𐴔𐴥𐴡𐴌𐴥𐴡𐴑𐴀𐴥𐴟𐴀𐴃 𐴓𐴝𐴌𐴝𐴙𐴌 𐴎𐴡𐴌𐴞𐴘𐴝 𐴇𐴥𐴝𐴣𐴃 𐴎𐴡𐴕𐴡𐴌 𐴔𐴡𐴖𐴃𐴢 𐴱𐴱

𐴒𐴡𐴃𐴡 𐴈𐴝𐴓𐴞𐴘𐴝 𐴀𐴝𐴌𐴑𐴝𐴕𐴡𐴃 𐴔𐴥𐴡𐴌𐴥𐴡𐴑𐴀𐴥𐴟𐴀 𐴐𐴥𐴡𐴀𐴌 𐴀𐴝𐴌 𐴔𐴥𐴝𐴔𐴁𐴡𐴌𐴥𐴝 𐴐𐴥𐴡𐴀𐴌𐴡𐴌 𐴔𐴝𐴎𐴠 𐴀𐴝𐴏𐴠𐴊𐴠 𐴱 𐴔𐴥𐴡𐴌𐴥𐴡𐴚 𐴁𐴗𐴠 𐴆𐴙𐴠 𐴉𐴝𐴌𐴝𐴌 𐴈𐴝𐴣𐴏𐴠 𐴈𐴝𐴛𐴏𐴧𐴝 𐴔𐴠𐴓𐴠𐴄𐴠𐴌𐴞𐴌 𐴒𐴝𐴌𐴞 𐴸 𐴱 𐴖𐴥𐴝𐴕𐴡𐴌𐴠 𐴔𐴡𐴒𐴁𐴝𐴒𐴞 𐴘𐴠 𐴔𐴦𐴝𐴙𐴕 𐴁𐴟𐴔 𐴁𐴟𐴖𐴝𐴘 𐴀𐴠𐴄𐴠𐴑 𐴒𐴡𐴙𐴅𐴧𐴙𐴠𐴊𐴠 𐴱 𐴘𐴦𐴝𐴕𐴃𐴟 𐴓𐴡𐴃𐴞 𐴓𐴝𐴌𐴥𐴝𐴘 𐴊𐴡𐴌𐴥𐴡 𐴔𐴡𐴌𐴥𐴡 𐴐𐴟𐴌𐴟 𐴀𐴥𐴡𐴘𐴧𐴠 𐴱 𐴀𐴥𐴠 𐴓𐴝𐴌𐴥𐴝𐴙𐴃 𐴵 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴔𐴟𐴏𐴡𐴓𐴔𐴝𐴕 𐴐𐴡𐴇𐴞𐴊 𐴀𐴥𐴡𐴘𐴧𐴠 𐴀𐴝𐴌 𐴲 𐴎𐴡𐴕 𐴔𐴡𐴒𐴡𐴌 𐴔𐴡𐴖𐴃 𐴀𐴥𐴡𐴘𐴧𐴠 𐴱 𐴀𐴝𐴌 𐴹 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴳 𐴎𐴡𐴕 𐴔𐴡𐴒𐴢 𐴒𐴥𐴝𐴙𐴓 𐴀𐴥𐴡𐴘𐴧𐴠 𐴁𐴡𐴓𐴞 𐴔𐴥𐴡𐴌𐴥𐴡𐴑 𐴀𐴥𐴟𐴀 𐴐𐴥𐴡𐴀𐴌𐴡𐴌 𐴀𐴠𐴔 𐴂𐴞 / 𐴀𐴥𐴟𐴀 𐴄𐴥𐴗𐴥𐴠𐴚 𐴏𐴝 𐴏𐴞𐴚𐴠 𐴀𐴝𐴌 𐴀𐴠𐴉𐴢 𐴀𐴠𐴌𐴠 𐴈𐴡𐴘𐴧𐴠 𐴱𐴱

𐴒𐴥𐴝𐴙𐴓 𐴀𐴥𐴡𐴘𐴧𐴠𐴊𐴠 𐴀𐴥𐴟𐴕𐴡𐴌 𐴁𐴥𐴟𐴃𐴡𐴌𐴠 𐴇𐴥𐴝𐴓𐴡𐴃 𐴁𐴠𐴐𐴥𐴞 𐴈𐴥𐴡𐴌𐴝𐴁 𐴀𐴥𐴡𐴘𐴧𐴠𐴊𐴠 𐴀𐴠𐴑 𐴎𐴡𐴕𐴡𐴌𐴠 𐴊𐴠𐴐𐴁𐴞𐴊𐴠𐴐𐴞 𐴌𐴥𐴠𐴋 𐴑𐴡𐴌𐴡𐴏𐴠 𐴀𐴝𐴙𐴑𐴧𐴙𐴝𐴁 𐴕𐴞𐴎𐴝𐴘 𐴊𐴝𐴁𐴝𐴘 𐴒𐴡𐴌𐴠𐴌 𐴱 𐴎𐴡𐴈𐴡𐴔 𐴉𐴝𐴃𐴡𐴓 𐴔𐴞𐴑𐴧𐴙𐴝 𐴀𐴝𐴏𐴠𐴊𐴠 𐴀𐴥𐴞𐴃𐴝𐴌𐴝𐴌𐴠 𐴔𐴥𐴡𐴌𐴥𐴡𐴚 𐴁𐴗𐴠𐴌 𐴋𐴝𐴑𐴄𐴡𐴌 𐴈𐴥𐴝𐴕𐴝𐴃 𐴊𐴝𐴁𐴝𐴘 𐴒𐴡𐴌𐴠𐴌 𐴱 𐴔𐴡𐴌𐴞 𐴒𐴞𐴘𐴡𐴘𐴊𐴠 𐴀𐴝𐴌 𐴒𐴥𐴝𐴙𐴓 𐴀𐴥𐴡𐴘𐴧𐴠𐴊𐴠 𐴀𐴥𐴟𐴀𐴕𐴁𐴝𐴊𐴠 𐴀𐴝𐴌𐴀𐴥𐴡 𐴰 𐴱 𐴎𐴡𐴕 𐴉𐴝𐴌𐴙𐴓𐴧𐴝 𐴔𐴝𐴕𐴟𐴙𐴐𐴢 𐴀𐴥𐴝𐴣𐴎𐴞 𐴒𐴞𐴘𐴡𐴘 𐴃𐴟𐴖𐴝𐴘 𐴕𐴡 𐴉𐴝𐴌 𐴁𐴡𐴓𐴞 𐴱 𐴁𐴥𐴟𐴃𐴡𐴓𐴧𐴟𐴚 𐴉𐴝𐴌𐴝𐴌 𐴀𐴥𐴟𐴑 𐴆𐴥𐴙𐴟𐴑 𐴌𐴥𐴠𐴔𐴤𐴟 / 𐴀𐴥𐴟𐴀 𐴔𐴡𐴚 𐴏𐴝 𐴛𐴥𐴗𐴥𐴠𐴚𐴠 𐴈𐴡𐴘𐴧𐴠 𐴱 𐴀𐴥𐴝𐴣𐴎𐴞 𐴒𐴞𐴘𐴡𐴘𐴊𐴠 𐴰 𐴱 𐴎𐴡𐴕 𐴀𐴥𐴟𐴀𐴕 𐴑𐴞 𐴔𐴡𐴌𐴞 𐴒𐴞𐴘𐴡𐴘𐴊𐴠 𐴕𐴥𐴝𐴑𐴞 𐴔𐴠𐴓𐴠𐴄𐴠𐴌𐴞 𐴘𐴠 𐴊𐴤𐴡𐴌𐴞 𐴕𐴞𐴘𐴡𐴘𐴊𐴠 𐴈𐴥𐴝𐴄𐴞 𐴁𐴝𐴉𐴠 𐴕𐴡 𐴎𐴝𐴕𐴠 𐴱𐴱

𐴔𐴦𐴝𐴙𐴕 𐴁𐴟𐴔 𐴉𐴥𐴞𐴄 𐴒𐴡𐴌𐴦𐴡𐴙𐴕𐴧𐴝 𐴀𐴝𐴌 𐴓𐴝𐴌𐴥𐴝𐴘 𐴒𐴡𐴙𐴌𐴅𐴧𐴙𐴠𐴊𐴠 𐴀𐴥𐴞𐴃𐴝𐴌𐴝 𐴂𐴝𐴂𐴓𐴞𐴑 𐴉𐴟𐴐𐴝𐴑 𐴉𐴞𐴕𐴊𐴝 𐴊𐴠 𐴀𐴥𐴠𐴃𐴡𐴓𐴧𐴝 𐴱 𐴔𐴠𐴓𐴠𐴄𐴠𐴌𐴞 𐴀𐴥𐴡𐴑𐴧𐴡𐴓𐴠 𐴐𐴟𐴁𐴤𐴝 𐴒𐴡𐴌𐴞 𐴀𐴝𐴃𐴡𐴌 𐴈𐴝𐴣𐴏𐴡𐴌 𐴔𐴝𐴕𐴟𐴙𐴐𐴢 𐴈𐴡𐴊𐴦𐴟𐴕 𐴊𐴤𐴌𐴞 𐴃𐴥𐴝𐴑𐴞𐴑 𐴒𐴡𐴌𐴠𐴌𐴊𐴠 𐴀𐴝𐴏𐴠𐴁𐴡𐴓𐴞 𐴔𐴠𐴓𐴠𐴄𐴠𐴌𐴞𐴌 𐴃𐴡𐴌𐴉𐴡𐴌 𐴈𐴡𐴃𐴥𐴝 𐴈𐴦𐴡𐴙𐴕𐴧𐴝 𐴁𐴟𐴔𐴥𐴟 𐴆𐴥𐴙𐴟𐴑 / 𐴎𐴡𐴔𐴥𐴞𐴚 𐴄𐴟𐴚𐴠 𐴈𐴡𐴘𐴧𐴠 𐴱 𐴔𐴠𐴓𐴠𐴄𐴠𐴌𐴞 𐴀𐴥𐴡𐴑𐴧𐴡𐴓 𐴓𐴝𐴌𐴥𐴝𐴙𐴃 𐴀𐴥𐴡𐴣𐴍𐴞𐴓𐴠 𐴂𐴝𐴂𐴓𐴞𐴑 𐴀𐴥𐴡𐴑𐴧𐴡𐴓𐴡𐴌𐴠 𐴔𐴝𐴌𐴦𐴡𐴕 𐴊𐴤𐴡𐴌𐴦𐴡𐴕 𐴀𐴥𐴞𐴃𐴝𐴌𐴝 𐴉𐴡𐴙𐴃𐴧𐴡 𐴊𐴞𐴕𐴧𐴝 𐴈𐴝𐴔 𐴁𐴡𐴓𐴞 𐴔𐴡𐴒𐴁𐴝𐴒𐴞𐴌 𐴃𐴡𐴌𐴉𐴡𐴌 𐴈𐴡𐴃𐴥𐴝 𐴈𐴦𐴡𐴙𐴕𐴧𐴝 / 𐴑𐴝𐴙𐴚 𐴏𐴥𐴟𐴑𐴝 𐴘𐴠 𐴈𐴡𐴘𐴧𐴠 𐴱 𐴉𐴠𐴌𐴖𐴝𐴌𐴞𐴌 𐴶 𐴲 – 𐴸 𐴲 𐴀𐴠 𐴃𐴞𐴕 𐴊𐴞𐴕𐴡𐴃 𐴁𐴥𐴟𐴏𐴞𐴊𐴡𐴚 𐴑𐴙𐴡𐴑𐴄𐴡 𐴔𐴥𐴝𐴔𐴁𐴡𐴌𐴥𐴝 𐴔𐴥𐴡𐴌𐴥𐴡𐴑 𐴀𐴥𐴟 𐴎𐴝𐴒𐴝 𐴀𐴦𐴞𐴕𐴡𐴃 𐴔𐴠𐴓𐴠𐴄𐴠𐴌𐴞 𐴀𐴝𐴌 𐴔𐴡𐴒𐴁𐴝𐴒𐴞𐴌 𐴔𐴝𐴎𐴠 𐴓𐴝𐴌𐴥𐴝𐴙𐴃 𐴱 𐴂𐴝𐴂𐴓𐴞𐴑 𐴔𐴡𐴌𐴝 𐴀𐴝𐴌 𐴒𐴥𐴝𐴙𐴓 𐴁𐴠𐴐𐴥𐴞 𐴀𐴥𐴡𐴘𐴧𐴠 𐴱𐴱