𐴔𐴡𐴒𐴁𐴝𐴒𐴞 ( 𐴀𐴠 𐴀𐴠 ) 𐴘𐴠 𐴔𐴢𐴢𐴏𐴡𐴓𐴔𐴝𐴕 𐴉𐴝𐴌𐴝 𐴀𐴥𐴡𐴑𐴧𐴡𐴓𐴡𐴌𐴠 𐴋𐴤𐴝𐴓 𐴁𐴝𐴕𐴝𐴘 𐴔𐴠𐴓𐴠𐴄𐴠𐴌𐴞𐴌 𐴓𐴡𐴘 𐴓𐴝𐴌𐴝𐴘 𐴒𐴡𐴌𐴠𐴞 𐴱𐴱

𐴔𐴡𐴒𐴁𐴝𐴒𐴞 𐴀𐴥𐴡𐴑𐴧𐴡𐴓𐴠 𐴁𐴥𐴢𐴢𐴏𐴞𐴊𐴡𐴚𐴡𐴌 𐴊𐴦𐴡𐴙𐴕 𐴀𐴠𐴓𐴝𐴑𐴝𐴃 𐴱 𐴌𐴢𐴢𐴇𐴝𐴙𐴚𐴒𐴙𐴝 𐴔𐴢𐴢𐴏𐴡𐴓𐴔𐴝𐴕 𐴃𐴥𐴝𐴑𐴠𐴊𐴠 𐴐𐴥𐴝𐴑𐴠𐴌 𐴉𐴝𐴌𐴝 𐴌𐴠 𐴋𐴤𐴝𐴓 𐴁𐴝𐴕𐴝𐴘 𐴱 𐴉𐴝𐴌𐴝𐴌 𐴁𐴥𐴢𐴢𐴃𐴡𐴌𐴠 𐴒𐴥𐴡𐴓𐴞 𐴔𐴠𐴓𐴠𐴄𐴠𐴌𐴞𐴌 𐴓𐴡𐴘 𐴓𐴝𐴌𐴝𐴘 𐴒𐴡𐴌𐴠𐴌 𐴱 𐴔𐴠𐴓𐴠𐴄𐴠𐴌𐴞 𐴀𐴥𐴡𐴑𐴧𐴡𐴓𐴠 𐴘𐴦𐴡 𐴱 𐴉𐴝𐴌𐴝𐴌 𐴁𐴥𐴢𐴢𐴃𐴡𐴌𐴠 𐴁𐴝𐴒𐴞 𐴀𐴝𐴏𐴠𐴊𐴠 𐴀𐴥𐴠𐴃𐴡𐴓𐴧𐴝 𐴱 𐴐𐴥𐴡𐴣𐴍𐴡 𐴀𐴝𐴌 𐴋𐴥𐴡𐴣𐴌 𐴀𐴥𐴝𐴣𐴃𐴞𐴘𐴝𐴌 𐴉𐴝𐴌𐴝𐴌 𐴀𐴢𐴢𐴎𐴢𐴢 𐴔𐴝𐴌𐴠𐴌 𐴀𐴝𐴌 𐴃𐴢𐴢𐴣𐴖𐴝𐴣𐴌𐴝𐴌 𐴉𐴝𐴌𐴝 𐴘𐴦𐴝𐴕 𐴀𐴦𐴢𐴢𐴣𐴙𐴃 𐴒𐴡𐴌𐴞 𐴊𐴞𐴘𐴢𐴢𐴔 𐴁𐴡𐴓𐴞 𐴈𐴦𐴡𐴘 𐴊𐴤𐴡𐴔𐴑𐴞 𐴘𐴥𐴡 𐴊𐴞𐴘𐴠 𐴱 𐴀𐴝𐴓𐴧𐴝𐴇𐴌 𐴌𐴝𐴇𐴝𐴔𐴡𐴃𐴠 𐴔𐴡𐴌𐴝 𐴀𐴝𐴌 𐴒𐴥𐴝𐴙𐴓 𐴕𐴦𐴡 𐴀𐴥𐴡 𐴱𐴱

𐴉𐴝𐴌𐴝𐴌 𐴁𐴠𐴐𐴥𐴞 𐴔𐴝𐴕𐴢𐴢𐴙𐴐𐴢 𐴋𐴦𐴡𐴌𐴠 𐴊𐴢𐴢𐴌𐴥𐴠 𐴀𐴡𐴙𐴕𐴧𐴡 𐴉𐴝𐴌𐴝𐴃 𐴒𐴞𐴘𐴡𐴘 𐴱 𐴀𐴝𐴌 𐴑𐴠𐴙𐴧𐴏𐴢𐴢 𐴔𐴝𐴕𐴢𐴢𐴙𐴐𐴢 𐴀𐴥𐴡𐴑𐴧𐴡𐴓𐴠 𐴱 𐴉𐴥𐴢𐴢𐴣𐴖𐴝𐴣𐴃𐴞 𐴓𐴡𐴘 𐴉𐴝𐴌𐴠𐴊𐴠 𐴐𐴥𐴡𐴐𐴡𐴔𐴁𐴡𐴃𐴧𐴞 𐴱 𐴒𐴡𐴌𐴢𐴢 𐴏𐴥𐴡𐴀𐴓 𐴓𐴡𐴘 𐴋𐴥𐴝𐴑𐴡𐴌 𐴒𐴤𐴡𐴌𐴈𐴝𐴙𐴣𐴏𐴧𐴝 𐴉𐴝𐴌𐴝𐴃 𐴎𐴝𐴘 𐴃𐴥𐴝𐴙𐴑𐴧𐴙𐴠 𐴱 𐴊𐴞𐴕𐴡𐴃 𐴉𐴝𐴌𐴝𐴃 𐴀𐴝𐴘𐴧𐴠 𐴌𐴝𐴙𐴃𐴧𐴝 𐴎𐴝𐴒𐴡𐴘 𐴱 𐴑𐴙𐴡𐴓𐴧𐴝 𐴈𐴡𐴘𐴓𐴠 ! 𐴉𐴝𐴙𐴅𐴧𐴝 𐴀𐴥𐴡𐴑𐴧𐴡𐴓𐴡𐴌 𐴈𐴡𐴃𐴝 𐴔𐴡𐴎𐴞𐴕 𐴱 𐴔𐴠𐴓𐴠𐴄𐴠𐴌𐴞 𐴀𐴥𐴡𐴑𐴧𐴡𐴓𐴠 𐴉𐴝𐴌𐴝𐴌 𐴋𐴦𐴡𐴣𐴌 𐴔𐴝𐴕𐴢𐴢𐴙𐴐𐴢 𐴀𐴝𐴌 𐴔𐴢𐴢𐴌𐴡𐴁𐴧𐴞 𐴀𐴥𐴡𐴑𐴧𐴡𐴓𐴡𐴌𐴠 𐴋𐴝𐴑𐴙𐴡𐴌𐴠 𐴈𐴡𐴘𐴧𐴠𐴊𐴠 𐴱 𐴀𐴝𐴁𐴧𐴝𐴌 𐴎𐴡𐴊𐴞 𐴔𐴡𐴒𐴁𐴝𐴒𐴞 𐴀𐴥𐴡𐴑𐴧𐴡𐴓 𐴃𐴢𐴢𐴣𐴖𐴝𐴣𐴌𐴝𐴌 𐴉𐴝𐴌𐴝𐴃 𐴀𐴝𐴘𐴓𐴠 𐴱 𐴃𐴝𐴌𐴝𐴌 𐴓𐴡𐴌𐴝𐴏𐴡𐴌𐴝𐴌 𐴈𐴥𐴡𐴁𐴡𐴌 𐴀𐴝𐴣𐴀𐴌𐴝𐴌𐴠 𐴕𐴡𐴊𐴞𐴓𐴠 𐴱𐴃𐴢𐴢𐴣𐴖𐴝𐴣𐴌𐴝𐴌 𐴉𐴝𐴌𐴝 𐴘𐴦𐴝𐴕 𐴀𐴢𐴢𐴓𐴋𐴝𐴘 𐴊𐴞𐴘𐴢𐴢𐴔 𐴱𐴱

𐴔𐴠𐴓𐴠𐴄𐴠𐴌𐴞 𐴀𐴥𐴡𐴑𐴧𐴡𐴓𐴠 𐴈𐴦𐴡𐴌 𐴊𐴠 𐴎𐴡𐴊𐴞 𐴃𐴢𐴢𐴣𐴖𐴝𐴣𐴌𐴝 𐴀𐴝𐴣𐴀𐴌𐴝𐴌 𐴏𐴥𐴝𐴣𐴀𐴃 𐴕𐴡 𐴊𐴞𐴓𐴠 𐴱 𐴃𐴢𐴢𐴣𐴖𐴝𐴣𐴌𐴝𐴌 𐴉𐴝𐴌𐴝 𐴈𐴥𐴡𐴃𐴡𐴔 𐴒𐴡𐴌𐴞 𐴊𐴞𐴘𐴢𐴢𐴔 𐴱 𐴀𐴥𐴠𐴕𐴋𐴞𐴓𐴧𐴝 𐴔𐴡𐴒𐴁𐴝𐴒𐴞 𐴀𐴥𐴡𐴑𐴧𐴡𐴓𐴠 𐴈𐴦𐴡𐴌 𐴊𐴠 𐴃𐴢𐴢𐴣𐴖𐴝𐴣𐴌𐴝 𐴔𐴠𐴓𐴠𐴄𐴠𐴌𐴞𐴌 𐴏𐴥𐴝𐴣𐴀𐴃 𐴊𐴞𐴓𐴠 𐴔𐴡𐴐𐴑𐴞𐴓 𐴀𐴥𐴡𐴙𐴁𐴡 𐴱 𐴘𐴦𐴝𐴌 𐴀𐴝𐴒𐴠 𐴋𐴥𐴝𐴑𐴡𐴌 𐴉𐴝𐴌𐴝 𐴀𐴠𐴑𐴧𐴝𐴕𐴡𐴃𐴧𐴢𐴢 𐴱 𐴔𐴠𐴓𐴠𐴄𐴠𐴌𐴞𐴌 𐴏𐴥𐴝𐴣𐴀𐴃 𐴊𐴠𐴌 𐴁𐴡𐴓𐴞 𐴈𐴦𐴡𐴘 𐴱 𐴔𐴡𐴒𐴁𐴝𐴒𐴞 𐴀𐴥𐴡𐴑𐴧𐴡𐴓𐴠 𐴌𐴢𐴢𐴇𐴝𐴙𐴚𐴒𐴙𐴝 𐴈𐴡𐴊𐴦𐴢𐴢𐴕 𐴊𐴤𐴡𐴌𐴞 𐴓𐴡𐴘 𐴒𐴞𐴀𐴓 𐴒𐴡𐴘 𐴱𐴱

𐴔𐴡𐴒𐴁𐴝𐴒𐴞 𐴀𐴥𐴡𐴑𐴧𐴡𐴓𐴠 𐴃𐴡𐴚𐴉𐴝𐴌𐴝𐴌 𐴉𐴞𐴏𐴡𐴃𐴧𐴢𐴢 𐴉𐴦𐴝𐴌𐴡𐴃 𐴎𐴝𐴒𐴝 𐴓𐴡𐴘𐴧𐴠 𐴱 𐴃𐴦𐴡𐴘 𐴔𐴠𐴓𐴠𐴄𐴠𐴌𐴞 𐴀𐴥𐴡𐴑𐴧𐴡𐴓𐴠 𐴉𐴝𐴌𐴝𐴌 𐴁𐴥𐴢𐴢𐴃𐴡𐴌𐴠 𐴒𐴥𐴡𐴓𐴞 𐴱 𐴒𐴤𐴡𐴌 𐴈𐴡𐴊𐴞𐴀𐴕 𐴁𐴥𐴝𐴚𐴞 𐴒𐴥𐴝𐴣𐴄𐴞 𐴁𐴝𐴕𐴝𐴘𐴧𐴠 𐴱 𐴀𐴝𐴌 𐴁𐴡𐴓𐴝𐴎𐴢𐴢𐴌𐴞 𐴉𐴝𐴙𐴅𐴧𐴝 𐴀𐴥𐴡𐴑𐴧𐴡𐴓𐴡𐴌 𐴒𐴡𐴌𐴢𐴢 𐴏𐴥𐴡𐴀𐴓 𐴀𐴥𐴡𐴘𐴃𐴠 𐴓𐴡𐴘 𐴀𐴡𐴙𐴕𐴧𐴡 𐴈𐴥𐴝𐴘𐴁𐴝𐴌 𐴏𐴞𐴏𐴢 𐴀𐴥𐴡𐴑𐴧𐴡𐴓 𐴈𐴥𐴝𐴘 𐴉𐴥𐴢𐴢𐴌𐴝𐴘 𐴉𐴥𐴠𐴓𐴝𐴌 𐴱𐴱 𐴀𐴥𐴠 𐴐𐴝𐴑𐴠𐴌 𐴉𐴝𐴌𐴝𐴌 𐴎𐴡𐴇𐴞𐴌 𐴀𐴝𐴇𐴔𐴡𐴊𐴡𐴌 𐴒𐴡𐴌𐴢𐴢 𐴀𐴢𐴢𐴒𐴧𐴗𐴝 𐴔𐴦𐴝𐴙𐴕 𐴁𐴢𐴢𐴔 𐴉𐴥𐴢𐴢𐴍𐴞 𐴒𐴥𐴝𐴙𐴓 𐴀𐴥𐴡𐴘𐴧𐴠 𐴱 𐴀𐴥𐴠 𐴎𐴝𐴒𐴝 𐴘𐴥𐴝𐴕𐴡𐴃 𐴉𐴝𐴕𐴁𐴡𐴌𐴡𐴃 𐴔𐴝𐴎𐴠 𐴱 𐴀𐴥𐴠 𐴎𐴡𐴇𐴞𐴌 𐴀𐴝𐴇𐴔𐴡𐴊𐴡𐴌 𐴀𐴝𐴣𐴐𐴄𐴡 𐴁𐴡𐴏𐴡𐴌𐴙𐴅𐴧𐴙𐴝 𐴉𐴢𐴢𐴖𐴝 𐴀𐴢𐴢𐴒𐴧𐴗𐴝 𐴌𐴠 𐴱 𐴒𐴡𐴃𐴡 𐴁𐴡𐴏𐴡𐴌 𐴔𐴡𐴒 𐴀𐴝𐴃𐴡𐴚𐴁𐴝𐴊𐴞 𐴀𐴥𐴡𐴑𐴧𐴡𐴓𐴠 𐴁𐴝𐴙𐴅𐴧𐴝𐴘 𐴔𐴝𐴌𐴞 𐴉𐴥𐴠𐴓𐴝𐴙𐴀𐴓 𐴱𐴱