𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴀𐴞𐴎𐴧𐴡𐴃𐴡𐴌 𐴏𐴥𐴝𐴣𐴀𐴃𐴠 𐴖𐴝𐴉𐴠𐴏𐴢 𐴎𐴝𐴘𐴉𐴝𐴌𐴠 𐴉𐴥𐴝𐴀𐴕 𐴱 𐴇𐴝𐴓𐴡𐴃 𐴁𐴝𐴕𐴝𐴘𐴁𐴡𐴓𐴧𐴝 𐴱 𐴁𐴡𐴌𐴔𐴝 𐴌𐴠 𐴀𐴝𐴔𐴠𐴌𐴞𐴑𐴝 𐴘𐴠 𐴈𐴡𐴘𐴧𐴠 𐴱𐴱

𐴁𐴝𐴚𐴓𐴝𐴊𐴠𐴐𐴡𐴃 𐴏𐴥𐴝𐴀𐴌𐴝 𐴓𐴡𐴘𐴧𐴠𐴊𐴠 𐴅𐴠𐴕𐴡𐴏𐴝𐴙𐴋 𐴈𐴥𐴝𐴘𐴧𐴝 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴱 𐴊𐴠𐴐𐴡𐴃 𐴀𐴞𐴎𐴧𐴡𐴃𐴡𐴌 𐴏𐴥𐴝𐴣𐴀𐴃𐴠 𐴖𐴝𐴉𐴠𐴏𐴢 𐴎𐴝𐴘 𐴉𐴝𐴌𐴠𐴊𐴠 𐴀𐴥𐴠𐴕𐴋𐴞𐴓𐴧𐴝 𐴇𐴝𐴓𐴡𐴃 𐴀𐴝𐴌 𐴉𐴡𐴌𐴞𐴏𐴃𐴞𐴃𐴞 𐴁𐴝𐴕𐴝𐴘𐴁𐴝𐴌 𐴁𐴝𐴁𐴡𐴃𐴠 𐴱 𐴀𐴝𐴔𐴠𐴌𐴞𐴑𐴝 𐴘𐴠 𐴁𐴡𐴌𐴔𐴝 𐴌𐴠 𐴁𐴝𐴌 𐴁𐴝𐴌 𐴒𐴡𐴌𐴞 𐴈𐴡𐴘𐴧𐴠 𐴱 𐴀𐴝𐴌 𐴎𐴡𐴌𐴟𐴌𐴡𐴃𐴡𐴌 𐴀𐴡𐴑𐴃𐴡𐴃 𐴀𐴞𐴕𐴏𐴝𐴕𐴞 𐴇𐴝𐴔𐴊𐴡𐴌𐴊𐴞 𐴱 𐴀𐴝𐴌𐴑𐴝𐴕 𐴁𐴥𐴝𐴐𐴞 𐴀𐴥𐴡𐴑𐴧𐴡𐴓𐴡𐴌 𐴀𐴥𐴠𐴍𐴠 𐴈𐴡𐴕𐴥𐴡 𐴌𐴟𐴑𐴄𐴥𐴟𐴑 𐴁𐴝𐴊𐴥𐴝 𐴏𐴥𐴝𐴌𐴝 𐴉𐴦𐴡𐴣𐴏𐴞 𐴉𐴝𐴌𐴠 𐴉𐴦𐴝𐴕 𐴈𐴥𐴝𐴄𐴞 𐴉𐴡𐴌𐴡𐴏𐴃𐴞𐴃𐴞 𐴁𐴝𐴕𐴝𐴘 𐴁𐴡𐴓𐴧𐴝 𐴘𐴥𐴡 𐴕𐴠𐴂𐴙𐴠𐴋𐴡 ( 𐴁𐴡𐴌𐴔𐴝 ) 𐴌𐴠 𐴀𐴝𐴔𐴠𐴌𐴞𐴑𐴝 𐴘𐴠 𐴈𐴡𐴘𐴧𐴠 𐴱𐴱

𐴀𐴝𐴌𐴑𐴝𐴕𐴡𐴌 𐴇𐴝𐴓𐴡𐴃𐴡𐴌𐴠 𐴀𐴠𐴕𐴋𐴞𐴓𐴧𐴝 𐴐𐴥𐴟𐴕𐴊𐴡𐴌 𐴁𐴝𐴕𐴝 𐴉𐴡𐴌𐴞𐴁𐴥𐴡𐴊𐴠 𐴱 𐴎𐴞𐴀𐴕 𐴏𐴦𐴝𐴘 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴠 𐴀𐴞𐴎𐴧𐴡𐴃 𐴀𐴝𐴌 𐴏𐴟𐴌𐴡𐴑𐴆𐴥𐴝 𐴀𐴝𐴌 𐴐𐴥𐴝𐴕𐴃𐴞𐴌 𐴏𐴥𐴝𐴣𐴀𐴃𐴠 𐴀𐴝𐴌𐴑𐴝𐴕𐴡𐴃 𐴃𐴥𐴝𐴑𐴞 𐴉𐴝𐴌𐴞 𐴁𐴡𐴊𐴠 𐴘𐴦𐴝𐴕 𐴁𐴟𐴎𐴞 𐴱 𐴕𐴞𐴎𐴡𐴌 𐴑𐴤𐴟𐴐𐴞 𐴘𐴠 𐴖𐴝𐴉𐴠𐴏𐴢 𐴎𐴝𐴘𐴁𐴡𐴓𐴧𐴝 𐴃𐴡𐴘𐴧𐴝𐴌 𐴀𐴥𐴡𐴘 𐴉𐴝𐴌𐴠 𐴱 𐴀𐴝𐴌 𐴊𐴠𐴐𐴡𐴌 𐴁𐴥𐴟𐴃𐴡𐴌𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴠 𐴔𐴡𐴅𐴁𐴟𐴌 𐴒𐴡𐴌𐴞 𐴑𐴠𐴀𐴠𐴔 𐴁𐴝𐴕𐴝𐴘 𐴁𐴝𐴣𐴊𐴃𐴞 𐴌𐴝𐴙𐴑𐴧𐴙𐴠𐴊𐴠 𐴀𐴥𐴞𐴃𐴝𐴌𐴝 𐴘𐴥𐴡 𐴐𐴥𐴝𐴕𐴃𐴞𐴌 𐴏𐴥𐴝𐴣𐴀𐴃𐴠 𐴃𐴥𐴝𐴑𐴞 𐴉𐴝𐴌𐴞 𐴁𐴡𐴊𐴠 𐴘𐴦𐴝𐴕 𐴁𐴞𐴐𐴧𐴝𐴐𐴢 𐴒𐴡𐴌𐴞 𐴉𐴝𐴌𐴠 𐴱 𐴀𐴠𐴕𐴋𐴞𐴓𐴧𐴝 𐴉𐴡𐴌𐴞𐴏𐴃𐴞𐴃𐴞 𐴁𐴝𐴕𐴝𐴘 𐴁𐴡𐴓𐴧𐴝 𐴱 𐴁𐴡𐴌𐴔𐴝𐴌𐴠 𐴓𐴝𐴒𐴝𐴃𐴝𐴌 𐴈𐴗𐴝𐴃 𐴀𐴝𐴏𐴠𐴁𐴡𐴓𐴞 𐴁𐴝𐴚𐴓𐴝𐴊𐴠𐴐𐴡𐴃 𐴀𐴝𐴏𐴠𐴊𐴠 𐴀𐴝𐴔𐴠𐴌𐴞𐴑𐴝𐴌 𐴏𐴡𐴉𐴞𐴌 / 𐴔𐴞𐴓𐴝𐴌𐴠 𐴒𐴡𐴃𐴡 𐴁𐴟𐴙𐴃 𐴁𐴝𐴌𐴠 𐴌𐴠𐴂𐴟𐴄𐴝𐴌 𐴀𐴥𐴡𐴑𐴧𐴡𐴓𐴡𐴌 𐴔𐴡𐴅𐴓𐴞𐴏𐴡𐴃 𐴈𐴡𐴘𐴧𐴠 𐴱𐴱

𐴌𐴟𐴇𐴝𐴙𐴚𐴒𐴙𐴝 𐴀𐴞𐴕𐴏𐴝𐴕𐴞 𐴇𐴥𐴝𐴔𐴊𐴡𐴌𐴊𐴞𐴌 𐴐𐴥𐴡𐴚𐴑𐴡𐴄𐴡𐴌 𐴁𐴝𐴁𐴡𐴃𐴠 𐴅𐴞𐴕𐴞𐴁𐴝𐴃 𐴒𐴡𐴙𐴅𐴧𐴙𐴠𐴊𐴠 𐴰 𐴲 𐴰 𐴲 𐴐𐴡𐴕𐴡𐴌 ( 𐴅𐴠 𐴀𐴝𐴌 𐴂𐴞 ) 𐴂𐴡𐴌𐴟𐴒𐴠𐴌𐴝𐴔𐴡𐴌 𐴀𐴝𐴕𐴋𐴝𐴌𐴠 𐴱 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴀𐴝𐴌 𐴌𐴞𐴉𐴟𐴎𐴞𐴌𐴠 𐴏𐴥𐴝𐴀𐴌𐴝 𐴊𐴞𐴘𐴠𐴊𐴠 𐴁𐴝𐴚𐴓𐴝𐴊𐴠𐴐𐴡𐴙𐴃𐴧𐴝 𐴀𐴝𐴌 𐴊𐴠𐴐𐴡𐴌 𐴁𐴥𐴟𐴃𐴡𐴌𐴠 𐴑𐴠𐴀𐴠𐴔𐴡𐴃 𐴁𐴝𐴣𐴊𐴞 𐴌𐴝𐴙𐴑𐴧𐴙𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴱 𐴊𐴠𐴐𐴡𐴌 𐴁𐴥𐴟𐴃𐴡𐴌𐴠 𐴓𐴝𐴌𐴥𐴝𐴙𐴌 𐴎𐴡𐴌𐴞𐴘𐴝 𐴊𐴟𐴑 𐴉𐴝𐴌𐴊𐴠 𐴑𐴡𐴖𐴔 𐴀𐴥𐴡𐴑𐴧𐴡𐴓 𐴱 𐴀𐴦𐴟𐴕 𐴁𐴠𐴙𐴒𐴧𐴟𐴕𐴡𐴌𐴓𐴝 𐴹 𐴵 𐴔𐴡𐴓𐴞𐴘𐴟𐴕 𐴋𐴡𐴓𐴝𐴌 𐴃𐴟𐴁𐴝𐴌𐴡 𐴁𐴠𐴙𐴐𐴢 𐴱 𐴀𐴝𐴔𐴠𐴌𐴞𐴑𐴝 𐴘𐴠 𐴔𐴡𐴊𐴡𐴊 𐴒𐴡𐴙𐴅𐴧𐴙𐴠𐴊𐴠 𐴘𐴥𐴝𐴕𐴡 𐴀𐴝𐴔𐴠𐴌𐴞𐴑𐴝𐴌 𐴏𐴡𐴉𐴞𐴌𐴠 𐴉𐴥𐴟𐴕𐴝𐴘 𐴊𐴞𐴘𐴠 𐴱𐴱