𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴀𐴥𐴡𐴑𐴧𐴡𐴓𐴠 𐴈𐴦𐴦𐴡𐴌 𐴊𐴠 ” 𐴈𐴡𐴏𐴝𐴌𐴝𐴌 𐴓𐴡𐴑 𐴉𐴟𐴑 𐴀𐴝𐴣𐴀𐴌𐴝𐴌 𐴒𐴤𐴡𐴌𐴡𐴃 𐴒𐴤𐴡𐴓𐴠𐴌 𐴒𐴥𐴝𐴘” 𐴱𐴱

𐴀𐴠𐴕 𐴅𐴞 𐴀𐴡 𐴀𐴡𐴑𐴧𐴡𐴓 𐴁𐴠𐴐𐴥𐴞 𐴓𐴝𐴔𐴁𐴝 𐴄𐴝𐴙𐴔 𐴓𐴥𐴡𐴃𐴞 𐴈𐴝𐴔 𐴕𐴡 𐴒𐴡𐴌𐴦𐴡𐴕𐴠 𐴁𐴝𐴚𐴓𐴝𐴊𐴠𐴐𐴢 𐴕𐴡𐴘𐴧𐴝 𐴉𐴝𐴌𐴝 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃 𐴏𐴥𐴡𐴉𐴝𐴘 𐴒𐴡𐴌𐴦𐴡𐴕𐴡𐴌 𐴎𐴞𐴔𐴧𐴝𐴊𐴝𐴌𐴞 𐴉𐴟𐴌𐴝 𐴕𐴡 𐴀𐴥𐴡𐴌 𐴊𐴠 𐴀𐴥𐴠𐴃𐴡𐴓𐴧𐴝 𐴱

𐴄𐴝𐴄𐴧𐴞𐴌 𐴄𐴝𐴚𐴑𐴞 𐴉𐴟𐴌𐴝𐴘 𐴁𐴝𐴀𐴌𐴠 𐴕𐴠𐴓𐴡𐴕𐴠 𐴀𐴝𐴌 𐴈𐴡𐴏𐴡𐴌𐴝𐴌 𐴋𐴝𐴁𐴧𐴗𐴝 𐴀𐴥𐴡𐴑𐴧𐴡𐴓 𐴉𐴟𐴌𐴝𐴘 𐴉𐴡𐴣𐴏𐴠𐴌 𐴊𐴠 𐴀𐴥𐴞𐴕𐴡𐴌 𐴎𐴡𐴌𐴞𐴘𐴝 𐴁𐴠𐴐𐴥𐴝𐴁𐴠𐴐𐴥𐴞 𐴓𐴡𐴑𐴉𐴟𐴑 𐴉𐴡𐴘𐴊𐴝 𐴀𐴥𐴡𐴘𐴧𐴠 𐴱 𐴀𐴥𐴠 𐴓𐴡𐴑𐴉𐴟𐴑 𐴀𐴥𐴡𐴑𐴧𐴡𐴓 𐴁𐴝𐴀𐴘 𐴁𐴝𐴀𐴘 𐴀𐴝𐴣𐴀𐴌𐴝𐴌 𐴒𐴤𐴡𐴌𐴡𐴌 𐴁𐴥𐴟𐴃𐴡𐴌𐴠 𐴒𐴤𐴡𐴓𐴠𐴌 𐴒𐴥𐴝𐴘 𐴱 𐴀𐴠𐴈𐴥𐴡𐴕 𐴀𐴝𐴣𐴀𐴌𐴝𐴌 𐴃𐴟 𐴈𐴥𐴝𐴕𐴝 𐴈𐴥𐴝𐴘𐴃𐴠 𐴀𐴥𐴟𐴊𐴧𐴝 𐴔𐴡𐴐𐴑𐴞𐴓 𐴀𐴥𐴡𐴘 𐴒𐴞𐴘𐴦𐴡𐴘 𐴱 𐴈𐴡𐴕𐴥𐴡 𐴀𐴠𐴕 𐴅𐴞 𐴀𐴡 𐴌 𐴔𐴝𐴕𐴟𐴙𐴐𐴢𐴀𐴥𐴡 𐴕𐴡 𐴀𐴝𐴘𐴧𐴠𐴌 𐴀𐴝𐴌 𐴀𐴝𐴣𐴀𐴌𐴝𐴌 𐴃𐴟 𐴈𐴡𐴏𐴡𐴌𐴝 𐴉𐴥𐴠𐴓𐴝𐴘 𐴁𐴝𐴌 𐴀𐴡𐴙𐴕𐴧𐴡 𐴎𐴝𐴒𐴝 𐴘𐴥𐴡 𐴕𐴥𐴝𐴘 𐴱 𐴀𐴥𐴠 𐴄𐴝𐴄𐴧𐴞𐴌 𐴀𐴝𐴌 𐴈𐴡𐴏𐴡𐴌𐴝 𐴉𐴡𐴣𐴏𐴝𐴌 𐴓𐴡𐴑 𐴀𐴥𐴡𐴑𐴧𐴡𐴓 𐴒𐴤𐴡𐴌𐴡𐴌 𐴁𐴥𐴟𐴃𐴡𐴌 𐴉𐴟𐴌𐴝𐴘 𐴎𐴦𐴡𐴕𐴠 𐴒𐴟𐴌𐴝 𐴉𐴟𐴖𐴝𐴙𐴕 𐴀𐴥𐴡𐴑𐴧𐴡𐴓 𐴏𐴥𐴡𐴣𐴀𐴙𐴓𐴃𐴠 𐴔𐴡𐴐𐴑𐴞𐴓 𐴀𐴥𐴡𐴘𐴧𐴠 𐴁𐴡𐴓𐴞 𐴀𐴝𐴌𐴖𐴞 𐴐𐴠𐴕𐴡𐴌𐴠 𐴈𐴡𐴘𐴧𐴠 𐴱𐴱

𐴊𐴟𐴕𐴞𐴘𐴝𐴘 𐴁𐴠𐴙𐴒𐴧𐴟𐴓𐴧𐴝 𐴏𐴥𐴝𐴘 𐴒𐴞𐴘𐴥𐴡𐴘𐴊𐴠 𐴑𐴡𐴌𐴟𐴕𐴝 𐴁𐴥𐴝𐴘𐴌𐴠𐴏𐴠 𐴀𐴝𐴣𐴀𐴌𐴝𐴌𐴠 𐴉𐴝𐴘𐴁𐴝𐴌 𐴀𐴝𐴒𐴠 𐴱 𐴀𐴠 𐴈𐴡𐴏𐴡𐴌𐴝𐴌 𐴎𐴡𐴌𐴞𐴘𐴝 𐴀𐴥𐴡𐴘𐴁𐴡𐴊𐴠 𐴁𐴙𐴝𐴌𐴝𐴔 𐴓𐴡𐴘 𐴃𐴡 𐴀𐴝𐴣𐴀𐴌𐴝 𐴔𐴡𐴌𐴞 𐴎𐴝𐴘𐴧𐴟𐴔 𐴁𐴥𐴡𐴘 𐴉𐴦𐴝𐴣𐴓𐴧𐴝 𐴁𐴡𐴓𐴞 𐴌𐴞𐴉𐴟𐴎𐴞 𐴀𐴥𐴡𐴑𐴧𐴡𐴓𐴠 𐴀𐴝𐴉𐴏𐴟𐴏𐴢 𐴎𐴦𐴝𐴙𐴌 𐴒𐴡𐴌𐴦𐴠𐴌 𐴱 𐴏𐴥𐴡𐴉𐴝𐴙𐴌 𐴎𐴞𐴔𐴧𐴝𐴊𐴝𐴌 ( 𐴁𐴝𐴌𐴝𐴑 = 𐴁𐴞 𐴀𐴝𐴌 𐴀𐴠 𐴏𐴞 ) 𐴌𐴠 𐴀𐴝𐴣𐴀𐴌𐴝 𐴕𐴡𐴊𐴠𐴑𐴞𐴌 𐴊𐴠 𐴁𐴡𐴖𐴃 𐴇𐴥𐴝𐴉𐴃𐴝 𐴀𐴥𐴡𐴘𐴎𐴥𐴝𐴌 𐴒𐴦𐴡𐴘 𐴱 𐴀𐴦𐴝𐴔 𐴃𐴡𐴗𐴌𐴠 𐴀𐴝𐴣𐴀𐴌𐴝 𐴉𐴝𐴕𐴞 𐴓𐴡𐴘 𐴊𐴟𐴑 𐴉𐴦𐴝𐴃 𐴀𐴝𐴏𐴥𐴞 𐴀𐴥𐴠𐴍𐴠 𐴖𐴡𐴌𐴠 𐴏𐴠𐴇𐴠𐴃𐴡𐴌 𐴁𐴝𐴁𐴡𐴃𐴠 𐴘𐴥𐴡 𐴀𐴝𐴣𐴀𐴌𐴝𐴌 𐴃𐴟 𐴓𐴝𐴒𐴠𐴌 𐴊𐴠 𐴀𐴥𐴠𐴊𐴧𐴟𐴌 𐴕𐴡 𐴉𐴦𐴝𐴙𐴌 𐴱 𐴀𐴞𐴀𐴕 𐴁𐴠𐴙𐴒𐴧𐴞𐴕𐴡𐴌𐴠 𐴔𐴞𐴓𐴝𐴘 𐴏𐴝𐴘𐴓𐴠 𐴀𐴡𐴓𐴉𐴡 𐴄𐴝𐴘𐴔𐴡𐴃 𐴀𐴝𐴣𐴀𐴌𐴝 𐴋𐴦𐴡𐴣𐴌 𐴁𐴙𐴝𐴌𐴝𐴔𐴡𐴌 𐴐𐴥𐴞𐴑𐴝𐴌 𐴁𐴡𐴙𐴕𐴧𐴟𐴔 𐴉𐴦𐴝𐴕 𐴓𐴝𐴒𐴦𐴠𐴌 𐴱𐴱

𐴀𐴠 𐴇𐴥𐴝𐴓𐴡𐴃𐴡𐴃 𐴏𐴠𐴇𐴠𐴃 𐴄𐴤𐴞𐴑 𐴌𐴝𐴑𐴞𐴁𐴡𐴓𐴧𐴝 𐴋𐴝𐴑𐴄𐴡𐴌 𐴀𐴥𐴡𐴑𐴧𐴡𐴓𐴡𐴌 𐴈𐴡𐴃𐴥𐴝 𐴔𐴡𐴎𐴞𐴕 𐴒𐴥𐴡𐴕𐴡 𐴒𐴥𐴡𐴕𐴡 𐴇𐴥𐴝𐴃 𐴊𐴤𐴟𐴘𐴃𐴡 𐴈𐴦𐴡𐴌 𐴊𐴠 𐴘𐴥𐴝𐴕𐴡 𐴕𐴡𐴉𐴝𐴌𐴞𐴌 𐴱 𐴈𐴥𐴝𐴘𐴁𐴝𐴌 𐴀𐴝𐴌 𐴌𐴝𐴣𐴊𐴝 𐴁𐴝𐴌𐴝 𐴒𐴡𐴙𐴃𐴧𐴠 𐴀𐴥𐴟𐴊𐴧𐴝 𐴉𐴝𐴕𐴞 𐴕𐴡𐴑𐴟𐴓𐴦𐴝𐴌 𐴱 𐴇𐴥𐴝𐴃 𐴊𐴤𐴟𐴘𐴃𐴡 𐴈𐴡𐴍𐴠 𐴉𐴝𐴘𐴧𐴟𐴔 𐴱 𐴀𐴠𐴑 𐴎𐴡𐴕 𐴌𐴞𐴉𐴟𐴎𐴞 𐴔𐴝𐴘𐴧𐴝 𐴘𐴠 𐴈𐴡𐴘𐴧𐴠𐴊𐴠 𐴀𐴝𐴣𐴀𐴌 𐴒𐴤𐴡𐴌𐴒𐴟𐴐𐴧𐴞𐴃 𐴸 𐴎𐴡𐴕 𐴀𐴝𐴏𐴠 𐴈𐴡𐴕𐴥𐴡 𐴋𐴦𐴡𐴙𐴓𐴧𐴝 𐴏𐴥𐴟𐴣𐴘 𐴏𐴥𐴟𐴣𐴘 𐴉𐴥𐴠𐴓𐴝𐴘𐴓𐴠 𐴀𐴥𐴟𐴊𐴧𐴝 𐴲 – 𐴳 𐴒𐴥𐴡𐴌𐴝 𐴓𐴝𐴒𐴠 𐴱 𐴈𐴡𐴀𐴠𐴑 𐴒𐴤𐴡𐴕𐴄𐴝 𐴓𐴝𐴙𐴕 𐴊𐴤𐴡𐴌𐴞 𐴁𐴝𐴊𐴠 𐴀𐴠𐴑 𐴒𐴥𐴡𐴌𐴝 𐴉𐴝𐴕𐴞 𐴉𐴝𐴘 𐴱 𐴀𐴥𐴞𐴕𐴀𐴥𐴡 𐴏𐴥𐴝𐴉𐴢 𐴉𐴝𐴕𐴞 𐴕𐴦𐴡 𐴃𐴦𐴡𐴘𐴓𐴠 𐴀𐴝𐴣𐴀𐴌𐴝 𐴏𐴠𐴇𐴠𐴃 𐴑𐴠𐴀𐴕 𐴒𐴡𐴌𐴞 𐴄𐴤𐴞𐴑 𐴌𐴝𐴑𐴞𐴃𐴦𐴝𐴔 𐴱𐴱