𐴑𐴥𐴡𐴏𐴥𐴡𐴚 𐴐𐴥𐴡𐴀𐴌𐴡𐴃 𐴁𐴢𐴢𐴍𐴡𐴃𐴧𐴢𐴢 𐴊𐴤𐴡𐴅𐴧𐴞𐴓𐴊𐴠 𐴌𐴞𐴉𐴢𐴢𐴎𐴞𐴌𐴠 𐴕𐴞𐴎𐴡𐴌 𐴕𐴞𐴎𐴡𐴌 𐴎𐴝𐴒𐴝𐴃 𐴖𐴝𐴉𐴠𐴏𐴢 𐴱𐴱

𐴀𐴝𐴙𐴑𐴧𐴙𐴝𐴁 𐴀𐴝𐴌 𐴁𐴝𐴚𐴓𐴝𐴊𐴠𐴐𐴢 𐴌𐴞𐴉𐴢𐴢𐴎𐴞 𐴑𐴠𐴀𐴠𐴔𐴡𐴃𐴧𐴢𐴢 𐴔𐴞𐴓𐴞 𐴱 𐴀𐴝𐴌𐴑𐴝𐴕𐴡𐴃𐴧𐴢𐴢 𐴁𐴢𐴢𐴄 𐴓𐴡𐴘 𐴕𐴠𐴓𐴞 𐴎𐴝𐴌𐴒𐴡𐴘𐴊𐴠 𐴌𐴢𐴢𐴇𐴝𐴙𐴚𐴒𐴙𐴝 𐴲 𐴷 𐴱 𐴎𐴡𐴕 𐴱 𐴎𐴞𐴃𐴝𐴌𐴝𐴌𐴠 𐴃𐴡𐴕𐴝𐴚𐴏𐴝𐴌𐴞 𐴋𐴞𐴐𐴄𐴞𐴑𐴡𐴌 𐴑𐴥𐴡𐴏𐴥𐴡𐴚 𐴐𐴥𐴡𐴀𐴌𐴡𐴌 𐴊𐴡𐴙𐴅𐴧𐴝𐴃𐴧𐴢𐴢 𐴊𐴤𐴡𐴅𐴧𐴞𐴓𐴊𐴠 𐴱 𐴀𐴥𐴢𐴢𐴀𐴕𐴡𐴌𐴠 𐴃𐴡𐴑𐴌𐴞𐴁𐴝𐴕 𐴀𐴠𐴑 𐴔𐴝𐴐𐴢 𐴁𐴝𐴊𐴠 𐴱 𐴔𐴠𐴓𐴠𐴄𐴠𐴌𐴞𐴌 𐴷 𐴱 𐴶 𐴓𐴡𐴔𐴁𐴡𐴌 𐴎𐴦𐴝𐴣𐴏𐴢 𐴓𐴡𐴘 𐴀𐴝𐴌𐴑𐴝𐴕𐴡𐴃 𐴖𐴝𐴉𐴠𐴏𐴢 𐴉𐴦𐴡𐴣𐴏𐴝𐴘 𐴊𐴞 𐴱 𐴑𐴠𐴙𐴧𐴏𐴢𐴢𐴌𐴠 𐴎𐴡𐴌𐴞𐴁𐴝𐴕𐴝 𐴒𐴡𐴌𐴞𐴁𐴡 𐴱𐴱 𐴑𐴥𐴡𐴏𐴥𐴡𐴚𐴡𐴌 𐴊𐴡𐴙𐴅𐴧𐴝𐴃 𐴁𐴢𐴢𐴍𐴡𐴃𐴧𐴢𐴢 𐴊𐴤𐴡𐴙𐴅𐴧𐴙𐴠𐴊𐴠 𐴀𐴥𐴞𐴃𐴝𐴌𐴝𐴌𐴠 𐴕𐴞𐴎𐴡𐴌 𐴎𐴝𐴒𐴝𐴃 𐴖𐴝𐴉𐴠𐴏𐴢 𐴉𐴦𐴡𐴣𐴏𐴝𐴌 𐴱𐴱

𐴀𐴥𐴠𐴌𐴝𐴖𐴡𐴋𐴧𐴞 𐴋𐴞𐴐𐴄𐴞𐴑𐴡𐴃𐴧𐴢𐴢 𐴊𐴤𐴡𐴅𐴧𐴞𐴓𐴊𐴠 𐴴 𐴱 𐴎𐴡𐴕𐴡𐴌𐴠 𐴲 𐴁𐴡𐴏𐴡𐴌𐴡𐴌 𐴊𐴡𐴌𐴠 𐴎𐴞𐴘𐴡𐴓 𐴱𐴱 𐴏𐴥𐴡𐴉𐴡𐴌𐴡𐴌 𐴏𐴝𐴁𐴢𐴢𐴃 𐴏𐴥𐴝𐴌𐴝 𐴊𐴤𐴡𐴅𐴧𐴞𐴓𐴊𐴠 𐴶 𐴹 𐴎𐴡𐴕𐴡𐴌𐴠 𐴁𐴡𐴕𐴒𐴡𐴌𐴞 𐴃𐴡𐴊𐴝𐴌𐴢𐴢𐴑 𐴒𐴡𐴌𐴠𐴌 𐴱𐴱

𐴑𐴥𐴡𐴏𐴥𐴡𐴚𐴡𐴃𐴧𐴢𐴢 𐴀𐴝𐴕𐴠𐴊𐴧𐴠 𐴀𐴥𐴞𐴃𐴝𐴌𐴝𐴌𐴠 𐴱 𐴀𐴝𐴒𐴠 𐴀𐴝𐴙𐴑𐴧𐴙𐴝𐴁 𐴉𐴦𐴡𐴣𐴏𐴝𐴘 𐴁𐴝𐴊𐴠 𐴱 𐴘𐴦𐴝𐴕𐴃𐴢𐴢 𐴎𐴝𐴌𐴙𐴠 𐴎𐴞𐴛𐴡𐴃 𐴉𐴦𐴡𐴣𐴏𐴝𐴉𐴡𐴌𐴠 𐴉𐴦𐴡𐴣𐴏𐴝𐴘 𐴊𐴞𐴁𐴦𐴡 𐴱 𐴁𐴡𐴓𐴞 𐴊𐴡𐴙𐴅𐴧𐴝 𐴏𐴦𐴡𐴛 𐴉𐴢𐴢𐴓𐴞𐴐𐴡𐴌 𐴁𐴡𐴌𐴡 / 𐴁𐴢𐴢𐴔𐴥𐴢𐴢 𐴅𐴥𐴞 𐴏𐴥𐴠𐴚 𐴎𐴝𐴚 𐴀𐴥𐴢𐴢𐴀 𐴘𐴠 𐴈𐴡𐴘𐴧𐴠 𐴱𐴱 𐴀𐴥𐴠 𐴲 𐴷 𐴱 𐴎𐴡𐴕𐴡𐴌 𐴁𐴥𐴢𐴢𐴃𐴡𐴌𐴠 𐴷 𐴱 𐴎𐴡𐴕 𐴀𐴝𐴙𐴑𐴧𐴙𐴝𐴉𐴡𐴌 𐴏𐴥𐴠𐴀 𐴐𐴥𐴡𐴚 𐴌𐴞𐴉𐴢𐴢𐴎𐴞 𐴑𐴠𐴀𐴠𐴔𐴡𐴌 𐴱 𐴀𐴝𐴌 𐴁𐴝𐴑𐴞 𐴒𐴢𐴢𐴀𐴕 𐴁𐴝𐴚𐴓𐴝𐴊𐴠𐴐𐴡𐴌 𐴑𐴢𐴢𐴃𐴢𐴢𐴉𐴝𐴓𐴡𐴚 𐴀𐴝𐴌 𐴁𐴝𐴓𐴢𐴢𐴈𐴝𐴓𐴞 𐴌𐴞𐴉𐴢𐴢𐴎𐴞 𐴑𐴠𐴀𐴠𐴔𐴡𐴌 𐴁𐴡𐴓𐴞 𐴱 𐴀𐴝𐴌𐴑𐴝𐴕𐴡𐴌 𐴇𐴥𐴡𐴑𐴢𐴢𐴔𐴡𐴃𐴞 𐴎𐴞𐴔𐴧𐴝𐴊𐴝𐴌 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴠 𐴱𐴱

𐴀𐴝𐴙𐴑𐴧𐴙𐴝𐴁 𐴏𐴥𐴠𐴀 𐴐𐴥𐴡𐴚 𐴌𐴞𐴉𐴢𐴢𐴎𐴞 𐴑𐴠𐴀𐴠𐴔𐴡𐴌 𐴷 𐴱 𐴎𐴡𐴕𐴡𐴌𐴠 𐴀𐴠𐴔𐴞𐴒𐴞𐴌𐴞𐴐𐴥𐴠𐴕𐴡𐴌 𐴑𐴝𐴕𐴢𐴢𐴕 𐴔𐴡𐴎𐴞𐴕 𐴎𐴡𐴌𐴞𐴁𐴝𐴕𐴝 𐴒𐴡𐴌𐴞𐴁𐴡 𐴱 𐴀𐴝𐴌𐴒𐴢𐴢𐴕𐴡𐴌𐴠 𐴀𐴞𐴕𐴏𐴝𐴕𐴞𐴘𐴡𐴃𐴡𐴌𐴠 𐴔𐴡𐴊𐴡𐴊 𐴒𐴡𐴌𐴡𐴘𐴧𐴝 𐴀𐴝𐴌 𐴊𐴢𐴢𐴖𐴝𐴌𐴝 𐴎𐴝𐴒𐴝 𐴊𐴦𐴡𐴙𐴕𐴧𐴝 𐴋𐴞𐴂𐴝𐴌𐴔𐴠𐴕𐴡𐴌 𐴌𐴝𐴘 𐴔𐴡𐴎𐴞𐴕 𐴱 𐴑𐴦𐴞 𐴁𐴝𐴚𐴓𐴝𐴊𐴠𐴐𐴢 𐴌𐴞𐴉𐴢𐴢𐴎𐴞 𐴑𐴠𐴀𐴠𐴔𐴡𐴃 𐴉𐴦𐴡𐴣𐴏𐴝𐴘 𐴊𐴞𐴁𐴡 𐴕𐴥𐴝𐴑𐴞 𐴔𐴡𐴚𐴋𐴥𐴢𐴢 𐴉𐴦𐴡𐴣𐴏𐴝𐴘 𐴊𐴞𐴁𐴡 𐴱 𐴀𐴥𐴞𐴃𐴝𐴌𐴝𐴌𐴠 𐴃𐴡𐴊𐴝𐴌𐴢𐴢𐴑 𐴒𐴡𐴌𐴞 𐴁𐴦𐴝𐴊𐴠 𐴱 𐴉𐴝𐴘𐴏𐴠𐴓𐴝 𐴀𐴥𐴡𐴘𐴁𐴡𐴊𐴠 𐴁𐴡𐴓𐴞 / 𐴁𐴢𐴢𐴔𐴥𐴢𐴢 𐴅𐴥𐴞 𐴔𐴥𐴝𐴚 𐴏𐴥𐴠𐴚𐴠 𐴈𐴡𐴘𐴧𐴠 𐴱𐴱

𐴀𐴞𐴃𐴝𐴌𐴝𐴌 𐴊𐴝𐴓𐴝𐴓 𐴱 𐴁𐴢𐴢𐴄 𐴀𐴡𐴓𐴝 𐴷 𐴎𐴡𐴕𐴡𐴌𐴓𐴧𐴝 𐴑𐴥𐴡 𐴏𐴥𐴡𐴚 𐴐𐴥𐴡𐴀𐴌𐴡𐴃 𐴔𐴡𐴀𐴊𐴧𐴞𐴔𐴝 𐴑𐴥𐴢𐴢𐴙𐴓𐴧𐴙𐴠 𐴁𐴡𐴓𐴞 𐴘𐴥𐴡 𐴈𐴡𐴘𐴧𐴠 𐴱 𐴀𐴝𐴌𐴑𐴝𐴕𐴡𐴃 𐴅𐴠𐴕𐴡𐴏𐴝𐴘𐴋𐴡𐴌 𐴐𐴥𐴡𐴚𐴑𐴡𐴄𐴡𐴌 𐴎𐴡𐴌𐴞𐴘𐴝 𐴇𐴥𐴝𐴣𐴃 𐴓𐴝𐴑𐴡𐴌 𐴖𐴡𐴌𐴠 𐴁𐴝𐴚𐴓𐴝𐴊𐴠𐴐𐴡𐴃 𐴏𐴥𐴝𐴀𐴌𐴝 𐴓𐴡𐴘𐴧𐴠𐴁𐴡𐴓𐴞 𐴎𐴝𐴃𐴞 𐴏𐴥𐴡𐴔𐴡𐴒𐴝𐴌 𐴌𐴠𐴂𐴢𐴢𐴄𐴡𐴃 𐴈𐴡𐴘𐴧𐴠 𐴱 𐴀𐴥𐴠 𐴑𐴠𐴀𐴠𐴔 𐴀𐴥𐴡𐴑𐴧𐴡𐴓𐴡𐴃𐴧𐴢𐴢 𐴊𐴝𐴓𐴝𐴓 𐴓𐴡𐴘 𐴃𐴝𐴀𐴝𐴓𐴧𐴢𐴢𐴑 𐴒𐴡𐴌𐴞 𐴱 𐴉𐴥𐴢𐴢𐴖𐴝𐴕𐴝𐴌 𐴌𐴝𐴧𐴏𐴝 𐴁𐴝𐴘 𐴉𐴝𐴌𐴠 𐴉𐴝𐴕𐴞𐴌 𐴌𐴝𐴏𐴧𐴝 𐴁𐴝𐴘 𐴉𐴝𐴌𐴠 𐴔𐴡𐴓𐴠𐴐𐴥𐴙𐴥𐴝 𐴎𐴝𐴘𐴁𐴝𐴌 𐴑𐴢𐴢𐴐𐴞𐴐𐴢 𐴒𐴡𐴌𐴠𐴊𐴧𐴠 𐴱𐴱

Sources :BBC Burmese