𐴌𐴟𐴇𐴝𐴙𐴚𐴒𐴙𐴝 𐴐𐴥𐴡𐴚𐴑𐴡𐴄𐴡𐴌 𐴁𐴝𐴁𐴡𐴃𐴠 𐴀𐴝𐴕𐴅𐴠𐴓𐴞𐴕𐴝 𐴅𐴟𐴓𐴞 𐴘𐴠 𐴁𐴝𐴚𐴓𐴝𐴊𐴠𐴐𐴡𐴌 𐴁𐴡𐴌𐴡 𐴀𐴟𐴎𐴞𐴌𐴡𐴌 𐴃𐴝𐴌𐴞𐴉𐴢 𐴒𐴡𐴙𐴅𐴧𐴙𐴠 𐴱𐴱

𐴌𐴞𐴉𐴟𐴎𐴞𐴌 𐴁𐴝𐴁𐴡𐴃𐴠 𐴘𐴟 𐴀𐴠𐴕 ( 𐴑𐴡𐴖𐴔𐴞 𐴏𐴥𐴡𐴔𐴡𐴒𐴝 ) 𐴔𐴡𐴇𐴝 𐴑𐴡𐴔𐴞𐴐𐴕𐴝𐴌𐴡𐴌 𐴏𐴡𐴉𐴞𐴌 ( 𐴊𐴤𐴟𐴃 ) 𐴱 𐴇𐴡𐴓𐴞 𐴀𐴦𐴟𐴋 𐴀𐴠𐴑𐴄𐴞𐴏𐴢 / 𐴀𐴝𐴕𐴅𐴠𐴓𐴞𐴕𐴝 𐴅𐴟𐴓𐴞 𐴘𐴠 𐴱 𐴁𐴝𐴚𐴓𐴝𐴊𐴠𐴐𐴡𐴌 𐴁𐴡𐴌𐴡 𐴀𐴟𐴎𐴞𐴌 / 𐴐𐴠𐴙𐴈𐴢 𐴇𐴥𐴝𐴏𐴞𐴕𐴝𐴌 𐴈𐴝𐴣𐴏𐴠 𐴱 𐴀𐴥𐴞𐴁𐴝 𐴘𐴠 𐴌𐴟𐴇𐴝𐴙𐴚𐴒𐴙𐴝𐴌 𐴁𐴝𐴁𐴡𐴃𐴠 𐴱 𐴕𐴠𐴃𐴝 𐴒𐴞𐴌𐴞𐴌 𐴌𐴦𐴟𐴓 𐴀𐴝𐴊𐴝 𐴒𐴡𐴙𐴅𐴧𐴙𐴠𐴊𐴠 𐴘𐴥𐴝𐴕𐴡𐴌 𐴖𐴡𐴌𐴠 𐴀𐴠𐴑𐴧𐴝𐴕 𐴃𐴝𐴌𐴞𐴉𐴢 𐴕𐴝𐴔𐴝 𐴉𐴦𐴡𐴣𐴏𐴝𐴘𐴧𐴠 𐴱 𐴒𐴡𐴃𐴡 𐴈𐴝𐴓𐴞𐴘𐴝 𐴌𐴦𐴡𐴘 𐴁𐴝𐴌𐴠 𐴁𐴝𐴚𐴓𐴝𐴊𐴠𐴐𐴡𐴌 𐴁𐴡𐴘𐴊𐴠𐴐𐴢 𐴀𐴟𐴎𐴞𐴌𐴠 𐴀𐴠𐴓𐴝𐴕 𐴒𐴡𐴙𐴅𐴧𐴙𐴠𐴊𐴠 𐴱 𐴁𐴝𐴚𐴓𐴝𐴊𐴠𐴐𐴡𐴌 𐴁𐴡𐴌𐴡 𐴀𐴟𐴎𐴞𐴌𐴠 𐴌𐴟𐴇𐴝𐴙𐴚𐴒𐴙𐴝 𐴌𐴠 𐴏𐴥𐴝𐴀𐴌𐴝 𐴀𐴝𐴌 𐴇𐴠𐴉𐴝𐴎𐴡𐴃𐴞 𐴊𐴞𐴘𐴠𐴊𐴠 𐴘𐴥𐴝𐴕𐴡𐴃 / 𐴀𐴝𐴕𐴅𐴠𐴓𐴞𐴕𐴝 𐴅𐴟𐴓𐴞 𐴘𐴠 𐴱 𐴀𐴠𐴑𐴧𐴝𐴕 𐴃𐴝𐴌𐴞𐴉𐴢 𐴕𐴝𐴔𐴝 𐴉𐴦𐴡𐴣𐴏𐴝𐴘𐴧𐴠 𐴱𐴱

𐴀𐴝𐴕𐴅𐴠𐴓𐴞𐴕𐴝 𐴅𐴟𐴓𐴞 𐴘𐴠 𐴃𐴝𐴌𐴞𐴉𐴢 𐴕𐴝𐴔𐴝𐴃 𐴘𐴦𐴝𐴕𐴡 𐴓𐴠𐴙𐴑𐴧𐴙𐴠𐴊𐴠 𐴱 ( 𐴘𐴟 𐴀𐴠𐴕 𐴀𐴠𐴐𐴢 𐴏𐴞 𐴀𐴝𐴌𐴠 ) 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴀𐴞𐴎𐴧𐴡𐴃𐴡𐴌 𐴏𐴥𐴝𐴣𐴀𐴃𐴠 𐴕𐴞𐴎𐴡𐴌 𐴊𐴠𐴐𐴡𐴃 𐴖𐴝𐴉𐴠𐴏𐴢 𐴎𐴝𐴘 𐴉𐴝𐴌𐴠 𐴉𐴦𐴝𐴕 𐴀𐴝𐴌 𐴇𐴥𐴝𐴔𐴞𐴐𐴝 𐴃𐴥𐴝𐴑𐴞 𐴉𐴝𐴌𐴠 𐴉𐴦𐴝𐴕 𐴱 𐴁𐴡𐴌𐴔𐴝 𐴇𐴥𐴡𐴑𐴟𐴔𐴡𐴃 𐴓𐴡𐴘 𐴔𐴞𐴓𐴞 𐴱 𐴁𐴤𐴝𐴓𐴝 𐴇𐴝𐴓𐴡𐴃 𐴁𐴝𐴕𐴝𐴘 𐴁𐴡𐴓𐴧𐴝 𐴓𐴝𐴒𐴝𐴃𐴝𐴌 𐴑𐴟𐴐𐴞𐴐𐴢 𐴒𐴡𐴌𐴞 𐴎𐴝𐴘𐴁𐴡 𐴱 𐴉𐴠𐴌𐴖𐴝𐴌𐴞 𐴹 𐴱 𐴰 𐴲 𐴐𐴥𐴡𐴕𐴡𐴃 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞𐴌 𐴑𐴠𐴀𐴠𐴔𐴡𐴃 𐴱 𐴘𐴟 𐴀𐴠𐴕 𐴀𐴠𐴐𐴢 𐴏𐴞 𐴀𐴝𐴌𐴡𐴌 𐴈𐴦𐴝𐴏𐴢 𐴕𐴡𐴔𐴝𐴙𐴕𐴊𐴝 𐴀𐴥𐴞𐴏𐴝𐴉𐴠 𐴏𐴝𐴘𐴃𐴡 𐴘𐴥𐴡 𐴀𐴝𐴐𐴧𐴞𐴀𐴓 𐴱𐴱

𐴀𐴥𐴞𐴁𐴝 𐴘𐴠 𐴀𐴝𐴌𐴀𐴥𐴡 𐴀𐴝𐴐𐴥𐴝 𐴒𐴡𐴙𐴅𐴧𐴙𐴠𐴊𐴠 𐴱 𐴌𐴟𐴇𐴝𐴙𐴚𐴒𐴙𐴝 𐴀𐴞𐴕𐴏𐴝𐴕 𐴊𐴦𐴟𐴏𐴃 𐴐𐴥𐴡𐴚𐴑𐴡𐴄𐴡𐴌 𐴁𐴝𐴁𐴡𐴃𐴠 𐴱 𐴔𐴝𐴌𐴠𐴆 𐴰 𐴲 𐴰 𐴲 𐴀𐴥𐴡𐴘𐴃𐴠 ( 𐴅𐴟𐴖𐴥𐴝𐴙𐴕 𐴌𐴠𐴏𐴂𐴦𐴡𐴕 𐴂𐴠𐴓𐴝𐴕 ) 𐴈𐴝𐴔 𐴀𐴥𐴡𐴉𐴦𐴝𐴕 𐴔𐴞𐴓𐴞𐴎𐴟𐴓𐴞 𐴂𐴡𐴌𐴟𐴒𐴠𐴌𐴝𐴔 𐴒𐴡𐴌𐴝𐴎𐴝𐴘𐴁𐴦𐴡 𐴀𐴝𐴌 𐴌𐴞𐴉𐴟𐴎𐴞𐴌𐴓𐴝 𐴉𐴥𐴝𐴕 𐴃𐴟𐴓𐴝 𐴘𐴥𐴡 𐴃𐴠𐴙𐴎 𐴒𐴡𐴌𐴝 𐴎𐴝𐴘𐴁𐴦𐴡 𐴱 𐴀𐴝𐴌 𐴔𐴝𐴙𐴕𐴐𐴡𐴃𐴝 𐴀𐴥𐴞𐴏𐴝𐴉𐴠 𐴉𐴟𐴌𐴝 𐴊𐴟𐴕𐴞𐴘𐴝𐴙𐴌 𐴔𐴝𐴙𐴕𐴐𐴡𐴌𐴠 𐴌𐴟𐴇𐴝𐴙𐴚𐴒𐴙𐴝𐴌 𐴔𐴝𐴀𐴔𐴠𐴓𐴝𐴌 𐴓𐴡𐴘 𐴁𐴝𐴎𐴝𐴘 𐴌𐴝𐴑𐴞𐴁𐴡 𐴁𐴡𐴓𐴞 𐴀𐴥𐴞𐴁𐴝 𐴘𐴠 𐴖𐴝𐴊𐴝 𐴒𐴡𐴙𐴅𐴧𐴙𐴠 𐴱 𐴀𐴝𐴌 𐴁𐴠 𐴏𐴥𐴝𐴀𐴌𐴝 𐴌𐴟𐴇𐴝𐴙𐴚𐴒𐴙𐴝𐴌𐴠 𐴔𐴡𐴊𐴡𐴊 𐴒𐴡𐴌𐴞 𐴎𐴝𐴌𐴊𐴠 𐴘𐴥𐴝𐴕𐴡𐴃 𐴁𐴝𐴚𐴓𐴝𐴊𐴠𐴐𐴡𐴌 𐴔𐴝𐴙𐴕𐴐𐴡𐴌 𐴁𐴠𐴐𐴥𐴞 𐴐𐴥𐴟𐴑𐴟𐴌𐴞𐴘𐴝 𐴒𐴡𐴙𐴅𐴧𐴙𐴠 𐴱𐴱 𐴌𐴟𐴇𐴝𐴙𐴚𐴒𐴙𐴝 𐴖𐴞𐴐𐴠𐴕𐴡𐴌 𐴌𐴠𐴂𐴟𐴄