𐴇𐴥𐴡𐴑𐴧𐴡𐴌 𐴋𐴦𐴝𐴘𐴧𐴠 𐴔𐴡𐴓𐴠𐴆𐴥𐴙𐴥𐴝𐴌𐴠 𐴌𐴟𐴇𐴝𐴙𐴚𐴒𐴙𐴝 𐴁𐴤𐴡𐴌𐴝 𐴁𐴟𐴄 𐴉𐴥𐴞𐴌𐴥𐴝𐴘 𐴕𐴡𐴊𐴞 𐴁𐴝𐴏𐴝𐴘 𐴓𐴡𐴘𐴃𐴡 𐴈𐴡𐴘𐴧𐴠 𐴱𐴱

𐴁𐴝𐴚𐴓𐴝𐴊𐴠𐴐𐴠 𐴰 𐴰 𐴴 𐴓𐴡𐴃𐴞 𐴌𐴟𐴇𐴝𐴙𐴚𐴒𐴙𐴝 𐴁𐴟𐴄 𐴓𐴡𐴘 𐴔𐴡𐴓𐴠𐴆𐴥𐴙𐴥𐴝 𐴀𐴝𐴌 𐴁𐴝𐴚𐴓𐴝𐴊𐴠𐴐𐴡𐴌 𐴔𐴝𐴎𐴠 𐴱 𐴊𐴟𐴘 𐴔𐴝𐴐𐴢 𐴀𐴥𐴡𐴘𐴃𐴠 𐴊𐴡𐴙𐴅𐴧𐴙𐴝𐴃 𐴁𐴥𐴝𐴐𐴠𐴌𐴊𐴠 𐴱 𐴀𐴥𐴠𐴃𐴧𐴟 𐴀𐴠𐴂𐴌𐴞𐴓𐴡𐴌 𐴶 𐴱 𐴃𐴝𐴌𐴞𐴑𐴡𐴃 𐴑𐴟𐴓𐴡𐴌 𐴖𐴡𐴌𐴠 𐴃𐴟𐴓𐴞 𐴓𐴡𐴘 𐴁𐴦𐴝𐴊𐴠 𐴱 𐴈𐴡𐴀𐴟𐴒𐴧𐴗𐴝 𐴇𐴥𐴡𐴑𐴧𐴡𐴌 𐴋𐴦𐴝𐴘𐴧𐴠 ( 𐴀𐴠 𐴂𐴞 𐴀𐴝𐴌 𐴀𐴝𐴌 𐴀𐴠𐴕𐴠 ) 𐴔𐴡𐴓𐴠𐴆𐴥𐴙𐴥𐴝 𐴀𐴝𐴌 𐴄𐴥𐴝𐴘𐴓𐴠𐴕𐴡𐴌𐴠 𐴌𐴟𐴇𐴝𐴙𐴚𐴒𐴙𐴝 𐴁𐴤𐴡𐴌𐴝 𐴁𐴟𐴄 𐴉𐴥𐴞𐴌𐴝𐴘 𐴕𐴡𐴊𐴞𐴃𐴡 𐴀𐴝𐴌 𐴁𐴝𐴏𐴝𐴘 𐴓𐴡𐴘𐴃𐴡 𐴈𐴡𐴘𐴧𐴠 𐴱 𐴁𐴝𐴊𐴠 𐴀𐴝𐴌𐴀𐴥𐴡 𐴈𐴡𐴘𐴧𐴠𐴊𐴠 𐴃𐴡𐴌𐴝𐴃𐴡𐴌𐴞 𐴀𐴟𐴒𐴧𐴗𐴝 𐴔𐴞𐴐𐴡𐴕 𐴃𐴡𐴌𐴃𐴞𐴁 𐴊𐴞 𐴌𐴟𐴇𐴝𐴙𐴚𐴒𐴙𐴝𐴌 𐴁𐴟𐴄 𐴊𐴡𐴙𐴅𐴧𐴙𐴝𐴌𐴃𐴟 𐴃𐴟𐴖𐴝𐴘 𐴑𐴟𐴓𐴡𐴃 𐴃𐴟𐴓𐴥𐴞 𐴱 𐴈𐴥𐴝𐴕𐴝 𐴊𐴝𐴁𐴝𐴘 𐴎𐴞𐴀𐴕 𐴓𐴝𐴒𐴠𐴌 𐴀𐴥𐴞𐴀𐴕 𐴊𐴞 𐴱 𐴀𐴠𐴓𐴝𐴑𐴝𐴃 𐴀𐴝𐴏𐴠𐴊𐴠 ( 𐴘𐴟 𐴀𐴠𐴕 𐴀𐴠𐴐𐴢 𐴏𐴞 𐴀𐴝𐴌 ) 𐴌𐴡𐴌𐴠 𐴒𐴡𐴏𐴥𐴝𐴘 𐴊𐴦𐴡 𐴱𐴱

𐴄𐴥𐴝𐴘𐴓𐴠𐴕𐴡𐴌 ( 𐴉𐴡𐴌𐴄𐴞 𐴉𐴥𐴝𐴘 𐴒𐴟𐴌𐴟𐴉𐴢 ) 𐴀𐴠 𐴘𐴥𐴡 𐴔𐴡𐴓𐴠𐴆𐴥𐴙𐴥𐴝 𐴇𐴥𐴡𐴑𐴟𐴔𐴡𐴃𐴡𐴌𐴠 𐴈𐴡𐴘𐴧𐴠𐴊𐴠 𐴱 𐴔𐴡𐴓𐴠𐴆𐴥𐴙𐴥𐴝𐴌 𐴔𐴡𐴌𐴑𐴡𐴎𐴞 𐴇𐴥𐴡𐴑𐴟𐴔𐴡𐴃𐴡𐴌𐴃𐴟 𐴌𐴞𐴉𐴟𐴎𐴞𐴌 𐴁𐴟𐴄 𐴁𐴥𐴞𐴌𐴠𐴊𐴠 𐴎𐴝𐴒𐴝 𐴘𐴥𐴝𐴕𐴡𐴌 𐴇𐴥𐴡𐴑𐴟𐴔𐴡𐴃𐴞 𐴎𐴞𐴔𐴧𐴝𐴊𐴝𐴌 𐴀𐴥𐴡𐴑𐴧𐴡𐴓 𐴓𐴡𐴘 𐴔𐴞𐴓𐴞 𐴱 𐴌𐴟𐴇𐴝𐴙𐴚𐴒𐴙𐴝 𐴁𐴤𐴡𐴌𐴝 𐴁𐴟𐴄 𐴊𐴡𐴙𐴅𐴧𐴙𐴝𐴌𐴃𐴟 𐴃𐴟𐴖𐴝𐴘 𐴓𐴡𐴘 𐴀𐴥𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴟𐴕𐴡𐴌 𐴎𐴞𐴕𐴊𐴞𐴒𐴞 𐴋𐴡𐴌𐴡𐴃 𐴉𐴡𐴙𐴅𐴧𐴙𐴠𐴊𐴠 𐴀𐴥𐴠𐴃𐴧𐴟 𐴁𐴝𐴏𐴝𐴘 𐴓𐴦𐴡𐴕 𐴏𐴦𐴝 𐴱 𐴀𐴠𐴂𐴌𐴞𐴓𐴡𐴌 𐴶 𐴱 𐴃𐴝𐴌𐴞𐴑𐴡𐴃 𐴁𐴝𐴚𐴓𐴝𐴊𐴠𐴐𐴡𐴌 𐴊𐴡𐴙𐴅𐴧𐴙𐴝 𐴏𐴦𐴡𐴛 𐴉𐴟𐴓𐴞𐴐𐴠 𐴱 𐴔𐴡𐴓𐴠𐴆𐴥𐴙𐴥𐴝 𐴎𐴝𐴘𐴁𐴡𐴌𐴓𐴝 𐴒𐴞𐴘𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴔𐴡𐴓𐴠𐴆𐴥𐴙𐴥𐴝𐴃 𐴀𐴟𐴍𐴞 𐴕𐴡𐴉𐴝𐴌𐴥𐴞 𐴁𐴝𐴚𐴓𐴝𐴊𐴠𐴐𐴢 𐴀𐴝𐴌 𐴔𐴡𐴓𐴠𐴆𐴥𐴙𐴥𐴝𐴌 𐴔𐴝𐴎𐴠 𐴊𐴡𐴙𐴅𐴧𐴙𐴝𐴃 𐴊𐴟𐴘 𐴔𐴝𐴐𐴢 𐴀𐴥𐴡𐴘𐴃𐴠 𐴁𐴥𐴝𐴐𐴞 𐴁𐴥𐴝𐴐𐴞 𐴌𐴡𐴘𐴧𐴠𐴊𐴠 𐴶 𐴹 𐴳 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴌𐴠 𐴀𐴟𐴊𐴧𐴝𐴌 𐴒𐴡𐴌𐴞 𐴑𐴟𐴓𐴡𐴃 𐴃𐴟𐴓𐴞 𐴓𐴡𐴘𐴧𐴠 𐴱𐴱

𐴎𐴡𐴊𐴞 𐴘𐴥𐴡 𐴃𐴝𐴌𐴝𐴌 𐴀𐴠 𐴊𐴟𐴘 𐴔𐴝𐴐𐴡𐴌 𐴏𐴥𐴡𐴉𐴡𐴌𐴡𐴃 𐴈𐴥𐴝𐴕𐴝 𐴉𐴝𐴕𐴞 𐴄𐴥𐴞𐴑𐴔𐴡𐴃𐴠 𐴕𐴡𐴉𐴝𐴘 𐴀𐴝𐴌 𐴒𐴦𐴝𐴌 𐴀𐴝𐴌𐴝𐴔𐴙𐴡𐴃 𐴀𐴝𐴌 𐴏𐴥𐴟𐴐𐴃𐴡 𐴏𐴥𐴡𐴀𐴞 𐴕𐴡𐴃𐴝𐴑𐴡𐴕𐴠 𐴰 𐴶 𐴎𐴡𐴕 𐴓𐴡𐴃𐴞 𐴔𐴡𐴌𐴞 𐴒𐴞𐴘𐴦𐴡𐴘 𐴱 𐴁𐴝𐴙𐴏𐴧𐴠𐴊𐴠 𐴀𐴥𐴠𐴍𐴠 𐴁𐴠𐴙𐴐𐴢 𐴀𐴥𐴞𐴏𐴧𐴝 𐴉𐴟𐴖𐴝𐴙𐴕 𐴀𐴝𐴌 𐴁𐴠𐴍𐴞𐴘𐴥𐴝𐴙𐴕 𐴱 𐴎𐴞𐴃𐴝𐴌𐴥𐴝 𐴑𐴡𐴑𐴐𐴡 𐴁𐴝𐴎𐴝𐴌 𐴀𐴠𐴓𐴝𐴑𐴝𐴃 𐴀𐴝𐴏𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴌𐴃𐴟 𐴔𐴝𐴏𐴢 𐴏𐴝𐴀𐴊𐴠 𐴁𐴟𐴄 𐴓𐴡𐴘 𐴉𐴠𐴌𐴖𐴝𐴌𐴞𐴌 𐴔𐴝𐴎𐴠 𐴔𐴝𐴙𐴅𐴧𐴙𐴝 𐴔𐴡𐴓𐴠𐴆𐴥𐴙𐴥𐴝 𐴎𐴝𐴘𐴁𐴡𐴌𐴓𐴝 𐴒𐴞𐴀𐴓𐴊𐴠 𐴔𐴡𐴕𐴃𐴡𐴌 𐴔𐴡𐴓𐴠𐴆𐴥𐴙𐴥𐴝𐴃 𐴀𐴟𐴍𐴞 𐴕𐴦𐴡 𐴉𐴝𐴌𐴠 𐴱 𐴔𐴡𐴓𐴠𐴆𐴥𐴙𐴥𐴝𐴌 𐴒𐴥𐴝𐴣𐴍𐴡𐴃 𐴁𐴥𐴞𐴅𐴧𐴞𐴀𐴓𐴊𐴠 𐴀𐴝𐴌𐴀𐴥𐴡 𐴰 𐴰 𐴲 𐴉𐴡𐴙𐴅𐴧𐴡𐴕𐴃𐴡 𐴌𐴟𐴇𐴝𐴙𐴚𐴒𐴙𐴝𐴌𐴠 𐴱 𐴔𐴡𐴓𐴠𐴆𐴥𐴙𐴥𐴝𐴌 𐴕𐴠𐴁𐴞𐴌 𐴉𐴡𐴖𐴏𐴠 𐴶 𐴱 / 𐴀𐴠𐴂𐴌𐴞𐴓𐴡𐴌 𐴊𐴞𐴕 𐴰 𐴳 , 𐴰 𐴱 𐴁𐴝𐴎𐴠 𐴖𐴀𐴉𐴠𐴏𐴢 𐴊𐴡𐴙𐴅𐴧𐴙𐴝𐴌 𐴀𐴟𐴎𐴟 𐴄𐴥𐴠𐴓𐴞 𐴊𐴞𐴘𐴠𐴊𐴠 𐴘𐴥𐴝𐴕 ( 𐴀𐴝𐴌 𐴀𐴠𐴔 𐴀𐴠 𐴀𐴠𐴉𐴢 ) 𐴡𐴌 𐴀𐴠𐴏𐴄𐴠𐴙𐴄𐴔𐴠𐴕𐴡𐴃 𐴉𐴝𐴘𐴧𐴠 𐴁𐴡𐴓𐴞 𐴉𐴡𐴌𐴄𐴞 𐴉𐴥𐴝𐴘 𐴌𐴥𐴝𐴙𐴄 𐴒𐴟𐴌𐴟𐴉𐴠 𐴈𐴡𐴘𐴧𐴠 𐴱𐴱