𐴔𐴥𐴝𐴔𐴁𐴡𐴌𐴝 𐴀𐴠𐴓𐴝𐴑𐴝𐴌 𐴉𐴝𐴌𐴝𐴌 𐴋𐴦𐴣𐴡𐴌 𐴔𐴝𐴙𐴕𐴐𐴡𐴌 𐴊𐴡𐴌𐴈𐴝𐴏𐴢 / 𐴋𐴦𐴡 𐴀𐴡𐴚 𐴏𐴥𐴠𐴚 𐴏𐴥𐴢𐴢𐴀𐴑𐴞𐴌 𐴈𐴝𐴣𐴏𐴠 𐴇𐴠𐴉𐴝𐴎𐴡𐴃𐴞𐴌𐴓𐴝 𐴱𐴱

𐴔𐴥𐴝𐴕𐴁𐴡𐴌𐴝 𐴀𐴠𐴓𐴝𐴑𐴝𐴌 𐴏𐴥𐴞𐴃𐴧𐴝𐴌𐴝 𐴉𐴝𐴌𐴝𐴌 𐴀𐴥𐴢𐴢𐴑𐴝𐴄𐴝 𐴌𐴠 𐴔𐴝𐴌𐴞 𐴉𐴥𐴠𐴓𐴝𐴘𐴧𐴠𐴊𐴠 𐴘𐴥𐴝𐴕𐴡𐴌 𐴁𐴝𐴁𐴡𐴃𐴠 𐴱 𐴃𐴡𐴊𐴝𐴌𐴢𐴢𐴑 𐴒𐴡𐴌𐴞 𐴇𐴥𐴡𐴑 𐴁𐴦𐴝𐴙𐴌 𐴒𐴡𐴌𐴞 𐴁𐴡𐴓𐴧𐴝 𐴱 𐴸 𐴶 𐴎𐴡𐴕 𐴀𐴥𐴢𐴢𐴑𐴝𐴄𐴝 𐴔𐴞𐴓𐴞 / 𐴋𐴦𐴡 𐴀𐴡𐴚 𐴏𐴥𐴠𐴚 𐴏𐴥𐴢𐴢𐴀𐴑𐴞𐴌 𐴈𐴝𐴣𐴏𐴠 𐴊𐴡𐴌𐴈𐴝𐴏𐴢 𐴊𐴞𐴘𐴠 𐴱 𐴳 𐴱 𐴃𐴝𐴌𐴞𐴑 𐴋𐴞𐴏𐴡𐴔𐴁𐴡𐴌 / 𐴹 𐴲 𐴀𐴡𐴀𐴕 𐴔𐴝𐴐𐴢 𐴱 𐴳 𐴲 𐴱 𐴌𐴢𐴢𐴇𐴝𐴙𐴚𐴒𐴙𐴝 𐴃𐴝𐴌𐴞𐴑𐴡𐴌 𐴊𐴞𐴕 𐴱 𐴏𐴥𐴞𐴃𐴧𐴝𐴌𐴝 𐴉𐴝𐴌𐴝𐴌 𐴀𐴥𐴢𐴢𐴑𐴧𐴝𐴄𐴝 / 𐴀𐴥𐴢𐴢𐴀 𐴛𐴠𐴚 𐴏𐴥𐴞𐴔𐴡𐴌 𐴒𐴤𐴡𐴌𐴡𐴃 𐴌𐴝𐴃𐴞𐴘𐴝 𐴱 𐴀𐴠𐴑 𐴎𐴡𐴕 𐴄𐴥𐴡𐴖𐴌 𐴐𐴥𐴡𐴣𐴀 𐴰 𐴲 𐴎𐴡𐴕 𐴉𐴝𐴙𐴅𐴧𐴙𐴝 𐴔𐴝𐴕𐴢𐴢𐴙𐴐𐴢 𐴱 𐴀𐴦𐴡𐴙𐴕 𐴉𐴥𐴢𐴢𐴖𐴝𐴘 𐴉𐴥𐴢𐴢𐴖𐴝𐴘 𐴒𐴡𐴂𐴢 𐴐𐴥𐴡𐴂𐴢 𐴒𐴡𐴌𐴠𐴊𐴧𐴠 𐴀𐴡𐴑𐴃𐴡𐴃 𐴱 𐴔𐴠𐴓𐴠𐴄𐴠𐴌𐴞 𐴒𐴥𐴡𐴓𐴞 𐴀𐴥𐴢𐴢𐴑𐴝𐴄𐴝 𐴌𐴠 𐴁𐴡𐴕𐴋𐴢𐴢𐴑𐴡𐴌 𐴉𐴢𐴢𐴣𐴊𐴝 𐴔𐴝𐴌𐴞 𐴁𐴝𐴙𐴅𐴧𐴝𐴘 𐴔𐴝𐴌𐴞 𐴉𐴥𐴠𐴓𐴘𐴧𐴠 𐴊𐴠 𐴘𐴦𐴝𐴕 𐴱 𐴛𐴥𐴡𐴀𐴃 𐴀𐴝𐴐𐴧𐴞𐴓𐴊𐴠 𐴀𐴥𐴢𐴢𐴕𐴠 𐴏𐴢𐴢𐴑 𐴊𐴠𐴈𐴝 𐴒𐴡𐴁𐴝 𐴊𐴞𐴘𐴠 𐴱𐴱

𐴒𐴢𐴢𐴌𐴝 𐴉𐴢𐴢𐴖𐴝𐴌 𐴔𐴝𐴣 𐴀𐴠𐴑𐴎𐴡𐴕 𐴹 𐴳 𐴁𐴡𐴏𐴡𐴌 𐴁𐴡𐴐𐴢 𐴱 𐴉𐴢𐴢𐴖𐴝 𐴓𐴡𐴘 𐴒𐴤𐴡𐴌𐴡𐴃𐴧𐴢𐴢 𐴓𐴝𐴔𐴠𐴌𐴊𐴠 𐴐𐴥𐴡𐴣𐴀𐴃 𐴒𐴢𐴢𐴓𐴞 𐴉𐴡𐴌𐴞 𐴔𐴡𐴌𐴞 𐴒𐴞𐴘𐴡𐴘 𐴱 𐴓𐴝𐴌𐴝𐴘 𐴀𐴥𐴡𐴊𐴧𐴠 𐴎𐴝𐴒𐴝 𐴀𐴥𐴡𐴑𐴧𐴡𐴓𐴡𐴃 𐴱 𐴀𐴞𐴕𐴏𐴝𐴉𐴢 𐴏𐴥𐴝𐴌𐴝 𐴁𐴠𐴑𐴝𐴕𐴢𐴢𐴕𐴞 𐴀𐴥𐴢𐴢𐴑𐴝𐴄𐴝 𐴀𐴥𐴡𐴑𐴧𐴡𐴓𐴡𐴌𐴠 𐴔𐴝𐴌𐴞 𐴉𐴥𐴠𐴓𐴠𐴌 𐴱 𐴀𐴠𐴓𐴎𐴝𐴔 𐴀𐴥𐴡𐴑𐴧𐴡𐴓 𐴓𐴝𐴒𐴝𐴌 𐴱 𐴀𐴥𐴞𐴕𐴡𐴌 𐴃𐴡𐴊𐴝𐴌𐴢𐴢𐴑𐴞 𐴀𐴝𐴌 𐴀𐴞𐴕𐴏𐴝𐴉𐴡𐴌𐴓𐴝 𐴱 𐴕𐴝𐴔 𐴀𐴝𐴌 𐴉𐴡𐴄𐴢𐴢 𐴎𐴝𐴙𐴌 𐴕𐴡𐴒𐴡𐴌𐴦𐴡𐴕𐴡𐴌 𐴐𐴡𐴌𐴡𐴃 𐴓𐴡𐴘 𐴱 𐴀𐴥𐴢𐴢𐴑𐴝𐴄𐴝 𐴏𐴝𐴙𐴌 𐴎𐴡𐴕 𐴐𐴥𐴡𐴣𐴀 𐴉𐴝𐴙𐴅𐴧𐴙𐴝 𐴀𐴥𐴡𐴑𐴧𐴡𐴓 𐴔𐴞𐴓𐴞 𐴱 𐴊𐴠𐴐𐴢 𐴌𐴡𐴑𐴧𐴝 𐴀𐴡𐴉𐴞𐴏𐴢 𐴀𐴝𐴌 𐴋𐴦𐴡 𐴀𐴡𐴚 𐴏𐴥𐴠𐴚 𐴏𐴥𐴢𐴢𐴀𐴑𐴞𐴌 𐴈𐴝𐴣𐴏𐴠 𐴊𐴡𐴌𐴈𐴝𐴏 𐴊𐴞𐴘𐴠𐴊𐴠 𐴱𐴱

𐴀𐴠 𐴀𐴠 𐴔𐴡𐴒𐴁𐴝𐴒𐴞 𐴘𐴠 𐴂𐴝𐴂𐴓𐴞𐴑𐴡𐴌𐴠 𐴔𐴝𐴌𐴞 𐴊𐴤𐴡𐴌𐴞 𐴁𐴡𐴓𐴡𐴃𐴑𐴝𐴌 𐴒𐴡𐴌𐴞𐴁𐴝𐴌 𐴑𐴢𐴢𐴐𐴞𐴐𐴢 𐴆𐴥𐴙𐴝𐴚 𐴀𐴠𐴏𐴄𐴦𐴠𐴄𐴡𐴃 𐴱𐴱

𐴀𐴠 𐴀𐴠 𐴔𐴡𐴒𐴁𐴝𐴒𐴞𐴌 𐴉𐴥𐴡𐴖𐴏𐴢 𐴀𐴠𐴑𐴎𐴡𐴕𐴠 𐴱 𐴆𐴥𐴙𐴝𐴚 𐴀𐴠𐴏𐴄𐴦𐴠𐴄𐴡𐴌 𐴂𐴡𐴓𐴝𐴖𐴝 𐴀𐴠𐴓𐴝𐴑𐴝𐴌 𐴑𐴦𐴠 𐴓𐴞 𐴉𐴝𐴌𐴝𐴃 𐴒𐴤𐴡𐴓𐴞 𐴱 𐴑𐴥𐴢𐴢𐴀𐴛 𐴔𐴝𐴘𐴧𐴝 𐴀𐴠𐴑𐴎𐴡𐴕𐴡𐴌𐴠 𐴁𐴡𐴓𐴡𐴃𐴑𐴝𐴌 𐴒𐴡𐴌𐴞𐴁𐴝𐴌 𐴏𐴥𐴞𐴓𐴏𐴞𐴓𐴝𐴃 𐴱 𐴔𐴝𐴘𐴧𐴝 𐴖𐴝𐴌 𐴁𐴝𐴉𐴢 𐴔𐴝𐴣 𐴐𐴥𐴡𐴣𐴀 𐴉𐴝𐴌𐴝𐴌 𐴁𐴢𐴢𐴌𐴤𐴝 𐴁𐴢𐴢𐴌𐴞 𐴀𐴥𐴡𐴑𐴧𐴡𐴓𐴡𐴌𐴠 𐴁𐴠𐴐𐴥𐴞 𐴔𐴝𐴌𐴝 𐴊𐴤𐴡𐴌𐴝 𐴒𐴡𐴙𐴅𐴧𐴙𐴠 𐴱 𐴀𐴝𐴌 𐴈𐴡𐴙𐴐𐴧𐴙𐴝 𐴉𐴢𐴢𐴖𐴝𐴙𐴕 𐴊𐴡𐴌𐴠 𐴱 𐴊𐴤𐴡𐴌𐴞 𐴁𐴝𐴣𐴊𐴞 𐴓𐴡𐴘𐴎𐴝𐴘 𐴑𐴡𐴓𐴝𐴋𐴠𐴚 𐴊𐴡𐴙𐴅𐴧𐴝𐴌 𐴈𐴝𐴣𐴏𐴝𐴃 𐴃𐴥𐴞𐴘𐴝 𐴒𐴝𐴌𐴝𐴘 𐴀𐴠𐴙𐴅𐴧𐴙𐴠 𐴱𐴱 𐴀𐴝𐴌 𐴇𐴥𐴝𐴔𐴞𐴐𐴝 𐴁𐴡𐴓𐴝𐴎𐴢𐴢𐴌𐴞 𐴎𐴡𐴁𐴡𐴌𐴊𐴡𐴏𐴃𐴞 𐴑𐴢𐴢𐴓𐴥𐴞 𐴊𐴡𐴌𐴞 𐴔𐴝𐴓 𐴀𐴝𐴌 𐴏𐴡𐴙𐴓 𐴀𐴥𐴝𐴣𐴍𐴝𐴁𐴝 𐴱 𐴀𐴝𐴌 𐴁𐴡𐴓𐴡𐴃 𐴑𐴝𐴌𐴞𐴌 𐴖𐴝𐴑𐴙𐴝𐴌 𐴁𐴝𐴁𐴡𐴃𐴠 𐴱 𐴈𐴡𐴕𐴥𐴞𐴑𐴧𐴙𐴝 𐴈𐴡𐴘𐴓𐴠 𐴀𐴥𐴞𐴃𐴝𐴌𐴠 𐴐𐴥𐴝𐴣𐴎𐴝 𐴊𐴞𐴁𐴡 𐴁𐴡𐴓𐴞 𐴊𐴤𐴔𐴑𐴞 𐴘𐴥𐴡 𐴊𐴞𐴘𐴠 𐴱𐴱