𐴔𐴡𐴚𐴋𐴥𐴟𐴃 𐴈𐴥𐴝𐴕𐴝𐴌 𐴏𐴞𐴏𐴢 𐴉𐴥𐴟𐴌𐴝𐴘 𐴒𐴞𐴘𐴥𐴡𐴘 𐴱 𐴁𐴝𐴎𐴝𐴌𐴡𐴃 𐴀𐴥𐴡 𐴊𐴝𐴔 𐴁𐴝𐴌𐴥𐴝 𐴱𐴱

𐴊𐴟𐴕𐴞𐴘𐴝𐴘 𐴁𐴠𐴙𐴒𐴧𐴟𐴓𐴧𐴝 𐴏𐴡𐴓𐴠𐴌𐴊𐴠 𐴑𐴡𐴌𐴟𐴕𐴝 𐴖𐴝𐴘𐴌𐴠𐴏𐴡𐴌 𐴎𐴡𐴌𐴞𐴘𐴝 𐴓𐴡𐴌𐴝 𐴏𐴡𐴌𐴝 𐴁𐴡𐴕 𐴀𐴥𐴡𐴕𐴠 𐴱 𐴀𐴝𐴌𐴑𐴝𐴕𐴡𐴃 𐴁𐴠𐴐𐴥𐴞 𐴌𐴟𐴇𐴝𐴙𐴚𐴒𐴙𐴝 𐴱 𐴃𐴝𐴌𐴝𐴌 𐴎𐴡𐴔𐴝 𐴑𐴥𐴟𐴌𐴝𐴂𐴢 𐴉𐴥𐴟𐴌𐴝𐴘 𐴎𐴡𐴕𐴠 𐴀𐴝𐴌 𐴁𐴝𐴎𐴝𐴌𐴡𐴃 𐴀𐴥𐴡 𐴈𐴥𐴝𐴘𐴁𐴝𐴌 𐴏𐴞𐴏𐴡𐴌 𐴊𐴝𐴔 𐴁𐴝𐴌𐴥𐴞 𐴎𐴡𐴕𐴠 𐴖𐴝𐴙𐴐𐴧𐴙𐴝 𐴃𐴥𐴝𐴑𐴠𐴌𐴊𐴠 𐴘𐴥𐴝𐴕 𐴎𐴝𐴕𐴝 𐴒𐴞𐴘𐴠 𐴱 𐴀𐴝𐴌𐴑𐴝𐴕𐴡𐴃 𐴀𐴝𐴒𐴠𐴓𐴡𐴃𐴞 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴖𐴡𐴌𐴠 𐴓𐴡𐴌𐴝 𐴏𐴡𐴌𐴝𐴌 𐴒𐴡𐴌𐴡𐴕𐴡𐴌 𐴖𐴡𐴌𐴠 𐴂𐴝𐴁𐴡𐴕𐴊𐴞 𐴓𐴝𐴒𐴝𐴘𐴧𐴝 𐴱 𐴀𐴥𐴠𐴍𐴠 𐴖𐴡𐴌𐴠 𐴑𐴡𐴌𐴟𐴕𐴝 𐴁𐴙𐴝𐴌𐴝𐴔𐴠 𐴉𐴝𐴘𐴁𐴡 𐴁𐴡𐴓𐴞 𐴋𐴡𐴌𐴠 𐴓𐴡𐴌𐴝𐴏𐴡𐴌𐴝𐴌 𐴂𐴝𐴁𐴡𐴕𐴊𐴞 𐴀𐴝𐴌𐴀𐴥𐴡 𐴄𐴝𐴙𐴄 𐴀𐴥𐴡𐴘 𐴒𐴞𐴘𐴥𐴡𐴘 𐴱 𐴀𐴥𐴠𐴃𐴡𐴓𐴧𐴝 𐴒𐴝𐴚 𐴀𐴠𐴓𐴝𐴑𐴝𐴌𐴃𐴟 𐴔𐴡𐴚𐴋𐴥𐴟𐴌 𐴄𐴦𐴡𐴕𐴡𐴌 𐴁𐴝𐴎𐴝𐴌𐴡𐴃 𐴎𐴝𐴘 𐴕𐴡 𐴉𐴝𐴌𐴠𐴌 𐴱 𐴀𐴝𐴌 𐴄𐴦𐴡𐴕𐴡𐴃 𐴑𐴥𐴟𐴏𐴝𐴌𐴝 𐴁𐴙𐴝𐴌𐴞 𐴘𐴝𐴃𐴡 𐴉𐴝𐴘𐴑𐴝𐴌𐴞 𐴁𐴙𐴝𐴌𐴞 𐴁𐴠𐴙𐴒𐴧𐴟𐴕𐴡𐴌𐴃𐴟 𐴁𐴠𐴏𐴝 𐴑𐴞𐴕𐴝 𐴈𐴡𐴔 𐴱𐴱

𐴀𐴠𐴑 𐴎𐴡𐴕 𐴐𐴥𐴡𐴊𐴡𐴌𐴠 𐴀𐴝𐴌 𐴖𐴞𐴐𐴠𐴕𐴡𐴌𐴠 𐴈𐴡𐴘𐴧𐴠𐴊𐴠 𐴱 𐴀𐴝𐴣𐴀𐴌𐴝 𐴀𐴝𐴒𐴠 𐴐𐴥𐴡𐴃 𐴐𐴥𐴡𐴃 𐴀𐴥𐴝𐴎𐴝𐴌 𐴀𐴥𐴝𐴎𐴝𐴌 𐴄𐴞𐴛𐴝𐴌 𐴁𐴠𐴏𐴝 𐴑𐴞𐴕𐴝 𐴒𐴡𐴌𐴞 𐴉𐴝𐴙𐴃𐴧𐴝𐴔 𐴱 𐴀𐴠𐴈𐴥𐴡𐴕 𐴰 𐴳 𐴀𐴡𐴃𐴧𐴟 𐴰 𐴵 𐴄𐴞𐴛𐴝 𐴁𐴠𐴏𐴦𐴡𐴕 𐴀𐴥𐴟𐴊𐴧𐴝 𐴔𐴡𐴐𐴑𐴞𐴓 𐴀𐴥𐴡𐴘𐴧𐴠 𐴱 𐴄𐴦𐴡𐴕𐴡𐴌 𐴁𐴦𐴝𐴌𐴃𐴟 𐴔𐴝𐴕𐴟𐴙𐴐𐴢 𐴀𐴦𐴝𐴘 𐴕𐴡𐴉𐴝𐴌𐴠𐴌 𐴀𐴝𐴌 𐴄𐴦𐴡𐴕𐴡𐴌 𐴃𐴟𐴖𐴝𐴚𐴒𐴡𐴌 𐴀𐴥𐴡𐴑𐴧𐴡𐴓 𐴓𐴠 𐴱 𐴇𐴥𐴝𐴓𐴡𐴃 𐴀𐴠𐴕𐴋𐴞𐴓𐴧𐴝 𐴃𐴥𐴝𐴑𐴞𐴓𐴠 𐴃𐴝𐴌𐴝𐴌𐴃𐴟 𐴁𐴦𐴝𐴌𐴡𐴌 𐴔𐴡𐴊𐴡𐴊 𐴓𐴝𐴒𐴞𐴁𐴥𐴡 𐴁𐴟𐴎𐴠𐴌𐴊𐴠 𐴀𐴥𐴠𐴃𐴡𐴓𐴧𐴝 𐴀𐴝𐴣𐴀𐴌𐴝𐴌𐴃𐴟 𐴁𐴠𐴏𐴠𐴑𐴞𐴕𐴝 𐴈𐴦𐴡𐴔 𐴱 𐴔𐴡𐴕𐴃𐴡𐴌 𐴒𐴡𐴌𐴞𐴁 𐴀𐴥𐴡𐴑𐴧𐴡𐴓 𐴁𐴠𐴐𐴥𐴞 𐴊𐴟𐴑𐴧𐴡𐴌 𐴇𐴥𐴝𐴓𐴡𐴃𐴡𐴃 𐴱 𐴈𐴦𐴝𐴏𐴢 𐴒𐴡𐴌𐴞 𐴊𐴞𐴕 𐴔𐴡𐴎𐴟𐴌𐴞 𐴒𐴡𐴌𐴞 𐴈𐴥𐴝𐴊𐴠 𐴀𐴥𐴞𐴃𐴝𐴌𐴝 𐴱 𐴀𐴝𐴣𐴌𐴃𐴟 𐴉𐴟𐴃𐴎𐴞 𐴀𐴥𐴡𐴑𐴧𐴡𐴓𐴡𐴌 𐴉𐴡𐴌𐴝𐴕 𐴁𐴝𐴏𐴥𐴝𐴘 𐴁𐴡𐴌𐴓𐴝 𐴉𐴡𐴙𐴃𐴧𐴡 𐴊𐴞𐴕 𐴈𐴝𐴔 𐴒𐴡𐴙𐴃𐴧𐴡 𐴎𐴦𐴝𐴉𐴡𐴌𐴠 𐴱 𐴀𐴠𐴈𐴥𐴡𐴕 𐴒𐴤𐴡𐴌𐴡𐴌 𐴁𐴦𐴝𐴌𐴠 𐴕𐴠𐴓𐴝 𐴔𐴝𐴕𐴥𐴝 𐴀𐴥𐴡𐴘𐴧𐴠𐴊𐴠 𐴀𐴥𐴠𐴃𐴡𐴓𐴧𐴝 𐴀𐴦𐴝𐴛 𐴈𐴝𐴔 𐴒𐴡𐴙𐴃𐴧𐴡 𐴎𐴝𐴘 𐴕𐴡 𐴉𐴝𐴌𐴞𐴌 𐴱𐴱

𐴀𐴦𐴝𐴛 𐴀𐴝𐴔𐴞𐴌 𐴇𐴝𐴑𐴞𐴔 𐴀𐴝𐴣𐴀𐴌𐴃𐴟 𐴴 𐴎𐴡𐴕 𐴉𐴟𐴖𐴝𐴙𐴕 𐴀𐴝𐴣𐴀𐴌𐴝 𐴔𐴝𐴣𐴁𐴝𐴉𐴢 𐴊𐴟𐴘 𐴎𐴡𐴕 𐴔𐴞𐴓𐴝𐴘 𐴶 𐴎𐴡𐴕𐴡𐴃𐴧𐴟 𐴑𐴥𐴟𐴌𐴝𐴂𐴢 𐴈𐴡𐴔𐴞 𐴎𐴦𐴡𐴕𐴠 𐴊𐴞𐴕𐴠 𐴀𐴠𐴑 𐴀𐴡𐴑𐴃𐴡 𐴈𐴥𐴝𐴕𐴝 𐴈𐴥𐴝𐴉𐴡𐴌𐴠𐴌 𐴱 𐴀𐴥𐴠𐴍𐴠 𐴖𐴡𐴌𐴠 𐴉𐴝𐴌𐴝𐴌 𐴈𐴥𐴝𐴘𐴁𐴝𐴌 𐴔𐴝𐴓𐴡𐴌 𐴊𐴗𐴝𐴕 𐴀𐴥𐴡𐴑𐴧𐴡𐴓𐴡𐴃 𐴔𐴝𐴓 𐴁𐴠𐴐𐴥𐴞 𐴔𐴦𐴡𐴚𐴒𐴝 𐴱 𐴇𐴥𐴡𐴑𐴟𐴔𐴡𐴃𐴠 𐴁𐴠𐴐𐴥𐴞 𐴎𐴡𐴌𐴟𐴌𐴡𐴃 𐴉𐴡𐴙𐴅𐴧𐴙𐴠𐴊𐴠 𐴀𐴥𐴠𐴕𐴋𐴞𐴓𐴧𐴝 𐴎𐴝𐴒𐴝 𐴀𐴥𐴡𐴑𐴧𐴡𐴓𐴡𐴃 𐴈𐴥𐴝𐴕𐴝𐴌 𐴌𐴝𐴘𐴐𐴡𐴕 𐴁𐴝𐴍𐴠𐴌 𐴱 𐴔𐴡𐴚𐴋𐴥𐴟𐴌 𐴉𐴝𐴣𐴏𐴀𐴡𐴔 𐴌𐴥𐴠𐴑𐴧𐴗𐴥𐴝𐴃 𐴒𐴤𐴡𐴌 𐴉𐴞𐴏𐴠 𐴵 𐴱 𐴑𐴠 𐴅𐴞 𐴏𐴡𐴙𐴓 𐴰 𐴵 𐴷 𐴒𐴠𐴌𐴝𐴔 𐴃𐴠𐴙𐴓 𐴵 , 𐴱 𐴑𐴠 𐴅𐴞 𐴉𐴞𐴛𐴝𐴏𐴢 𐴀𐴠𐴑 𐴉𐴝𐴑𐴞𐴄 𐴕𐴟𐴕 𐴱 𐴎𐴡𐴊𐴞𐴘𐴥𐴡 𐴊𐴟𐴘𐴀𐴡𐴔 𐴌𐴥𐴠𐴑𐴧𐴗𐴥𐴝𐴃 𐴒𐴤𐴡𐴌 𐴉𐴞𐴏𐴠 𐴰 𐴱 𐴑𐴠 𐴅𐴞 𐴏𐴡𐴙𐴓 𐴰 𐴰 𐴵 𐴒𐴠𐴌𐴝𐴔 𐴃𐴠𐴙𐴓 𐴰 𐴵 𐴷 𐴒𐴠𐴌𐴝𐴔 𐴉𐴞𐴛𐴝𐴏𐴢 𐴰 𐴵 𐴲 𐴒𐴠𐴌𐴝𐴔 𐴌𐴡𐴖𐴕 𐴱 𐴀𐴠𐴂𐴌𐴞𐴓𐴡𐴌 𐴰 𐴳 𐴃𐴝𐴌𐴞𐴑 𐴉𐴡𐴙𐴅𐴧𐴡𐴕𐴃𐴡 𐴀𐴥𐴝𐴣𐴎𐴡𐴙𐴕𐴧𐴝 𐴰 𐴱 𐴁𐴝𐴎𐴡𐴌𐴃𐴟 𐴁𐴠𐴙𐴕𐴧𐴝 𐴵 𐴁𐴝𐴎𐴠 𐴃𐴡𐴃 𐴑𐴝𐴌𐴉𐴙𐴟 𐴘𐴥𐴡 𐴓𐴝𐴒𐴝𐴘 𐴊𐴞𐴘𐴠 𐴱𐴱