𐴁𐴝𐴚𐴓𐴝𐴊𐴠𐴐𐴢 𐴕𐴡𐴎𐴝𐴘 𐴀𐴝𐴌𐴑𐴝𐴕𐴡𐴃 𐴃𐴥𐴝𐴙𐴑𐴧𐴙𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴑𐴧𐴡𐴓 𐴱𐴱

𐴀𐴟𐴃𐴡𐴌 𐴀𐴝𐴌𐴑𐴝𐴕𐴡𐴌 𐴁𐴥𐴟𐴏𐴞𐴊𐴡𐴚𐴡𐴃 𐴱 𐴔𐴡𐴚𐴋𐴥𐴟𐴃 𐴷 𐴱 𐴰 𐴲 𐴐𐴡𐴕𐴡𐴃 𐴱 𐴔𐴠𐴓𐴠𐴄𐴠𐴌𐴞 𐴀𐴥𐴡𐴑𐴧𐴡𐴓𐴠 𐴊𐴠𐴐𐴢 𐴏𐴥𐴡𐴉𐴝𐴙𐴌 𐴕𐴝𐴔𐴊𐴞 𐴕𐴡𐴏𐴥𐴡𐴓 𐴈𐴥𐴡𐴃𐴡𐴔 𐴑𐴝𐴌𐴖𐴝𐴘 𐴒𐴡𐴌𐴦𐴡𐴕𐴡𐴌 𐴎𐴡𐴌𐴞𐴘𐴝 𐴱 𐴇𐴥𐴝𐴣𐴃 𐴓𐴝𐴑𐴡𐴌 𐴖𐴡𐴌𐴠 𐴌𐴟𐴇𐴝𐴙𐴚𐴒𐴙𐴝 𐴁𐴝𐴚𐴓𐴝𐴊𐴠𐴐𐴡𐴃 𐴱 𐴔𐴡𐴅𐴁𐴟𐴌𐴞 𐴏𐴥𐴝𐴀𐴌𐴝 𐴓𐴡𐴘𐴧𐴠 𐴱 𐴁𐴝𐴚𐴓𐴝𐴊𐴠𐴐𐴢 𐴕𐴡𐴀𐴦𐴝𐴘 𐴀𐴝𐴌𐴑𐴝𐴕𐴡𐴃 𐴀𐴝𐴏𐴠𐴊𐴠 𐴀𐴥𐴞𐴃𐴝𐴌𐴝 𐴱 𐴁𐴦𐴠𐴙𐴐 𐴀𐴥𐴞𐴧𐴏𐴝 𐴉𐴝𐴌𐴝 𐴉𐴟𐴌𐴝𐴊𐴞 𐴏𐴥𐴝𐴘 𐴁𐴝𐴕𐴝𐴘 𐴉𐴥𐴠𐴓𐴡𐴕𐴠 𐴱 𐴉𐴟𐴌𐴝 𐴕𐴥𐴡𐴊𐴠𐴊𐴠 𐴒𐴤𐴡𐴌 𐴑𐴠𐴙𐴧𐴏𐴟 𐴀𐴝𐴏𐴠𐴊𐴠 𐴀𐴥𐴠𐴍𐴠 𐴎𐴝𐴘 𐴊𐴡𐴓𐴝 𐴊𐴡𐴙𐴓𐴧𐴝 𐴒𐴡𐴌𐴞 𐴃𐴥𐴝𐴙𐴑𐴧𐴙𐴠 𐴱 𐴀𐴥𐴞𐴃𐴝𐴌𐴝 𐴕𐴥𐴡 𐴕𐴞𐴎𐴡𐴌 𐴒𐴤𐴡𐴌 𐴁𐴞𐴍𐴝𐴃 𐴎𐴝𐴘𐴉𐴝𐴌𐴠𐴌 𐴕𐴥𐴡 𐴀𐴝𐴎𐴝𐴊𐴞𐴌 𐴏𐴥𐴝𐴣𐴀𐴃𐴠 𐴓𐴡𐴌𐴝𐴏𐴡𐴌𐴝 𐴒𐴡𐴌𐴞 𐴉𐴝𐴌𐴠𐴌 𐴱𐴱

𐴀𐴥𐴠𐴕𐴋𐴞𐴓𐴧𐴝 𐴔𐴝𐴙𐴕𐴐𐴡𐴌 𐴁𐴥𐴟𐴃𐴡𐴌𐴠 𐴱 𐴔𐴡𐴚𐴋𐴥𐴟𐴌 𐴊𐴦𐴡𐴙𐴕𐴡𐴌 𐴉𐴥𐴝𐴊𐴝𐴕𐴏𐴝 𐴒𐴥𐴗𐴝𐴚𐴡𐴌 𐴑𐴝𐴛𐴝𐴚 𐴋𐴥𐴠𐴚 𐴉𐴝𐴌𐴝𐴃 𐴉𐴟𐴌𐴝 𐴕𐴦𐴡𐴊𐴠𐴊𐴠 𐴒𐴤𐴡𐴌 𐴀𐴠𐴑𐴧𐴝𐴕𐴡𐴃 𐴃𐴥𐴝𐴑𐴠𐴌𐴊𐴠 / 𐴀𐴝𐴁𐴟𐴓𐴑𐴝𐴓𐴝𐴔 𐴁𐴡𐴐𐴢 𐴱 𐴶 𐴁𐴡𐴏𐴡𐴌 𐴱 𐴀𐴞𐴁𐴝𐴌 𐴀𐴝𐴏𐴡𐴓 𐴒𐴤𐴡𐴌 𐴉𐴥𐴝𐴊𐴝𐴕𐴏𐴝 𐴒𐴥𐴗𐴝𐴚𐴡𐴌 𐴒𐴥𐴡𐴚 𐴋𐴥𐴢𐴢𐴑𐴧𐴝 𐴉𐴝𐴌𐴝𐴃 𐴱 𐴎𐴞𐴀𐴕 𐴉𐴟𐴌𐴝 𐴊𐴞𐴉𐴥𐴠𐴓𐴝𐴘𐴧𐴠 𐴱 𐴀𐴥𐴠 𐴉𐴥𐴝𐴊𐴝𐴕𐴏𐴝 𐴑𐴝𐴛𐴝𐴚 𐴋𐴥𐴠𐴚𐴡𐴃 𐴀𐴠𐴈𐴥𐴡𐴕 𐴰 𐴰 𐴳 𐴐𐴥𐴡𐴃 𐴉𐴡𐴙𐴅𐴧𐴡𐴕𐴃𐴡 𐴔𐴝𐴕𐴟𐴙𐴐𐴢 𐴀𐴝𐴏𐴠 𐴱 𐴎𐴠𐴍𐴠 𐴰 𐴰 𐴰 𐴵 𐴇𐴥𐴝𐴎𐴝𐴌𐴡𐴌 𐴖𐴡𐴌𐴠 𐴔𐴝𐴕𐴟𐴙𐴐𐴢 𐴀𐴝𐴐𐴧𐴞𐴀𐴓 𐴱 𐴀𐴝𐴁𐴟𐴓𐴑𐴝𐴓𐴝𐴔𐴠 𐴈𐴦𐴡𐴌𐴊𐴠 𐴀𐴝𐴣𐴀𐴌𐴝𐴌 𐴉𐴝𐴌𐴝𐴃 ( 𐴘𐴟 𐴀𐴠𐴕 𐴋𐴞 𐴂𐴞 / 𐴘𐴟 𐴀𐴠𐴕 𐴀𐴠𐴐𐴢 𐴏𐴞 𐴀𐴝𐴌 ) 𐴀𐴠 𐴊𐴟𐴕𐴥𐴟 𐴋𐴦𐴝𐴙𐴌 𐴃𐴟 𐴎𐴞𐴔𐴧𐴝𐴊𐴝𐴌 𐴀𐴥𐴡𐴑𐴧𐴡𐴓 𐴃𐴞𐴕𐴁𐴝𐴌 𐴀𐴦𐴝𐴘𐴧𐴡𐴌𐴠 𐴏𐴦𐴝𐴘 𐴏𐴞𐴃𐴞 𐴀𐴝𐴣𐴀𐴌𐴝𐴌𐴠 𐴕𐴞𐴎𐴡𐴌 𐴉𐴝𐴌𐴝𐴃 𐴒𐴤𐴡𐴌 𐴁𐴝𐴣𐴊𐴞 𐴊𐴞𐴁𐴡 𐴈𐴡𐴘𐴧𐴠 𐴱 𐴔𐴡𐴕𐴃𐴡𐴌 𐴀𐴝𐴘𐴅𐴥𐴡 𐴕𐴦𐴡𐴊𐴠 𐴱 𐴉𐴥𐴝𐴊𐴝𐴕𐴏𐴝𐴌 𐴀𐴥𐴢𐴢𐴖 𐴆𐴥𐴢𐴢𐴖 𐴌𐴥𐴠𐴔𐴥𐴢𐴢 / 𐴔𐴢𐴢𐴇𐴝𐴔𐴧𐴡𐴊𐴢 𐴇𐴝𐴏𐴡𐴕𐴠 𐴀𐴥𐴠𐴃𐴡 𐴀𐴝𐴏𐴦𐴝𐴕 𐴕𐴦𐴡 𐴁𐴡𐴓𐴞 𐴈𐴡𐴘𐴧𐴠 𐴱𐴱 𐴁𐴥𐴟𐴏𐴞𐴊𐴡𐴚𐴡𐴃 𐴔𐴠𐴓𐴠𐴄𐴠𐴌𐴞 𐴀𐴝𐴌 𐴔𐴡𐴒𐴁𐴝𐴒𐴞𐴌 𐴔𐴝𐴎𐴠 𐴏𐴡𐴓𐴠𐴌𐴊𐴠 𐴓𐴝𐴌𐴥𐴝𐴙𐴌 𐴐𐴥𐴝𐴎𐴝 𐴁𐴠𐴙𐴒𐴧𐴞𐴕 𐴀𐴝𐴣𐴀𐴌𐴝 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴃𐴟 𐴁𐴥𐴟𐴒𐴧𐴡𐴌𐴝 𐴉𐴡𐴌𐴠𐴌 𐴱 𐴀𐴠𐴑𐴎𐴝𐴒𐴝𐴌𐴃𐴟 𐴀𐴝𐴌𐴀𐴠𐴑𐴎𐴝𐴒𐴝𐴃 𐴎𐴝𐴘𐴕𐴡𐴉𐴝𐴌𐴞𐴌 𐴈𐴝𐴔 𐴒𐴡𐴌𐴞 𐴕𐴡𐴉𐴝𐴌𐴞𐴌 𐴏𐴥𐴡𐴚𐴡𐴌 𐴃𐴡𐴓𐴠 𐴑𐴟𐴌𐴥𐴝 𐴁𐴝𐴣𐴊𐴞 𐴌𐴝𐴙𐴑𐴧𐴙𐴠 𐴉𐴦𐴝𐴕 𐴒𐴡𐴌𐴞 𐴃𐴥𐴝𐴑𐴝 𐴉𐴡𐴌𐴠𐴌 𐴁𐴡𐴓𐴞 / 𐴁𐴥𐴟𐴏𐴞𐴊𐴡𐴚𐴡𐴌 ( 𐴄𐴥𐴠𐴌𐴝 𐴉𐴝𐴌𐴝𐴌 𐴀𐴝𐴁𐴟 𐴌𐴡𐴐𐴞𐴃𐴠 𐴈𐴡𐴘𐴧𐴠 𐴱 𐴁𐴥𐴟𐴏𐴞𐴊𐴡𐴚𐴡𐴌 𐴌𐴗𐴝 𐴔𐴥𐴝 𐴉𐴝𐴌𐴝𐴃 𐴃𐴥𐴝𐴑𐴠𐴊𐴠 / 𐴔𐴟𐴇𐴝𐴔𐴧𐴡𐴊 𐴔𐴞𐴛𐴝 𐴱 𐴵 𐴁𐴡𐴏𐴡𐴌 𐴱 𐴀𐴥𐴞𐴁𐴝𐴘𐴠 𐴈𐴦𐴡𐴌𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴓𐴡𐴌𐴠 𐴀𐴝𐴙𐴑𐴧𐴙𐴝𐴁 𐴱 𐴔𐴡𐴚𐴋𐴥𐴟𐴃 𐴇𐴥𐴡𐴑𐴟𐴔𐴡𐴃𐴡𐴌 𐴀𐴠𐴅𐴝𐴎𐴡𐴃 𐴕𐴝𐴔𐴝 𐴏𐴥𐴝𐴌𐴝 𐴎𐴝𐴘𐴃𐴡 𐴕𐴡𐴊𐴠 𐴱 𐴀𐴠𐴅𐴝𐴎𐴡𐴃 𐴕𐴝𐴔𐴝𐴌𐴓𐴝 𐴒𐴞𐴓𐴠 𐴱 𐴊𐴠𐴐𐴥𐴡𐴙𐴃𐴧𐴝 𐴑𐴝𐴀𐴋 𐴀𐴝𐴕𐴒𐴡𐴘 𐴀𐴥𐴠𐴀𐴕 𐴈𐴡𐴀 𐴱 𐴁𐴥𐴟𐴏𐴞𐴊𐴡𐴚𐴡𐴌 𐴁𐴝𐴒𐴧𐴟𐴕𐴝𐴌 / 𐴕𐴟𐴌 𐴀𐴞𐴏𐴓𐴝𐴔𐴠 𐴈𐴦𐴡𐴌𐴊𐴠 𐴀𐴝𐴣𐴀𐴌𐴃𐴟 𐴃𐴞𐴕 𐴈𐴥𐴡𐴣𐴙𐴑𐴧𐴙𐴝 𐴉𐴡𐴄𐴟 𐴃𐴥𐴝𐴑𐴞 𐴁𐴦𐴝𐴊𐴠 𐴘𐴥𐴡 𐴱 𐴇𐴥𐴡𐴑𐴟𐴔𐴡𐴃𐴠 𐴈𐴝𐴌𐴥𐴞 𐴓𐴡𐴘𐴉𐴠𐴓𐴝𐴘𐴁𐴡 𐴁𐴡𐴓𐴞 𐴋𐴡𐴌𐴠 𐴔𐴡𐴚𐴋𐴥𐴟 𐴎𐴝𐴘 𐴕𐴡𐴉𐴝𐴌𐴞𐴌 𐴱𐴱