𐴓𐴝𐴘𐴝𐴚𐴡𐴃 𐴀𐴝𐴏𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴠𐴑 𐴎𐴡𐴕 𐴀𐴥𐴟𐴊𐴧𐴝 𐴐𐴥𐴡𐴊𐴡𐴀𐴌 𐴕𐴦𐴡 𐴱 𐴁𐴥𐴡𐴓𐴑𐴥𐴞 𐴀𐴥𐴝𐴃𐴡𐴌 𐴈𐴝𐴔 𐴒𐴡𐴌𐴞 , 𐴑𐴟𐴓𐴞 𐴔𐴡𐴎𐴟𐴌𐴞 𐴒𐴡𐴌𐴞 𐴏𐴡𐴓𐴠𐴊𐴠 𐴔𐴝𐴕𐴟𐴙𐴐𐴢 𐴱 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴁𐴡𐴓𐴞 𐴕𐴦𐴡 𐴈𐴡𐴕𐴥𐴡 𐴑𐴙𐴠 𐴑𐴝𐴕𐴟𐴕𐴡𐴌 𐴁𐴦𐴝𐴌𐴠 𐴎𐴝𐴘 𐴕𐴡𐴉𐴝𐴌𐴥𐴞𐴕𐴦𐴡 𐴱 𐴀𐴥𐴠 𐴎𐴝𐴒𐴝 𐴘𐴥𐴝𐴕𐴡𐴃 𐴇𐴥𐴡𐴑𐴟𐴔𐴡𐴃𐴡𐴌 𐴉𐴟𐴓𐴞𐴐𐴢 𐴀𐴝𐴌 𐴑𐴝𐴕𐴟𐴕 𐴓𐴝𐴒𐴥𐴟 𐴒𐴡𐴌𐴦𐴡𐴙𐴕𐴧𐴝 𐴀𐴝𐴏𐴠 𐴱 𐴌𐴟𐴇𐴝𐴙𐴚𐴒𐴙𐴝 𐴐𐴥𐴡𐴣𐴀 𐴎𐴠𐴈𐴡𐴕𐴥𐴞𐴑𐴧𐴙𐴝 𐴑𐴝𐴕𐴟𐴕𐴡𐴌 𐴀𐴟𐴓𐴋𐴝 𐴒𐴡𐴌𐴠𐴌 𐴀𐴥𐴞𐴃𐴝𐴌𐴠 𐴐𐴥𐴝𐴎𐴝 𐴊𐴞𐴉𐴝𐴌𐴞𐴁𐴡 𐴱 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴁𐴠𐴙𐴒𐴧𐴟𐴕𐴠 𐴀𐴠𐴑𐴌𐴝𐴌 𐴒𐴡𐴌𐴠𐴌𐴊𐴠 , 𐴔𐴡𐴓𐴠𐴆𐴙𐴥𐴝 𐴘𐴠 𐴀𐴝𐴣𐴀𐴌𐴝𐴌𐴠 𐴁𐴠𐴐𐴥𐴞 𐴀𐴝𐴊𐴡𐴌 𐴔𐴟𐴇𐴝𐴁𐴧𐴡𐴃 𐴀𐴝 𐴌𐴀𐴠𐴑𐴎𐴟𐴃𐴞 𐴊𐴠𐴈𐴥𐴝𐴘𐴧𐴠 𐴱 𐴀𐴝𐴣𐴀𐴌𐴝 𐴕𐴞𐴎𐴡𐴌 𐴕𐴝𐴒𐴞 𐴈𐴝𐴍𐴥𐴝 𐴊𐴠𐴐𐴡𐴃 𐴕𐴦𐴡𐴉𐴝𐴘𐴊𐴠 𐴀𐴥𐴠𐴕𐴋𐴞𐴓𐴧𐴝 𐴐𐴥𐴝𐴕𐴃𐴞 𐴔𐴡𐴓𐴠𐴆𐴙𐴥𐴝𐴃 𐴉𐴝𐴘𐴧𐴞 𐴱 𐴀𐴝𐴌 𐴀𐴝𐴣𐴀𐴌𐴝 𐴌𐴠 𐴏𐴥𐴝𐴌𐴔𐴠 𐴘𐴥𐴡 𐴀𐴠 𐴀𐴞𐴕𐴏𐴝𐴕𐴙𐴡𐴃𐴞 𐴑𐴥𐴠𐴌𐴔𐴡𐴏𐴢 𐴒𐴡𐴌𐴞 𐴁𐴡𐴌𐴓𐴝 𐴔𐴡𐴓𐴠𐴆𐴙𐴥𐴝𐴌 𐴇𐴥𐴡𐴑𐴟𐴔𐴡𐴃𐴡𐴌𐴠 𐴀𐴝𐴌𐴡𐴎 𐴒𐴡𐴌𐴦𐴞𐴌 𐴱𐴱