𐴔𐴡𐴕𐴟𐴉𐴝𐴌𐴝 𐴀𐴝𐴌 𐴐𐴥𐴗𐴥𐴝𐴂𐴧𐴝𐴌𐴝𐴚𐴡𐴌 𐴔𐴝𐴀𐴔𐴠𐴓𐴝 𐴑𐴦𐴟𐴍𐴠 𐴀𐴝𐴌 𐴔𐴠𐴓𐴠𐴄𐴠𐴌𐴞 𐴘𐴠 𐴉𐴥𐴝𐴘𐴏𐴠𐴓𐴝 𐴒𐴡𐴌𐴞𐴁𐴡 𐴱𐴱

𐴷 𐴱 𐴰 𐴲 𐴐𐴥𐴡𐴕𐴡𐴃 𐴁𐴡𐴌𐴔𐴝𐴌 𐴔𐴠𐴓𐴠𐴄𐴠𐴌𐴞 𐴘𐴠 𐴊𐴠𐴐𐴢 𐴏𐴥𐴡𐴉𐴝𐴙𐴌 𐴕𐴝𐴔𐴊𐴞 𐴌𐴟𐴇𐴝𐴙𐴚𐴒𐴙𐴝𐴌𐴠 𐴱 𐴅𐴠𐴕𐴡𐴏𐴝𐴙𐴋 𐴒𐴡𐴙𐴅𐴧𐴙𐴠𐴊𐴠 𐴀𐴡𐴑𐴃𐴡𐴃 𐴀𐴟𐴃𐴧𐴡𐴌 𐴀𐴝𐴌𐴑𐴝𐴕𐴡𐴃 𐴁𐴥𐴟𐴏𐴞𐴊𐴡𐴚𐴡𐴌 𐴀𐴟𐴃𐴧𐴡𐴌𐴠 𐴱 𐴂𐴡𐴚𐴋𐴡 𐴂𐴡𐴌𐴝𐴚 𐴒𐴥𐴗𐴥𐴝𐴚𐴡𐴌 𐴔𐴡𐴕𐴥𐴟 𐴉𐴝𐴌𐴝 𐴱 𐴀𐴝𐴌 𐴁𐴥𐴟𐴏𐴞𐴊𐴡𐴚𐴡𐴌 𐴊𐴦𐴡𐴙𐴕𐴠 𐴐𐴥𐴗𐴥𐴝𐴂𐴧𐴝𐴌𐴝𐴚𐴡𐴃 𐴀𐴞𐴕𐴏𐴝𐴕𐴞 𐴇𐴥𐴡𐴑𐴔𐴝𐴍𐴞 𐴒𐴡𐴌𐴝 𐴀𐴝𐴌 𐴎𐴥𐴝𐴑𐴧𐴗𐴝 𐴈𐴝𐴙𐴄𐴧𐴙𐴠𐴊𐴠 𐴱 𐴀𐴥𐴞𐴕𐴡𐴌 𐴀𐴞𐴕𐴏𐴝𐴉𐴢 𐴑𐴦𐴟𐴄 𐴀𐴝𐴌 𐴔𐴠𐴓𐴠𐴄𐴠𐴌𐴞 𐴔𐴞𐴓𐴞 𐴒𐴡𐴌𐴞𐴁𐴡 𐴁𐴡𐴓𐴞 𐴱 𐴔𐴠𐴓𐴠𐴄𐴠𐴌𐴞𐴌 𐴃𐴡𐴌𐴉𐴡𐴌 𐴈𐴥𐴡𐴁𐴡𐴌 𐴈𐴦𐴡𐴙𐴕𐴧𐴝 𐴘𐴠 𐴒𐴡𐴃𐴡 𐴈𐴝𐴙𐴓𐴧𐴝 𐴈𐴡𐴘𐴧𐴠 𐴱𐴱

𐴁𐴡𐴌𐴌𐴔𐴝 𐴇𐴥𐴡𐴑𐴟𐴔𐴡𐴃𐴠 𐴀𐴝𐴎𐴝𐴊𐴝𐴕𐴝 𐴃𐴡𐴊𐴝𐴌𐴟𐴑 𐴒𐴡𐴌𐴞𐴁𐴡𐴌𐴓𐴝 𐴁𐴝𐴕𐴝𐴘 𐴊𐴞𐴀𐴓𐴊𐴠 𐴑𐴡𐴔𐴞𐴐𐴠𐴕𐴠 𐴘𐴥𐴡 𐴱 𐴀𐴥𐴞𐴃𐴝𐴌𐴝 𐴅𐴝𐴕𐴟𐴖𐴀𐴌𐴞 𐴔𐴝𐴐𐴡𐴃 𐴕𐴠𐴓𐴝𐴘 𐴊𐴞𐴘𐴠𐴊𐴠 𐴌𐴠𐴂𐴟𐴄𐴡𐴃 𐴔𐴝𐴎𐴠 𐴔𐴡𐴚𐴕𐴟 𐴉𐴝𐴌𐴝 𐴀𐴝𐴌 𐴐𐴥𐴗𐴙𐴥𐴝𐴂𐴧𐴝𐴌𐴝𐴚𐴡𐴌 𐴎𐴥𐴝𐴑𐴧𐴗𐴝 𐴈𐴝𐴍𐴝𐴌 𐴁𐴝𐴁𐴡𐴃𐴠 𐴓𐴠𐴙𐴑𐴧𐴙𐴠 𐴱 𐴀𐴠 𐴔𐴝𐴀𐴔𐴠𐴓𐴝 𐴀𐴞𐴕𐴡𐴌𐴠 𐴔𐴠𐴓𐴠𐴄𐴠𐴌𐴞𐴌 𐴑𐴦𐴟𐴍𐴠 𐴑𐴝𐴕𐴟𐴕 𐴔𐴡𐴎𐴞𐴕 𐴉𐴝𐴘𐴏𐴠𐴓𐴝 𐴒𐴡𐴌𐴞𐴁𐴡𐴊𐴠 𐴁𐴝𐴊𐴠 𐴘𐴥𐴡 ( 𐴀𐴝𐴘 𐴏𐴞 𐴀𐴡 𐴀𐴞 ) 𐴀𐴝𐴎𐴝𐴊 𐴑𐴡𐴔𐴞𐴐𐴠𐴕𐴠 𐴊𐴠𐴈𐴥𐴝𐴘 𐴊𐴞𐴘𐴠𐴊𐴠 𐴱 𐴔𐴡𐴕𐴟 𐴉𐴝𐴌𐴝 𐴀𐴝𐴌 𐴐𐴥𐴗𐴥𐴝𐴂𐴧𐴝𐴌𐴝𐴚𐴡𐴌 𐴔𐴝𐴀𐴔𐴠𐴓𐴝 𐴌𐴠 𐴘𐴥𐴡 𐴔𐴠𐴓𐴠𐴄𐴠𐴌𐴞𐴌 𐴑𐴝𐴕𐴟𐴕 𐴔𐴡𐴎𐴞𐴕 𐴉𐴝𐴘𐴏𐴠𐴓𐴝 𐴒𐴡𐴌𐴞𐴁𐴡 𐴁𐴡𐴓𐴞 𐴔𐴠𐴓𐴠𐴄𐴠𐴌𐴞𐴌 𐴁𐴡𐴘𐴝𐴕𐴡𐴃 𐴈𐴡𐴘𐴧𐴠 𐴱𐴱

𐴀𐴝𐴚𐴋𐴝𐴚𐴡𐴌 𐴔𐴝𐴀𐴔𐴠𐴓𐴝𐴌 𐴀𐴝𐴐𐴝𐴔𐴞 𐴀𐴥𐴡𐴑𐴧𐴡𐴓𐴡𐴌𐴠 𐴐𐴥𐴝𐴎𐴝 𐴊𐴞𐴘𐴝𐴒𐴞𐴘𐴠 𐴱 𐴒𐴟𐴊𐴝𐴔 𐴉𐴝𐴌𐴝𐴌 𐴔𐴝𐴀𐴔𐴠𐴓𐴝𐴌 𐴃𐴡𐴊𐴝𐴌𐴟𐴑 𐴀𐴝𐴌 𐴃𐴝𐴇𐴑𐴞𐴑 𐴏𐴡𐴓𐴠𐴌 𐴱 𐴈𐴥𐴝𐴌𐴝 𐴄𐴝𐴘𐴔𐴡𐴃 𐴑𐴠𐴙𐴏𐴢 𐴈𐴥𐴡𐴃𐴡𐴔 𐴒𐴡𐴌𐴞 𐴀𐴝𐴐𐴝𐴔𐴞 𐴀𐴥𐴡𐴑𐴧𐴡𐴓𐴡𐴌𐴠 𐴐𐴥𐴝𐴎𐴝 𐴉𐴥𐴟𐴕𐴝𐴘𐴁𐴝𐴊𐴠 𐴀𐴠𐴓𐴝𐴕 𐴒𐴡𐴌𐴝 𐴎𐴝𐴘𐴁𐴡 𐴱𐴱