𐴵 𐴹 / 𐴎𐴡𐴕 𐴌𐴢𐴢𐴇𐴝𐴙𐴚𐴒𐴙𐴝𐴌𐴠 𐴎𐴠𐴘𐴡𐴓𐴡𐴃 𐴊𐴠𐴌 𐴱 𐴀𐴝𐴘 𐴏𐴞 𐴅𐴠𐴃 𐴅𐴠𐴕𐴡𐴏𐴝𐴙𐴋𐴡𐴌 𐴔𐴡𐴀𐴊𐴧𐴞𐴔𐴝 𐴏𐴡𐴓𐴠𐴌 𐴱𐴱

𐴃𐴝𐴌𐴝𐴌 𐴈𐴡𐴏𐴢𐴢𐴌𐴞 𐴀𐴥𐴡𐴙𐴓𐴊𐴠 𐴱 𐴇𐴥𐴡𐴑𐴢𐴢𐴔𐴡𐴃𐴡𐴌 𐴀𐴠𐴅𐴝𐴎𐴡𐴃 𐴕𐴝𐴔𐴝 𐴏𐴥𐴝𐴌𐴝 𐴏𐴥𐴡𐴉𐴡𐴌 𐴒𐴡𐴙𐴅𐴧𐴠 𐴱𐴱 𐴒𐴡𐴃𐴡 𐴈𐴝𐴙𐴓𐴧𐴝 𐴰 𐴰 𐴱 𐴎𐴡𐴕 𐴓𐴡𐴃𐴞 𐴌𐴢𐴢𐴇𐴝𐴙𐴚𐴒𐴙𐴝 𐴁𐴡𐴌𐴔𐴝 𐴇𐴥𐴡𐴑𐴢𐴢𐴔𐴡𐴃𐴡𐴌 𐴎𐴢𐴢𐴓𐴢𐴢𐴔 𐴐𐴥𐴡𐴀𐴘 𐴕𐴡𐴉𐴝𐴌𐴞 𐴱𐴱 𐴈𐴡𐴕𐴥𐴡 𐴔𐴞𐴑𐴧𐴙𐴝 𐴎𐴝𐴘𐴁𐴡𐴙𐴀𐴓𐴧𐴝 𐴑𐴢𐴢𐴐𐴞𐴐𐴢 𐴒𐴡𐴌𐴠𐴊𐴧𐴠 𐴱𐴱 𐴀𐴥𐴢𐴢𐴕𐴡𐴌𐴠 𐴉𐴢𐴢𐴓𐴞𐴐𐴠 𐴁𐴡𐴕𐴒𐴡𐴙𐴅𐴧𐴠 𐴱 𐴀𐴥𐴞𐴃𐴝𐴌𐴝𐴌 𐴀𐴢𐴢𐴑𐴞𐴓𐴠 𐴈𐴡𐴘𐴧𐴠 𐴱𐴱 𐴅𐴥𐴡𐴁𐴑𐴥𐴞 𐴀𐴥𐴠𐴃𐴡𐴑𐴧𐴡𐴕𐴡𐴃 / 𐴀𐴡𐴚 𐴏𐴝𐴕 𐴏𐴥𐴢𐴢𐴀𐴑𐴞 𐴘𐴠 𐴱 𐴊𐴠𐴐𐴁𐴞𐴊𐴠𐴐𐴞 𐴀𐴞𐴕𐴏𐴝𐴉𐴢 𐴑𐴦𐴢𐴢𐴍𐴡𐴃 𐴱 𐴈𐴡𐴔 𐴐𐴥𐴡𐴙𐴚𐴒𐴙𐴝 𐴌𐴢𐴢𐴇𐴝𐴙𐴚𐴒𐴙𐴝𐴌𐴠 𐴱 𐴅𐴠𐴕𐴡𐴏𐴝𐴙𐴋 𐴕𐴦𐴡𐴒𐴡𐴌𐴠𐴊𐴠 𐴘𐴦𐴝𐴕𐴡𐴌𐴠 𐴏𐴝𐴁𐴢𐴢𐴃 𐴒𐴡𐴌𐴠𐴌 𐴱𐴱

𐴁𐴡𐴌𐴔𐴝𐴌 𐴐𐴥𐴡𐴀𐴌 𐴁𐴡𐴏𐴥𐴝𐴙𐴌 𐴑𐴦𐴢𐴢𐴍𐴡𐴌 𐴔𐴢𐴢𐴀𐴕𐴃𐴢𐴢 𐴱 𐴊𐴤𐴡𐴌𐴝 𐴉𐴡𐴙𐴅𐴧𐴠𐴊𐴠 𐴌𐴢𐴢𐴇𐴝𐴙𐴚𐴒𐴙𐴝 𐴀𐴥𐴢𐴢𐴀𐴕 𐴓𐴝𐴙𐴕𐴊𐴡𐴌𐴞 𐴉𐴢𐴢𐴓𐴞𐴐𐴡𐴌 𐴒𐴝𐴌𐴞𐴃𐴧𐴢𐴢 𐴓𐴝𐴔𐴠𐴌𐴊𐴠 𐴏𐴡𐴀 𐴱𐴱 𐴌𐴢𐴢𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴀𐴝𐴌𐴑𐴝𐴕𐴡𐴃 𐴱 𐴎𐴡𐴁𐴡𐴌𐴊𐴥𐴡𐴏𐴢 𐴂𐴝𐴁𐴡𐴕𐴊𐴞 𐴓𐴡𐴘 𐴎𐴞𐴕𐴊𐴞𐴒𐴞 𐴈𐴝𐴍𐴠𐴌 𐴱 𐴐𐴥𐴢𐴢𐴊𐴢𐴢 𐴀𐴡𐴓𐴉𐴡𐴒𐴌𐴞 𐴱 𐴊𐴝𐴁𐴝𐴙𐴌 / 𐴉𐴡𐴕𐴧𐴝𐴌 / 𐴌𐴞𐴎𐴞𐴑 𐴃𐴗𐴝𐴙𐴁𐴝𐴌 𐴐𐴥𐴢𐴢𐴎𐴢𐴢𐴑 𐴊𐴞𐴘𐴠𐴊𐴠 𐴱𐴱 𐴀𐴠 𐴇𐴝𐴓𐴡𐴃 𐴀𐴞𐴕𐴡𐴌𐴠 / 𐴀𐴠𐴔𐴕𐴠𐴏𐴄𐴞 𐴀𐴞𐴕𐴄𐴝𐴌 𐴕𐴠𐴐𐴕𐴠𐴓𐴠 ” 𐴎𐴝𐴃 𐴉𐴡𐴌𐴡𐴑 𐴒𐴡𐴌𐴝 ” 𐴈𐴡𐴘 𐴕𐴝𐴔𐴊𐴞𐴘𐴠 𐴱𐴱 𐴁𐴡𐴖𐴃 𐴁𐴡𐴏𐴡𐴌 𐴀𐴥𐴡𐴘𐴃𐴠 𐴱 𐴌𐴢𐴢𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴎𐴝𐴕𐴡𐴌 𐴁𐴝𐴎𐴞 𐴓𐴝𐴒𐴝𐴘 𐴱 𐴀𐴥𐴝𐴎𐴝𐴌𐴥𐴡 𐴋𐴡𐴙𐴓𐴧𐴝 𐴌𐴦𐴞𐴏𐴢 𐴓𐴡𐴘 𐴱 𐴎𐴞𐴘𐴝𐴕𐴓𐴡𐴘 𐴉𐴝𐴌𐴠 𐴱 𐴔𐴡𐴏𐴞𐴁𐴡𐴃𐴡𐴃𐴧𐴢𐴢 𐴕𐴠𐴓𐴞 𐴎𐴝𐴘𐴁𐴡 𐴒𐴡𐴙𐴓𐴧𐴝 𐴑𐴢𐴢𐴐𐴞𐴐𐴢 𐴒𐴡𐴌𐴝𐴃 𐴀𐴝𐴏𐴠 𐴱𐴱

𐴀𐴠 𐴵 𐴹 𐴎𐴡𐴕𐴡𐴌 𐴁𐴥𐴢𐴢 𐴌𐴠 𐴵 𐴲 𐴎𐴡𐴕 𐴉𐴢𐴢𐴖𐴝𐴙𐴕 𐴀𐴝𐴏𐴠 𐴱 𐴉𐴡𐴃𐴧𐴞𐴎𐴡𐴕𐴠 𐴐𐴥𐴡𐴃𐴝𐴐𐴥𐴡𐴃𐴞 𐴋𐴡𐴓𐴝𐴌 𐴊𐴞𐴘𐴡𐴌𐴠 𐴱 𐴀𐴠𐴑𐴧𐴝𐴕 𐴁𐴤𐴝𐴓𐴝 𐴎𐴞𐴕𐴊𐴞𐴒𐴞 𐴉𐴝𐴘𐴁𐴡𐴓𐴧𐴝 𐴑𐴢𐴢𐴐𐴞𐴐𐴢 𐴒𐴡𐴌𐴠𐴊𐴧𐴠 𐴁𐴡𐴓𐴞 / 𐴀𐴢𐴢𐴑𐴞𐴓 𐴃𐴝𐴎𐴞𐴕 𐴔𐴙𐴥𐴝 𐴔𐴙𐴥𐴝 𐴖𐴞𐴕𐴠 ( 𐴀𐴠 𐴀𐴠𐴉 𐴂𐴞) 𐴌𐴠 𐴈𐴡𐴘𐴧𐴠 𐴱𐴱 𐴊𐴝𐴓𐴝𐴓𐴡𐴌𐴠 𐴄𐴞𐴛𐴝 𐴊𐴞𐴁𐴡𐴓𐴧𐴝 𐴱 𐴁𐴡𐴖𐴃 𐴎𐴡𐴕𐴠 𐴕𐴞𐴎𐴡𐴌 ( 𐴒𐴢𐴢𐴌𐴊𐴝 ) 𐴀𐴥𐴢𐴢𐴊𐴧𐴝 𐴁𐴠𐴏𐴞 𐴉𐴥𐴠𐴓𐴝𐴘𐴧𐴠 𐴁𐴡𐴓𐴞 / 𐴀𐴢𐴢𐴑𐴞𐴓𐴠 𐴈𐴡𐴘𐴧𐴠 𐴱𐴱 𐴀𐴞𐴔𐴞𐴒𐴞𐴌𐴞𐴐𐴥𐴠𐴕𐴡𐴌 𐴑𐴝𐴕𐴢𐴢𐴕 𐴔𐴡𐴎𐴞𐴕 𐴊𐴢𐴢𐴘 𐴁𐴡𐴏𐴡𐴌 𐴓𐴡𐴃𐴞 𐴎𐴞𐴘𐴡𐴓 𐴀𐴥𐴡𐴙𐴃𐴉𐴝𐴌𐴠 𐴱𐴱