𐴀𐴞𐴕𐴏𐴝𐴉𐴢 𐴀𐴝𐴌 𐴎𐴞𐴔𐴧𐴝𐴊𐴝𐴌𐴞𐴌 𐴏𐴥𐴝𐴣𐴀𐴃𐴠 𐴱 𐴏𐴥𐴡𐴀𐴞 𐴏𐴥𐴡𐴓𐴝𐴔𐴡𐴃 𐴌𐴟𐴇𐴝𐴙𐴚𐴒𐴙𐴝𐴌 𐴖𐴝𐴉𐴠𐴏𐴞𐴌𐴠 𐴀𐴠𐴑𐴞𐴕𐴞 𐴱 𐴁𐴝𐴕𐴝𐴘𐴁𐴡𐴓𐴧𐴝 𐴈𐴡𐴘𐴧𐴠 𐴁𐴝𐴚𐴓𐴝𐴊𐴠𐴐𐴠 𐴱𐴱

𐴁𐴠𐴓𐴅𐴞𐴘𐴠𐴔𐴡𐴌 𐴔𐴟𐴌𐴡𐴁𐴧𐴞𐴘𐴝𐴕𐴝𐴃 𐴱 𐴉𐴠𐴌𐴖𐴝𐴌𐴞 𐴔𐴝𐴐𐴡𐴃 𐴒𐴡𐴙𐴅𐴧𐴙𐴠𐴊𐴠 ( 𐴘𐴟 𐴀𐴠𐴕 𐴀𐴠𐴏𐴢 𐴏𐴞 ) 𐴌 𐴁𐴡𐴙𐴍𐴡𐴑𐴡𐴃 𐴱 𐴁𐴝𐴚𐴓𐴝𐴊𐴠𐴐𐴡𐴌 𐴕𐴡𐴔𐴝𐴙𐴕𐴊𐴝 / 𐴌𐴝𐴁𐴝𐴁 𐴉𐴝𐴃𐴠𐴔𐴤𐴝 𐴘𐴠 𐴈𐴡𐴘𐴧𐴠𐴊𐴠 𐴱 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴀𐴞𐴕𐴏𐴝𐴉𐴢 𐴀𐴝𐴌 𐴎𐴞𐴔𐴧𐴝𐴊𐴝𐴌𐴞𐴌 𐴏𐴥𐴝𐴣𐴀𐴃𐴠 𐴱 𐴇𐴠𐴉𐴝𐴎𐴡𐴃 𐴀𐴝𐴌 𐴀𐴞𐴎𐴧𐴡𐴃𐴡𐴌 𐴒𐴠𐴌𐴝𐴕𐴄𐴞 𐴓𐴡𐴘 𐴑𐴥𐴟𐴐𐴞 𐴘𐴠 𐴀𐴝𐴌𐴑𐴝𐴕𐴡𐴃 𐴎𐴝𐴘𐴉𐴝𐴌𐴦𐴡𐴕𐴧𐴝𐴕𐴡𐴌𐴠 𐴀𐴠𐴑𐴞𐴕𐴞 𐴁𐴝𐴕𐴦𐴡𐴕 𐴁𐴠𐴐𐴥𐴞 𐴎𐴡𐴌𐴟𐴌𐴞 𐴁𐴡𐴓𐴞 𐴘𐴟 𐴀𐴠𐴕𐴡𐴌 𐴑𐴤𐴟𐴓𐴝 𐴔𐴡𐴅𐴓𐴞𐴏𐴡𐴃 / 𐴉𐴝𐴃𐴠𐴔𐴝 𐴘𐴠 𐴈𐴡𐴘𐴧𐴠 𐴱 𐴁𐴡𐴌𐴔𐴝 𐴘𐴠 𐴌𐴟𐴇𐴝𐴙𐴚𐴒𐴙𐴝𐴌𐴠 𐴎𐴟𐴓𐴟𐴔 𐴒𐴡𐴙𐴅𐴧𐴙𐴠𐴊𐴠 𐴀𐴝𐴌 𐴁𐴠𐴐𐴥𐴞 𐴁𐴟𐴌𐴝 𐴁𐴥𐴝𐴉𐴠 𐴀𐴞𐴕𐴏𐴝𐴕𐴞 𐴇𐴥𐴡𐴑 𐴔𐴝𐴍𐴞 𐴒𐴡𐴙𐴅𐴧𐴙𐴠𐴊𐴠 𐴘𐴥𐴝𐴕𐴡𐴌 𐴖𐴡𐴌𐴠 𐴱 𐴁𐴡𐴌𐴔𐴝𐴌 𐴀𐴟𐴓𐴋𐴝 𐴀𐴝𐴘 𐴏𐴞 𐴏𐴞𐴌 𐴉𐴝𐴘𐴏𐴠𐴓𐴝𐴌𐴠 𐴀𐴝𐴌 𐴀𐴝𐴘 𐴏𐴞 𐴅𐴠 𐴘𐴠 𐴳 𐴲 / 𐴃𐴝𐴌𐴞𐴑 𐴅𐴝𐴕𐴟𐴖𐴝𐴌𐴞 𐴁𐴡𐴌𐴔𐴝𐴌 𐴀𐴟𐴓𐴋𐴝 𐴕𐴠𐴓𐴝𐴘𐴊𐴞𐴘𐴠𐴊𐴠 𐴀𐴡𐴋𐴝𐴌𐴡𐴌𐴠 / 𐴉𐴝𐴃𐴠𐴔𐴤𐴝 𐴘𐴠 𐴏𐴟𐴖𐴝𐴒𐴡𐴃 𐴒𐴡𐴙𐴅𐴧𐴙𐴠 𐴱𐴱

𐴌𐴟𐴇𐴝𐴙𐴚𐴒𐴙𐴝 𐴑𐴠𐴀𐴠𐴔𐴡𐴌 𐴏𐴝𐴙𐴌𐴀𐴥𐴡 𐴋𐴥𐴝𐴑 𐴁𐴠𐴌𐴝𐴘 𐴑𐴠𐴣𐴍𐴝 𐴏𐴞𐴘𐴡𐴓𐴡𐴌 𐴒𐴥𐴞𐴌𐴝𐴊𐴦𐴡𐴕𐴡𐴌 𐴈𐴝𐴔 𐴏𐴝𐴓𐴟 𐴱𐴱

𐴊𐴠𐴙𐴐𐴢 𐴏𐴝𐴓𐴡𐴑 𐴀𐴟𐴎𐴞𐴌 / 𐴀𐴝𐴏𐴡𐴊𐴟𐴎𐴧𐴡𐴔𐴝𐴕𐴠 𐴱 𐴐𐴥𐴡𐴕𐴞 𐴁𐴝𐴌𐴠 𐴋𐴤𐴝𐴑𐴝 𐴀𐴝𐴒𐴝𐴌 𐴒𐴝𐴀𐴡𐴣 𐴃 𐴱 𐴊𐴡𐴙𐴅𐴧𐴙𐴝 𐴏𐴦𐴡𐴛 𐴉𐴟𐴓𐴞𐴐𐴡𐴌 𐴇𐴥𐴠𐴋𐴑𐴗𐴝𐴄𐴝𐴌𐴡𐴃 𐴒𐴡𐴙𐴅𐴧𐴙𐴠𐴊𐴠 𐴉𐴥𐴝𐴚𐴐𐴠𐴕𐴡𐴃 𐴱 𐴌𐴠𐴂𐴟𐴄𐴝𐴌 𐴀𐴥𐴡𐴑𐴧𐴡𐴓𐴠 𐴏𐴟𐴖𐴝𐴓 ( 𐴌𐴞𐴉𐴟𐴎𐴞 𐴀𐴥𐴡𐴑𐴧𐴡𐴓𐴡𐴌 𐴕𐴠𐴒𐴌𐴝𐴕𐴞 𐴏𐴝𐴀𐴝𐴏𐴞𐴃𐴝 𐴁𐴠𐴐𐴥𐴞 𐴇𐴥𐴠𐴣𐴍𐴝𐴔𐴧𐴗𐴝 𐴀𐴥𐴡𐴘𐴧𐴠 ) 𐴅𐴟𐴖𐴝𐴁𐴡𐴃 𐴈𐴡𐴘𐴧𐴠𐴊𐴠 𐴱 𐴌𐴞𐴉𐴟𐴎𐴞 𐴀𐴥𐴡𐴑𐴧𐴡𐴓𐴡𐴌 𐴏𐴝𐴀𐴝𐴏𐴞𐴃𐴝 𐴇𐴥𐴠𐴣𐴍𐴝𐴔𐴧𐴗𐴝 𐴕𐴦𐴡 𐴱 𐴀𐴠𐴒𐴝𐴌𐴡 𐴓𐴝𐴑 𐴉𐴡𐴙𐴅𐴧𐴡𐴕𐴃𐴡 𐴌𐴞𐴉𐴟𐴎𐴞 𐴱 𐴎𐴟𐴀𐴕 𐴄𐴠𐴑𐴕𐴝𐴉𐴡𐴌 𐴀𐴝𐴃𐴌𐴝𐴉𐴡𐴌 𐴊𐴠𐴐𐴥𐴡𐴙𐴃𐴧𐴝 𐴔𐴝𐴙𐴕𐴐𐴡𐴌 𐴃𐴞𐴕 𐴒𐴟𐴕𐴧𐴝 𐴱 𐴎𐴞𐴃𐴝𐴌𐴝𐴌𐴠 ( 𐴌𐴠𐴁 / 𐴁𐴞 𐴅𐴞 𐴁𐴞 / 𐴀𐴝𐴕𐴏𐴝𐴌 ) 𐴡𐴌 𐴑𐴝𐴕𐴟𐴕𐴡𐴌 𐴀𐴝𐴕𐴋𐴝𐴌𐴠 𐴎𐴝𐴒𐴝 𐴊𐴞𐴘𐴝 𐴒𐴞𐴘𐴠 𐴱𐴱

𐴑𐴠𐴣𐴍𐴝 𐴏𐴞𐴘𐴡𐴓𐴡𐴌 𐴒𐴥𐴞𐴌𐴝 𐴁𐴡𐴌 𐴀𐴟𐴎𐴞𐴌 / 𐴐𐴠𐴙𐴈𐴢 𐴇𐴥𐴝𐴏𐴞𐴕𐴝𐴌 𐴀𐴡𐴋𐴝𐴌 𐴓𐴡𐴘 𐴊𐴞𐴘𐴝 𐴎𐴝𐴌𐴊𐴠 𐴱 𐴀𐴠𐴕𐴃𐴠𐴎𐴝𐴔𐴞 𐴉𐴡𐴖𐴏𐴢 𐴀𐴥𐴡𐴑𐴧𐴡𐴓𐴠 𐴀𐴝𐴒𐴠 𐴓𐴥𐴡𐴃𐴞 𐴒𐴥𐴞𐴌𐴝𐴌 𐴎𐴞𐴔𐴧𐴝𐴊𐴝𐴌𐴞 𐴓𐴡𐴘𐴧𐴠 𐴱 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴑𐴠𐴀𐴠𐴔𐴡𐴌 𐴁𐴦𐴝𐴌𐴠 𐴎𐴦𐴝𐴘 𐴊𐴠𐴐𐴥𐴡𐴙𐴃𐴧𐴝𐴌 𐴓𐴡𐴘 𐴔𐴞𐴓𐴎𐴟𐴓 𐴒𐴡𐴌𐴞 𐴕𐴡𐴉𐴝𐴌𐴠𐴉𐴦𐴝𐴕 𐴱 𐴒𐴥𐴞𐴌𐴝 𐴁𐴝𐴊𐴠 𐴘𐴥𐴡 𐴌𐴟𐴇𐴝𐴙𐴚𐴒𐴙𐴝𐴌𐴠 𐴕𐴠𐴒𐴌𐴝𐴕𐴞 𐴒𐴡𐴌𐴝 𐴀𐴝𐴌𐴀𐴥𐴡 𐴔𐴡𐴎𐴁𐴟𐴃 𐴀𐴥𐴡𐴘𐴁𐴡𐴓𐴧𐴝 𐴱 𐴖𐴦𐴝𐴐𐴢 𐴄𐴞 𐴁𐴞 / 𐴏𐴞 𐴏𐴞 𐴑𐴠𐴔𐴌𐴝 𐴘𐴥𐴡 𐴉𐴥𐴞𐴄 𐴒𐴡𐴌𐴝 𐴎𐴝𐴘𐴁𐴡 𐴱 𐴀𐴝𐴌 𐴀𐴝𐴣𐴀𐴌𐴝𐴌 𐴀𐴥𐴝𐴣𐴃𐴞𐴘𐴝𐴌𐴞 𐴅𐴟𐴖𐴝𐴕 𐴀𐴥𐴡𐴑𐴧𐴡𐴓 𐴌𐴞𐴉𐴟𐴎𐴞𐴌 𐴎𐴠𐴈𐴡𐴕𐴥𐴡 𐴆𐴠𐴙𐴓𐴥𐴠𐴕𐴅𐴧𐴡𐴓𐴧𐴝 𐴃𐴡𐴘𐴧𐴝𐴌 𐴱𐴱