𐴑𐴡𐴖𐴔 𐴈𐴥𐴡𐴃𐴡𐴔 𐴈𐴝𐴔 𐴱 𐴁𐴡𐴌𐴔𐴝 𐴘𐴠 𐴀𐴝𐴘𐴅𐴥𐴡 𐴒𐴡𐴌𐴝𐴃 𐴀𐴝𐴏𐴠 (𐴉𐴡𐴌𐴄𐴞𐴉𐴥𐴝𐴘 𐴌𐴥𐴝𐴙𐴄𐴏𐴢 ) 𐴱𐴱

𐴌𐴢𐴢𐴇𐴝𐴙𐴚𐴒𐴙𐴝 𐴔𐴢𐴢𐴏𐴡𐴓𐴔𐴝𐴕𐴡𐴌𐴠 𐴅𐴠𐴕𐴡𐴏𐴝𐴙𐴋 𐴒𐴡𐴙𐴅𐴧𐴠𐴊𐴠 𐴀𐴠𐴓𐴎𐴝𐴔 𐴊𐴞 𐴱 𐴒𐴝𐴔𐴁𐴞𐴘𐴝 𐴘𐴠 𐴁𐴡𐴌𐴔𐴝𐴌 𐴈𐴠𐴓𐴝𐴉𐴢 𐴱 𐴊𐴠𐴐𐴁𐴞𐴊𐴠𐴐𐴡𐴌 𐴀𐴞𐴕𐴏𐴝𐴉𐴢 𐴑𐴦𐴢𐴢𐴄 ( 𐴀𐴝𐴘 𐴏𐴞 𐴅𐴠 ) 𐴃 𐴔𐴡𐴀𐴊𐴧𐴞𐴔𐴝 𐴑𐴥𐴢𐴢𐴓𐴞 𐴁𐴝𐴊𐴠𐴘𐴥𐴡 𐴱 𐴁𐴡𐴌𐴔𐴝 𐴘𐴠 𐴀𐴢𐴢𐴃𐴧𐴡𐴌 𐴀𐴝𐴌𐴑𐴝𐴕𐴡𐴃 / 𐴁𐴥𐴢𐴢𐴏𐴞𐴊𐴡𐴚𐴡𐴃 𐴀𐴝𐴘𐴅𐴥𐴡 𐴀𐴞𐴕𐴏𐴝𐴕𐴞 𐴇𐴥𐴡𐴑 𐴔𐴝𐴍𐴞 𐴒𐴡𐴌𐴝𐴃 𐴀𐴝𐴏𐴠 𐴁𐴡𐴓𐴞 𐴱 𐴒𐴡𐴃𐴡 𐴈𐴝𐴙𐴓𐴧𐴝 ( 𐴉𐴡𐴌𐴄𐴞𐴉𐴥𐴝𐴘 𐴌𐴥𐴝𐴙𐴄𐴏𐴢 ) 𐴒𐴢𐴢𐴌𐴢𐴢𐴉𐴠 𐴈𐴡𐴘𐴧𐴠 𐴱𐴱

𐴌𐴢𐴢𐴇𐴝𐴙𐴚𐴒𐴙𐴝 𐴔𐴢𐴢𐴏𐴡𐴓𐴔𐴝𐴕𐴡𐴌𐴠 𐴁𐴡𐴌𐴔𐴝 𐴘𐴠 𐴅𐴠𐴕𐴡𐴏𐴝𐴙𐴋 𐴒𐴡𐴙𐴅𐴧𐴠𐴊𐴠 𐴱 𐴘𐴥𐴝𐴕𐴡𐴌 𐴔𐴡𐴀𐴊𐴧𐴞𐴔𐴝 𐴏𐴡𐴓𐴠𐴊𐴧𐴠 𐴀𐴡𐴑𐴃𐴥𐴡𐴃 𐴀𐴥𐴢𐴢𐴊𐴧𐴝 𐴱 𐴁𐴡𐴌𐴔𐴝 𐴘𐴠 𐴓𐴝𐴒𐴝𐴃𐴝𐴌 𐴀𐴞𐴕𐴏𐴝𐴕𐴞 𐴇𐴥𐴡𐴑 𐴔𐴝𐴍𐴞 𐴒𐴡𐴌𐴠𐴌 𐴊𐴠 𐴱 𐴀𐴥𐴞𐴕𐴡𐴌 𐴏𐴝𐴁𐴢𐴢𐴃 𐴀𐴝𐴣𐴀𐴌𐴝𐴌 𐴈𐴝𐴣𐴏𐴠 𐴀𐴝𐴏𐴠 𐴁𐴡𐴓𐴞 𐴱 𐴄𐴥𐴝𐴀𐴘𐴓𐴠𐴕𐴡𐴌 𐴀𐴞𐴕𐴏𐴝𐴕𐴞 𐴇𐴥𐴡𐴑𐴧𐴡𐴌 𐴃𐴡𐴕𐴎𐴞𐴔 ( 𐴉𐴡𐴌𐴄𐴞𐴉𐴥𐴝𐴘 𐴌𐴥𐴝𐴙𐴄𐴏 ) 𐴒𐴢𐴢𐴌𐴢𐴢𐴉𐴠 𐴈𐴡𐴘𐴧𐴠 𐴱𐴱

𐴀𐴠 𐴄𐴝𐴙𐴔𐴡𐴃 𐴁𐴡𐴖𐴋𐴝𐴌 𐴏𐴦𐴡𐴛 𐴉𐴢𐴢𐴓𐴞𐴐𐴢 𐴀𐴝𐴌 𐴔𐴠𐴓𐴠𐴄𐴠𐴌𐴞 𐴀𐴥𐴡𐴑𐴧𐴡𐴓𐴠 𐴱 𐴁𐴥𐴢𐴢𐴏𐴞𐴊𐴡𐴚𐴡𐴃 𐴌𐴢𐴢𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴠 𐴎𐴢𐴢𐴓𐴢𐴢𐴔 𐴒𐴡𐴌𐴦𐴡𐴕 𐴁𐴤𐴝𐴓𐴝 𐴕𐴡𐴊𐴠 𐴱 𐴀𐴥𐴠𐴃𐴡𐴓𐴧𐴝 𐴎𐴢𐴢𐴓𐴢𐴢𐴔𐴒𐴡𐴌𐴝 𐴁𐴡𐴕𐴒𐴡𐴌𐴞 𐴉𐴥𐴠𐴓𐴡𐴕 𐴎𐴡𐴌𐴢𐴢𐴌𐴞 𐴁𐴡𐴓𐴞 𐴱 𐴉𐴡𐴌𐴄𐴞𐴉𐴥𐴝𐴘 𐴌𐴥𐴝𐴙𐴄 𐴒𐴢𐴢𐴌𐴢𐴢𐴉𐴡𐴃 𐴱 𐴁𐴡𐴌𐴔𐴝𐴌 𐴔𐴢𐴢𐴃𐴝𐴀𐴓𐴧𐴠𐴑 𐴀𐴝𐴏𐴠𐴊𐴠 𐴀𐴞𐴕𐴏𐴝𐴕𐴞 𐴇𐴥𐴡𐴑𐴧𐴡𐴌 𐴔𐴝𐴇𐴠𐴌 / 𐴑𐴢𐴢𐴕𐴝𐴑𐴧𐴞 𐴋𐴥𐴝𐴙𐴚 𐴔𐴗𐴥𐴠𐴚𐴠 𐴈𐴡𐴘𐴧𐴠 𐴱𐴱

𐴑𐴠𐴙𐴏𐴧𐴢𐴢 𐴊𐴞𐴕 𐴀𐴝𐴒𐴠 𐴀𐴝𐴌𐴑𐴝𐴕𐴡𐴃 𐴁𐴥𐴢𐴢𐴏𐴞𐴊𐴡𐴚𐴡𐴃 𐴱 𐴉𐴡𐴌𐴄𐴞𐴉𐴥𐴝𐴘 𐴌𐴥𐴝𐴙𐴄 𐴒𐴢𐴢𐴌𐴢𐴢𐴉𐴡𐴌 𐴔𐴝𐴕𐴢𐴢𐴙𐴐𐴢 𐴈𐴡𐴊𐴦𐴢𐴢𐴕 𐴲 𐴱 𐴎𐴡𐴕 𐴌𐴢𐴢𐴇𐴝𐴙𐴚𐴒𐴙𐴝𐴌 𐴓𐴡𐴘 𐴊𐴡𐴓𐴝 𐴀𐴥𐴡𐴘 𐴇𐴝𐴓𐴡𐴃 𐴉𐴢𐴢𐴏𐴥𐴝𐴌 𐴒𐴡𐴙𐴅𐴧𐴠 𐴱𐴱 𐴃𐴦𐴡𐴘 𐴌𐴢𐴢𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴠𐴊𐴠 𐴱 𐴒𐴡𐴃𐴡 𐴏𐴠𐴃𐴡𐴔𐴁𐴡𐴌 𐴔𐴝𐴐𐴡𐴃 𐴱 𐴔𐴠𐴓𐴠𐴄𐴠𐴌𐴞 𐴀𐴝𐴌 𐴁𐴡𐴖𐴋𐴝𐴌 𐴏𐴦𐴡𐴛 𐴉𐴢𐴢𐴓𐴞𐴐𐴢 𐴀𐴥𐴡𐴑𐴧𐴡𐴓𐴠 𐴱 𐴇𐴥𐴝𐴣𐴃𐴧𐴝𐴕 𐴋𐴦𐴡𐴣𐴌 𐴁𐴡𐴓𐴝𐴎𐴢𐴢𐴌𐴞 𐴎𐴢𐴢𐴓𐴢𐴢𐴔𐴡𐴌 𐴖𐴝𐴑𐴙𐴝 𐴒𐴡𐴙𐴅𐴧𐴠 𐴱 𐴀𐴝𐴌 𐴐𐴥𐴡𐴐𐴡𐴔𐴁𐴡𐴃𐴧𐴞 𐴎𐴦𐴝𐴣 𐴉𐴝𐴘𐴧𐴠 𐴓𐴢𐴢𐴄𐴒𐴡𐴌𐴞 𐴉𐴥𐴠𐴓𐴝𐴘𐴧𐴠 𐴱𐴱

𐴁𐴥𐴢𐴢𐴏𐴞𐴊𐴡𐴚𐴡𐴌 / 𐴏𐴡𐴁𐴧𐴠𐴌𐴠 𐴃𐴥𐴡𐴀 𐴉𐴝𐴌𐴝𐴃 𐴱 𐴒𐴢𐴢𐴌𐴝 𐴒𐴢𐴢𐴌𐴝 𐴉𐴢𐴢𐴖𐴝𐴙𐴕 𐴐𐴥𐴡𐴣𐴀 𐴰 𐴳 𐴎𐴡𐴕 𐴔𐴝𐴙𐴕𐴐𐴡𐴌𐴠 𐴁𐴡𐴓𐴝𐴎𐴢𐴢𐴌𐴞 𐴀𐴝𐴌𐴥𐴝𐴘𐴁𐴡𐴓𐴧𐴝 𐴱 𐴈𐴥𐴝𐴕𐴝 𐴉𐴝𐴕𐴞 𐴕𐴡𐴊𐴞 𐴁𐴡𐴕𐴒𐴡𐴌𐴞 𐴌𐴝𐴙𐴑𐴧𐴙𐴠 𐴁𐴡𐴓𐴞 ( 𐴀𐴝𐴌 𐴀𐴠𐴉𐴢 𐴀𐴠 ) 𐴌 𐴈𐴥𐴡𐴁𐴡𐴌𐴡𐴃 𐴓𐴠𐴙𐴑𐴧𐴙𐴠 𐴱𐴱 𐴀𐴢𐴢𐴃𐴧𐴡𐴌 𐴀𐴝𐴌𐴑𐴝𐴕𐴡𐴃 𐴱 𐴌𐴢𐴢𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴖𐴡𐴌𐴠 𐴀𐴞𐴕𐴏𐴝𐴕𐴞 𐴇𐴥𐴡𐴑𐴔𐴝𐴍𐴞𐴌 𐴎𐴢𐴢𐴓𐴢𐴢𐴔 𐴀𐴥𐴡𐴌𐴁𐴡𐴓𐴞 ( 𐴋𐴞𐴔𐴢𐴢𐴑𐴠𐴌𐴠𐴏𐴞 𐴀𐴝𐴌 𐴀𐴞𐴕𐴏𐴝𐴕𐴞 𐴇𐴥𐴡𐴑𐴧𐴡𐴌 𐴉𐴝𐴄𐴞𐴌 ) 𐴏𐴠𐴑𐴠𐴄𐴠𐴌𐴞 / 𐴑𐴢𐴢 𐴆𐴙𐴡 𐴏𐴥𐴢𐴢𐴀 𐴀𐴡𐴚𐴠 𐴈𐴡𐴘𐴧𐴠 𐴱𐴱 𐴀𐴝𐴌𐴑𐴝𐴕𐴡𐴃 𐴐𐴥𐴢𐴢𐴊𐴠 𐴔𐴢𐴢𐴏𐴡𐴓𐴔𐴝𐴕 𐴕𐴦𐴡 𐴱 𐴔𐴡𐴒𐴡𐴌 𐴀𐴥𐴢𐴢𐴊𐴧𐴝 𐴀𐴞𐴕𐴏𐴝𐴕𐴞 𐴇𐴥𐴡𐴑 𐴔𐴝𐴍𐴞 𐴀𐴥𐴡𐴌𐴁𐴡𐴓𐴞 𐴱 𐴁𐴥𐴢𐴢𐴏𐴞𐴊𐴡𐴚𐴡𐴌 / 𐴀𐴠𐴔 𐴂𐴢 / 𐴀𐴥𐴢𐴢𐴀 𐴀𐴡𐴚 𐴏𐴥𐴡𐴚 𐴐𐴗𐴠 𐴘𐴠 𐴈𐴡𐴘𐴧𐴠 𐴱𐴱

Source: RFA Burmese https://www.rfa.org/burmese/news/fortify-rights-statement-rohingya-genocide-12082019063130.html