𐴔𐴥𐴝𐴔𐴁𐴝𐴌𐴝𐴃 𐴒𐴡𐴌𐴢𐴢 𐴀𐴥𐴝𐴣𐴎𐴝𐴌 𐴁𐴝𐴁𐴡𐴃𐴠 𐴱 𐴌𐴢𐴢𐴇𐴝𐴙𐴚𐴒𐴙𐴝 𐴀𐴝𐴌 𐴔𐴡𐴒𐴡𐴌 𐴔𐴝𐴎𐴠 𐴃𐴡𐴕𐴝𐴖 𐴁𐴝𐴌𐴦𐴠𐴌 𐴱𐴱

𐴔𐴥𐴝𐴁𐴝𐴌𐴝 𐴀𐴠𐴓𐴝𐴑𐴝𐴌 𐴐𐴥𐴡𐴣𐴍𐴡 𐴄𐴡𐴀𐴕 𐴂𐴝𐴕 𐴔𐴙𐴡𐴚𐴡𐴌 𐴱 𐴉𐴡𐴑𐴃𐴢𐴢𐴌 𐴕𐴝𐴒𐴝𐴌𐴝 𐴉𐴝𐴌𐴝𐴌 / 𐴀𐴥𐴢𐴢𐴀 𐴑𐴙𐴡 𐴔𐴙𐴥𐴝 𐴏𐴠𐴕 𐴁𐴝𐴉𐴢 𐴏𐴠𐴕 𐴃𐴝 𐴓𐴤𐴝𐴌 𐴊𐴢𐴢𐴖𐴝 𐴒𐴡𐴌𐴢𐴢 𐴱 𐴅𐴝𐴕𐴢𐴢𐴖𐴝𐴌𐴞𐴌 𐴹 𐴲 𐴃𐴝𐴌𐴞𐴑𐴡𐴌 𐴊𐴞𐴕 𐴀𐴥𐴝𐴣𐴎𐴞 𐴒𐴞𐴘𐴡𐴘 𐴱 𐴀𐴥𐴠 𐴔𐴡𐴙𐴒𐴧𐴙𐴝 𐴘𐴠 𐴀𐴥𐴠𐴉𐴝𐴌𐴝𐴌 𐴉𐴡𐴘𐴝𐴎𐴢𐴢𐴓 𐴀𐴞𐴏𐴓𐴝𐴔 𐴁𐴝𐴉𐴢 𐴕𐴢𐴢𐴌𐴢𐴢𐴓 𐴀𐴞𐴏𐴓𐴝𐴔 𐴁𐴡𐴐𐴢 𐴵 𐴳 𐴁𐴡𐴏𐴡𐴌𐴡𐴌𐴠 𐴱 𐴔𐴞𐴏𐴥𐴝 𐴏𐴢𐴢𐴌𐴞𐴃 𐴁𐴝𐴎𐴝𐴘 𐴱 𐴃𐴞𐴕𐴎𐴡𐴕 𐴔𐴡𐴒𐴁𐴝𐴒𐴞 𐴀𐴝𐴌 𐴃𐴞𐴕𐴎𐴡𐴕 𐴉𐴝𐴙𐴅𐴧𐴙𐴝 𐴉𐴠𐴄𐴞 𐴔𐴡𐴒𐴢 𐴓𐴡𐴘 𐴱 𐴀𐴦𐴝𐴘𐴧𐴡𐴌𐴠 𐴅𐴝𐴕𐴢𐴢𐴖𐴝𐴌𐴞𐴌 𐴰 𐴳 𐴃𐴝𐴌𐴞𐴑𐴡𐴌 𐴊𐴞𐴕 𐴁𐴝𐴣𐴊𐴞 𐴓𐴡𐴘𐴒𐴞𐴘𐴡𐴘 𐴱𐴱

𐴃𐴝𐴌 𐴉𐴡𐴌𐴡𐴌 𐴊𐴞𐴕 𐴈𐴡𐴊𐴢𐴢𐴀𐴕 𐴔𐴡𐴒𐴁𐴝𐴒𐴢 𐴘𐴠 𐴰 𐴳 𐴎𐴡𐴕 𐴓𐴡𐴃𐴞 𐴉𐴠𐴄𐴞 𐴔𐴡𐴒𐴢 𐴉𐴥𐴢𐴢𐴣𐴖𐴝𐴣𐴃𐴞 𐴓𐴦𐴡𐴘 𐴱 𐴐𐴗𐴠 𐴄𐴝𐴔𐴝 𐴁𐴡𐴌𐴉𐴝𐴌𐴝𐴌 𐴓𐴝𐴄 𐴔𐴝 𐴉𐴝𐴌𐴝𐴃 𐴎𐴝𐴘 𐴱 𐴔𐴢𐴢𐴇𐴝𐴔𐴧𐴡𐴊𐴢 𐴃𐴡𐴘𐴧𐴢𐴢𐴁 𐴁𐴝𐴉𐴢 𐴕𐴢𐴢𐴌𐴢𐴢𐴓 𐴀𐴞𐴏𐴓𐴝𐴔 𐴁𐴡𐴐𐴢 𐴰 𐴴 𐴁𐴡𐴏𐴡𐴌𐴡 𐴌𐴠 𐴘𐴥𐴡 𐴁𐴝𐴣𐴊𐴞 𐴓𐴡𐴘𐴒𐴞𐴘𐴡𐴘 𐴱 𐴔𐴡𐴕𐴃𐴡𐴌 𐴏𐴥𐴡𐴀𐴞 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴒𐴡𐴌𐴢𐴢 𐴊𐴢𐴢𐴕𐴥𐴢𐴢𐴖𐴝 𐴔𐴡𐴒𐴢𐴉𐴝𐴌𐴝𐴃 𐴉𐴝𐴒𐴞𐴘𐴠 𐴱 𐴁𐴝𐴊𐴠 𐴇𐴥𐴝𐴘𐴎𐴝𐴑 𐴒𐴡𐴌𐴞 𐴕𐴞𐴀𐴓𐴊𐴠 𐴌𐴢𐴢𐴇𐴝𐴙𐴚𐴒𐴙𐴝 𐴊𐴢𐴢𐴕𐴥𐴢𐴢 𐴎𐴡𐴕𐴡𐴌𐴠 𐴔𐴝𐴌𐴞 𐴉𐴥𐴠𐴓𐴝𐴘𐴧𐴠 𐴈𐴦𐴡𐴘 𐴀𐴝𐴁𐴝𐴘𐴧𐴝 𐴈𐴥𐴡𐴁𐴡𐴌 𐴕𐴠𐴓𐴝𐴘 𐴊𐴞𐴘𐴠 𐴱𐴱

𐴀𐴡 𐴌𐴢𐴢𐴇𐴝𐴙𐴚𐴒𐴙𐴝 𐴊𐴢𐴢𐴕𐴥𐴢𐴢 𐴎𐴡𐴕𐴡𐴌 𐴁𐴡𐴊𐴡𐴓𐴝𐴃 𐴔𐴢𐴢𐴏𐴡𐴓𐴔𐴝𐴕 𐴀𐴥𐴡𐴑𐴧𐴡𐴓𐴠 𐴔𐴡𐴒𐴢 𐴃𐴞𐴕𐴎𐴡𐴕 𐴌𐴝𐴧𐴏𐴝𐴃𐴧𐴢𐴢 𐴊𐴤𐴡𐴌𐴞 𐴁𐴝𐴣𐴊𐴞 𐴌𐴝𐴑𐴞 𐴊𐴞𐴘𐴠 𐴱 𐴃𐴦𐴡𐴘 𐴐𐴗𐴠 𐴄𐴝𐴔𐴝 𐴉𐴝𐴙𐴅𐴧𐴙𐴝 𐴋𐴦𐴡𐴣𐴌 𐴔𐴝𐴕𐴢𐴢𐴙𐴐𐴢 𐴀𐴝𐴌 𐴔𐴡𐴒𐴡𐴌 𐴔𐴢𐴢𐴌𐴡𐴁𐴧𐴞 𐴀𐴥𐴡𐴑𐴧𐴡𐴓 𐴀𐴝𐴀𐴘 𐴱 𐴔𐴡𐴒𐴢 𐴃𐴞𐴕𐴥𐴞𐴎𐴡𐴕𐴡𐴌𐴠 𐴀𐴠𐴌𐴞 𐴊𐴞𐴃𐴡 𐴈𐴡𐴘𐴓𐴡𐴁𐴝𐴌 𐴱 𐴔𐴢𐴢𐴏𐴡𐴓𐴔𐴝𐴕 𐴀𐴥𐴡𐴑𐴧𐴡𐴓𐴠 𐴱 𐴀𐴥𐴞𐴃𐴝𐴌𐴝𐴌 𐴉𐴝𐴙𐴅𐴧𐴙𐴝 𐴊𐴢𐴢𐴕𐴥𐴞𐴎𐴡𐴕𐴡𐴌𐴠 𐴀𐴠𐴌𐴞𐴊𐴡𐴕𐴡𐴌 𐴐𐴡𐴌𐴡𐴃 𐴓𐴡𐴘 𐴔𐴡𐴒𐴢 𐴃𐴞𐴕𐴥𐴞𐴎𐴡𐴕𐴡𐴌𐴠 𐴀𐴠𐴌𐴞 𐴊𐴞𐴉𐴥𐴠𐴓𐴝𐴘𐴧𐴠 𐴱 𐴎𐴠𐴈𐴥𐴡𐴕 𐴌𐴢𐴢𐴇𐴝𐴙𐴚𐴒𐴙𐴝 𐴀𐴝𐴌 𐴔𐴡𐴒𐴡𐴌 𐴔𐴝𐴎𐴠 𐴃𐴡𐴕𐴝𐴖 ( 𐴄𐴠𐴕𐴐𐴥𐴠𐴕 ) 𐴁𐴝𐴌𐴥𐴞 𐴒𐴞𐴘𐴡𐴘 𐴱 𐴃𐴦𐴡𐴘 𐴇𐴥𐴡𐴑𐴢𐴢𐴔𐴡𐴃𐴠 𐴰 𐴰 𐴲 𐴉𐴡𐴙𐴅𐴧𐴡𐴕𐴃𐴡 𐴉𐴢𐴢𐴓𐴞𐴐𐴢 𐴉𐴝𐴌𐴝𐴃 𐴀𐴝𐴕𐴞 𐴊𐴞𐴘𐴠 𐴱 𐴔𐴡𐴕𐴃𐴡𐴌 𐴔𐴢𐴢𐴏𐴡𐴓𐴔𐴝𐴕 𐴊𐴢𐴢𐴕𐴥𐴢𐴢𐴎𐴡𐴕 𐴀𐴝𐴘𐴅𐴥𐴡 𐴕𐴦𐴡 𐴀𐴝𐴘𐴧𐴠 𐴱 𐴉𐴝𐴙𐴅𐴧𐴙𐴝 𐴀𐴥𐴡𐴑𐴧𐴡𐴓𐴠 𐴃𐴝𐴌𐴝𐴌 𐴀𐴠𐴕𐴃𐴠𐴎𐴝𐴌 𐴒𐴡𐴌𐴦𐴠𐴌 𐴱𐴱