𐴁𐴞 𐴅𐴞 𐴂𐴞 𐴘𐴠 𐴱 𐴔𐴡𐴒𐴢𐴁𐴝𐴒𐴞 𐴀𐴝𐴌 𐴀𐴝𐴌𐴏𐴝 𐴔𐴞𐴓𐴝𐴘𐴧𐴝 𐴇𐴝𐴔𐴓𐴝𐴌 𐴋𐴡𐴌 𐴓𐴝𐴒𐴝𐴌 𐴱 𐴊𐴠𐴐𐴡𐴙𐴃𐴧𐴝 𐴘𐴠 ” 𐴕𐴢𐴢𐴖𐴝 𐴂𐴡𐴌𐴡𐴂𐴠𐴒𐴠𐴕𐴋𐴝 ” 𐴈𐴡𐴘𐴧𐴠 𐴱𐴱

𐴔𐴡𐴚𐴋𐴢𐴢𐴌 𐴀𐴢𐴢𐴃𐴧𐴡𐴌𐴡𐴌 𐴶 𐴓𐴡𐴔𐴁𐴡𐴌 𐴏𐴠𐴑𐴄𐴝𐴌𐴡𐴌 𐴁𐴡𐴖𐴋𐴝𐴌 𐴒𐴦𐴝𐴋 𐴉𐴢𐴢𐴓𐴞𐴐𐴡𐴌 𐴐𐴥𐴝𐴀𐴉𐴠 𐴱 𐴔𐴡𐴚𐴋𐴢𐴢𐴌 𐴀𐴠𐴓𐴝𐴑𐴝𐴃 𐴀𐴝𐴏𐴠𐴊𐴠 𐴌𐴢𐴢𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴠 𐴱 𐴎𐴞𐴃𐴝𐴌𐴝 𐴁𐴡𐴌𐴔𐴝𐴌 𐴎𐴝𐴓𐴠𐴔 𐴔𐴠𐴓𐴠𐴄𐴠𐴌𐴞𐴌 𐴎𐴢𐴢𐴓𐴢𐴢𐴔𐴡𐴌 𐴋𐴡𐴌𐴠 𐴉𐴡𐴌𐴝𐴕 𐴇𐴥𐴝𐴃𐴡𐴃 𐴓𐴡𐴘 𐴊𐴞𐴕 𐴈𐴝𐴍𐴝𐴌 𐴱 𐴔𐴡𐴒𐴁𐴝𐴒𐴞 𐴀𐴝𐴌 𐴀𐴝𐴌𐴏𐴝 𐴉𐴥𐴢𐴢𐴖𐴝𐴣𐴃𐴞 𐴔𐴞𐴓𐴞 𐴱 𐴔𐴡𐴚𐴋𐴥𐴢𐴢𐴃 𐴇𐴝𐴔𐴓𐴝 𐴒𐴡𐴙𐴃𐴧𐴡 𐴏𐴝𐴀𐴌 𐴁𐴡𐴓𐴞 𐴈𐴡𐴘 𐴒𐴡𐴃𐴡 𐴇𐴥𐴝𐴉𐴃𐴝𐴃 𐴹 𐴱 𐴋𐴞𐴏𐴡𐴔𐴁𐴡𐴌𐴃 𐴒𐴡𐴙𐴅𐴧𐴠𐴊𐴠 𐴔𐴞𐴄𐴞𐴚𐴡𐴃 𐴋𐴡𐴌 𐴓𐴝𐴒𐴝𐴌 𐴱𐴱 𐴔𐴡𐴚𐴋𐴥𐴢𐴢𐴃 𐴀𐴝𐴏𐴠𐴊𐴠 𐴉𐴝𐴌𐴝 𐴁𐴠𐴀𐴒𐴧𐴞𐴕𐴡𐴌 𐴋𐴝𐴘𐴋𐴦𐴡𐴣𐴌 𐴔𐴝𐴕𐴢𐴢𐴙𐴐𐴢 𐴀𐴝𐴌 𐴔𐴡𐴓𐴡𐴘 𐴏𐴝𐴀𐴉𐴢 𐴀𐴝𐴌 𐴁𐴢𐴢𐴌𐴥𐴝𐴁𐴢𐴢𐴌𐴞 𐴔𐴢𐴢𐴌𐴡𐴁𐴧𐴞 𐴀𐴥𐴡𐴑𐴧𐴡𐴓𐴡𐴘 𐴔𐴞𐴄𐴞𐴚 𐴒𐴡𐴙𐴅𐴧𐴠 𐴱𐴱

𐴀𐴥𐴠 𐴔𐴞𐴄𐴞𐴚𐴡𐴃 𐴁𐴞 𐴅𐴞 𐴂𐴞 𐴘𐴠 𐴌𐴢𐴢𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴠 𐴀𐴥𐴢𐴢𐴣𐴐𐴙𐴝𐴌 𐴀𐴝𐴌 𐴆𐴡𐴑𐴝𐴕𐴧𐴝 𐴃𐴥𐴝𐴑𐴞𐴃𐴡 𐴈𐴡𐴘𐴧𐴠 𐴱 𐴎𐴡𐴊𐴞 𐴀𐴥𐴠𐴕𐴋𐴞𐴓𐴧𐴝 𐴀𐴥𐴡𐴘𐴓𐴠 𐴃𐴢𐴢𐴣𐴖𐴝𐴣𐴌𐴝 𐴔𐴞𐴓𐴞𐴎𐴢𐴢𐴓𐴞 𐴀𐴥𐴞𐴃𐴝𐴌𐴝𐴌 𐴔𐴢𐴢𐴑𐴝𐴁𐴠𐴓𐴝𐴌𐴓𐴝 𐴑𐴞 𐴒𐴡𐴌𐴞 𐴉𐴝𐴌𐴞𐴁𐴝 𐴁𐴡𐴓𐴞 𐴘𐴥𐴡 𐴉𐴢𐴢𐴏𐴝𐴌 𐴒𐴡𐴙𐴅𐴧𐴠 𐴱𐴱 𐴉𐴝𐴙𐴅𐴧𐴝 𐴀𐴠𐴑 𐴎𐴡𐴕𐴠 𐴈𐴡𐴘𐴧𐴠𐴊𐴠 𐴱 𐴀𐴠 𐴀𐴠𐴓𐴝𐴑𐴝𐴃 𐴌𐴢𐴢𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴱 𐴀𐴥𐴡𐴊𐴡𐴌 𐴁𐴝𐴀𐴌𐴝 𐴂𐴝𐴁𐴡𐴕𐴊𐴞 𐴀𐴝𐴌 𐴏𐴞𐴑𐴙𐴢𐴢𐴌𐴞𐴄𐴞𐴌 𐴔𐴝𐴎𐴠 𐴁𐴠𐴐𐴥𐴞 𐴀𐴡𐴐𐴥𐴝𐴕𐴃𐴞𐴌 𐴏𐴥𐴝𐴣𐴀𐴃𐴠 𐴉𐴡𐴌𐴝𐴕 𐴁𐴝𐴏𐴝𐴘 𐴃𐴥𐴝𐴑𐴠𐴌 𐴱𐴱

𐴀𐴠𐴕𐴋𐴞𐴓𐴧𐴝 𐴏𐴞𐴑𐴙𐴢𐴢𐴌𐴞𐴄𐴞𐴌 𐴁𐴥𐴢𐴢𐴃𐴡𐴌𐴠 𐴱 𐴑𐴠𐴀𐴠𐴕𐴠 𐴀𐴝𐴌𐴏𐴝𐴌 𐴇𐴝𐴔𐴓𐴝 𐴀𐴥𐴡𐴘𐴉𐴝𐴌𐴞𐴁𐴡𐴀 ؟ 𐴱 𐴀𐴠 𐴇𐴝𐴓𐴡𐴃𐴡𐴃 𐴀𐴝𐴃𐴥𐴞𐴑𐴧𐴙𐴝 𐴇𐴝𐴔𐴓𐴝 𐴀𐴥𐴡𐴙𐴃 𐴉𐴝𐴌𐴠 𐴱 𐴔𐴝𐴀𐴕𐴞 𐴷 𐴱 𐴰 𐴲 𐴐𐴡𐴕𐴡𐴌 𐴌𐴢𐴢𐴇𐴝𐴙𐴚𐴒𐴙𐴝𐴌 𐴕𐴡𐴏𐴡𐴓 𐴉𐴥𐴢𐴢𐴌𐴝 𐴑𐴝𐴌𐴖𐴝𐴙𐴌 𐴁𐴦𐴝𐴊𐴠 𐴱 𐴔𐴡𐴚𐴋𐴢𐴢𐴌 𐴀𐴠𐴓𐴝𐴑𐴝𐴃 𐴑𐴠𐴙𐴧𐴏𐴢𐴢 𐴌𐴢𐴢𐴇𐴝𐴙𐴚𐴒𐴙𐴝 𐴀𐴝𐴏𐴠𐴊𐴠 𐴀𐴥𐴞𐴃𐴝𐴌𐴝 𐴌𐴠 𐴀𐴡𐴐𐴥𐴝𐴕𐴃𐴞 𐴒𐴡𐴌𐴞𐴁𐴝𐴌 𐴁𐴥𐴝𐴇𐴝𐴕𐴝 𐴁𐴝𐴊𐴠 𐴀𐴝𐴌 𐴑𐴠𐴙𐴧𐴏𐴢𐴢 𐴕𐴡𐴀 𐴱𐴱 𐴑𐴠𐴙𐴧𐴏𐴢𐴢𐴊𐴞𐴕𐴡𐴌 𐴁𐴥𐴢𐴢𐴃𐴡𐴌𐴠 𐴔𐴡𐴒𐴁𐴝𐴒𐴞𐴌 𐴁𐴡𐴌𐴡 𐴖𐴥𐴝𐴘𐴠 𐴀𐴠𐴌𐴝𐴖𐴡𐴋𐴧𐴞 𐴈𐴥𐴡𐴁𐴡𐴌𐴞 𐴈𐴝𐴁𐴡𐴏𐴡𐴌 𐴀𐴠𐴅𐴥𐴠𐴕𐴡𐴌𐴠 𐴊𐴞𐴘𐴠𐴊𐴠 𐴀𐴥𐴞𐴕𐴄𐴝𐴌𐴁𐴙𐴢𐴢𐴃 𐴀𐴝𐴣𐴀𐴌𐴝 𐴓𐴡𐴘 𐴀𐴝𐴌𐴏𐴝𐴓𐴡𐴘 𐴈𐴡𐴕𐴥𐴡 𐴃𐴝𐴀𐴓𐴧𐴢𐴢𐴑 𐴀𐴝𐴓𐴝𐴑𐴝 𐴕𐴥𐴝𐴘 𐴁𐴡𐴓𐴞 𐴏𐴝𐴉𐴢 𐴏𐴝𐴉𐴢 𐴒𐴡𐴌𐴞 𐴈𐴡𐴘𐴧𐴠 𐴱𐴱 𐴀𐴝𐴀𐴛 𐴀𐴥𐴠 𐴁𐴝𐴁𐴡𐴃𐴠 𐴑𐴠𐴙𐴧𐴏𐴢𐴢 𐴕𐴡𐴎𐴝𐴕𐴞 𐴁𐴡𐴓𐴞 𐴘𐴥𐴡 𐴈𐴡𐴘𐴧𐴠 𐴱𐴱