ICC: 𐴀𐴝𐴑𐴠𐴌𐴑𐴝𐴌 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴠 𐴀𐴞𐴕𐴏𐴝𐴉𐴢 𐴉𐴝𐴘𐴁𐴡

𐴁𐴝𐴚𐴓𐴝𐴊𐴠𐴐𐴠 𐴀𐴠𐴈𐴡𐴕 𐴱 . 𐴱 𐴔𐴡𐴓𐴞𐴘𐴟𐴕 𐴌𐴟𐴇𐴝𐴙𐴚𐴒𐴙𐴝 𐴌𐴠 𐴱 𐴑𐴝𐴑𐴐𐴢 𐴁𐴝𐴎𐴝𐴌 𐴋𐴞𐴐𐴄𐴞𐴑𐴡𐴃 𐴑𐴠𐴀𐴠𐴔 𐴁𐴝𐴕𐴝𐴘 𐴌𐴝𐴙𐴑𐴧𐴙𐴠 𐴱 𐴎𐴞𐴃𐴝𐴌𐴝 𐴷 𐴱 𐴰 𐴲 𐴐𐴥𐴡𐴕𐴡𐴃 𐴁𐴡𐴌𐴔𐴝 𐴔𐴠𐴓𐴠𐴄𐴠𐴌𐴞𐴌 𐴅𐴠𐴕𐴡𐴏𐴝𐴙𐴋𐴡𐴌𐴃𐴟 𐴊𐴥𐴝𐴘𐴧𐴡𐴌𐴠 𐴉𐴡𐴌𐴝𐴕 𐴁𐴝𐴏𐴝𐴘𐴁𐴡𐴓𐴧𐴝 𐴏𐴥𐴝𐴀𐴌𐴝 𐴓𐴡𐴘𐴧𐴠 𐴱 𐴀𐴝𐴘 𐴏𐴞 𐴏𐴞 𐴑𐴦𐴟𐴄𐴡𐴌 𐴉𐴥𐴡𐴌𐴘𐴝𐴊𐴞 𐴀𐴟𐴑𐴞𐴓𐴠 𐴀𐴝𐴐𐴥𐴝 𐴎𐴦𐴝𐴙𐴌 𐴒𐴡𐴙𐴅𐴧𐴙𐴠𐴊𐴠 𐴱 𐴀𐴞𐴕𐴏𐴝𐴉𐴢 𐴀𐴝𐴑𐴠𐴌𐴑𐴝𐴌 𐴌𐴟𐴇𐴝𐴙𐴚𐴒𐴙𐴝 𐴘𐴠 𐴉𐴝𐴘𐴁𐴡 𐴱 𐴔𐴡𐴕𐴃𐴡𐴌 𐴓𐴝𐴔𐴁𐴝 𐴄𐴝𐴙𐴔 𐴓𐴝𐴒𐴞𐴁𐴡 𐴀𐴝𐴌 𐴆𐴠𐴙𐴣𐴓𐴥𐴠𐴅 𐴒𐴡𐴙𐴅𐴧𐴙𐴝 𐴃𐴡𐴊𐴝𐴌𐴟𐴑𐴞 𐴏𐴥𐴞𐴏𐴞𐴓𐴝 𐴏𐴡𐴓𐴞𐴁𐴡 𐴱𐴱

𐴋𐴤𐴝𐴑𐴝𐴃 𐴂𐴝𐴕 𐴂𐴠𐴏𐴞𐴉𐴥𐴞𐴑 𐴐𐴟𐴕𐴝𐴌 𐴒𐴝𐴀𐴡𐴣 𐴇𐴥𐴡𐴄𐴡𐴓𐴡𐴃 𐴀𐴥𐴡𐴘𐴧𐴠𐴊𐴠 𐴂𐴠𐴌𐴠𐴏𐴢 𐴑𐴝𐴕𐴉𐴠𐴌𐴥𐴠𐴣𐴏𐴡𐴃 𐴱 𐴀𐴠𐴑𐴃𐴞𐴘𐴝𐴌𐴞 𐴐𐴥𐴡𐴎𐴟𐴒𐴞𐴃𐴝𐴌 𐴋𐴝𐴘𐴌𐴠𐴑𐴄𐴝𐴌 / 𐴉𐴝𐴑𐴞𐴏𐴟 𐴔𐴟𐴐𐴟𐴐𐴟𐴑𐴟 𐴘𐴠 𐴌𐴠𐴂𐴟𐴄𐴝𐴌 𐴀𐴥𐴡𐴑𐴧𐴡𐴓𐴡𐴌𐴠 𐴈𐴡𐴘𐴧𐴠𐴊𐴠 𐴀𐴞𐴕𐴏𐴝𐴉𐴢 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴇𐴥𐴡𐴑𐴧𐴡𐴃 𐴀𐴥𐴡𐴘𐴁𐴡 𐴱 𐴎𐴝𐴓𐴠𐴔 𐴀𐴥𐴡𐴑𐴧𐴡𐴓𐴡𐴌𐴠 𐴑𐴦𐴟𐴍𐴡𐴃 𐴀𐴝𐴕𐴝 𐴎𐴝𐴘𐴁𐴡 𐴱 𐴕𐴡𐴖𐴡𐴔𐴁𐴡𐴌𐴡𐴌 𐴴 𐴱 𐴃𐴝𐴌𐴞𐴑𐴡𐴃 𐴀𐴝𐴘 𐴏𐴞 𐴏𐴞𐴌 𐴀𐴟𐴑𐴞𐴓 / 𐴉𐴝𐴄𐴟 𐴁𐴠𐴕𐴏𐴟𐴋𐴝 𐴌𐴠 𐴱 𐴀𐴝𐴘 𐴏𐴞 𐴏𐴞 𐴘𐴠 𐴌𐴟𐴇𐴝𐴙𐴚𐴒𐴙𐴝𐴌 𐴇𐴥𐴡𐴑 𐴔𐴝𐴍𐴞 𐴒𐴡𐴙𐴅𐴧𐴙𐴠𐴊𐴠 𐴀𐴡𐴉𐴡𐴌𐴝𐴊𐴞 𐴀𐴥𐴡𐴑𐴧𐴡𐴓𐴡𐴌𐴠 𐴱 𐴃𐴡𐴊𐴝𐴌𐴟𐴑 𐴒𐴡𐴌𐴞𐴁𐴝𐴌 𐴀𐴠𐴅𐴝𐴎𐴡𐴃 𐴊𐴞𐴉𐴥𐴠𐴓𐴥𐴝𐴘𐴧𐴠 𐴱𐴱

𐴌𐴟𐴇𐴝𐴙𐴚𐴒𐴙𐴝𐴌 𐴇𐴝𐴓𐴡𐴃𐴡𐴌 𐴔𐴟𐴃𐴝𐴀𐴓𐴧𐴠𐴑 𐴱 𐴀𐴠𐴈𐴡𐴕 𐴀𐴝𐴘 𐴏𐴞 𐴏𐴞 𐴀𐴡𐴉𐴞𐴏𐴡𐴌 𐴀𐴟𐴑𐴞𐴓 𐴀𐴥𐴡𐴑𐴧𐴡𐴓𐴡𐴌 𐴏𐴡𐴓𐴠𐴌𐴊𐴠 𐴈𐴝𐴔 𐴓𐴡𐴘 𐴱 𐴀𐴥𐴞𐴃𐴝𐴌𐴝𐴌 𐴀𐴡𐴋𐴝𐴌𐴠 𐴌𐴟𐴔 𐴀𐴠𐴏𐴄𐴠𐴄𐴙𐴟𐴄 𐴀𐴠𐴒𐴌𐴞𐴔𐴥𐴠𐴕𐴄𐴡𐴌 𐴀𐴝𐴕𐴋𐴝𐴌𐴠 𐴱 𐴀𐴥𐴞𐴁𐴝 𐴀𐴠𐴈𐴥𐴡𐴕 𐴁𐴝𐴚𐴓𐴝𐴊𐴠𐴐𐴡𐴃 𐴀𐴝𐴙𐴐𐴧𐴙𐴠𐴊𐴠 𐴱 𐴔𐴟𐴄𐴝𐴔𐴟𐴄𐴞 𐴀𐴝𐴘𐴧𐴡𐴕𐴡𐴌 𐴔𐴡𐴑𐴏𐴡𐴊 𐴀𐴥𐴡𐴙𐴓𐴊𐴠 𐴱 𐴔𐴝𐴀𐴔𐴠𐴓𐴝𐴌 𐴔𐴟𐴃𐴝𐴀𐴓𐴧𐴠𐴑 𐴁𐴝𐴎𐴝𐴘𐴧𐴝 𐴀𐴝𐴏𐴠𐴊𐴠 𐴀𐴥𐴞𐴃𐴝𐴌𐴝𐴌 𐴓𐴡𐴘 𐴔𐴞𐴓𐴞 𐴱 𐴀𐴝𐴒𐴧𐴗𐴝𐴘 𐴉𐴝𐴌𐴠𐴉𐴦𐴝𐴕 𐴀𐴝𐴌 𐴃𐴡𐴊𐴝𐴌𐴟𐴑𐴞 𐴇𐴝𐴓𐴡𐴃 𐴀𐴝𐴌 𐴀𐴞𐴕𐴏𐴝𐴉𐴡𐴌 𐴔𐴟𐴃𐴝𐴀𐴓𐴧𐴠𐴑 𐴏𐴥𐴞𐴏𐴞𐴓𐴝𐴌𐴠 𐴔𐴝𐴙𐴕𐴐𐴡𐴌𐴠 𐴁𐴟𐴎𐴝𐴘 𐴉𐴝𐴌𐴠𐴉𐴦𐴝𐴕 𐴱𐴱

𐴀𐴠 𐴅𐴠𐴕𐴡𐴏𐴝𐴙𐴋 𐴈𐴝𐴘𐴧𐴝 𐴌𐴟𐴇𐴝𐴙𐴚𐴒𐴙𐴝 𐴔𐴟𐴏𐴡𐴓𐴔𐴝𐴕𐴡𐴌 𐴎𐴞𐴃 𐴀𐴝𐴌 𐴁𐴤𐴝𐴙𐴒𐴧𐴙𐴡 𐴀𐴥𐴡𐴙𐴓𐴊𐴠 𐴱 𐴀𐴝𐴘 𐴏𐴞 𐴅𐴠 𐴘𐴠 𐴁𐴡𐴌𐴔𐴝 𐴌𐴠 𐴱 𐴌𐴟𐴇𐴝𐴙𐴚𐴒𐴙𐴝𐴌 𐴖𐴡𐴌𐴠 𐴀𐴝𐴌 𐴈𐴡𐴕𐴥𐴡𐴋𐴦𐴡𐴙𐴓𐴧𐴝 𐴎𐴟𐴓𐴟𐴔 𐴀𐴥𐴡𐴘 𐴕𐴡𐴉𐴝𐴌𐴠𐴉𐴦𐴝𐴕 𐴱 𐴇𐴠𐴉𐴝𐴎𐴡𐴃 𐴒𐴡𐴌𐴞𐴁𐴡𐴓𐴧𐴝 𐴀𐴡𐴋𐴝𐴌 𐴊𐴞𐴘𐴧𐴠𐴊𐴠 𐴘𐴦𐴝𐴕 𐴱 𐴁𐴡𐴌𐴔𐴝𐴃 𐴀𐴝𐴏𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴁𐴠𐴐𐴥𐴞 𐴊𐴞𐴓𐴁𐴥𐴝𐴚𐴝 𐴁𐴡𐴓𐴞 𐴀𐴝𐴘 𐴏𐴞 𐴅𐴠 𐴀𐴞𐴕𐴏𐴝𐴉𐴢 𐴑𐴦𐴟𐴍𐴡𐴌 𐴅𐴡𐴐𐴢 𐴀𐴥𐴡𐴑𐴧𐴡𐴓𐴡𐴌 𐴁𐴡𐴌𐴡 / 𐴀𐴝𐴁𐴊𐴟𐴓 𐴑𐴡𐴖𐴞 𐴀𐴝𐴇𐴔𐴡𐴊 𐴘𐴟𐴏𐴟𐴉𐴠 𐴈𐴡𐴘𐴧𐴠 𐴱𐴱

Sources :Dhaka Tribune https://www.dhakatribune.com/bangladesh/rohingya-crisis/2020/02/04/icc-rohingya-finally-await-justice