𐴌𐴢𐴢𐴇𐴝𐴙𐴚𐴒𐴙𐴝 𐴅𐴠𐴕𐴡𐴏𐴝𐴙𐴋𐴡𐴌𐴠 𐴁𐴥𐴢𐴢𐴎𐴝𐴘 𐴉𐴥𐴠𐴓𐴝𐴘𐴁𐴝𐴌 𐴑𐴢𐴢𐴐𐴞𐴐𐴢 𐴱 𐴁𐴡𐴌𐴔𐴝𐴌 𐴃𐴡𐴊𐴝𐴌𐴢𐴢𐴑𐴞 𐴑𐴡𐴔𐴞𐴐𐴥𐴠𐴕𐴡𐴌 𐴱𐴱

𐴀𐴝𐴌𐴑𐴝𐴕𐴡𐴃 𐴔𐴠𐴓𐴠𐴄𐴠𐴌𐴞 𐴀𐴥𐴡𐴑𐴧𐴡𐴓𐴠 𐴌𐴢𐴢𐴇𐴝𐴙𐴚𐴒𐴙𐴝𐴌𐴠 𐴎𐴢𐴢𐴓𐴢𐴢𐴔 𐴒𐴡𐴙𐴅𐴧𐴙𐴠 𐴱 𐴀𐴞𐴕𐴏𐴝𐴕𐴞 𐴇𐴥𐴡𐴑 𐴔𐴝𐴍𐴞 𐴒𐴡𐴙𐴅𐴧𐴙𐴠 𐴱 𐴀𐴥𐴞𐴕𐴡𐴌𐴠 𐴁𐴥𐴢𐴢𐴎𐴝𐴘 𐴉𐴥𐴠𐴓𐴝𐴘𐴁𐴡𐴓𐴧𐴝 𐴱 𐴕𐴢𐴢𐴖𐴝 𐴑𐴢𐴢𐴐𐴞𐴐𐴡𐴌 𐴀𐴡𐴕𐴃𐴡𐴌𐴒𐴡𐴃𐴠 𐴱 𐴏𐴢𐴢𐴖𐴝 𐴃𐴡𐴊𐴝𐴌𐴢𐴢𐴑𐴞 𐴑𐴡𐴔𐴞𐴐𐴥𐴠𐴕 𐴁𐴝𐴕𐴝𐴘 𐴱 𐴊𐴢𐴢𐴕𐴞𐴘𐴝𐴘𐴌𐴠 𐴌𐴠𐴂𐴢𐴢𐴄 𐴉𐴥𐴢𐴢𐴕𐴝𐴊𐴧𐴠 𐴱 𐴑𐴠𐴀𐴠𐴕 𐴈𐴡𐴘𐴓𐴠 ! 𐴔𐴠𐴓𐴠𐴄𐴠𐴌𐴞 𐴀𐴥𐴡𐴑𐴧𐴡𐴓𐴠 𐴷 𐴱 𐴰 𐴲 𐴐𐴥𐴡𐴕𐴡𐴃 𐴊𐴠𐴐𐴢 𐴏𐴥𐴡𐴉𐴝𐴘 𐴑𐴝𐴌𐴖𐴝𐴘 𐴒𐴡𐴌𐴞𐴁𐴝𐴌 𐴐𐴥𐴡𐴣𐴀𐴃 𐴱 𐴓𐴝𐴌𐴝𐴙𐴌 𐴊𐴢𐴢𐴐𐴢 𐴀𐴝𐴌 𐴀𐴞𐴕𐴏𐴝𐴕𐴞 𐴇𐴥𐴡𐴑 𐴔𐴝𐴍𐴞 𐴀𐴥𐴡𐴘𐴧𐴠𐴊𐴠 𐴘𐴦𐴝𐴕 𐴉𐴝𐴒𐴞𐴘𐴠𐴊𐴠 ( 𐴅𐴠𐴕𐴡𐴏𐴝𐴙𐴋𐴡𐴌 𐴀𐴠𐴌𐴝𐴊𐴝 ) 𐴉𐴝𐴦𐴕𐴡𐴎𐴝 𐴱 𐴎𐴢𐴢𐴓𐴢𐴢𐴔 𐴱 𐴈𐴝𐴍𐴝 𐴱 𐴔𐴝𐴌𐴝𐴱 𐴁𐴡𐴓𐴡𐴃𐴑𐴝𐴌𐴞 𐴱 𐴉𐴢𐴢𐴌𐴝𐴊𐴞𐴘𐴝 𐴱 𐴀𐴢𐴢𐴒𐴧𐴗𐴝 𐴑𐴡𐴖𐴔 𐴊𐴢𐴢𐴕𐴞𐴘𐴝𐴙𐴌 𐴖𐴡𐴌𐴡𐴌𐴃𐴧𐴢𐴢 𐴉𐴥𐴢𐴢𐴌𐴝𐴘 𐴎𐴝𐴒𐴥𐴡𐴘𐴊𐴠 𐴱 𐴃𐴡𐴌𐴞𐴑𐴝 𐴁𐴠𐴀𐴒𐴧𐴞𐴕 𐴒𐴡𐴙𐴅𐴧𐴙𐴠 𐴔𐴡𐴕𐴃𐴡𐴌 ” 𐴅𐴠𐴕𐴡𐴏𐴝𐴙𐴋𐴡𐴌 / 𐴕𐴡𐴏𐴥𐴡𐴓 𐴐𐴥𐴠𐴐𐴢 𐴒𐴡𐴌𐴞𐴁𐴝𐴌 𐴕𐴞𐴘𐴡𐴃 𐴕𐴦𐴡𐴒𐴡𐴌𐴠 𐴁𐴡𐴓𐴠 ” 𐴁𐴥𐴝𐴉𐴞 𐴏𐴡𐴀 𐴌𐴠𐴂𐴢𐴢𐴄 𐴘𐴦𐴝𐴕 𐴑𐴞 𐴏𐴢𐴢𐴖𐴝 𐴕𐴥𐴝𐴑𐴞 𐴉𐴢𐴢𐴃𐴧𐴝𐴕𐴞 𐴱𐴱

𐴃𐴡𐴊𐴝𐴌𐴢𐴢𐴑𐴞 𐴑𐴡𐴔𐴞𐴐𐴥𐴠𐴕𐴡𐴌 𐴀𐴠𐴓𐴝𐴕 𐴘𐴝𐴕 𐴀𐴠𐴑𐴧𐴝𐴕 𐴉𐴝𐴃𐴧𐴝𐴌𐴝𐴎𐴞 𐴱 𐴳 𐴲 𐴃𐴝𐴌𐴞𐴑𐴡𐴃 𐴀𐴝𐴘 𐴏𐴞 𐴅𐴠 𐴘𐴠 𐴃𐴦𐴡𐴙𐴃𐴧𐴝 𐴏𐴡𐴓𐴝𐴌 𐴃𐴡𐴌𐴞𐴑𐴝𐴌 𐴀𐴠𐴓𐴝𐴕 𐴒𐴡𐴌𐴞𐴁𐴡𐴊𐴠 𐴱 𐴀𐴥𐴠𐴃𐴧𐴢𐴢 𐴊𐴠𐴐𐴁𐴞𐴊𐴠𐴐𐴡𐴌 𐴊𐴤𐴞𐴘𐴧𐴝𐴕 𐴓𐴝𐴌𐴞 𐴉𐴥𐴠𐴓𐴝𐴘 𐴱 𐴌𐴢𐴢𐴇𐴝𐴙𐴚𐴒𐴙𐴝 𐴅𐴠𐴕𐴡𐴏𐴝𐴙𐴋𐴡𐴌𐴠 𐴑𐴢𐴢𐴣𐴏𐴝𐴘 𐴈𐴝𐴣𐴏𐴝𐴘 𐴒𐴝𐴣𐴃𐴡𐴃 𐴉𐴥𐴠𐴓𐴝𐴘𐴊𐴞𐴁𐴝𐴌 𐴱 𐴀𐴝𐴌𐴀𐴠𐴑 𐴉𐴡𐴌𐴑𐴝𐴌𐴡𐴌 𐴑𐴢𐴢𐴐𐴞𐴐𐴢 𐴱 𐴀𐴝𐴌 𐴀𐴥𐴠 𐴃𐴡𐴊𐴝𐴌𐴢𐴢𐴑𐴞 𐴑𐴡𐴔𐴞𐴐𐴥𐴠𐴕𐴠 𐴌𐴠𐴂𐴢𐴢𐴄𐴡𐴃 ” 𐴌𐴢𐴢𐴇𐴝𐴙𐴚𐴒𐴙𐴝 ” 𐴕𐴦𐴡 𐴓𐴠𐴑𐴠𐴊𐴠 𐴘𐴦𐴝𐴕𐴡𐴊𐴠 𐴅𐴠𐴕𐴡𐴏𐴝𐴙𐴋 𐴱 𐴑𐴙𐴡𐴓𐴧𐴝 𐴈𐴡𐴘𐴓𐴠 𐴀𐴢𐴢𐴒𐴧𐴗𐴝 𐴑𐴡𐴖𐴔𐴡𐴌 𐴏𐴞𐴕𐴧𐴡 𐴀𐴝𐴌 𐴖𐴡𐴅𐴢𐴢𐴊 𐴉𐴥𐴢𐴢𐴌𐴝𐴘𐴁𐴝𐴌 𐴱 𐴈𐴡𐴕𐴥𐴡 𐴑𐴞𐴘𐴥𐴡𐴃𐴧𐴢𐴢 𐴇𐴥𐴡𐴑 𐴕𐴥𐴝𐴘 𐴱𐴱

𐴊𐴢𐴢𐴕𐴞𐴘𐴝𐴙𐴌 𐴁𐴢𐴢𐴎𐴦𐴡𐴘𐴧𐴝 𐴀𐴥𐴡𐴑𐴧𐴡𐴓𐴠 𐴱 𐴌𐴢𐴢𐴇𐴝𐴙𐴚𐴒𐴙𐴝 𐴅𐴠𐴕𐴡𐴏𐴝𐴙𐴋𐴡𐴌 𐴎𐴞𐴔𐴧𐴝𐴊𐴝𐴌 𐴔𐴠𐴓𐴠𐴄𐴠𐴌𐴞𐴌 𐴁𐴡𐴌𐴡 / 𐴔𐴥𐴞𐴚 𐴀𐴡𐴚 𐴓𐴝𐴙𐴚 𐴐𐴥𐴡𐴣𐴀 𐴋𐴦𐴡𐴣𐴀𐴌 𐴐𐴥𐴝𐴀𐴉𐴢 𐴀𐴥𐴡𐴑𐴧𐴡𐴓𐴡𐴌𐴠 𐴄𐴤𐴡𐴌𐴦𐴝𐴊𐴧𐴠 𐴱 𐴀𐴥𐴠𐴃𐴡𐴓𐴧𐴝 𐴀𐴥𐴠 𐴌𐴠𐴂𐴢𐴢𐴄 𐴘𐴥𐴝𐴕𐴡𐴃 𐴀𐴥𐴞𐴃𐴝𐴌𐴝𐴌𐴠 𐴁𐴝𐴏𐴝𐴘 𐴓𐴡𐴘𐴁𐴡𐴓𐴧𐴝 𐴱 𐴎𐴢𐴢𐴓𐴢𐴢𐴔 𐴀𐴥𐴞𐴀𐴕 𐴁𐴡𐴖𐴋𐴝𐴌 𐴏𐴡𐴀𐴛 𐴉𐴢𐴢𐴓𐴞𐴐𐴢 𐴀𐴥𐴡𐴑𐴧𐴡𐴓𐴠 𐴕𐴞𐴎𐴡𐴌 𐴃𐴡𐴌𐴉𐴡𐴌𐴃𐴢𐴢 𐴒𐴡𐴙𐴅𐴧𐴙𐴠𐴊𐴠 𐴱 𐴈𐴦𐴡𐴘𐴧𐴡𐴌𐴠 𐴕𐴝𐴑𐴝𐴔 𐴑𐴢𐴢𐴐𐴞𐴐𐴢 𐴀𐴥𐴡 𐴒𐴡𐴙𐴅𐴧𐴙𐴠 𐴱𐴱