𐴀𐴡 𐴀𐴝𐴘 𐴏𐴞𐴌 𐴎𐴟𐴑𐴝𐴎𐴟𐴑 𐴋𐴦𐴝𐴘𐴧𐴠 𐴌𐴟𐴇𐴝𐴙𐴚𐴒𐴙𐴝𐴌 𐴏𐴟𐴌𐴡𐴑𐴆𐴝𐴌 𐴁𐴝𐴁𐴡𐴃𐴠 𐴘𐴟 𐴀𐴠𐴕𐴡𐴌 𐴁𐴡𐴌𐴡𐴌 𐴓𐴡𐴘 𐴈𐴟𐴖𐴝𐴈𐴡𐴘 𐴒𐴡𐴙𐴅𐴧𐴙𐴠 𐴱𐴱

𐴀𐴡 𐴀𐴝𐴘 𐴏𐴞𐴌 𐴎𐴟𐴑𐴝𐴎𐴟𐴑 𐴋𐴦𐴝𐴘 𐴱 𐴏𐴡𐴀𐴟𐴊𐴞 𐴀𐴝𐴌𐴡𐴁𐴡𐴌 𐴕𐴠𐴃𐴧𐴟𐴌𐴟𐴃𐴞𐴃 𐴱 𐴌𐴟𐴇𐴝𐴙𐴚𐴒𐴙𐴝𐴌 𐴁𐴡𐴌𐴃𐴡𐴔𐴝𐴕 𐴀𐴝𐴁𐴡𐴏𐴃𐴝𐴌 𐴁𐴝𐴁𐴡𐴃𐴠 𐴁𐴟𐴎𐴝 𐴁𐴟𐴎𐴞 𐴒𐴞𐴌𐴞𐴁𐴡𐴌𐴓𐴝 𐴱 𐴀𐴝𐴔𐴠𐴌𐴞𐴑𐴝𐴌 𐴐𐴥𐴡𐴀𐴌 𐴕𐴙𐴟𐴘𐴥𐴡𐴌𐴑𐴡𐴃 𐴱 𐴘𐴟 𐴀𐴠𐴕𐴡𐴌 𐴇𐴥𐴠𐴋 𐴑𐴗𐴝𐴄𐴝𐴌𐴡𐴃 𐴱 𐴘𐴟 𐴀𐴠𐴕𐴡𐴌 𐴅𐴠𐴕𐴠𐴌𐴡𐴓 𐴏𐴠𐴑𐴠𐴄𐴠𐴌𐴞 / 𐴀𐴝𐴕𐴄𐴡𐴕𐴞𐴀𐴡 𐴒𐴟𐴄𐴠𐴌𐴠𐴏𐴢 𐴓𐴡𐴘 𐴀𐴥𐴞𐴁𐴝𐴌 𐴀𐴡𐴉𐴞𐴏𐴡𐴃 𐴊𐴡𐴓𐴝 𐴀𐴥𐴡𐴘𐴧𐴠 𐴱 𐴀𐴥𐴠 𐴋𐴦𐴝𐴘 𐴀𐴥𐴞𐴁𐴝𐴃 𐴃𐴟𐴌𐴑𐴞 𐴁𐴝𐴚𐴓𐴝𐴊𐴠𐴐𐴢 𐴔𐴡𐴓𐴠𐴐𐴞𐴘𐴝 𐴀𐴞𐴕𐴋𐴟𐴕𐴞𐴏𐴞𐴘𐴝𐴌 𐴕𐴡𐴔𐴝𐴙𐴕𐴊𐴝 𐴀𐴝𐴌 𐴘𐴟 𐴀𐴠𐴕𐴡𐴃 𐴀𐴝𐴏𐴠𐴊𐴠 𐴱 𐴀𐴡 𐴀𐴝𐴘 𐴏𐴞𐴌 𐴃𐴡𐴌𐴉𐴡𐴌𐴃𐴟 𐴇𐴝𐴓𐴡𐴃 𐴏𐴝𐴀𐴏𐴞𐴃𐴝 𐴒𐴡𐴌𐴠𐴊𐴠 𐴋𐴦𐴝𐴘𐴧𐴡 𐴉𐴥𐴟𐴣𐴖𐴝𐴣𐴃𐴞 𐴀𐴝𐴏𐴠 𐴱𐴱

𐴁𐴡𐴌𐴔𐴝𐴌𐴃𐴟 𐴌𐴟𐴇𐴝𐴙𐴚𐴒𐴙𐴝𐴌𐴠 𐴏𐴟𐴌𐴡𐴑𐴆𐴝 𐴊𐴙𐴝 𐴉𐴡𐴌𐴞𐴁𐴡𐴊𐴠 𐴘𐴥𐴝𐴕𐴡𐴌 𐴁𐴝𐴁𐴡𐴃𐴠 𐴊𐴠𐴐𐴁𐴞𐴊𐴠𐴐𐴞 𐴀𐴞𐴕𐴏𐴝𐴉𐴢 𐴑𐴦𐴟𐴄 ( 𐴀𐴝𐴘 𐴏𐴞 𐴅𐴠𐴌 ) 𐴉𐴝𐴘𐴏𐴠𐴓𐴝 𐴀𐴝𐴌 𐴌𐴟𐴇𐴝𐴙𐴚𐴒𐴙𐴝𐴌 𐴑𐴝𐴕𐴟𐴕𐴞 𐴇𐴥𐴡𐴑𐴡𐴌𐴠 𐴱 𐴀𐴝𐴕𐴄𐴡𐴕𐴞𐴀𐴡 𐴒𐴟𐴄𐴠𐴌𐴠𐴏𐴠 𐴃𐴦𐴝𐴙𐴃 𐴒𐴡𐴙𐴅𐴧𐴙𐴠𐴊𐴠 𐴘𐴥𐴝𐴕𐴡𐴃 𐴱 𐴘𐴟 𐴀𐴠𐴕𐴡𐴌 𐴏𐴡𐴀𐴟𐴊𐴞 𐴀𐴝𐴌𐴡𐴁𐴡𐴌 𐴕𐴡𐴔𐴝𐴙𐴕𐴊𐴝 / 𐴀𐴝𐴁𐴊𐴟𐴓𐴧𐴝𐴇 𐴀𐴝𐴓 𐴔𐴟𐴀𐴝𐴓𐴧𐴞𐴔𐴞 𐴘𐴠 / 𐴒𐴟𐴄𐴠𐴌𐴠𐴏𐴡𐴌 𐴁𐴠𐴐𐴥𐴞 𐴃𐴝𐴌𐴞𐴉𐴢 𐴒𐴡𐴙𐴅𐴧𐴙𐴠 𐴱 ( 𐴀𐴝𐴘 𐴏𐴞 𐴅𐴠𐴌 ) 𐴉𐴝𐴘𐴏𐴠𐴓𐴝 𐴘𐴦𐴝𐴕 𐴱 𐴕𐴙𐴟𐴘𐴥𐴡𐴌𐴑𐴡𐴃 𐴀𐴝𐴏𐴠𐴊𐴠 ( 𐴀𐴡 𐴀𐴝𐴘 𐴏𐴞𐴌 ) 𐴔𐴞𐴔𐴁𐴡𐴌 𐴊𐴠𐴐𐴢 𐴀𐴥𐴡𐴑𐴧𐴡𐴓𐴡𐴌 𐴀𐴝𐴌 𐴏𐴡𐴀𐴟𐴊𐴞 𐴀𐴝𐴌𐴡𐴁𐴡𐴌 𐴕𐴞𐴃𐴧𐴟𐴌𐴟𐴃𐴞𐴃 𐴱 𐴁𐴡𐴌𐴔𐴝𐴌 𐴌𐴟𐴇𐴝𐴙𐴚𐴒𐴙𐴝 𐴔𐴟𐴏𐴡𐴓𐴔𐴝𐴕𐴡𐴌 𐴁𐴝𐴁𐴡𐴃𐴠 𐴎𐴟𐴑𐴝𐴎𐴟𐴑 𐴋𐴦𐴝𐴘𐴌 𐴑𐴟𐴐𐴞𐴐𐴡𐴌 𐴕𐴡𐴃𐴞𐴅𐴝 𐴁𐴡𐴓𐴞 / 𐴀𐴝𐴁𐴊𐴟𐴓𐴧𐴝𐴇 𐴘𐴠 𐴈𐴡𐴘𐴧𐴠

𐴘𐴟 𐴀𐴠𐴕 𐴅𐴞𐴕𐴞𐴌𐴡𐴓 𐴀𐴠𐴏𐴠𐴔𐴁𐴠𐴓𐴞 𐴘𐴠 ” 𐴁𐴡𐴌𐴔𐴝𐴌 𐴌𐴟𐴇𐴝𐴙𐴚𐴒𐴙𐴝 𐴔𐴟𐴏𐴡𐴓𐴔𐴝𐴕 𐴐𐴥𐴡𐴣𐴀 𐴀𐴡𐴙𐴕𐴧𐴡 𐴈𐴡𐴔 𐴐𐴡𐴙𐴚𐴒𐴙𐴝 𐴑𐴡𐴖𐴔 𐴀𐴥𐴡𐴑𐴧𐴡𐴓𐴡𐴌 𐴀𐴞𐴕𐴏𐴝𐴕𐴞 𐴇𐴥𐴡𐴑𐴡𐴌 𐴇𐴝𐴓𐴡𐴃 ” 𐴈𐴦𐴡𐴘 𐴄𐴝𐴘𐴄𐴡𐴓 𐴊𐴞 𐴏𐴡𐴕𐴑𐴠𐴓𐴝𐴂𐴢 ( 𐴌𐴠𐴎𐴡𐴓𐴡𐴐𐴥𐴠𐴕 ) 𐴉𐴝𐴏𐴢 𐴒𐴡𐴙𐴅𐴧𐴙𐴠𐴊𐴠 𐴘𐴦𐴝𐴕𐴀𐴥𐴡 𐴀𐴥𐴞𐴃𐴝𐴌𐴝𐴌 𐴑𐴟𐴐𐴞𐴐𐴡𐴌 𐴕𐴡𐴃𐴞𐴅𐴝 𐴱 𐴎𐴙𐴝𐴕𐴡𐴌 𐴉𐴡𐴌𐴡𐴏𐴃𐴝𐴁 𐴏𐴡𐴀𐴟𐴊𐴞 𐴀𐴝𐴌𐴡𐴁𐴠 𐴊𐴞 𐴱 𐴌𐴟𐴇𐴝𐴙𐴚𐴒𐴙𐴝𐴌 𐴏𐴟𐴌𐴡𐴑𐴆𐴝 𐴀𐴝𐴌 𐴉𐴦𐴟𐴓 𐴊𐴠𐴐𐴡𐴙𐴃𐴧𐴝 𐴇𐴥𐴡𐴑 𐴉𐴝𐴘𐴁𐴡𐴓𐴧𐴝 𐴉𐴝𐴘𐴏𐴠𐴓𐴝 𐴒𐴡𐴌𐴞 𐴱 𐴒𐴝𐴔𐴁𐴞𐴘𐴝𐴌 𐴊𐴟𐴖𐴝𐴌𐴝 𐴀𐴝𐴘 𐴏𐴞 𐴅𐴠 𐴑𐴦𐴟𐴍𐴡𐴃 𐴁𐴡𐴌𐴔𐴝𐴌𐴓𐴧𐴝 𐴔𐴡𐴀𐴊𐴧𐴞𐴔𐴝 𐴑𐴥𐴟𐴓𐴝𐴘𐴧𐴠 𐴱𐴱

𐴁𐴡𐴌𐴔𐴝 𐴘𐴠 𐴀𐴝𐴘 𐴏𐴞 𐴅𐴠𐴌 𐴉𐴝𐴘𐴏𐴠𐴓𐴝 𐴌𐴠 𐴔𐴝𐴕𐴞 𐴓𐴡𐴘 𐴓𐴝𐴒𐴝𐴃𐴝𐴌 𐴎𐴟𐴓𐴟𐴔 𐴒𐴡𐴌𐴝𐴃 𐴀𐴝𐴏𐴠𐴊𐴠 𐴱 𐴀𐴥𐴠𐴃𐴧𐴟 𐴉𐴥𐴞𐴌𐴞 𐴀𐴝𐴘𐴧𐴠 𐴉𐴦𐴝𐴕 𐴁𐴡𐴌𐴔𐴝 𐴌𐴠 𐴏𐴞𐴂𐴢 𐴊𐴞𐴁𐴡𐴓𐴧𐴝 𐴱 𐴊𐴠𐴐𐴁𐴞𐴊𐴠𐴐𐴡𐴌𐴃𐴟 𐴀𐴝𐴌𐴀𐴥𐴡 𐴁𐴠𐴀𐴐𐴢 𐴒𐴡𐴌𐴞 𐴑𐴟𐴐𐴞𐴐𐴢 𐴒𐴡𐴌𐴝 𐴉𐴡𐴌𐴞𐴁𐴡𐴊𐴠 𐴘𐴥𐴝𐴕 𐴀𐴝𐴌 𐴏𐴠𐴑𐴠𐴄𐴠𐴌𐴞 𐴅𐴡𐴕𐴡𐴌𐴠𐴓 / 𐴒𐴟𐴄𐴠𐴌𐴠𐴏𐴠 𐴏𐴞𐴑𐴙𐴟𐴌𐴞𐴄𐴞 𐴑𐴡𐴕𐴏𐴞𐴓𐴡𐴌𐴠 𐴘𐴥𐴝𐴕𐴡𐴌 𐴖𐴡𐴌𐴠 𐴈𐴝𐴔 𐴒𐴡𐴌𐴥𐴝𐴘 𐴁𐴡𐴓𐴧𐴝 𐴑𐴟𐴐𐴞𐴐𐴢 𐴒𐴡𐴌𐴞𐴁𐴡 𐴱 𐴎𐴠𐴀𐴠𐴕𐴠 𐴌𐴟𐴇𐴝𐴙𐴚𐴒𐴙𐴝 𐴑𐴡𐴖𐴔 𐴔𐴡𐴏𐴞𐴁𐴡𐴃𐴡𐴌𐴃𐴟 𐴀𐴟𐴊𐴧𐴝𐴌 𐴀𐴥𐴡𐴘 𐴉𐴝𐴌𐴠 / 𐴀𐴝𐴁𐴊𐴟𐴓𐴧𐴝𐴇𐴢 𐴀𐴝𐴓 𐴔𐴟𐴀𐴝𐴓𐴧𐴞𐴔𐴞 𐴘𐴠 𐴁𐴠𐴐𐴥𐴞 𐴊𐴡𐴌𐴥𐴡 𐴒𐴡𐴌𐴞 𐴈𐴡𐴘𐴧𐴠 𐴱𐴱

𐴒𐴟𐴄𐴠𐴌𐴠𐴏𐴠 𐴀𐴝𐴘 𐴏𐴞 𐴅𐴠𐴌 𐴉𐴝𐴘𐴏𐴠𐴓𐴝𐴌𐴠 𐴏𐴗𐴝𐴒𐴡𐴃 𐴒𐴡𐴌𐴞 𐴈𐴡𐴘𐴧𐴠𐴊𐴠 𐴁𐴡𐴌𐴔𐴝𐴌𐴃𐴟 𐴈𐴥𐴝𐴔𐴝𐴈𐴥𐴝 𐴀𐴝𐴘 𐴏𐴞 𐴎𐴠𐴌 𐴉𐴝𐴘𐴏𐴠𐴓𐴝 𐴌𐴠 𐴀𐴠𐴇𐴃𐴠𐴌𐴝𐴔 𐴒𐴡𐴌𐴦𐴡𐴕 𐴏𐴝 𐴱 𐴀𐴝𐴌 𐴌𐴟𐴇𐴝𐴙𐴚𐴒𐴙𐴝𐴌 𐴔𐴝𐴀𐴔𐴠𐴓𐴝 𐴘𐴦𐴝𐴕 𐴏𐴞𐴑𐴙𐴟𐴌𐴞𐴄𐴞 𐴑𐴡𐴕𐴏𐴞𐴓𐴡𐴃 𐴃𐴟𐴓𐴞𐴁𐴡 𐴁𐴡𐴓𐴞 𐴈𐴡𐴘𐴧𐴠 𐴱𐴱