𐴀𐴝𐴘 𐴏𐴞 𐴅𐴠 𐴘𐴠 𐴌𐴢𐴢𐴇𐴝𐴙𐴚𐴒𐴙𐴝𐴌 𐴁𐴝𐴁𐴡𐴃𐴠 𐴱 𐴁𐴡𐴌𐴔𐴝𐴌𐴠 𐴃𐴦𐴡𐴙𐴃𐴧𐴝 𐴁𐴡𐴕𐴊𐴢𐴢𐴁𐴡𐴏𐴡𐴌 𐴀𐴡𐴋𐴝𐴌 𐴉𐴥𐴢𐴢𐴕𐴝𐴘 𐴊𐴞𐴘𐴠 𐴱𐴱

𐴁𐴡𐴌𐴔𐴝 𐴘𐴠 𐴌𐴢𐴢𐴇𐴝𐴙𐴚𐴒𐴙𐴝𐴌𐴠 𐴅𐴠𐴕𐴡𐴏𐴝𐴙𐴋 𐴒𐴡𐴙𐴅𐴧𐴙𐴠𐴊𐴠 𐴱 𐴘𐴥𐴝𐴕𐴡𐴌𐴓𐴝 𐴒𐴝𐴔𐴁𐴞𐴘𐴝 𐴘𐴠 𐴌𐴢𐴢𐴇𐴝𐴙𐴚𐴒𐴙𐴝𐴌 𐴃𐴡𐴌𐴉𐴡𐴌𐴃𐴢𐴢 𐴱 𐴁𐴡𐴌𐴔𐴝𐴌𐴠 𐴀𐴝𐴐𐴥𐴝𐴔𐴞 𐴊𐴞 𐴊𐴠𐴐𐴁𐴞𐴃𐴠𐴐𐴞 𐴀𐴞𐴕𐴏𐴝𐴉𐴢 𐴑𐴦𐴢𐴢𐴄 ( 𐴀𐴝𐴘 𐴏𐴞 𐴅𐴠 ) 𐴃 𐴑𐴥𐴢𐴢𐴙𐴓𐴧𐴠𐴊𐴠 𐴔𐴡𐴀𐴊𐴧𐴞𐴔𐴝 𐴱 𐴀𐴝𐴈𐴠𐴌𐴞 𐴉𐴥𐴝𐴘𐴏𐴠𐴓𐴝 𐴀𐴥𐴡 𐴉𐴡𐴙𐴅𐴧𐴡𐴕𐴃𐴡 𐴔𐴝𐴎𐴡𐴌 𐴀𐴡𐴑𐴃𐴡𐴌𐴓𐴝 𐴱 𐴒𐴡𐴃𐴡 𐴋𐴞𐴏𐴡𐴔𐴁𐴡𐴌𐴡𐴌 𐴰 𐴱 – 𐴲 𐴱 𐴃𐴝𐴌𐴞𐴑𐴡𐴃 𐴀𐴥𐴡𐴘𐴧𐴠𐴊𐴠 𐴉𐴥𐴢𐴢𐴕𐴡𐴕𐴞𐴌 𐴁𐴦𐴝𐴊𐴠 𐴱 𐴒𐴝𐴔𐴁𐴞𐴘𐴝 𐴘𐴠 𐴶 𐴖𐴝𐴕 𐴃𐴦𐴡𐴙𐴃𐴧𐴝 𐴃𐴡𐴕𐴊𐴢𐴢𐴁𐴡𐴏𐴡𐴌 𐴀𐴡𐴋𐴝𐴌 𐴕𐴠𐴓𐴝𐴘𐴊𐴞𐴁𐴡𐴓𐴧𐴝 𐴊𐴡𐴌𐴈𐴝𐴏𐴢 𐴃𐴢𐴢𐴓𐴞𐴊𐴞𐴀𐴓 / 𐴱 = 𐴌𐴢𐴢𐴇𐴝𐴙𐴚𐴒𐴙𐴝𐴌 𐴖𐴡𐴌𐴠 𐴅𐴠𐴕𐴡𐴏𐴝𐴙𐴋 𐴀𐴥𐴡𐴌 𐴱 𐴁𐴢𐴢𐴎𐴝𐴊𐴠 𐴎𐴠𐴊𐴞𐴀𐴕 𐴈𐴝𐴔 𐴀𐴝𐴏𐴠 𐴱 𐴁𐴡𐴌𐴔𐴝 𐴇𐴥𐴡𐴑𐴢𐴢𐴔𐴡𐴃𐴡𐴌𐴃𐴢𐴢 𐴁𐴠𐴙𐴒𐴧𐴞𐴕 𐴃𐴥𐴞𐴘𐴝𐴒𐴝𐴌𐴝𐴘 𐴉𐴥𐴠𐴓𐴝 𐴉𐴡𐴌𐴞𐴁𐴡 𐴱𐴱

𐴲 = 𐴁𐴡𐴌𐴔𐴝𐴌 𐴔𐴠𐴓𐴠𐴄𐴠𐴌𐴞 𐴘𐴝𐴃𐴡 𐴉𐴢𐴢𐴓𐴞𐴐𐴢 𐴘𐴝𐴃𐴡 𐴀𐴡𐴙𐴕𐴧𐴡 𐴈𐴡𐴕𐴥𐴡 𐴀𐴥𐴝𐴣𐴃𐴞𐴘𐴝𐴌 𐴀𐴡𐴓𐴝 𐴋𐴦𐴝𐴘𐴧𐴠 𐴅𐴠𐴕𐴡𐴏𐴙𐴋 𐴒𐴡𐴌𐴞 𐴕𐴡𐴉𐴝𐴌𐴠 𐴉𐴦𐴝𐴕 𐴌𐴢𐴢𐴇𐴝𐴙𐴚𐴒𐴙𐴌𐴠 𐴇𐴠𐴉𐴝𐴎𐴡𐴃 𐴒𐴡𐴌𐴝 𐴉𐴡𐴌𐴞𐴁𐴡 / 𐴳 = 𐴒𐴡𐴁𐴝 𐴀𐴥𐴞𐴏𐴝𐴉𐴠 𐴎𐴠𐴊𐴞𐴀𐴕 𐴏𐴝𐴁𐴢𐴢𐴃 𐴀𐴝𐴏𐴠 𐴱 𐴀𐴥𐴞𐴀𐴕 𐴁𐴥𐴢𐴢𐴎𐴝𐴘 𐴕𐴡 𐴉𐴥𐴠𐴓𐴝 𐴉𐴦𐴝𐴕 / 𐴴 = 𐴁𐴡𐴌𐴔𐴝 – 𐴒𐴝𐴔𐴁𐴞𐴘𐴝 𐴀𐴝𐴉𐴡𐴏𐴡𐴌 𐴃𐴝𐴀𐴓𐴧𐴢𐴢𐴑 𐴈𐴥𐴡𐴌𐴝𐴉𐴢 𐴀𐴥𐴡𐴊𐴠 𐴀𐴥𐴠𐴕𐴋𐴞𐴓𐴧𐴝 𐴈𐴝𐴔 𐴕𐴡𐴒𐴡𐴌𐴦𐴡𐴕 / 𐴵 = 𐴃𐴦𐴡𐴙𐴃𐴧𐴝 𐴁𐴡𐴕𐴊𐴢𐴢𐴁𐴡𐴏𐴡𐴌 𐴀𐴡𐴋𐴝𐴌 𐴀𐴥𐴡𐴘𐴓𐴠 𐴱 𐴏𐴝𐴙𐴌 𐴔𐴥𐴝𐴐𐴡𐴌 𐴁𐴥𐴢𐴢𐴃𐴡𐴌 𐴊𐴢𐴢𐴕𐴥𐴢𐴢 𐴋𐴦𐴝𐴘𐴧𐴠 𐴌𐴠𐴂𐴢𐴢𐴄 𐴃𐴢𐴢𐴓𐴞 𐴊𐴦𐴡𐴕 / 𐴶 = 𐴉𐴥𐴠𐴑𐴄 𐴉𐴥𐴝𐴙𐴕𐴋𐴞𐴚 𐴔𐴞𐴐𐴥𐴞𐴕 𐴘𐴝𐴃𐴡 𐴀𐴥𐴠𐴕𐴋𐴞𐴓𐴧𐴝 𐴎𐴝𐴃𐴞𐴏𐴥𐴡𐴔𐴡𐴒𐴝𐴌 𐴀𐴡𐴙𐴕𐴧𐴡 𐴃𐴡𐴊𐴝𐴌𐴢𐴢𐴑𐴞 𐴑𐴡𐴔𐴞𐴐𐴠𐴕 𐴀𐴥𐴡𐴑𐴧𐴡𐴓 𐴓𐴡𐴘 𐴔𐴞𐴓𐴞 𐴈𐴝𐴔 𐴒𐴡𐴌𐴦𐴡𐴕 𐴱𐴱

𐴒𐴝𐴔𐴁𐴞𐴘𐴝 𐴊𐴞𐴘𐴠𐴊𐴠 𐴀𐴥𐴠𐴕𐴋𐴞𐴓𐴧𐴝 𐴁𐴡𐴌𐴔𐴝 𐴇𐴥𐴡𐴑𐴢𐴢𐴔𐴡𐴃𐴡𐴌 𐴃𐴡𐴌𐴉𐴡𐴌𐴃𐴢𐴢 𐴱 𐴔𐴡𐴀𐴊𐴧𐴞𐴔𐴝𐴃 𐴇𐴥𐴎𐴞𐴌 𐴀𐴦𐴡𐴙𐴓𐴊𐴠 / 𐴋𐴦𐴡 𐴀𐴡𐴚 𐴏𐴥𐴝𐴕 𐴏𐴥𐴢𐴢𐴀𐴑𐴞 𐴘𐴠 𐴘𐴥𐴡 𐴊𐴢𐴢𐴘𐴧𐴝𐴕 𐴊𐴞𐴀𐴓 / 𐴱 = 𐴔𐴡𐴀𐴊𐴧𐴞𐴔𐴝𐴌 𐴉𐴥𐴝𐴙𐴓 𐴉𐴥𐴠𐴓𐴝𐴘 𐴊𐴦𐴡𐴕 / 𐴲 = 𐴔𐴡𐴀𐴊𐴧𐴞𐴔𐴝 𐴑𐴥𐴢𐴢𐴓𐴞𐴓𐴠 𐴘𐴦𐴡 𐴒𐴝𐴔𐴁𐴞𐴘𐴝 𐴘𐴠 𐴈𐴡𐴘𐴧𐴠𐴊𐴠 𐴀𐴥𐴠𐴕𐴋𐴞𐴓𐴧𐴝 𐴃𐴦𐴡𐴙𐴃𐴧𐴝 𐴌𐴦𐴢𐴢𐴓𐴡𐴌 𐴀𐴡𐴋𐴝𐴌 𐴕𐴡 𐴒𐴡𐴌𐴦𐴡𐴕 𐴱𐴱 ” 𐴀𐴝𐴓𐴇𐴥𐴝𐴔𐴊𐴢𐴢 𐴓𐴞𐴓𐴧𐴝𐴇 𐴀𐴝𐴓𐴧𐴝𐴇𐴢 𐴃𐴝𐴀𐴝𐴓𐴝𐴌 𐴓𐴝𐴑 𐴓𐴝𐴑 𐴐𐴥𐴢𐴢𐴑𐴢𐴢𐴌 ” 𐴀𐴝𐴙𐴅𐴧𐴙𐴝 𐴳 𐴲 / 𐴃𐴝𐴌𐴞𐴑 𐴅𐴝𐴕𐴢𐴢𐴖𐴝𐴌𐴞 𐴰 𐴲 𐴰 𐴲 𐴀𐴞𐴚𐴌𐴝𐴎𐴞 / 𐴹 / 𐴃𐴝𐴌𐴞𐴑 𐴔𐴝𐴒𐴢𐴔𐴝𐴐𐴢 𐴱 𐴳 𐴲 𐴱 𐴌𐴢𐴢𐴇𐴝𐴙𐴚𐴒𐴙𐴝 𐴁𐴞𐴐𐴥𐴞𐴃 𐴁𐴝𐴌𐴠 𐴱 𐴀𐴝𐴘 𐴏𐴞 𐴅𐴠 𐴊𐴠𐴐𐴁𐴞𐴊𐴠𐴐𐴞 𐴀𐴞𐴕𐴏𐴝𐴉𐴢 𐴑𐴦𐴢𐴢𐴍𐴠 𐴱 𐴁𐴡𐴌𐴔𐴝 𐴇𐴥𐴡𐴑𐴢𐴢𐴔𐴡𐴃𐴡𐴌 𐴊𐴢𐴢𐴕𐴥𐴞𐴘𐴝𐴕 𐴉𐴥𐴠𐴓𐴝𐴘𐴊𐴞 𐴱 𐴒𐴝𐴔𐴁𐴞𐴘𐴝 𐴘𐴠 𐴊𐴞𐴀𐴓𐴊𐴠 𐴏𐴥𐴡𐴖𐴧𐴝𐴕𐴡𐴃𐴧𐴢𐴢 𐴏𐴝𐴙𐴌𐴒𐴝𐴕𐴡𐴌 𐴀𐴡𐴋𐴝𐴌 𐴕𐴠𐴓𐴝𐴘𐴊𐴞𐴘𐴠 𐴱𐴱

𐴱 = 𐴌𐴢𐴢𐴇𐴝𐴙𐴚𐴒𐴙𐴝𐴌 𐴖𐴡𐴌𐴠 𐴎𐴠𐴃𐴡 𐴋𐴦𐴡𐴙𐴓𐴧𐴝 𐴎𐴢𐴢𐴓𐴢𐴢𐴔 𐴀𐴥𐴡𐴘𐴧𐴠 𐴁𐴠𐴙𐴒𐴧𐴞𐴕 𐴁𐴡𐴕𐴒𐴡𐴌𐴞 𐴱 𐴌𐴢𐴢𐴇𐴝𐴙𐴚𐴒𐴙𐴝𐴌𐴠 𐴇𐴥𐴡𐴑𐴢𐴢𐴔𐴡𐴃𐴡𐴌𐴃𐴢𐴢 𐴇𐴠𐴉𐴝𐴎𐴡𐴃 𐴒𐴡𐴌𐴝 𐴉𐴡𐴌𐴞 𐴁𐴡 / 𐴲 = 𐴔𐴠𐴓𐴠𐴄𐴠𐴌𐴞 𐴘𐴝𐴃𐴡 𐴔𐴠𐴓𐴠𐴄𐴠𐴌𐴞𐴌 𐴇𐴥𐴝𐴃 𐴁𐴝𐴌𐴦𐴡𐴙𐴕𐴧𐴝 𐴈𐴡𐴕𐴥𐴡 𐴋𐴦𐴝𐴘 𐴘𐴝𐴃𐴡 𐴋𐴞𐴂𐴦𐴝𐴌𐴔𐴠𐴕𐴠 𐴱 𐴌𐴢𐴢𐴇𐴝𐴙𐴚𐴒𐴙𐴝𐴌𐴠 𐴕𐴡𐴏𐴥𐴡𐴓 𐴉𐴥𐴢𐴢𐴌𐴥𐴝 𐴑𐴝𐴌𐴖𐴝𐴘 𐴒𐴡𐴌𐴦𐴡𐴕 𐴱 𐴘𐴝𐴃𐴡 𐴀𐴝𐴌 𐴈𐴡𐴕𐴥𐴡 𐴋𐴦𐴝𐴘𐴌 𐴓𐴡𐴘 𐴐𐴥𐴡𐴌𐴞𐴑 𐴀𐴥𐴡𐴘 𐴒𐴡𐴌𐴦𐴡𐴕 𐴱 𐴘𐴝𐴃𐴡 𐴈𐴝𐴍𐴝 𐴔𐴝𐴌𐴝𐴌 𐴀𐴝𐴌 𐴀𐴡𐴙𐴕𐴧𐴡 𐴋𐴦𐴡𐴙𐴓𐴧𐴝 𐴎𐴢𐴢𐴓𐴢𐴢𐴔𐴡𐴌 𐴊𐴤𐴡𐴔𐴑𐴞 𐴊𐴦𐴡𐴕𐴱 𐴀𐴞𐴀𐴕 𐴕𐴡𐴀𐴥𐴡𐴉𐴦𐴝𐴕 𐴒𐴡𐴌𐴝 𐴉𐴡𐴌𐴞𐴁𐴡 𐴱 / 𐴳 = 𐴎𐴠 𐴎𐴠 𐴎𐴝𐴒𐴝 𐴀𐴥𐴡𐴑𐴧𐴡𐴓𐴡𐴃 𐴅𐴠𐴕𐴡𐴏𐴝𐴙𐴋 𐴀𐴥𐴡𐴘𐴧𐴠 𐴱 𐴀𐴥𐴠 𐴎𐴝𐴒𐴝 𐴀𐴥𐴡𐴑𐴧𐴡𐴓𐴡𐴌 𐴕𐴞𐴐𐴝𐴕𐴞 𐴕𐴡𐴁𐴥𐴢𐴢𐴎𐴝 𐴉𐴡𐴌𐴞𐴁𐴡 𐴱𐴎𐴠𐴕𐴋𐴞𐴓𐴧𐴝 𐴀𐴝𐴐𐴧𐴞𐴀𐴓 𐴀𐴥𐴠𐴕𐴋𐴞𐴓𐴧𐴝 𐴌𐴝𐴑𐴝 𐴉𐴡𐴌𐴞𐴁𐴡 𐴱 / 𐴴 = 𐴀𐴡𐴋𐴝𐴌 𐴕𐴠𐴙𐴓𐴧𐴠𐴊𐴠 𐴊𐴞𐴕 𐴀𐴥𐴡𐴙𐴃𐴠 𐴏𐴝𐴙𐴌 𐴔𐴝𐴐𐴡𐴌 𐴁𐴥𐴢𐴢𐴃𐴡𐴌𐴠 𐴌𐴠𐴂𐴢𐴢𐴄 𐴃𐴢𐴢𐴓𐴞 𐴊𐴞𐴘𐴝 𐴉𐴡𐴌𐴞𐴁𐴡 𐴱 𐴘𐴦𐴝𐴌 𐴁𐴦𐴝𐴊𐴠 𐴔𐴡𐴀𐴊𐴧𐴞𐴔𐴝 𐴉𐴥𐴝𐴘𐴏𐴠𐴓𐴝 𐴀𐴥𐴡𐴉𐴡𐴙𐴅𐴧𐴡𐴕𐴃𐴡 𐴉𐴡𐴙𐴃𐴧𐴡 𐴏𐴥𐴡𐴔𐴝𐴐𐴢 𐴁𐴝𐴊𐴠 𐴌𐴠𐴂𐴢𐴢𐴄 𐴃𐴢𐴢𐴓𐴞 𐴊𐴞𐴘𐴝 𐴉𐴡𐴌𐴞𐴁𐴡 𐴱𐴱 𐴀𐴠 𐴐𐴡𐴌𐴡𐴃 𐴀𐴞𐴀𐴕 𐴎𐴝𐴃𐴞𐴏𐴥𐴡𐴔𐴡𐴒𐴝𐴌 𐴑𐴝𐴕𐴢𐴢𐴕 𐴔𐴡𐴃𐴝𐴁𐴠𐴑 𐴊𐴠 𐴱 𐴀𐴥𐴠𐴃𐴡𐴓𐴧𐴝 𐴕𐴡𐴒𐴡𐴌𐴞 𐴕𐴡𐴉𐴥𐴝𐴌𐴞𐴁𐴡 𐴱 𐴈𐴥𐴝𐴔𐴝𐴑𐴥𐴝 𐴔𐴝𐴕𐴞 𐴓𐴢𐴢𐴖𐴝 𐴉𐴡𐴌𐴞𐴁𐴡𐴊𐴠 𐴱 𐴘𐴥𐴝𐴕𐴡 𐴀𐴝𐴘 𐴏𐴞 𐴅𐴠 𐴑𐴦𐴢𐴢𐴍𐴠 𐴀𐴠𐴓𐴝𐴕𐴡𐴃 𐴏𐴥𐴝𐴉𐴢 𐴒𐴡𐴌𐴞 𐴈𐴦𐴘𐴊𐴞𐴘𐴠 𐴱𐴱

SOURCES : RFA BURMESE