𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴀𐴝𐴌𐴑𐴝𐴕𐴡𐴃 𐴃𐴥𐴝𐴑𐴝 𐴔𐴡𐴐𐴑𐴞𐴓 𐴀𐴥𐴡𐴕𐴠 𐴱 𐴀𐴝𐴌𐴑𐴝𐴕 𐴏𐴥𐴝𐴌𐴞 𐴕𐴠𐴓𐴞 𐴎𐴦𐴝 𐴁𐴝𐴌𐴦𐴠𐴌 𐴱𐴱

𐴔𐴡𐴒𐴧𐴗𐴥𐴠 𐴋𐴞𐴐𐴄𐴞𐴑𐴡𐴌 𐴔𐴥𐴝𐴚 𐴓𐴤𐴝 𐴐𐴥𐴡𐴀𐴌𐴡𐴌 𐴀𐴠𐴓𐴝𐴑𐴝𐴃 𐴊𐴤𐴡𐴌𐴝 𐴉𐴡𐴙𐴅𐴧𐴙𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴵 𐴱 𐴎𐴡𐴕𐴡𐴌𐴠 𐴱 𐴒𐴡𐴃𐴡 𐴈𐴝𐴓𐴞𐴘𐴝 𐴉𐴡𐴄𐴟 𐴘𐴝 𐴀𐴝𐴌 𐴈𐴡𐴕𐴥𐴡 𐴏𐴥𐴡𐴏𐴝𐴁𐴟𐴃 𐴏𐴥𐴝𐴌𐴝 𐴱 𐴒𐴝𐴙𐴌 𐴑𐴝𐴕𐴟𐴕𐴞 𐴏𐴥𐴡𐴉𐴡𐴌 𐴒𐴡𐴌𐴠𐴌 𐴁𐴡𐴓𐴞 𐴈𐴦𐴡𐴘 𐴱 𐴔𐴥𐴝𐴚 𐴓𐴤𐴝 𐴐𐴥𐴡𐴀𐴌𐴡𐴌 𐴀𐴠𐴔𐴠𐴒𐴠𐴌𐴞𐴐𐴠𐴕 𐴉𐴥𐴡𐴌𐴘𐴝𐴊𐴞 𐴁𐴡𐴕𐴞 𐴉𐴡𐴄𐴟𐴌 𐴑𐴝𐴕𐴟𐴕𐴡𐴌 𐴊𐴤𐴝𐴌𐴝 ( 𐴶 / 𐴳 ) 𐴓𐴡𐴘 𐴔𐴡𐴀𐴊𐴧𐴞𐴔𐴝 𐴑𐴤𐴟𐴓𐴞 𐴱 𐴇𐴝𐴣𐴏𐴝𐴌𐴞𐴃 𐴉𐴥𐴟𐴕𐴝 𐴉𐴥𐴟𐴕𐴞 𐴌𐴓𐴝 𐴃𐴟𐴙𐴓𐴧𐴙𐴠𐴊𐴠 𐴀𐴥𐴠𐴍𐴠 𐴱 𐴀𐴝𐴣𐴀𐴌𐴝 𐴊𐴝𐴓𐴝𐴓𐴡𐴌 𐴀𐴥𐴝𐴃𐴡𐴃 𐴉𐴡𐴌𐴞 𐴀𐴝𐴙𐴐𐴧𐴞𐴊𐴠 𐴁𐴡𐴓𐴞 𐴈𐴡𐴘𐴧𐴠𐴊𐴠 𐴘𐴦𐴝𐴕 𐴔𐴝𐴀𐴔𐴠𐴓𐴝 𐴊𐴝𐴙𐴌 𐴒𐴡𐴌𐴠𐴌𐴊𐴠 𐴀𐴟𐴑𐴞𐴓 / 𐴋𐴡 𐴏𐴝𐴎𐴝𐴚 𐴔𐴠𐴌𐴥𐴝𐴚 𐴔𐴠𐴌𐴥𐴠 𐴖𐴥𐴝𐴚𐴠 𐴀𐴝𐴌 𐴀𐴠𐴉𐴢 𐴀𐴠 𐴌𐴠 𐴈𐴡𐴘𐴧𐴠 𐴱𐴱

𐴔𐴥𐴝𐴚 𐴓𐴤𐴝 𐴐𐴥𐴡𐴀𐴌𐴡𐴃 𐴊𐴤𐴡𐴌𐴝 𐴉𐴡𐴙𐴅𐴧𐴙𐴠𐴊𐴠 𐴁𐴠𐴙𐴒𐴧𐴟𐴕𐴠 𐴹 𐴱 𐴎𐴡𐴕 𐴱 𐴁𐴠𐴍𐴝 𐴸 𐴎𐴡𐴕 𐴁𐴠𐴍𐴞 𐴷 𐴎𐴡𐴕 𐴀𐴝𐴌 𐴴 𐴎𐴡𐴕 𐴒𐴟𐴌𐴝 𐴁𐴡𐴐𐴢 𐴕𐴦𐴡𐴉𐴟𐴌𐴝𐴊𐴠 𐴀𐴥𐴠𐴃𐴡𐴓𐴧𐴝 𐴱 𐴔𐴥𐴝𐴕𐴋𐴠𐴓𐴠𐴃 𐴉𐴟𐴖𐴝𐴙𐴕 𐴉𐴝𐴓𐴠𐴊𐴠 𐴀𐴞𐴐𐴑𐴟𐴓𐴡𐴃 𐴉𐴦𐴡𐴣𐴏𐴝𐴘 𐴊𐴞𐴘𐴠 𐴱 𐴀𐴝𐴌𐴑𐴝𐴕𐴡𐴃 𐴁𐴡𐴌𐴔𐴝 𐴇𐴥𐴡𐴑𐴟𐴔𐴡𐴃𐴠 𐴔𐴟𐴏𐴡𐴓𐴔𐴝𐴕 𐴀𐴥𐴡𐴑𐴧𐴡𐴓𐴡𐴌 𐴏𐴡𐴓𐴝𐴉𐴞𐴌𐴝 𐴊𐴝𐴁𐴝𐴘 𐴀𐴡𐴐𐴟𐴃 𐴃𐴝𐴓𐴞𐴔 𐴁𐴠𐴙𐴒𐴧𐴞𐴕𐴡𐴌 𐴖𐴡𐴌𐴠 𐴂𐴝𐴁𐴡𐴕𐴊𐴞 𐴓𐴝𐴒𐴝𐴘 𐴊𐴦𐴡𐴕𐴠 𐴱 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴃𐴟 𐴉𐴡𐴌𐴝𐴕𐴠 𐴁𐴝𐴏𐴞 𐴃𐴥𐴝𐴑𐴡𐴕 𐴔𐴡𐴐𐴑𐴞𐴓 𐴀𐴥𐴡𐴘𐴧𐴠𐴊𐴠 𐴀𐴥𐴠𐴃𐴡𐴓𐴧𐴝 𐴱 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴠 𐴓𐴝𐴑 𐴓𐴝𐴑 𐴄𐴞𐴛𐴝𐴊𐴞 𐴏𐴟𐴑𐴠 𐴎𐴞𐴀𐴞𐴑𐴧𐴙𐴝 𐴊𐴠𐴑𐴠𐴌 𐴎𐴝𐴌𐴒𐴥𐴡𐴘𐴊𐴠 𐴁𐴡𐴓𐴞 𐴀𐴟𐴑𐴞𐴓 / 𐴋𐴡 𐴏𐴝𐴎𐴝𐴚 𐴔𐴠𐴌𐴥𐴝𐴚 𐴔𐴠𐴌𐴥𐴠 𐴖𐴥𐴝𐴚𐴠 𐴈𐴡𐴘𐴧𐴠 𐴱𐴱

𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴔𐴦𐴟𐴏𐴡𐴔 𐴄𐴥𐴞𐴑 𐴀𐴥𐴡𐴘𐴓𐴠 𐴉𐴟𐴃 𐴎𐴞 𐴔𐴝𐴣 𐴁𐴝𐴉𐴢 𐴉𐴝𐴓𐴞 𐴁𐴝𐴌 𐴕𐴙𐴡𐴃 𐴓𐴡𐴘 𐴱 𐴐𐴟𐴊𐴥𐴠 𐴁𐴡𐴘𐴊𐴠𐴐𐴡𐴌 𐴀𐴟𐴎𐴟 𐴎𐴝𐴌𐴊𐴠 𐴕𐴦𐴡 𐴌𐴠𐴚𐴒𐴟𐴕𐴡𐴌 𐴀𐴥𐴞𐴑𐴧𐴙𐴝 𐴘𐴥𐴡 𐴒𐴥𐴡𐴓𐴠𐴌𐴒𐴥𐴝𐴘𐴊𐴠 𐴀𐴥𐴠𐴍𐴠 𐴉𐴡𐴣𐴃𐴡𐴃 𐴊𐴤𐴡𐴌𐴝𐴃 𐴉𐴡𐴌𐴠𐴌𐴊𐴠 𐴱 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴁𐴡𐴌𐴔𐴝 𐴀𐴝𐴒𐴝 𐴒𐴟𐴌𐴝 𐴉𐴡𐴣𐴃𐴠 𐴉𐴡𐴣𐴃𐴠 𐴊𐴤𐴡𐴌𐴝𐴃 𐴉𐴡𐴌𐴠𐴌𐴊𐴠 𐴱 𐴔𐴝𐴀𐴔𐴠𐴓𐴝 𐴘𐴦𐴝𐴕 𐴈𐴥𐴡𐴃𐴡𐴔 𐴒𐴡𐴙𐴌𐴃𐴡 𐴔𐴡𐴕𐴠 𐴈𐴡𐴘𐴓𐴠 𐴱 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴠 𐴔𐴟𐴓𐴥𐴝 𐴁𐴟𐴕𐴘𐴝𐴊𐴞 𐴀𐴞𐴕𐴏𐴝𐴕𐴞 𐴇𐴥𐴡𐴑 𐴊𐴦𐴡𐴕𐴧𐴝𐴕 𐴁𐴡𐴌𐴔𐴝 𐴇𐴥𐴡𐴑𐴟𐴔𐴡𐴃𐴡𐴌 𐴖𐴡𐴌𐴠 𐴎𐴡𐴌𐴟𐴌𐴞 𐴁𐴡𐴓𐴞 𐴌𐴟𐴇𐴝𐴙𐴚𐴒𐴙𐴝𐴌 𐴈𐴝𐴔𐴒𐴡𐴌𐴦𐴡𐴘𐴧𐴝 / 𐴀𐴥𐴟𐴀 𐴃𐴝𐴇𐴠𐴌𐴠 𐴈𐴡𐴘𐴧𐴠 𐴱𐴱

𐴹 𐴱 𐴰 𐴲 𐴋𐴞𐴏𐴡𐴔𐴁𐴡𐴌 𐴀𐴥𐴡𐴘𐴃𐴠 𐴰 𐴲 𐴰 𐴲 𐴉𐴠𐴌𐴖𐴝𐴌𐴞 𐴉𐴡𐴙𐴅𐴧𐴡𐴕𐴃𐴡 𐴳 𐴔𐴝𐴐𐴡𐴌 𐴁𐴥𐴟𐴃𐴡𐴌𐴠 𐴔𐴥𐴝𐴚 𐴓𐴤𐴝 𐴐𐴥𐴡𐴀𐴌𐴡𐴌 𐴀𐴠𐴔𐴠𐴒𐴠𐴌𐴞𐴐𐴠𐴕𐴠 𐴰 𐴰 𐴳 𐴓𐴡𐴃𐴞 𐴌𐴟𐴇𐴝𐴙𐴚𐴒𐴙𐴝 𐴊𐴤𐴡𐴙𐴅𐴧𐴙𐴠 𐴱 𐴀𐴥𐴠𐴃𐴧𐴟 𐴰 𐴰 𐴱 𐴓𐴡𐴃 𐴀𐴝𐴣𐴀𐴌 𐴕𐴞𐴎𐴡𐴌 𐴀𐴥𐴝𐴃𐴡𐴃 𐴉𐴡𐴙𐴅𐴧𐴙𐴠 𐴁𐴡𐴓𐴞 / 𐴀𐴟𐴑𐴞𐴓 𐴋𐴡 𐴔𐴠𐴌𐴥𐴠 𐴖𐴥𐴝𐴚𐴠 𐴈𐴡𐴘𐴧𐴠 𐴱𐴱

𐴀𐴝𐴌𐴑𐴝𐴕𐴡𐴃 𐴃𐴥𐴝𐴑𐴠𐴊𐴠 𐴁𐴠𐴀𐴐𐴢 𐴀𐴥𐴞𐴏𐴧𐴝 𐴌𐴟𐴇𐴝𐴙𐴚𐴒𐴙𐴝 𐴘𐴠 𐴉𐴡𐴄𐴟 𐴕𐴦𐴡 𐴉𐴝 𐴸 𐴴 𐴹 𐴱 𐴐𐴡𐴕𐴡𐴃 𐴁𐴡𐴌𐴔𐴝 𐴀𐴝𐴎𐴝𐴊 𐴀𐴥𐴡𐴘 𐴁𐴝𐴊𐴠 𐴱 𐴁𐴡𐴌𐴔𐴝 𐴇𐴥𐴡𐴑𐴟𐴔𐴡𐴃𐴠 𐴁𐴡𐴌𐴔𐴝𐴌 𐴊𐴠𐴐𐴡𐴙𐴃𐴧𐴝 𐴀𐴥𐴡𐴑𐴧𐴡𐴓𐴡𐴌𐴠 𐴉𐴡𐴄𐴟 𐴊𐴞𐴘𐴝 𐴐𐴥𐴟𐴌𐴟 𐴒𐴡𐴙𐴅𐴧𐴙𐴠𐴊𐴠 𐴀𐴡𐴑𐴃𐴡𐴃 𐴱 𐴀𐴝𐴌𐴑𐴝𐴕𐴡𐴌 𐴀𐴝𐴏𐴡𐴓𐴞 𐴁𐴥𐴝𐴐𐴞𐴕𐴊𐴝 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴁𐴠𐴙𐴒𐴧𐴟𐴕𐴠 𐴉𐴡𐴄𐴟 𐴉𐴦𐴝𐴙𐴓 𐴱 𐴁𐴡𐴌𐴔𐴝 𐴘𐴠 𐴲 𐴸 𐴹 𐴱 𐴐𐴡𐴕𐴡𐴃 𐴔𐴡𐴕𐴎𐴡𐴑𐴧𐴝 𐴑𐴝𐴕𐴟𐴕 𐴁𐴝𐴕𐴝𐴘 𐴀𐴝𐴌𐴑𐴝𐴕𐴡𐴌 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴠 𐴁𐴝𐴚𐴓𐴝𐴊𐴠𐴐𐴡𐴌𐴃𐴟 𐴀𐴝𐴎𐴝𐴊𐴞𐴌 𐴁𐴝𐴊𐴠 𐴒𐴥𐴡𐴙𐴓𐴧𐴠𐴊𐴠 𐴈𐴡𐴘 𐴉𐴡𐴄𐴟 𐴊𐴞𐴘𐴝 𐴁𐴡𐴕 𐴒𐴡𐴌𐴞 𐴉𐴥𐴠𐴓𐴝𐴘𐴧𐴠 𐴱 𐴌𐴟𐴇𐴝𐴙𐴚𐴒𐴙𐴝 𐴑𐴦𐴝𐴋 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴠 𐴕𐴡 𐴓𐴦𐴡𐴌 𐴱𐴱 N V C 𐴀𐴥𐴡𐴑𐴧𐴡𐴓𐴠 𐴘𐴥𐴡 𐴇𐴥𐴡𐴑𐴟𐴔𐴡𐴃𐴠 𐴁𐴝𐴚𐴒𐴝𐴓𐴞 𐴈𐴦𐴡𐴌𐴊𐴠 𐴘𐴥𐴝𐴕𐴡𐴌𐴠 𐴑𐴡𐴁𐴟𐴓 𐴕𐴡𐴒𐴡𐴌𐴠 𐴱