𐴁𐴟𐴙𐴃 𐴁𐴝𐴌 𐴀𐴥𐴡𐴘𐴃𐴠 𐴌𐴟𐴇𐴝𐴙𐴚𐴒𐴙𐴝𐴌 𐴑𐴠𐴀𐴠𐴔𐴡𐴃 𐴏𐴡𐴌𐴞𐴃𐴧𐴡𐴌𐴡 𐴁𐴡𐴕𐴒𐴡𐴌𐴝 𐴎𐴝𐴘𐴁𐴡 𐴱𐴱

𐴁𐴝𐴚𐴓𐴝𐴊𐴠𐴐𐴢 𐴑𐴡𐴑𐴐𐴡𐴁𐴝𐴎𐴝𐴌 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴌 𐴎𐴞𐴔𐴧𐴝𐴊𐴝𐴌 / 𐴔𐴥𐴝𐴇𐴁𐴟𐴁𐴟𐴓 𐴀𐴝𐴓𐴡𐴔 𐴃𐴝𐴓𐴟𐴑𐴊𐴝𐴌𐴠 𐴈𐴡𐴘𐴧𐴠𐴊𐴠 𐴵 𐴲 𐴔𐴝𐴌𐴠𐴆 𐴰 𐴲 𐴰 𐴲 𐴃𐴝𐴌𐴞𐴑 𐴁𐴟𐴙𐴃 𐴁𐴝𐴌𐴠 𐴓𐴡𐴃𐴞 𐴱 𐴏𐴡𐴗𐴃𐴞𐴌𐴞𐴐𐴧𐴝𐴕 𐴑𐴠𐴀𐴠𐴔 𐴁𐴠𐴙𐴒𐴧𐴞𐴕𐴡𐴃 𐴊𐴟𐴕𐴞𐴘𐴝𐴘 𐴁𐴠𐴙𐴒𐴧𐴗𐴥𐴝 𐴉𐴥𐴡𐴘𐴓𐴝𐴘 𐴒𐴞𐴘𐴡𐴘𐴊𐴠 𐴑𐴡𐴌𐴟𐴕𐴝 𐴁𐴙𐴝𐴌𐴝𐴔𐴡𐴌𐴃𐴟 𐴁𐴝𐴏𐴞𐴁𐴝𐴌 𐴏𐴥𐴞𐴓𐴏𐴞𐴓𐴝𐴃 𐴱 𐴎𐴡𐴌𐴟𐴌𐴞 𐴀𐴝𐴁𐴡𐴏𐴃𐴝 𐴁𐴦𐴝𐴊𐴠 𐴀𐴡𐴙𐴕𐴧𐴡 𐴏𐴡𐴌𐴞𐴃𐴧𐴡𐴌𐴡 𐴁𐴠𐴙𐴒𐴧𐴞𐴕 𐴁𐴡𐴕 𐴒𐴡𐴌𐴞 𐴊𐴞𐴘𐴝 𐴎𐴝𐴘𐴁𐴡 𐴱 𐴔𐴝𐴌𐴠𐴆𐴡𐴌 𐴴 𐴲 𐴃𐴝𐴌𐴞𐴑 𐴓𐴡𐴃 𐴁𐴝𐴚𐴓𐴝𐴊𐴠𐴐𐴡𐴃 𐴹 𐴳 𐴎𐴡𐴕 𐴑𐴡𐴌𐴘𐴕𐴝 𐴓𐴝𐴙𐴒𐴧𐴙𐴠 𐴉𐴝𐴒𐴞𐴘𐴠 𐴱 𐴀𐴥𐴠𐴃𐴧𐴟 𐴊𐴟𐴘 𐴎𐴡𐴕 𐴔𐴝𐴌𐴝 𐴒𐴞𐴘𐴠 𐴱 𐴈𐴥𐴝𐴕𐴝 𐴏𐴠𐴇𐴠𐴃 𐴀𐴝𐴌 𐴊𐴝𐴁𐴝𐴘 𐴀𐴡𐴐𐴟𐴃 𐴊𐴞𐴘𐴝𐴌 𐴈𐴝𐴔 𐴓𐴝𐴒𐴝𐴃𐴝𐴌 𐴃𐴥𐴝𐴑𐴞𐴁𐴡 𐴱𐴱

𐴔𐴡𐴊𐴡𐴌𐴡𐴏𐴝 𐴀𐴞𐴐𐴑𐴟𐴓 𐴀𐴥𐴡 𐴁𐴡𐴕𐴃𐴥𐴝𐴑𐴞𐴁𐴡 𐴱 𐴁𐴠𐴙𐴒𐴧𐴟𐴕𐴡𐴌𐴃𐴟 𐴒𐴤𐴡𐴌𐴡𐴌 𐴁𐴟𐴃𐴡𐴌𐴠 𐴒𐴤𐴡𐴌𐴒𐴟𐴐𐴧𐴞 𐴀𐴠𐴑𐴎𐴡𐴕 𐴀𐴝𐴌 𐴀𐴠𐴑𐴎𐴡𐴕 𐴓𐴡𐴘 𐴒𐴥𐴞𐴐𐴝 𐴒𐴥𐴞𐴐𐴧𐴝 𐴕𐴡𐴒𐴡𐴌𐴞 𐴏𐴥𐴞𐴌𐴝 𐴏𐴥𐴞𐴌𐴝 𐴀𐴝𐴓𐴡𐴒 𐴀𐴝𐴓𐴡𐴒 𐴒𐴡𐴌𐴞 𐴁𐴦𐴡𐴘 𐴃𐴥𐴝𐴑𐴝 𐴉𐴡𐴌𐴞𐴁𐴡 𐴱 𐴃𐴟𐴣𐴖𐴝𐴣𐴌 𐴀𐴝𐴌 𐴀𐴡𐴉𐴡𐴌 𐴎𐴡𐴕𐴡𐴌 𐴇𐴠𐴉𐴝𐴎𐴡𐴃𐴡𐴌𐴓𐴝 𐴱 𐴑𐴠𐴀𐴠𐴔𐴡𐴌 𐴁𐴥𐴟𐴃𐴡𐴌𐴃𐴟 𐴈𐴡𐴕𐴥𐴡𐴑𐴙𐴝 𐴁𐴦𐴝𐴌𐴠 𐴕𐴠𐴓𐴞 𐴕𐴡𐴉𐴥𐴝𐴌𐴞𐴁𐴡 𐴱 𐴀𐴥𐴠𐴕𐴋𐴞𐴓𐴧𐴝 𐴁𐴦𐴝𐴌𐴃𐴟 𐴘𐴥𐴡 𐴈𐴡𐴕𐴥𐴞𐴑𐴧𐴙𐴝 𐴑𐴠𐴀𐴠𐴔𐴡𐴌 𐴁𐴥𐴟𐴃𐴡𐴌𐴠 𐴀𐴦𐴝𐴘 𐴕𐴡𐴉𐴝𐴌𐴥𐴞𐴁𐴡 𐴱 𐴁𐴦𐴝𐴌𐴡𐴌 𐴈𐴡𐴕𐴥𐴡 𐴁𐴡𐴘𐴊𐴠𐴐𐴡𐴙𐴃𐴧𐴝 𐴘𐴥𐴡 𐴒𐴥𐴡𐴓𐴞 𐴕𐴡𐴉𐴝𐴌𐴥𐴞𐴁𐴡 𐴱 𐴎𐴠𐴃𐴡 𐴋𐴦𐴡𐴙𐴓𐴧𐴝 𐴔𐴝𐴕𐴟𐴙𐴐𐴢 𐴎𐴡𐴔𐴝 𐴀𐴥𐴡𐴊𐴠 𐴎𐴝𐴒𐴝 𐴀𐴝𐴏𐴥𐴠 𐴔𐴡𐴏𐴡𐴙𐴃 𐴐𐴥𐴡𐴣𐴀 𐴁𐴡𐴕 𐴒𐴡𐴌𐴞 𐴊𐴞𐴘𐴝 𐴎𐴝𐴘𐴁𐴡 𐴕𐴟𐴖𐴝𐴏𐴢 𐴕𐴞𐴎𐴡𐴌 𐴕𐴞𐴎𐴡𐴌 𐴒𐴤𐴡𐴌𐴡𐴃 𐴉𐴡𐴌𐴦𐴡 𐴱𐴱

𐴔𐴥𐴝𐴔𐴁𐴡𐴌𐴥𐴝 𐴉𐴝𐴌𐴝𐴃 𐴁𐴟𐴔 𐴉𐴡𐴌𐴞 𐴉𐴟𐴖𐴝 𐴀𐴠𐴑𐴎𐴡𐴕 𐴔𐴡𐴌𐴞 𐴒𐴞𐴘𐴡𐴘 𐴵 𐴱 𐴎𐴡𐴕 𐴒𐴥𐴝𐴙𐴓 𐴀𐴥𐴡𐴘𐴧𐴠 𐴱𐴱

𐴔𐴡𐴒𐴁𐴝𐴒𐴞 𐴘𐴠 𐴳 𐴲 𐴔𐴝𐴌𐴠𐴆𐴡𐴃 𐴔𐴠𐴓𐴠𐴄𐴠𐴌𐴞𐴌 𐴄𐴠𐴕𐴧𐴞𐴕 𐴀𐴞𐴐𐴑𐴟𐴓𐴡𐴌 𐴁𐴥𐴟𐴃𐴡𐴌𐴠 𐴒𐴥𐴡𐴓𐴞 𐴔𐴝𐴙𐴅𐴧𐴙𐴠𐴊𐴠 𐴱 𐴇𐴥𐴝𐴔𐴓𐴝 𐴀𐴥𐴞𐴁𐴝𐴌 𐴅𐴟𐴖𐴝𐴁𐴡𐴃 𐴱 𐴔𐴠𐴓𐴠𐴄𐴠𐴌𐴞 𐴀𐴥𐴡𐴑𐴧𐴡𐴓𐴠 𐴀𐴝𐴣𐴊𐴤𐴝𐴊𐴤𐴟𐴔 𐴇𐴠𐴓𐴞𐴑𐴝𐴂𐴄𐴝𐴌 𐴓𐴡𐴘 𐴔𐴝𐴙𐴅𐴧𐴙𐴠𐴊𐴠 𐴀𐴥𐴠𐴍𐴠 𐴱 𐴔𐴥𐴝𐴔𐴁𐴡𐴌𐴥𐴝 𐴀𐴠𐴓𐴝𐴑𐴝𐴌 𐴑𐴥𐴠𐴔𐴕𐴥𐴞𐴀 𐴒𐴥𐴗𐴥𐴝𐴚𐴡𐴌 𐴆𐴥𐴠 𐴄𐴡𐴚 𐴉𐴝𐴌𐴝𐴃 𐴔𐴠𐴓𐴠𐴄𐴠𐴌𐴞 𐴘𐴠 𐴔𐴝𐴙𐴅𐴧𐴙𐴠𐴊𐴠 𐴁𐴟𐴔 𐴉𐴥𐴟𐴍𐴞 𐴊𐴡𐴐𐴢 𐴁𐴡𐴏𐴥𐴡𐴙𐴌𐴅𐴧𐴙𐴝 𐴉𐴟𐴖𐴝 𐴀𐴠𐴑𐴎𐴡𐴕 𐴀𐴡𐴑𐴃𐴡 𐴔𐴡𐴎𐴞𐴕 𐴊𐴝𐴁𐴝𐴘 𐴒𐴡𐴌𐴞 𐴕𐴡𐴉𐴝𐴌𐴞 𐴴 𐴲 𐴃𐴝𐴌𐴞𐴑𐴡𐴌𐴊𐴞𐴕 𐴁𐴠𐴙𐴕𐴧𐴝 𐴋𐴝𐴑𐴄𐴡𐴌 𐴈𐴥𐴝𐴕𐴝𐴃 𐴔𐴡𐴌𐴞 𐴒𐴞𐴘𐴡𐴘 𐴀𐴝𐴌 𐴵 𐴱 𐴎𐴡𐴕 𐴒𐴥𐴝𐴙𐴓 𐴀𐴥𐴡𐴘𐴧𐴠 𐴱𐴱 𐴒𐴥𐴝𐴙𐴓 𐴀𐴥𐴡𐴘𐴧𐴠𐴊𐴠 𐴀𐴥𐴠𐴍𐴠 𐴁𐴝𐴉𐴢 𐴉𐴟𐴃 𐴊𐴟𐴘 𐴎𐴡𐴕𐴡𐴌 𐴇𐴝𐴓𐴡𐴃 𐴁𐴠𐴐𐴥𐴞 𐴈𐴥𐴡𐴌𐴝𐴁 𐴀𐴥𐴡𐴕𐴠 𐴀𐴝𐴙𐴑𐴧𐴙𐴝𐴁 𐴉𐴦𐴡𐴣𐴏𐴝𐴘 𐴊𐴞𐴘𐴠 𐴱𐴱