𐴀𐴝𐴘 𐴏𐴞 𐴅𐴠 𐴌 𐴉𐴝𐴘𐴏𐴠𐴓𐴝 𐴀𐴝𐴌 𐴔𐴡𐴚𐴋𐴥𐴟 𐴀𐴠𐴓𐴝𐴑𐴝𐴌 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴱𐴱

𐴀𐴝𐴌𐴑𐴝𐴕𐴡𐴃 𐴁𐴡𐴌𐴔𐴝 𐴇𐴥𐴡𐴑𐴟𐴔𐴡𐴃𐴠 𐴌𐴟𐴇𐴝𐴙𐴚𐴒𐴙𐴝 𐴔𐴟𐴏𐴡𐴓𐴔𐴝𐴕𐴡𐴌𐴠 𐴅𐴠𐴕𐴡𐴏𐴝𐴙𐴋 𐴒𐴡𐴙𐴅𐴧𐴙𐴠𐴊𐴠 𐴱 𐴀𐴥𐴠𐴃𐴡𐴓𐴧𐴝 𐴁𐴡𐴌𐴔𐴝𐴌 𐴀𐴟𐴓𐴋𐴝 𐴊𐴠𐴐𐴁𐴞𐴊𐴠𐴐𐴥𐴞 𐴀𐴞𐴕𐴏𐴝𐴉𐴢 𐴑𐴦𐴟𐴄 ( 𐴀𐴝𐴘 𐴏𐴞 𐴅𐴠 ) 𐴃 𐴏𐴡𐴓𐴠𐴌𐴊𐴠 𐴔𐴡𐴀𐴊𐴧𐴞𐴔𐴝 𐴉𐴝𐴘𐴏𐴠𐴓𐴝 𐴀𐴥𐴡𐴉𐴡𐴙𐴅𐴧𐴡𐴕𐴃𐴡 𐴱 𐴄𐴝𐴙𐴔 𐴘𐴥𐴝𐴕𐴡𐴌𐴓𐴧𐴝 𐴱 𐴎𐴠𐴈𐴡𐴕𐴥𐴡 𐴋𐴦𐴡𐴙𐴓𐴧𐴝 𐴎𐴟𐴓𐴟𐴔𐴡𐴌𐴃𐴟 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴁𐴝𐴏𐴞 𐴃𐴥𐴝𐴘𐴉𐴝𐴌𐴠 𐴉𐴦𐴝𐴕 𐴱 𐴅𐴝𐴕𐴟𐴖𐴝𐴌𐴞𐴌 𐴳 𐴲 𐴃𐴝𐴌𐴞𐴑𐴡𐴌𐴊𐴞𐴕 ( 𐴀𐴝𐴘 𐴏𐴞 𐴅𐴠 ) 𐴘𐴠 𐴁𐴡𐴌𐴔𐴝𐴌𐴠 𐴃𐴦𐴡𐴙𐴃𐴧𐴝 𐴇𐴥𐴠𐴉𐴝𐴎𐴡𐴃𐴞 𐴐𐴡𐴌𐴡𐴃 𐴴 𐴒𐴥𐴝𐴕 𐴉𐴥𐴟𐴕𐴝𐴘 𐴊𐴞𐴘𐴠 𐴱 𐴎𐴞𐴀𐴕𐴡𐴌𐴠 𐴔𐴝𐴕𐴞 𐴎𐴦𐴡𐴕 𐴁𐴡𐴌𐴔𐴝𐴌𐴃𐴟 𐴎𐴡𐴌𐴟𐴌𐴞 𐴁𐴡𐴓𐴞 𐴊𐴠𐴐𐴁𐴞𐴊𐴠𐴝𐴠 𐴈𐴦𐴡𐴌 𐴱 𐴀𐴥𐴠 𐴐𐴡𐴌𐴡𐴃 𐴀𐴥𐴞𐴕𐴡𐴌 𐴁𐴝𐴁𐴡𐴃𐴠 𐴔𐴡𐴚𐴋𐴥𐴟 / 𐴁𐴥𐴟𐴏𐴞𐴊𐴡𐴚𐴌 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴓𐴡𐴌 𐴁𐴥𐴝𐴉𐴝 𐴏𐴞𐴕𐴃𐴝 𐴀𐴝𐴌 𐴑𐴥𐴙𐴝𐴓 𐴈𐴡𐴕𐴋𐴞𐴓𐴧𐴝 ؟ 𐴱𐴱

𐴁𐴥𐴟𐴏𐴞𐴊𐴡𐴚𐴡𐴃 𐴃𐴥𐴝𐴑𐴠𐴊𐴠 / 𐴀𐴥𐴟𐴀 𐴔𐴟𐴇𐴝𐴔𐴧𐴡𐴊𐴢 𐴏𐴡𐴓𐴞𐴔𐴠 𐴈𐴡𐴘𐴧𐴠𐴊𐴠 𐴱 𐴁𐴡𐴌𐴔𐴝𐴌 𐴔𐴠𐴓𐴠𐴄𐴠𐴌𐴞𐴘𐴠 𐴌𐴟𐴇𐴝𐴙𐴚𐴒𐴙𐴌 𐴕𐴡𐴏𐴡𐴓 𐴉𐴥𐴟𐴌𐴝 𐴑𐴝𐴌𐴖𐴝𐴘 𐴒𐴡𐴌𐴞𐴁𐴝𐴌 𐴐𐴥𐴡𐴣𐴀𐴃 𐴱 𐴒𐴟𐴊𐴝𐴔 𐴉𐴝𐴌𐴝𐴃 𐴎𐴥𐴝𐴑𐴧𐴗𐴝 𐴔𐴝𐴌𐴝 𐴔𐴝𐴙𐴅𐴧𐴟𐴊𐴠 𐴀𐴥𐴠𐴕𐴋𐴞𐴓𐴧𐴝 𐴱 𐴀𐴝𐴌𐴀𐴥𐴡 𐴁𐴡𐴖𐴃 𐴎𐴝𐴒𐴝 𐴀𐴝𐴏𐴠 𐴱 𐴎𐴠𐴀𐴕𐴧𐴞𐴑𐴞 𐴃𐴟𐴓𐴝𐴃𐴟𐴓𐴞 𐴱 𐴂𐴡𐴚𐴋𐴡 𐴂𐴡𐴌𐴝𐴚 𐴱 𐴔𐴡𐴕𐴟𐴉𐴝𐴌𐴝 𐴱 𐴀𐴝𐴚𐴋𐴝𐴚 𐴀𐴞𐴀𐴕𐴡𐴃 𐴀𐴥𐴡 𐴎𐴥𐴝𐴑𐴧𐴗𐴝 𐴔𐴝𐴙𐴅𐴧𐴙𐴠 𐴁𐴡𐴓𐴞 𐴉𐴥𐴟𐴕𐴧𐴞 𐴱 𐴅𐴝𐴟𐴖𐴝𐴌𐴞𐴌 𐴹 𐴲 𐴃𐴝𐴌𐴞𐴑 𐴓𐴡𐴃𐴞 ( 𐴀𐴝𐴌 𐴀𐴠𐴉𐴢 𐴀𐴠 ) 𐴐𐴥𐴡𐴣𐴀 𐴁𐴡𐴌𐴔𐴝𐴌 𐴁𐴥𐴢𐴢𐴃𐴡𐴌𐴡𐴌 𐴀𐴝𐴌 𐴁𐴦𐴝𐴌𐴡𐴌 𐴔𐴠𐴋𐴞𐴘𐴝 𐴀𐴥𐴡𐴑𐴧𐴡𐴓𐴡𐴌𐴠 𐴔𐴡𐴚𐴋𐴥𐴟𐴃 𐴎𐴝𐴘 𐴈𐴥𐴡𐴁𐴡𐴌 𐴓𐴡𐴘𐴁𐴝𐴌 𐴀𐴠𐴅𐴝𐴎𐴡𐴃 𐴊𐴞𐴘𐴠𐴊𐴠 𐴘𐴥𐴝𐴀𐴕 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴎𐴝𐴕𐴝 𐴒𐴞𐴘𐴠 𐴱𐴱

𐴀𐴝𐴚𐴧𐴟𐴔𐴡 𐴉𐴝𐴌𐴝𐴌𐴃𐴧𐴟 𐴔𐴡𐴚𐴋𐴥𐴟 𐴎𐴝𐴊𐴠 𐴌𐴝𐴏𐴃𐴝𐴃 𐴀𐴝𐴚𐴋𐴝𐴚 𐴀𐴝𐴌 𐴔𐴥𐴟𐴌𐴥𐴟𐴏𐴟𐴒𐴥𐴞𐴌𐴥𐴞 𐴎𐴠𐴍𐴠 𐴀𐴠𐴑 𐴀𐴡𐴑𐴃𐴡𐴃 𐴱 𐴌𐴟𐴇𐴝𐴙𐴚𐴒𐴙𐴝 𐴔𐴟𐴏𐴡𐴓𐴔𐴝𐴕 𐴃𐴥𐴝𐴑𐴞𐴃𐴡 𐴱 𐴎𐴝𐴒𐴝 𐴀𐴥𐴞𐴕𐴡𐴃 𐴔𐴠𐴓𐴠𐴄𐴠𐴌𐴞𐴌 𐴒𐴥𐴝𐴣𐴄𐴞 𐴁𐴝𐴕𐴝𐴘𐴧𐴠𐴊𐴠 𐴓𐴡𐴃 𐴉𐴝𐴒𐴞𐴘𐴠 𐴱 𐴀𐴠𐴈𐴥𐴡𐴕𐴡𐴌 𐴇𐴝𐴓𐴡𐴃𐴡𐴃 𐴀𐴝𐴌 ( 𐴀𐴝𐴘 𐴏𐴞 𐴅𐴠 ) 𐴌 𐴃𐴦𐴡𐴙𐴃𐴧𐴝 𐴉𐴥𐴝𐴘𐴏𐴠𐴓𐴝𐴌 𐴁𐴝𐴁𐴡𐴃𐴠 ( 𐴀𐴝𐴌 𐴀𐴠𐴉𐴢 𐴀𐴠 ) 𐴘𐴠 𐴔𐴡𐴚𐴋𐴥𐴟𐴌 𐴐𐴥𐴝𐴘𐴐𐴙𐴡𐴃𐴑𐴝𐴌 / 𐴀𐴥𐴟𐴀 𐴏𐴥𐴟𐴀 𐴀𐴡𐴚𐴡𐴃𐴧𐴟 𐴉𐴟𐴏𐴥𐴝𐴌 𐴒𐴡𐴙𐴅𐴧𐴙𐴠𐴁𐴝𐴌 ” 𐴀𐴝𐴣𐴀𐴌𐴝 𐴅𐴠𐴕𐴡𐴏𐴝𐴙𐴋 𐴕𐴦𐴡 𐴒𐴡𐴌𐴞 𐴱 𐴊𐴠𐴐𐴢 𐴏𐴥𐴝𐴌𐴞 𐴒𐴞𐴘𐴠𐴒𐴥𐴡𐴙𐴊𐴠 ( 𐴁𐴝𐴚𐴒𐴝𐴓𐴞 ) 𐴀𐴥𐴡𐴑𐴧𐴡𐴓𐴡𐴌 𐴎𐴝𐴒𐴝 𐴀𐴝𐴘 𐴏𐴞 𐴅𐴠 𐴘𐴠 𐴈𐴡𐴘𐴧𐴠𐴊𐴠 𐴔𐴡𐴎𐴞𐴕 𐴀𐴠𐴏𐴃𐴠𐴔𐴝𐴓 𐴕𐴡𐴒𐴡𐴌𐴞 𐴁𐴡𐴌𐴝𐴁𐴡𐴌 𐴌𐴝𐴑𐴥𐴞 𐴊𐴞𐴘𐴧𐴞 𐴱 𐴔𐴡𐴕𐴃𐴡𐴌 𐴔𐴡𐴚𐴋𐴥𐴟𐴌 𐴀𐴠𐴓𐴝𐴑𐴝 𐴁𐴝𐴊𐴠 𐴀𐴡𐴙𐴕𐴧𐴡 𐴀𐴠𐴓𐴝𐴑𐴝𐴃 𐴱 𐴇𐴥𐴡𐴑𐴟𐴔𐴡𐴃𐴡𐴌𐴃𐴟 𐴉𐴥𐴝𐴘𐴊𐴝 𐴀𐴥𐴡𐴊𐴠 𐴀𐴥𐴠𐴕𐴋𐴞𐴓𐴧𐴝 𐴱 𐴂𐴡𐴌𐴡𐴅𐴥𐴠𐴑𐴄 𐴃𐴥𐴝𐴑𐴞𐴓𐴠 𐴒𐴡𐴌𐴞 𐴉𐴥𐴠𐴓𐴝𐴘𐴧𐴟𐴔 𐴱 𐴀𐴥𐴠𐴕𐴋𐴞𐴓𐴧𐴝 𐴀𐴡𐴑𐴃𐴡𐴃 𐴔𐴝𐴕𐴟𐴙𐴐𐴢 𐴃𐴥𐴝𐴑𐴞𐴓𐴠 𐴀𐴥𐴟𐴊𐴧𐴝 𐴱 𐴔𐴝𐴕𐴟𐴙𐴐𐴢 𐴃𐴟𐴓𐴞𐴊𐴞 𐴎𐴝𐴒𐴝 𐴎𐴡𐴁𐴊𐴡 𐴒𐴡𐴌𐴞 𐴇𐴥𐴡𐴑𐴟𐴔𐴡𐴃𐴡𐴌 𐴂𐴡𐴌𐴟𐴒𐴠𐴌𐴝𐴔 𐴒𐴡𐴌𐴥𐴞 𐴉𐴥𐴠𐴓𐴝 𐴉𐴡𐴌𐴠 𐴱 𐴀𐴝𐴘 𐴏𐴞 𐴅𐴠𐴌 𐴁𐴝𐴁𐴡𐴃𐴠 𐴀𐴝𐴣𐴀𐴌𐴝 𐴈𐴡𐴕𐴥𐴡 𐴀𐴡𐴐𐴥𐴝𐴕𐴃𐴞𐴃 𐴕𐴥𐴝𐴘 ” 𐴇𐴥𐴞𐴕𐴊𐴟 𐴀𐴝𐴌 𐴔𐴟𐴏𐴡𐴓𐴔𐴝𐴕 𐴐𐴥𐴟𐴊𐴠 𐴊𐴤𐴡𐴌𐴔𐴡 𐴉𐴡𐴌𐴡𐴑𐴊𐴠 𐴊𐴟𐴕𐴥𐴡 𐴎𐴝𐴃 𐴁𐴝𐴚𐴒𐴝𐴓𐴞 𐴱 𐴁𐴝𐴚𐴓𐴝𐴊𐴠𐴐𐴡𐴃 𐴒𐴞𐴘𐴠𐴒𐴥𐴡𐴙𐴊𐴠 𐴐𐴥𐴡𐴃𐴝 𐴐𐴥𐴡𐴃𐴞 𐴇𐴥𐴞𐴕𐴊𐴟𐴌𐴠 𐴔𐴟𐴏𐴡𐴓𐴔𐴝𐴕𐴠 𐴎𐴥𐴝𐴑𐴧𐴗𐴝 𐴔𐴝𐴌𐴝 𐴑𐴠𐴀𐴕𐴠 𐴔𐴝𐴙𐴓𐴧𐴡𐴀 𐴁𐴡𐴓𐴞 𐴐𐴥𐴝𐴘𐴐𐴙𐴡𐴃𐴑𐴝𐴌 𐴀𐴥𐴟𐴀 𐴏𐴥𐴟𐴀 𐴘𐴠 𐴈𐴡𐴘𐴧𐴠 𐴱𐴱

𐴷 𐴱 𐴰 𐴲 𐴀𐴞𐴚𐴌𐴝𐴎𐴞 𐴹 𐴲 𐴲 𐴱 𐴌𐴟𐴇𐴝𐴙𐴚𐴒𐴙𐴝 𐴐𐴡𐴕𐴡𐴃 𐴀𐴝𐴃𐴡𐴚𐴁𐴝𐴊𐴞𐴌 𐴐𐴥𐴡𐴚𐴑𐴡𐴄𐴡𐴌 𐴎𐴡𐴌𐴞𐴘𐴝 𐴁𐴝𐴚𐴓𐴝𐴊𐴠𐴐𐴡𐴃 𐴒𐴞𐴀𐴓 𐴒𐴥𐴡𐴙𐴊𐴠 𐴱 𐴔𐴝𐴙𐴕𐴐𐴡𐴌 𐴁𐴥𐴟𐴃𐴡𐴌𐴃𐴟 𐴔𐴡𐴚𐴋𐴥𐴟𐴃 𐴖𐴝𐴉𐴠𐴏𐴢 𐴀𐴝𐴙𐴐𐴧𐴠𐴊𐴠 / 𐴔𐴟𐴇𐴝𐴔𐴧𐴡𐴊𐴢 𐴐𐴥𐴡𐴌𐴞𐴉𐴠 𐴈𐴡𐴘𐴧𐴠𐴊𐴠 ” 𐴀𐴝𐴌𐴑𐴝𐴕𐴡𐴃 𐴅𐴠𐴕𐴡𐴏𐴝𐴙𐴋 𐴕𐴦𐴡 𐴀𐴥𐴡 𐴱 𐴀𐴥𐴠𐴃𐴡𐴓𐴧𐴝 𐴅𐴠𐴕𐴡𐴏𐴝𐴙𐴋 𐴕𐴡𐴈𐴦𐴡𐴕 𐴏𐴝𐴀 𐴱 𐴎𐴝𐴃𐴞𐴏𐴥𐴡𐴔𐴡𐴒𐴝𐴌 𐴓𐴞𐴏𐴄𐴞 𐴔𐴡𐴎𐴞𐴕 𐴇𐴥𐴝𐴣𐴃 𐴓𐴝𐴑𐴡𐴌 𐴖𐴡𐴌𐴠 𐴱 𐴔𐴝𐴕𐴟𐴙𐴐𐴢 𐴁𐴝𐴚𐴓𐴝𐴊𐴠𐴐𐴡𐴃 𐴎𐴡𐴕𐴡𐴌 𐴏𐴥𐴡𐴁𐴡𐴁 ( 𐴀𐴝𐴌𐴏𐴝) 𐴱 𐴎𐴡𐴊𐴞 𐴀𐴝𐴌𐴏𐴝 𐴘𐴠 𐴁𐴡𐴖𐴋𐴝𐴌 𐴏𐴦𐴡𐴛 𐴉𐴟𐴓𐴞𐴐𐴡𐴌 𐴒𐴥𐴝𐴣𐴄𐴞𐴃 𐴀𐴝𐴃𐴡𐴚𐴁𐴝𐴊𐴞 𐴇𐴥𐴝𐴔𐴓𐴝 𐴕𐴡𐴒𐴡𐴌𐴞𐴃𐴡 𐴱 𐴁𐴠𐴈𐴡𐴏𐴟𐴌 𐴔𐴝𐴙𐴕𐴐𐴡𐴌𐴠 𐴕𐴡𐴔𐴝𐴌𐴞𐴃𐴡 𐴱 𐴀𐴠𐴊𐴦𐴟𐴕 𐴔𐴝𐴙𐴕𐴟𐴙𐴐𐴢 𐴁𐴝𐴚𐴓𐴝𐴊𐴠𐴐𐴢 𐴎𐴝𐴀 𐴕𐴡𐴉𐴡𐴌𐴞𐴃𐴡 𐴱 𐴁𐴡𐴌𐴔𐴝 𐴌𐴠 𐴐𐴥𐴝𐴎𐴝 𐴊𐴞𐴘𐴝 𐴉𐴡𐴙𐴌𐴓𐴠 𐴱 𐴀𐴝𐴌𐴏𐴝 𐴌𐴠 𐴘𐴥𐴡 𐴊𐴞𐴘𐴝𐴉𐴡𐴌𐴞𐴁𐴡 𐴱 𐴁𐴡𐴓𐴞 / 𐴔𐴟𐴇𐴝𐴔𐴧𐴡𐴊𐴢 𐴐𐴥𐴡𐴌𐴞𐴉𐴠 𐴈𐴡𐴘𐴧𐴠 ” 𐴱𐴱

𐴁𐴠𐴐𐴥𐴝𐴁𐴠𐴐𐴥𐴞 𐴉𐴝𐴌𐴝 𐴎𐴝𐴓𐴝𐴘 𐴊𐴦𐴡𐴕𐴠 𐴱 𐴕𐴡𐴏𐴡𐴓 𐴉𐴥𐴟𐴌𐴝 𐴑𐴝𐴌𐴖𐴝𐴘 𐴒𐴡𐴌𐴥𐴡𐴕𐴠 𐴱 𐴓𐴝𐴑𐴥𐴝 𐴓𐴝𐴑𐴥𐴞 𐴔𐴝𐴕𐴟𐴙𐴐𐴢 𐴔𐴡𐴚𐴋𐴥𐴟𐴌𐴃𐴟 𐴁𐴝𐴚𐴓𐴝𐴊𐴠𐴐𐴡𐴃 𐴒𐴞𐴘𐴠 𐴒𐴥𐴡𐴘𐴊𐴠 𐴱 𐴀𐴝𐴌𐴥𐴝𐴘 𐴁𐴡𐴏𐴡𐴌𐴡𐴌 𐴖𐴡𐴌𐴠 𐴀𐴥𐴡𐴘𐴧𐴠 𐴱 𐴌𐴞𐴉𐴟𐴎𐴞 𐴕𐴡 𐴁𐴡𐴕𐴞 𐴊𐴠𐴐𐴡𐴃 𐴃𐴥𐴝𐴙𐴑𐴞 𐴒𐴞𐴘𐴡𐴘𐴊𐴠 𐴔𐴟𐴏𐴡𐴓𐴔𐴝𐴕 𐴁𐴠𐴐𐴥𐴞 𐴏𐴞𐴕𐴃𐴝 𐴀𐴝𐴌 𐴋𐴡𐴌𐴡𐴃 𐴀𐴝𐴏𐴠 𐴱𐴱