𐴁𐴡𐴌𐴔𐴝 𐴘𐴠 𐴌𐴢𐴢𐴇𐴝𐴙𐴚𐴒𐴙𐴝𐴌 𐴀𐴞𐴕𐴏𐴝𐴕𐴞 𐴇𐴥𐴡𐴑 𐴔𐴝𐴍𐴞 𐴒𐴡𐴙𐴅𐴧𐴠𐴊𐴠 𐴘𐴥𐴝𐴕𐴡𐴌𐴠 𐴘𐴢𐴢 𐴀𐴠𐴕𐴠 𐴁𐴡𐴌𐴔𐴝 𐴌𐴠 𐴊𐴢𐴢𐴐𐴥𐴞 𐴁𐴝𐴕𐴝𐴘𐴧𐴠 𐴱𐴱

𐴁𐴡𐴌𐴔𐴝 𐴘𐴠 𐴌𐴢𐴢𐴇𐴝𐴙𐴚𐴒𐴙𐴝 𐴔𐴢𐴢𐴏𐴡𐴓𐴔𐴝𐴕 𐴐𐴥𐴡𐴣𐴀 𐴈𐴡𐴔𐴐𐴡𐴙𐴚𐴒𐴙𐴝 𐴑𐴡𐴖𐴔 𐴀𐴥𐴡𐴑𐴧𐴡𐴓𐴡𐴌 𐴀𐴞𐴕𐴏𐴝𐴕𐴞 𐴇𐴥𐴡𐴑 𐴔𐴝𐴍𐴞 𐴒𐴡𐴙𐴅𐴧𐴠𐴊𐴠 𐴱 𐴘𐴥𐴝𐴕𐴡𐴌𐴓𐴧𐴝 𐴁𐴡𐴌𐴔𐴝 𐴌𐴠 𐴊𐴢𐴢𐴐𐴞 𐴁𐴝𐴕𐴝𐴘 ( 𐴘𐴢𐴢 𐴀𐴠𐴕𐴠) 𐴀𐴠𐴑𐴧𐴝𐴕 𐴉𐴝𐴘𐴏𐴠𐴓𐴝 𐴉𐴝𐴏𐴢 𐴒𐴡𐴙𐴅𐴧𐴠 𐴱𐴱 𐴀𐴥𐴠 𐴉𐴝𐴘𐴏𐴠𐴓𐴝 𐴘𐴥𐴝𐴕𐴡𐴃 𐴌𐴢𐴢𐴇𐴝𐴙𐴚𐴒𐴙𐴝 𐴐𐴥𐴡𐴣𐴀 𐴈𐴡𐴔𐴐𐴥𐴡𐴙𐴚𐴒𐴙𐴝 𐴑𐴡𐴖𐴔 𐴀𐴥𐴡𐴑𐴧𐴡𐴓𐴡𐴌 𐴈𐴠𐴓𐴝𐴉𐴢 𐴕𐴞𐴉𐴌𐴡𐴃 𐴁𐴤𐴡𐴍𐴑𐴝𐴌𐴊𐴧𐴠 𐴱 𐴀𐴥𐴞𐴀𐴕 𐴁𐴡𐴕𐴒𐴡𐴌𐴞𐴁𐴡𐴌𐴓𐴝 𐴘𐴦𐴡 𐴁𐴡𐴌𐴔𐴝 𐴌𐴠 𐴈𐴡𐴘𐴧𐴠 𐴱𐴱

𐴷 𐴱 𐴰 𐴲 𐴐𐴡𐴕𐴡𐴃 𐴁𐴢𐴢𐴋𐴧𐴞𐴏𐴢 𐴁𐴠𐴀𐴐𐴢 𐴔𐴢𐴢𐴓𐴧𐴢𐴢𐴑 𐴁𐴡𐴌𐴔𐴝𐴃 𐴱 𐴔𐴠𐴓𐴠𐴄𐴠𐴌𐴞𐴌 𐴕𐴡𐴏𐴡𐴓 𐴉𐴥𐴢𐴢𐴌𐴝 𐴑𐴝𐴌𐴖𐴝𐴙𐴌 𐴕𐴡𐴃𐴞𐴅𐴝𐴃 𐴱 𐴈𐴝𐴍𐴝 𐴔𐴝𐴌𐴝 𐴈𐴥𐴝𐴘 𐴁𐴦𐴝𐴊𐴠 𐴱 𐴇𐴥𐴝𐴣𐴃 𐴓𐴝𐴑𐴡𐴌 𐴖𐴡𐴌𐴠 𐴌𐴢𐴢𐴇𐴝𐴙𐴚𐴒𐴙𐴝 𐴱 𐴁𐴝𐴚𐴓𐴝𐴊𐴠𐴐𐴡𐴃 𐴏𐴥𐴝𐴀𐴌𐴝 𐴓𐴡𐴘𐴧𐴠 𐴱𐴱 𐴔𐴡𐴕𐴃𐴡𐴌 𐴁𐴡𐴌𐴔𐴝 𐴘𐴠 𐴱 𐴀𐴝𐴀𐴛 𐴅𐴠𐴕𐴡𐴏𐴝𐴙𐴋 𐴕𐴦𐴡 𐴒𐴡𐴌𐴞 𐴱 𐴁𐴝𐴒𐴞 𐴈𐴥𐴡𐴃𐴡𐴔 𐴒𐴡𐴌𐴞𐴁𐴝𐴌 𐴑𐴝𐴌𐴖𐴝𐴘 𐴒𐴡𐴙𐴅𐴧𐴞𐴊𐴠 𐴱 𐴁𐴡𐴓𐴞 𐴈𐴗𐴝𐴃 𐴀𐴝𐴏𐴠 𐴎𐴞𐴊 𐴒𐴡𐴌𐴝𐴃 𐴀𐴝𐴏𐴠 𐴱𐴱 𐴁𐴡𐴌𐴔𐴝𐴌 𐴓𐴞𐴋𐴝𐴌 𐴀𐴡𐴚 𐴏𐴝𐴕 𐴏𐴥𐴢𐴢𐴀𐴑𐴞 𐴘𐴠 ( 𐴀𐴝𐴘 𐴏𐴞 𐴅𐴠 ) 𐴌 𐴑𐴦𐴢𐴢𐴍𐴡𐴃 𐴱 𐴀𐴠 𐴔𐴝𐴐𐴡𐴌 𐴐𐴥𐴢𐴢𐴌𐴢𐴢𐴃 𐴀𐴠𐴓𐴎𐴝𐴔 𐴁𐴠𐴀𐴒𐴧𐴞𐴕𐴡𐴌𐴠 𐴀𐴞𐴕𐴑𐴝𐴌 𐴒𐴡𐴙𐴅𐴧𐴙𐴠 𐴱𐴱 𐴋𐴞𐴔𐴡𐴑𐴠𐴌𐴠𐴏𐴞𐴌 𐴔𐴢𐴢𐴃𐴧𐴞𐴌 𐴀𐴞𐴎𐴧𐴡𐴃 𐴁𐴥𐴝𐴙𐴚𐴒𐴠 𐴇𐴥𐴡𐴑𐴢𐴢𐴔𐴡𐴃𐴡𐴌 𐴔𐴡𐴏𐴡𐴓𐴝 𐴇𐴥𐴡𐴓 𐴒𐴡𐴌𐴞𐴁𐴡𐴓𐴧𐴝 𐴌𐴢𐴢𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴒𐴤𐴡𐴌 𐴁𐴝𐴚𐴞 𐴏𐴢𐴢𐴌𐴞 𐴕𐴞𐴏𐴃𐴡𐴕𐴝𐴁𐴢𐴢𐴃 𐴒𐴡𐴌𐴞 𐴉𐴥𐴠𐴓𐴝𐴘𐴧𐴠

𐴱𐴱
𐴀𐴝𐴙𐴅𐴧𐴙𐴝 𐴏𐴝𐴙𐴌 𐴎𐴢𐴢𐴒𐴡𐴌 𐴖𐴡𐴌𐴠 𐴀𐴥𐴡𐴘𐴧𐴠 𐴱 𐴔𐴠𐴓𐴠𐴄𐴠𐴌𐴞 𐴀𐴝𐴌 𐴁𐴡𐴖𐴋𐴝𐴌 𐴒𐴦𐴝𐴋 𐴉𐴢𐴢𐴓𐴞𐴐𐴡𐴌 𐴎𐴢𐴢𐴓𐴢𐴢𐴔 𐴐𐴥𐴡𐴘 𐴕𐴡𐴉𐴝𐴌𐴞 𐴱 𐴌𐴢𐴢𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴓𐴝𐴒𐴝𐴃𐴝𐴌 𐴁𐴝𐴚𐴓𐴝𐴊𐴠𐴐𐴡𐴃 𐴀𐴦𐴝𐴃 𐴀𐴝𐴏𐴠𐴊𐴠 𐴱 𐴘𐴥𐴝𐴕𐴡𐴌 𐴁𐴝𐴁𐴡𐴃𐴠 𐴐𐴥𐴢𐴢𐴑𐴧𐴢𐴢𐴌 𐴁𐴝𐴌𐴠 ( 𐴘𐴢𐴢 𐴀𐴠𐴕 ) 𐴡𐴌 𐴉𐴝𐴘𐴏𐴠𐴓𐴝𐴃 𐴱 𐴁𐴡𐴌𐴔𐴝 𐴌𐴠 𐴏𐴡𐴑𐴃𐴡 𐴒𐴡𐴌𐴞 𐴀𐴠𐴃𐴧𐴠𐴓𐴝 𐴊𐴞𐴘𐴠 𐴱𐴱 𐴌𐴢𐴢𐴇𐴝𐴙𐴚𐴒𐴙𐴝 𐴐𐴥𐴡𐴣𐴀 𐴈𐴡𐴔𐴐𐴥𐴡𐴙𐴚𐴒𐴙𐴝 𐴑𐴡𐴖𐴔 𐴀𐴥𐴡𐴑𐴧𐴡𐴓𐴡𐴌 𐴱 𐴁𐴡𐴌𐴔𐴝 𐴘𐴠 𐴀𐴞𐴕𐴏𐴝𐴕𐴞 𐴇𐴥𐴡𐴑 𐴔𐴝𐴍𐴞 𐴒𐴡𐴌𐴠𐴊𐴧𐴠 𐴘𐴥𐴝𐴕𐴡𐴌𐴠 𐴱 𐴊𐴠𐴐𐴁𐴞𐴃𐴠𐴐𐴞 𐴑𐴝𐴕𐴢𐴢𐴕 𐴔𐴡𐴎𐴞𐴕 𐴁𐴠𐴐𐴥𐴞 𐴋𐴦𐴡𐴣𐴌 𐴈𐴡𐴏𐴢𐴢𐴌𐴞 𐴊𐴠 𐴘𐴥𐴝𐴕𐴡𐴌𐴠 𐴱 𐴁𐴠𐴐𐴥𐴞 𐴐𐴥𐴢𐴢𐴕𐴊𐴡𐴌 𐴒𐴡𐴌𐴞 ( 𐴀𐴝𐴘 𐴀𐴝𐴘 𐴀𐴠𐴔 ) 𐴃𐴡𐴕𐴎𐴞𐴔𐴠 𐴁𐴢𐴢𐴎𐴝𐴘 𐴊𐴞𐴘𐴠 𐴱𐴱

𐴀𐴥𐴠 𐴉𐴝𐴘𐴏𐴠𐴓𐴝 𐴘𐴥𐴝𐴕𐴡𐴃 𐴱 𐴁𐴡𐴌𐴔𐴝 𐴌𐴠 𐴱 𐴈𐴡𐴔𐴐𐴥𐴡𐴙𐴚𐴒𐴙𐴝 𐴑𐴡𐴖𐴔 𐴀𐴥𐴡𐴑𐴧𐴡𐴓𐴡𐴌𐴠 𐴀𐴝𐴔𐴝𐴕 𐴊𐴞𐴁𐴡𐴓𐴧𐴝 𐴀𐴝𐴌 𐴀𐴞𐴕𐴏𐴝𐴕𐴞 𐴇𐴥𐴡𐴑 𐴔𐴝𐴍𐴞 𐴀𐴥𐴡𐴘𐴧𐴠𐴊𐴠 𐴀𐴥𐴞𐴀𐴕𐴡𐴌 𐴀𐴞𐴕𐴏𐴝𐴉𐴢 𐴊𐴞𐴁𐴡𐴓𐴧𐴝 𐴘𐴥𐴡 𐴈𐴡𐴘𐴧𐴠 𐴱 𐴀𐴠 𐴉𐴝𐴘𐴏𐴠𐴓𐴝 𐴘𐴦𐴝𐴕𐴡𐴌𐴠 𐴱 𐴊𐴢𐴢𐴕𐴞𐴘𐴝𐴙𐴌 𐴳 𐴹 𐴱 𐴘𐴥𐴝𐴕 𐴊𐴠𐴐𐴡𐴃 𐴴 𐴳 𐴱 𐴊𐴠𐴐𐴠 𐴀𐴥𐴡𐴘 𐴁𐴢𐴢𐴄 𐴹 𐴖𐴝𐴕 𐴊𐴠𐴐𐴠 𐴕𐴡𐴀𐴘 𐴁𐴢𐴢𐴄 𐴸 𐴲 𐴊𐴠 𐴐𐴢 𐴔𐴝𐴎𐴠 𐴔𐴝𐴎𐴠 𐴱 𐴁𐴠𐴐𐴥𐴞 𐴁𐴠𐴀𐴐𐴢 𐴓𐴡𐴘 𐴉𐴝𐴘𐴏𐴠𐴓𐴝 𐴒𐴡𐴌𐴝 𐴒𐴞𐴘𐴠 𐴱𐴱 𐴘𐴢𐴢 𐴀𐴠𐴕 𐴡𐴃 𐴀𐴝𐴏𐴠𐴊𐴠 𐴁𐴡𐴌𐴔𐴝𐴌 𐴏𐴡𐴉𐴞𐴌𐴠 𐴈𐴡𐴘𐴧𐴠𐴊𐴠 𐴱 𐴉𐴝𐴘𐴏𐴠𐴓𐴝 𐴏𐴥𐴡𐴀𐴞 𐴕𐴦𐴡 𐴀𐴥𐴡 𐴱 𐴀𐴝𐴌 𐴀𐴝𐴌𐴑𐴝𐴕𐴡𐴌 𐴇𐴝𐴓𐴡𐴃𐴡𐴌𐴠 𐴁𐴢𐴢𐴎𐴞 𐴏𐴞𐴕𐴃𐴞 𐴇𐴥𐴡𐴓 𐴕𐴡 𐴃𐴢𐴢𐴖𐴝𐴘 𐴱 𐴔𐴝𐴕𐴞 𐴕𐴡𐴉𐴝𐴌𐴠𐴊𐴠 𐴀𐴥𐴠𐴕𐴋𐴞𐴓𐴧𐴝 𐴁𐴡𐴌𐴔𐴝𐴌 𐴖𐴡𐴌𐴠 𐴏𐴞𐴘𐴝𐴏𐴞 𐴏𐴞𐴂𐴢 𐴱𐴱

BBC News