𐴀𐴠𐴔𐴠𐴒𐴠𐴌𐴞𐴆𐴥𐴠𐴕𐴡𐴌 𐴑𐴝𐴕𐴟𐴕 𐴓𐴡𐴘 𐴁𐴡𐴕 𐴒𐴡𐴙𐴅𐴧𐴞𐴀𐴓𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴁𐴥𐴟𐴃𐴡𐴌 𐴃𐴟 𐴰 𐴴 𐴱 𐴎𐴡𐴕𐴡𐴌 𐴓𐴦𐴡𐴃 𐴔𐴡𐴀𐴊𐴧𐴞𐴔𐴝 𐴉𐴥𐴟𐴌𐴝𐴘 𐴉𐴥𐴠𐴓𐴝𐴘𐴧𐴠 𐴱𐴱

𐴀𐴝𐴌𐴑𐴝𐴕𐴡𐴌 𐴀𐴝𐴏𐴥𐴡𐴓𐴞 𐴁𐴥𐴝𐴐𐴞𐴕𐴊𐴝 𐴈𐴡𐴔𐴐𐴡𐴙𐴚𐴒𐴙𐴝 𐴑𐴡𐴖𐴔 𐴌𐴟𐴇𐴝𐴙𐴚𐴒𐴙𐴝 𐴌𐴠 𐴀𐴝𐴌𐴑𐴝𐴕𐴡𐴌 𐴃𐴟 𐴕𐴠𐴓𐴝𐴘 𐴉𐴥𐴠𐴓𐴝𐴘 𐴁𐴡𐴓𐴧𐴝 𐴲 𐴴 𐴹 𐴱 𐴀𐴞𐴚 / 𐴴 𐴵 𐴱 𐴱 𐴌𐴟𐴇𐴝𐴙𐴚𐴒𐴙𐴝 𐴐𐴥𐴡𐴕 𐴓𐴡𐴃𐴞 𐴁𐴡𐴌𐴔𐴝 𐴇𐴥𐴡𐴑𐴟𐴔𐴡𐴃𐴠 𐴁𐴡𐴖𐴃 𐴋𐴡𐴙𐴓𐴧𐴝 𐴒𐴡𐴌𐴞 𐴏𐴝𐴘𐴧𐴠 𐴱 𐴔𐴡𐴕𐴃𐴡𐴌 ” 𐴀𐴝𐴓𐴧𐴝𐴇𐴢 𐴃𐴝𐴀𐴝𐴓𐴝 𐴘𐴠 ” 𐴁𐴡𐴌𐴔𐴝 𐴇𐴥𐴡𐴑𐴟𐴔𐴡𐴃𐴡𐴌𐴠 𐴑𐴝𐴔𐴙𐴝𐴁 𐴕𐴦𐴡 𐴒𐴡𐴌𐴠 𐴱 𐴀𐴥𐴠 𐴏𐴥𐴞𐴓𐴏𐴞𐴓𐴝𐴃 𐴲 𐴱 𐴰 𐴲 𐴀𐴞𐴚 / 𐴴 𐴲 𐴲 𐴱 𐴌𐴟𐴇𐴝𐴙𐴚𐴒𐴙𐴝 𐴐𐴥𐴡𐴕 𐴓𐴡𐴃𐴞 𐴅𐴠𐴕𐴡𐴏𐴥𐴝𐴙𐴋𐴡𐴌 𐴂𐴡𐴌𐴟𐴒𐴠𐴌𐴝𐴔 𐴓𐴡𐴘 𐴌𐴟𐴇𐴝𐴙𐴚𐴒𐴙𐴝 𐴌𐴠 𐴉𐴥𐴟𐴌𐴝𐴘 𐴉𐴥𐴠𐴓𐴝𐴘𐴁𐴝𐴌 𐴑𐴟𐴐𐴥𐴞𐴐𐴢 𐴐𐴥𐴟𐴌𐴟 𐴒𐴡𐴙𐴅𐴧𐴙𐴠 𐴱 𐴎𐴞𐴀𐴕𐴡𐴌 𐴎𐴡𐴌𐴞𐴘𐴝 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴊𐴠𐴐𐴡𐴌 𐴁𐴥𐴟𐴃𐴡𐴌𐴠 𐴁𐴦𐴝𐴌𐴠 𐴑𐴠𐴀𐴠𐴔𐴡𐴃 𐴁𐴡𐴐𐴥𐴡𐴃𐴞 𐴒𐴡𐴌𐴝 𐴉𐴡𐴌𐴦𐴠𐴌 𐴱𐴱

𐴀𐴥𐴠 𐴑𐴠𐴀𐴠𐴔 𐴀𐴥𐴡𐴑𐴧𐴡𐴓𐴡𐴌 𐴁𐴥𐴟𐴃𐴡𐴌𐴠 𐴁𐴝𐴣𐴊𐴤𐴝 𐴀𐴥𐴡𐴕𐴠 𐴉𐴡𐴃𐴧𐴞𐴊𐴞𐴕𐴧𐴝 𐴀𐴞𐴕𐴏𐴝𐴕𐴞 𐴎𐴞𐴕𐴊𐴞𐴒𐴞 𐴃𐴡𐴚 𐴀𐴥𐴡𐴘 𐴉𐴟𐴃𐴎𐴞 𐴔𐴝𐴣𐴁𐴝𐴁 𐴉𐴝𐴙𐴓𐴃𐴠 𐴀𐴥𐴟𐴊𐴧𐴝 𐴱 𐴎𐴠𐴈𐴡𐴕 𐴀𐴡𐴐𐴥𐴝𐴕𐴃𐴞𐴃 𐴉𐴡𐴌𐴞𐴒𐴠𐴓 𐴒𐴦𐴡𐴘 𐴃𐴦𐴡𐴘 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴉𐴡𐴌𐴝𐴕𐴡𐴌 𐴊𐴥𐴡𐴣𐴀𐴏𐴠 𐴏𐴟𐴒𐴠 𐴎𐴞𐴀𐴑𐴧𐴙𐴝 𐴊𐴠𐴑𐴤𐴠 𐴀𐴥𐴞𐴑𐴧𐴙𐴝 𐴀𐴝𐴌𐴑𐴝𐴕𐴡𐴌 𐴃𐴟 𐴕𐴠𐴓𐴝 𐴐𐴥𐴟𐴌𐴟 𐴒𐴡𐴙𐴅𐴧𐴙𐴠 𐴱 𐴀𐴥𐴠 𐴕𐴠𐴓𐴦𐴝𐴃 𐴈𐴡𐴃𐴡 𐴔𐴝𐴣𐴁𐴝𐴉𐴠 𐴉𐴟𐴖𐴝𐴙𐴕 𐴀𐴥𐴝𐴌𐴝𐴘 𐴉𐴥𐴠𐴓𐴝𐴘𐴧𐴠 𐴀𐴝𐴌 𐴈𐴡𐴃𐴡 𐴉𐴟𐴖𐴝𐴙𐴕𐴊𐴠 𐴁𐴝𐴉𐴁𐴤𐴝𐴘 𐴀𐴥𐴝𐴌𐴝𐴘 𐴉𐴥𐴠𐴓𐴝𐴘𐴧𐴠 𐴒𐴡𐴕𐴝 𐴏𐴥𐴝𐴌𐴝 𐴱 𐴀𐴝𐴌 𐴀𐴝𐴙𐴅𐴧𐴙𐴝 𐴉𐴡𐴙𐴅𐴧𐴡𐴕𐴃𐴡 𐴈𐴡𐴃𐴡 𐴊𐴠𐴐𐴡𐴌 𐴎𐴙𐴡𐴓 𐴈𐴥𐴝𐴕𐴝𐴃 𐴌𐴟𐴇𐴝𐴙𐴚𐴒𐴙𐴝𐴌 𐴔𐴝𐴣𐴁𐴤𐴡𐴙𐴕 𐴁𐴝𐴉𐴁𐴤𐴝𐴘 𐴎𐴞𐴕𐴊𐴞𐴒𐴞 𐴈𐴝𐴍𐴠𐴌 𐴒𐴡𐴕𐴝 𐴕𐴥𐴝𐴘 𐴱𐴱

𐴀𐴥𐴠𐴕𐴋𐴞𐴓𐴧𐴝 𐴕𐴠𐴓𐴞 𐴎𐴝𐴘𐴁𐴝𐴌 𐴐𐴥𐴡𐴣𐴀𐴃 𐴁𐴡𐴌𐴔𐴝𐴌 𐴐𐴥𐴡𐴀𐴌 𐴂𐴡𐴏𐴧𐴞𐴔 , 𐴌𐴠𐴚𐴒𐴟𐴕 , 𐴔𐴡𐴒𐴧𐴗𐴥𐴠 , 𐴏𐴥𐴝𐴘𐴒𐴥𐴝𐴙𐴚 𐴀𐴝𐴌𐴀𐴥𐴡 𐴐𐴥𐴡𐴀𐴌 𐴀𐴥𐴡𐴑𐴧𐴡𐴓𐴡𐴃 𐴁𐴡𐴌𐴔𐴝𐴌 𐴀𐴠𐴔𐴠𐴒𐴞𐴌𐴠𐴆𐴥𐴠𐴕𐴠 𐴱 𐴏𐴥𐴡𐴉𐴡𐴌 𐴒𐴡𐴌𐴞𐴁𐴝𐴌 𐴏𐴝𐴁𐴟𐴃 𐴕𐴝𐴘 𐴁𐴡𐴓𐴞 𐴈𐴦𐴡𐴘 𐴊𐴤𐴡𐴌𐴞 𐴐𐴥𐴡𐴃𐴝 𐴐𐴥𐴡𐴃𐴞 𐴌𐴟𐴇𐴝𐴙𐴚𐴒𐴙𐴝 𐴌𐴠 𐴎𐴙𐴡𐴓𐴡𐴃 𐴁𐴡𐴕 𐴒𐴡𐴌𐴞 𐴌𐴝𐴙𐴑𐴧𐴙𐴠 𐴱 𐴀𐴥𐴥𐴠𐴕𐴋𐴞𐴓𐴧𐴝 𐴕𐴡𐴖𐴡𐴔𐴁𐴡𐴌 𐴹 𐴱 𐴰 𐴲 𐴀𐴝𐴌 𐴉𐴥𐴠𐴌𐴖𐴝𐴌𐴞 𐴰 𐴲 𐴰 𐴲 𐴀𐴞𐴃 𐴀𐴥𐴠𐴌𐴝𐴖𐴡𐴋𐴧𐴞 𐴋𐴞𐴐𐴄𐴞𐴑𐴡𐴌 𐴂𐴡𐴏𐴧𐴞𐴔 𐴐𐴥𐴡𐴀𐴌𐴡𐴃 𐴀𐴠𐴔𐴠𐴒𐴞𐴌𐴠𐴆𐴥𐴠𐴕𐴠 𐴁𐴡𐴕𐴒𐴡𐴙𐴅𐴧𐴞𐴀𐴓𐴊𐴠 𐴳 𐴹 + 𐴰 𐴵 𐴌𐴟𐴇𐴝𐴙𐴚𐴒𐴙𐴝𐴌 𐴔𐴡𐴀𐴊𐴧𐴞𐴔𐴝 𐴐𐴥𐴠𐴐𐴢 𐴒𐴡𐴌𐴞 𐴉𐴥𐴠𐴓𐴝𐴘 𐴎𐴝𐴌 𐴒𐴤𐴡𐴌𐴡𐴃 𐴃𐴝𐴌𐴥𐴠 𐴉𐴦𐴡𐴣𐴏𐴝𐴘𐴁𐴝𐴌 𐴃𐴡𐴘𐴧𐴝𐴌𐴞 𐴒𐴡𐴌𐴦𐴠𐴌 𐴊𐴠 𐴘𐴥𐴝𐴕 𐴎𐴝𐴕𐴝 𐴒𐴞𐴘𐴠 𐴁𐴡𐴓𐴞 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴔𐴝𐴀𐴔𐴠𐴓𐴝𐴌 𐴁𐴝𐴁𐴡𐴃𐴠 𐴀𐴞𐴕𐴏𐴝𐴕𐴞 𐴇𐴥𐴑𐴧𐴡𐴌 𐴀𐴟𐴑𐴞𐴓 / 𐴋𐴦𐴡 𐴏𐴝𐴎𐴝𐴚 𐴔𐴠𐴌𐴥𐴠 𐴖𐴥𐴝𐴚𐴠 𐴈𐴡𐴘𐴧𐴠 𐴱𐴱