𐴳 𐴷 𐴱 𐴎𐴡𐴕 𐴌𐴢𐴢𐴇𐴝𐴙𐴚𐴒𐴙𐴝 𐴁𐴢𐴢𐴄 𐴓𐴡𐴘 𐴎𐴝𐴌𐴒𐴡𐴘𐴊𐴠 𐴑𐴥𐴡𐴀𐴏𐴥𐴡𐴀𐴚𐴡𐴃 𐴊𐴤𐴡𐴌𐴝 𐴉𐴡𐴙𐴅𐴧𐴙𐴠 𐴱𐴱

𐴀𐴝𐴌𐴑𐴝𐴕𐴡𐴃 𐴕𐴡𐴏𐴥𐴡𐴓 𐴉𐴥𐴢𐴢𐴌𐴝 𐴑𐴝𐴌𐴖𐴝𐴙𐴌 𐴎𐴢𐴢𐴓𐴢𐴢𐴔 𐴁𐴡𐴊𐴧𐴝𐴐𐴢 𐴒𐴡𐴌𐴞 𐴕𐴡𐴉𐴝𐴌𐴞 𐴱 𐴀𐴥𐴠 𐴅𐴠𐴕𐴡𐴏𐴝𐴙𐴋𐴡𐴃𐴧𐴢𐴢 𐴉𐴡𐴌𐴝𐴕 𐴁𐴝𐴏𐴝𐴘 𐴏𐴢𐴢𐴒𐴠 𐴎𐴞𐴀𐴑𐴧𐴙𐴝 𐴊𐴠𐴑𐴤𐴠 𐴱 𐴁𐴢𐴢𐴄 𐴓𐴡𐴘 𐴎𐴝𐴌𐴒𐴡𐴘𐴊𐴠 𐴳 𐴷 𐴱 𐴎𐴡𐴕 𐴌𐴢𐴢𐴇𐴝𐴙𐴚𐴒𐴙𐴝 𐴱 𐴃𐴡𐴕𐴧𐴝𐴚 𐴏𐴝𐴌𐴞 𐴀𐴠𐴓𐴝𐴑𐴝𐴌 𐴑𐴥𐴡𐴀𐴏𐴥𐴡𐴀𐴚 𐴐𐴥𐴡𐴀𐴌𐴡𐴌 𐴁𐴝𐴎𐴝𐴘𐴧𐴝 𐴏𐴠𐴚𐴐𐴥𐴗𐴥𐴠𐴚𐴡𐴌 𐴉𐴡𐴏𐴠𐴔𐴠 𐴱 𐴀𐴝𐴕𐴃𐴝𐴎𐴠 𐴵 𐴵 𐴱 𐴔𐴝𐴘𐴓𐴡𐴌 𐴁𐴥𐴢𐴢𐴃𐴡𐴌𐴠 𐴱 𐴁𐴡𐴌𐴔𐴝𐴌 𐴉𐴝𐴕𐴞𐴌 𐴉𐴡𐴖𐴏𐴠 𐴕𐴠𐴁𐴞 𐴓𐴡𐴘 𐴓𐴡𐴌𐴝𐴘 𐴱 𐴵 𐴱 / 𐴋𐴞𐴏𐴡𐴔𐴁𐴡𐴌 𐴌𐴝𐴘𐴃𐴡𐴌 𐴸 𐴖𐴝𐴁𐴝𐴎𐴠 𐴁𐴢𐴢𐴄 𐴘𐴦𐴝𐴕 𐴊𐴤𐴡𐴙𐴅𐴧𐴙𐴠 𐴱

𐴀𐴥𐴠 𐴁𐴢𐴢𐴍𐴡𐴃 𐴲 𐴸 𐴎𐴡𐴕 𐴁𐴠𐴍𐴝 𐴹 𐴶 𐴎𐴡𐴕 𐴁𐴠𐴍𐴞 𐴲 𐴲 𐴎𐴡𐴕 𐴒𐴢𐴢𐴌𐴝 𐴉𐴢𐴢𐴖𐴝 𐴁𐴠𐴀𐴒𐴧𐴢𐴢𐴕𐴠 𐴔𐴞𐴓𐴝𐴘 𐴳 𐴷 𐴱 𐴎𐴡𐴕 𐴌𐴢𐴢𐴇𐴝𐴙𐴚𐴒𐴙𐴝 𐴊𐴤𐴡𐴌𐴝 𐴉𐴡𐴙𐴅𐴧𐴙𐴠 𐴁𐴡𐴓𐴞 𐴱 𐴁𐴡𐴌𐴔𐴝𐴌 𐴔𐴠𐴓𐴠𐴄𐴠𐴌𐴞𐴌 𐴔𐴠𐴋𐴞𐴘𐴝𐴌 𐴈𐴡𐴃𐴝 𐴈𐴡𐴀𐴙𐴕𐴧𐴝 / 𐴁𐴞𐴌𐴒𐴞𐴋𐴞𐴘𐴝𐴌 𐴅𐴡𐴕𐴡𐴌𐴡𐴓 / 𐴎𐴡𐴔𐴞𐴕 𐴄𐴢𐴢𐴕𐴠 𐴈𐴡𐴘𐴧𐴠 𐴱𐴱 𐴀𐴥𐴞𐴃𐴝𐴌𐴝𐴌𐴠 𐴏𐴥𐴠𐴚𐴐𐴥𐴗𐴥𐴠𐴚𐴡𐴃𐴧𐴢𐴢 𐴑𐴥𐴡𐴀𐴏𐴥𐴡𐴀𐴚 𐴐𐴥𐴡𐴀𐴌𐴡𐴃 𐴀𐴝𐴕𐴞 𐴃𐴡𐴊𐴝𐴌𐴢𐴢𐴑 𐴒𐴡𐴌𐴞𐴁𐴡 𐴱 𐴀𐴥𐴡𐴙𐴃 𐴉𐴝𐴌𐴠 𐴱 𐴘𐴦𐴝𐴌 𐴀𐴝𐴒𐴠 𐴵 𐴹 𐴎𐴡𐴕 𐴌𐴢𐴢𐴇𐴝𐴙𐴚𐴒𐴙𐴝 𐴌𐴠 𐴎𐴞𐴘𐴡𐴓 𐴊𐴞𐴀𐴓𐴊𐴠 𐴱 𐴀𐴥𐴠𐴕𐴋𐴞𐴓𐴧𐴝 𐴀𐴞𐴃𐴝𐴌𐴝𐴌𐴠 𐴘𐴥𐴡 𐴎𐴞𐴘𐴡𐴓𐴡𐴌 𐴇𐴥𐴡𐴑𐴢𐴢𐴔 𐴒𐴡𐴌𐴞𐴃 𐴉𐴝𐴌𐴠 𐴱𐴱

𐴱 𐴱 / 𐴋𐴞𐴏𐴡𐴔𐴁𐴡𐴌𐴡𐴃 𐴀𐴥𐴡 𐴵 𐴹 𐴎𐴡𐴕 𐴌𐴢𐴢𐴇𐴝𐴙𐴚𐴒𐴙𐴝 𐴌𐴠 𐴏𐴥𐴡𐴉𐴡𐴌𐴡𐴌 𐴇𐴥𐴡𐴑𐴢𐴢𐴔𐴡𐴃𐴞 𐴀𐴠𐴅𐴝𐴎𐴡𐴃 𐴕𐴝𐴔𐴝 𐴕𐴥𐴝𐴘𐴑𐴙𐴥𐴝 𐴁𐴡𐴓𐴞 𐴈𐴦𐴡𐴘 𐴁𐴠𐴀𐴒𐴧𐴢𐴢𐴕𐴡𐴌𐴠 𐴲 𐴁𐴡𐴏𐴡𐴌 𐴎𐴞𐴘𐴡𐴓𐴡𐴌 𐴇𐴥𐴡𐴑𐴢𐴢𐴔 𐴒𐴡𐴌𐴞 𐴎𐴞𐴘𐴡𐴓𐴡𐴃 𐴉𐴦𐴡𐴣𐴏𐴝𐴘𐴊𐴞𐴘𐴠 𐴱𐴱 𐴒𐴠𐴓𐴊𐴠 𐴴 𐴱 / 𐴋𐴞𐴏𐴡𐴔𐴁𐴡𐴌𐴡𐴃 𐴔𐴦𐴢𐴢𐴕 𐴀𐴠𐴏𐴄𐴠𐴀𐴄𐴡𐴌 𐴔𐴡𐴓𐴔𐴝𐴙𐴕 𐴐𐴥𐴡𐴀𐴌𐴡𐴃𐴧𐴢𐴢 𐴰 𐴲 𐴁𐴡𐴏𐴡𐴌𐴡𐴌 𐴕𐴞𐴏𐴠 𐴸 𐴎𐴡𐴕 𐴉𐴢𐴢𐴖𐴝𐴙𐴕 𐴁𐴡𐴕𐴒𐴡𐴌𐴞 𐴎𐴞𐴘𐴡𐴓𐴡𐴃 𐴊𐴞𐴘𐴠 𐴱𐴱

𐴌𐴢𐴢𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴕𐴞𐴎𐴡𐴌 𐴀𐴝𐴌 𐴁𐴝𐴉𐴢 𐴊𐴝𐴊𐴝𐴌 𐴕𐴝𐴒𐴞 𐴈𐴝𐴍𐴝 𐴊𐴠𐴐𐴡𐴃 𐴐𐴥𐴡𐴃𐴑𐴝𐴌𐴝 𐴳 𐴏𐴠𐴇𐴥𐴠𐴃 𐴱 𐴐𐴥𐴞𐴑𐴧𐴝 𐴀𐴝𐴌 𐴌𐴞𐴎𐴞𐴑 𐴃𐴢𐴢𐴖𐴝𐴘𐴁𐴝𐴌 𐴉𐴥𐴠𐴏𐴞𐴓𐴞𐴄𐴞 𐴓𐴡𐴘 𐴱 𐴏𐴡𐴑𐴃𐴥𐴡 𐴂𐴝𐴁𐴡𐴕𐴊𐴞𐴌 𐴏𐴥𐴝𐴣𐴀𐴃𐴠 𐴱 𐴀𐴝𐴘 𐴋𐴞 𐴂𐴞 𐴑𐴠𐴀𐴠𐴔 𐴈𐴦𐴡𐴘 𐴕𐴝𐴔𐴊𐴞 𐴱 𐴑𐴥𐴢𐴢𐴓𐴝 𐴎𐴞𐴘𐴡𐴓𐴡𐴃 𐴎𐴞𐴕𐴊𐴞𐴒𐴞 𐴈𐴝𐴍𐴠𐴌 𐴎𐴠𐴍𐴠 𐴎𐴡𐴁𐴞𐴕 𐴁𐴞𐴏𐴥𐴝𐴕𐴝 𐴀𐴝𐴧𐴏𐴝𐴕 𐴏𐴥𐴝𐴕𐴞 𐴱 𐴎𐴠 𐴇𐴝𐴓𐴡𐴃𐴡𐴌𐴠 𐴑𐴦𐴢𐴢𐴂𐴢 𐴐𐴥𐴢𐴢𐴕𐴊𐴡𐴌 𐴒𐴡𐴌𐴞 𐴏𐴝𐴀𐴘𐴧𐴡𐴌𐴠 ( 𐴀𐴠𐴔𐴕𐴠𐴏𐴄𐴞 𐴀𐴞𐴕𐴄𐴝𐴌𐴕𐴠𐴐𐴕𐴠𐴓𐴠 ) ” 𐴎𐴝𐴃 𐴉𐴡𐴌𐴡𐴑 𐴒𐴡𐴌𐴝 ” 𐴈𐴡𐴘 𐴕𐴝𐴔𐴊𐴞𐴘𐴠 𐴱𐴱