𐴌𐴠𐴚𐴒𐴟𐴕 𐴋𐴞𐴐𐴄𐴞𐴑𐴡𐴌 𐴓𐴤𐴞𐴀 𐴑𐴥𐴟𐴀 𐴐𐴥𐴡𐴀𐴌𐴡𐴃 𐴴 𐴱 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴊𐴤𐴡𐴌𐴝 𐴉𐴡𐴙𐴅𐴧𐴙𐴠 𐴱𐴱

𐴌𐴠𐴚𐴒𐴟𐴕 𐴋𐴞𐴐𐴄𐴞𐴑𐴡𐴌 𐴓𐴤𐴞𐴀 𐴑𐴥𐴟𐴀 𐴐𐴥𐴡𐴀𐴌𐴡𐴌 𐴎𐴦𐴡𐴣𐴓𐴡𐴌 𐴁𐴥𐴟𐴃𐴡𐴌𐴃𐴟 𐴔𐴡𐴓𐴠 𐴐𐴥𐴙𐴝 𐴎𐴝𐴌𐴊𐴠 𐴀𐴝𐴌𐴀𐴥𐴡 𐴴 𐴱 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴱 𐴉𐴠𐴌𐴖𐴝𐴌𐴞𐴌 𐴱 𐴲 𐴃𐴝𐴌𐴞𐴑 𐴰 𐴲 𐴰 𐴲 𐴐𐴥𐴟𐴑𐴧𐴟𐴌 𐴁𐴝𐴌𐴠 𐴊𐴤𐴡𐴌𐴝 𐴉𐴡𐴙𐴅𐴧𐴙𐴠 𐴱 𐴁𐴠𐴍𐴝 𐴹 𐴎𐴡𐴕 𐴁𐴠𐴍𐴞 𐴵 𐴎𐴡𐴕 𐴱𐴱 𐴊𐴤𐴡𐴙𐴅𐴧𐴙𐴠𐴊𐴠 𐴔𐴠𐴓𐴠𐴄𐴠𐴌𐴞 𐴀𐴥𐴡𐴑𐴧𐴡𐴓𐴠 𐴱 𐴀𐴥𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴟𐴕𐴡𐴌𐴠 𐴀𐴠𐴔𐴠𐴒𐴠𐴌𐴞𐴐𐴠𐴕𐴡𐴌 𐴇𐴥𐴝𐴃𐴡𐴃 𐴒𐴡𐴏𐴥𐴝𐴘 𐴊𐴞𐴘𐴝 𐴉𐴡𐴌𐴞𐴁𐴡 𐴱 𐴊𐴝𐴓𐴝𐴓 𐴀𐴥𐴡𐴙𐴃 𐴉𐴝𐴌𐴠 𐴈𐴦𐴡𐴘 𐴐𐴟𐴁𐴤𐴝 𐴒𐴡𐴙𐴅𐴧𐴙𐴠𐴊𐴠 𐴀𐴥𐴞𐴃𐴝𐴌𐴝𐴌𐴠 𐴃𐴝𐴇𐴑𐴞𐴑 𐴃𐴡𐴊𐴝𐴌𐴟𐴑 𐴒𐴡𐴌𐴞𐴁𐴡𐴓𐴧𐴝 𐴔𐴡𐴀𐴊𐴧𐴞𐴔𐴝 𐴑𐴥𐴟𐴙𐴓𐴧𐴙𐴠 𐴱 𐴀𐴦𐴟𐴕𐴡𐴌 𐴁𐴥𐴟𐴃𐴡𐴌𐴠 𐴘𐴥𐴡 𐴊𐴟𐴘 𐴎𐴡𐴕 𐴐𐴟𐴁𐴤𐴝 𐴒𐴡𐴌𐴞 𐴁𐴡𐴕 𐴒𐴡𐴙𐴅𐴧𐴙𐴠 𐴁𐴡𐴓𐴞 𐴓𐴤𐴞𐴀 𐴑𐴥𐴟𐴀 𐴐𐴥𐴡𐴀𐴌𐴡𐴌 𐴁𐴡𐴌𐴡 / 𐴏𐴥𐴠𐴣 𐴖𐴥𐴝𐴚𐴠 𐴀𐴝𐴌 𐴀𐴠𐴉 𐴀𐴠𐴌𐴠 𐴈𐴡𐴘𐴧𐴠 𐴱𐴱

𐴒𐴡𐴃𐴡 𐴁𐴟𐴙𐴃 𐴁𐴝𐴌𐴠 𐴹 𐴱 𐴃𐴝𐴌𐴞𐴑 𐴉𐴠𐴌𐴖𐴝𐴌𐴞 𐴰 𐴲 𐴰 𐴲 𐴊𐴞𐴕𐴡𐴃 𐴊𐴤𐴡𐴙𐴅𐴧𐴞𐴀𐴓𐴊𐴠 𐴱 𐴁𐴠𐴙𐴒𐴧𐴟𐴕𐴠 𐴔𐴞𐴓𐴝𐴘 𐴴 𐴵 𐴎𐴡𐴕 𐴀𐴝𐴌 𐴱 𐴲 𐴃𐴝𐴌𐴞𐴑 𐴉𐴠𐴌𐴖𐴝𐴌𐴞 𐴰 𐴲 𐴰 𐴲 𐴊𐴞𐴕𐴡𐴃 𐴊𐴤𐴡𐴌𐴝 𐴉𐴡𐴙𐴅𐴧𐴙𐴠𐴊𐴠 𐴴 𐴱 𐴎𐴡𐴕 𐴁𐴠𐴙𐴒𐴧𐴟𐴕𐴡𐴌𐴠 𐴱 𐴀𐴠𐴔𐴠𐴒𐴠𐴌𐴞𐴐𐴠𐴕𐴡𐴌 𐴑𐴝𐴕𐴟𐴕𐴡𐴌 𐴊𐴡𐴉𐴥𐴝 𐴘𐴝 𐴊𐴤𐴝𐴌𐴝 𐴳 𐴶 𐴓𐴡𐴘 𐴔𐴡𐴀𐴊𐴧𐴞𐴔𐴝 𐴑𐴤𐴟𐴓𐴞 𐴉𐴠𐴌𐴖𐴝𐴌𐴞𐴌 𐴷 𐴲 𐴃𐴝𐴌𐴞𐴑𐴡𐴌 𐴊𐴞𐴕 𐴑𐴦𐴟𐴍𐴡𐴃 𐴀𐴟𐴍𐴞𐴁𐴝𐴌 𐴃𐴝𐴌𐴞𐴑𐴊𐴞𐴘𐴠 𐴁𐴡𐴓𐴞 𐴀𐴟𐴑𐴞𐴓𐴡𐴌 𐴑𐴡𐴔𐴞𐴄𐴞 𐴘𐴠 𐴀𐴝𐴌 𐴀𐴠𐴉 𐴀𐴠𐴌𐴠 𐴈𐴡𐴘𐴧𐴠𐴊𐴠 𐴎𐴝𐴕𐴝 𐴒𐴞𐴘𐴠 𐴱𐴱

𐴀𐴝𐴌𐴑𐴝𐴕𐴡𐴌 𐴐𐴥𐴡𐴚𐴑𐴡𐴄𐴡𐴌 𐴁𐴝𐴁𐴡𐴃𐴠 𐴀𐴝𐴔𐴠𐴌𐴞𐴑𐴝𐴃 𐴱 𐴁𐴡𐴌𐴔𐴝𐴌 𐴏𐴡𐴉𐴝𐴌𐴡𐴃𐴡𐴌 𐴔𐴦𐴟𐴕𐴃𐴟 𐴇𐴥𐴡𐴌𐴃𐴝𐴓 𐴱𐴱

𐴀𐴝𐴌𐴑𐴝𐴕𐴡𐴃 𐴁𐴡𐴌𐴔𐴝 𐴇𐴥𐴡𐴑𐴟𐴔𐴡𐴃𐴠 𐴀𐴝𐴣𐴐𐴄𐴡 𐴖𐴥𐴝𐴕 𐴐𐴥𐴡𐴀𐴌𐴡𐴃 𐴱 𐴔𐴠𐴓𐴠𐴄𐴠𐴌𐴞 𐴀𐴥𐴡𐴑𐴧𐴡𐴓𐴠 𐴀𐴞𐴕𐴏𐴝𐴕𐴞 𐴇𐴥𐴡𐴑 𐴔𐴝𐴍𐴞 𐴒𐴡𐴌𐴠𐴌𐴊𐴠 𐴀𐴥𐴞𐴕𐴡𐴌𐴠 𐴁𐴡𐴓𐴊𐴞𐴁𐴡𐴓𐴧𐴝 𐴱 𐴀𐴝𐴌 𐴊𐴟𐴕𐴞𐴘𐴝𐴙𐴌 𐴏𐴟𐴑𐴠 𐴕𐴡𐴊𐴠𐴑𐴤𐴞𐴁𐴡𐴓𐴧𐴝 𐴱 𐴁𐴠𐴐𐴥𐴞 𐴎𐴟𐴙𐴃 𐴒𐴡𐴌𐴞 𐴑𐴡𐴖𐴔 𐴉𐴥𐴟𐴌𐴝𐴘 𐴉𐴥𐴠𐴓𐴝𐴘 𐴉𐴝𐴌𐴠 𐴉𐴦𐴝𐴕 𐴱 𐴅𐴟𐴕 𐴔𐴝𐴐𐴢 𐴹 𐴱 𐴰 𐴲 𐴓𐴡𐴃𐴞 𐴀𐴞𐴕𐴄𐴝𐴌𐴕𐴠𐴄 𐴁𐴡𐴕 𐴒𐴡𐴌𐴞 𐴉𐴥𐴠𐴓𐴦𐴝𐴙𐴓 𐴱 𐴁𐴡𐴖𐴃 𐴊𐴞𐴕 𐴁𐴝𐴊𐴠 𐴀𐴥𐴠𐴃𐴧𐴟 𐴉𐴝𐴣𐴏𐴧𐴝𐴕 𐴐𐴥𐴡𐴀𐴌𐴡𐴃 𐴈𐴡𐴀𐴠𐴑 𐴔𐴝𐴐𐴡𐴓𐴧𐴝 𐴑𐴤𐴟𐴓𐴞 𐴊𐴞𐴀𐴓 𐴱 𐴉𐴥𐴞𐴃𐴞𐴕 𐴉𐴠𐴌𐴖𐴝𐴌𐴞𐴌 𐴳 𐴃𐴝𐴌𐴞𐴑 𐴓𐴡𐴃𐴞 𐴁𐴡𐴕 𐴒𐴡𐴌𐴞 𐴊𐴞𐴘𐴠 𐴱 𐴎𐴞𐴘𐴝𐴕𐴡𐴌 𐴎𐴡𐴌𐴞𐴘𐴝 𐴊𐴠𐴐𐴡𐴌 𐴁𐴥𐴟𐴃𐴡𐴌𐴠 𐴈𐴥𐴡𐴃𐴡𐴌𐴝 𐴁𐴝𐴌𐴞 𐴒𐴞𐴘𐴡𐴘 𐴱 𐴐𐴥𐴝𐴕𐴃𐴞 𐴀𐴟𐴍𐴞 𐴒𐴞𐴘𐴡𐴘 𐴱 𐴊𐴠𐴐𐴡𐴌 𐴁𐴥𐴟𐴃𐴡𐴌𐴡𐴌 𐴁𐴦𐴝𐴌𐴡𐴌 𐴔𐴠𐴋𐴞𐴘𐴝 𐴀𐴥𐴡𐴑𐴧𐴡𐴓𐴠 𐴈𐴥𐴁𐴡𐴌 𐴓𐴡𐴘 𐴕𐴡𐴉𐴝𐴌𐴠𐴌 𐴱 𐴀𐴞𐴕𐴄𐴝𐴌𐴕𐴠𐴄 𐴑𐴤𐴟𐴓𐴞 𐴊𐴞𐴁𐴡𐴓𐴧𐴝 𐴀𐴝𐴌 𐴀𐴝𐴌𐴑𐴝𐴕𐴡𐴌 𐴐𐴥𐴡𐴚𐴑𐴡𐴄 𐴈𐴥𐴡𐴃𐴡𐴔 𐴒𐴡𐴌𐴞𐴁𐴡𐴓𐴧𐴝 𐴱 𐴰 𐴲 𐴰 𐴲 𐴉𐴠𐴌𐴖𐴝𐴌𐴞𐴌 𐴲 𐴲 𐴃𐴝𐴌𐴞𐴑𐴡𐴃 𐴀𐴞𐴐𐴑𐴟𐴙𐴓𐴧𐴝 𐴉𐴟𐴖𐴝𐴙𐴕 𐴀𐴝𐴌 𐴅𐴟𐴖𐴝𐴕 𐴀𐴥𐴡𐴑𐴧𐴡𐴓𐴠 𐴔𐴞𐴓𐴞 𐴀𐴝𐴙𐴑𐴧𐴙𐴝𐴁𐴡𐴃 𐴖𐴝𐴚𐴑𐴡𐴁𐴧𐴝 𐴔𐴝𐴍𐴡𐴃𐴧𐴟 𐴓𐴡𐴃 𐴇𐴥𐴡𐴌𐴃𐴝𐴓 𐴐𐴥𐴟𐴌𐴟 𐴒𐴡𐴌𐴞 𐴀𐴥𐴟𐴀 𐴀𐴥𐴟𐴀𐴃𐴡𐴔𐴧𐴝 𐴁𐴝𐴌𐴞𐴎𐴝 𐴉𐴡𐴙𐴅𐴧𐴡𐴕𐴃𐴡 𐴀𐴝𐴙𐴐𐴧𐴙𐴠 𐴱 𐴀𐴝𐴔𐴠𐴌𐴞𐴑𐴝𐴃 𐴖𐴝𐴐𐴞𐴚𐴄𐴡𐴕 𐴋𐴞 𐴏𐴞𐴃 𐴀𐴝𐴏𐴠𐴊𐴠 𐴁𐴡𐴌𐴔𐴝𐴌 𐴏𐴡𐴉𐴝𐴌𐴡𐴃𐴡𐴌 𐴔𐴦𐴟𐴕𐴃𐴟 𐴘𐴥𐴡 𐴱 𐴀𐴝𐴌𐴑𐴝𐴕𐴡𐴌 𐴐𐴥𐴡𐴚𐴑𐴡𐴄 𐴁𐴡𐴕 𐴒𐴡𐴌𐴞𐴁𐴡𐴓𐴧𐴝 𐴀𐴝𐴌 𐴀𐴞𐴕𐴄𐴝𐴌𐴕𐴠𐴄 𐴑𐴤𐴟𐴓𐴞𐴊𐴞 𐴱 𐴊𐴠𐴐𐴡𐴙𐴃𐴧𐴝𐴌 𐴎𐴞𐴕𐴊𐴞𐴒𐴞 𐴀𐴝𐴏𐴝𐴕 𐴁𐴝𐴕𐴝𐴘 𐴁𐴡𐴓𐴧𐴝 𐴔𐴡𐴒𐴢 𐴀𐴝𐴌 𐴁𐴡𐴌𐴔𐴝 𐴁𐴥𐴝𐴐𐴞 𐴀𐴥𐴡𐴑𐴧𐴡𐴓𐴠 𐴇𐴥𐴡𐴌𐴃𐴝𐴓 𐴒𐴡𐴙𐴅𐴧𐴙𐴠 𐴱𐴱

                         𐴱