𐴁𐴡𐴌𐴔𐴝𐴌 𐴀𐴢𐴢𐴃𐴧𐴡𐴌𐴡𐴌 𐴀𐴠𐴃𐴧𐴠𐴇𐴝𐴊𐴠 𐴔𐴠𐴓𐴠𐴄𐴠𐴌𐴞𐴌 𐴀𐴢𐴢𐴓𐴋𐴝 𐴀𐴠𐴏𐴄𐴠𐴀𐴄𐴔𐴥𐴠𐴕𐴄 𐴕𐴠𐴓𐴝𐴘𐴧𐴠 𐴱𐴱

𐴀𐴠 𐴀𐴠 𐴐𐴥𐴡𐴣𐴀 𐴀𐴝𐴌𐴥𐴡 𐴶 𐴉𐴝𐴄𐴞 𐴔𐴞𐴓𐴞 𐴱 𐴁𐴡𐴌𐴔𐴝𐴓𐴧𐴝 ( 𐴀𐴝𐴘 𐴏𐴞 𐴏𐴞 𐴀𐴝𐴌 𐴀𐴝𐴘 𐴏𐴞 𐴅𐴠 ) 𐴃 𐴔𐴡𐴀𐴊𐴧𐴞𐴔𐴝 𐴑𐴥𐴢𐴢𐴙𐴓𐴧𐴠𐴊𐴠 𐴘𐴦𐴝𐴕𐴡𐴌 𐴃𐴝𐴘𐴊𐴡𐴃 𐴱 𐴀𐴝𐴌 𐴎𐴠 𐴈𐴡𐴕𐴥𐴡 𐴑𐴡𐴖𐴔𐴡𐴃𐴧𐴢𐴢 𐴕𐴞𐴎𐴡𐴌 𐴏𐴞𐴕𐴧𐴡 𐴕𐴞𐴎𐴠 𐴊𐴞𐴉𐴝𐴌𐴞𐴁𐴝𐴌 𐴇𐴥𐴡𐴑 𐴀𐴝𐴏𐴠𐴊𐴠 𐴔𐴡𐴎𐴞𐴕 𐴱 𐴌𐴢𐴢𐴇𐴝𐴙𐴚𐴒𐴙𐴝 𐴘𐴠 𐴕𐴞𐴎𐴡𐴌 𐴑𐴡𐴖𐴔𐴞 𐴕𐴝𐴔 𐴌𐴢𐴢𐴇𐴝𐴙𐴚𐴒𐴙𐴝 𐴈𐴦𐴡𐴊𐴧𐴠 𐴱 𐴇𐴥𐴡𐴑𐴡𐴌𐴠 𐴁𐴡𐴌𐴔𐴝 𐴘𐴠 𐴔𐴝𐴍𐴞 𐴒𐴡𐴌𐴞 ” 𐴁𐴝𐴚𐴒𐴝𐴓𐴞 ” 𐴈𐴦𐴡𐴊𐴧𐴠 𐴱 𐴘𐴥𐴝𐴕𐴡𐴌 𐴀𐴢𐴢𐴓𐴋𐴝𐴃 𐴀𐴠𐴏𐴄𐴠𐴀𐴄𐴔𐴥𐴠𐴕𐴄 𐴀𐴠𐴑𐴧𐴝𐴕 𐴕𐴠𐴓𐴝𐴘𐴧𐴠 𐴱𐴱

𐴁𐴡𐴌𐴔𐴝𐴌 𐴈𐴡𐴔𐴐𐴥𐴡𐴙𐴚𐴒𐴙𐴝 𐴑𐴡𐴖𐴔 𐴁𐴝𐴚𐴒𐴝𐴓𐴞 𐴔𐴢𐴢𐴏𐴡𐴓𐴔𐴝𐴕𐴡𐴌𐴠 𐴁𐴡𐴌𐴔𐴝𐴘𐴠 𐴅𐴠𐴕𐴡𐴏𐴥𐴝𐴙𐴋 𐴒𐴡𐴙𐴅𐴧𐴠𐴊𐴠 𐴱 𐴀𐴥𐴠𐴃𐴡𐴓𐴧𐴝 𐴒𐴝𐴔𐴁𐴞𐴘𐴝 𐴘𐴠 𐴁𐴡𐴌𐴔𐴝𐴓𐴧𐴝 𐴀𐴝𐴘 𐴏𐴞 𐴅𐴠 𐴌 𐴑𐴦𐴢𐴢𐴍𐴡𐴃 𐴔𐴡𐴀𐴊𐴧𐴞𐴔𐴝 𐴑𐴥𐴢𐴢𐴙𐴓𐴧𐴠 𐴊𐴠 𐴘𐴦𐴝𐴕𐴡𐴌𐴠 𐴱 𐴀𐴝𐴣𐴀𐴌𐴝 𐴇𐴥𐴝𐴣𐴃 𐴉𐴝𐴄𐴞 𐴁𐴠𐴙𐴒𐴧𐴢𐴢𐴕𐴠 𐴃𐴝𐴙𐴊𐴒𐴡𐴌𐴞𐴌 𐴈𐴡𐴘 𐴀𐴠𐴏𐴄𐴠𐴀𐴔𐴠𐴕𐴄 𐴘𐴦𐴝𐴕𐴡𐴃 𐴓𐴠𐴙𐴑𐴧𐴠 𐴱𐴱 𐴀𐴥𐴞𐴃𐴝𐴌𐴝𐴌𐴠 𐴘𐴥𐴡 𐴔𐴠𐴓𐴠𐴄𐴠𐴌𐴞 𐴘𐴠 𐴌𐴢𐴢𐴇𐴝𐴙𐴚𐴒𐴙𐴝𐴌 𐴋𐴡𐴙𐴓𐴧𐴝 𐴀𐴠𐴑𐴧𐴢𐴢𐴉𐴥𐴗𐴝𐴙𐴕𐴧𐴝 𐴎𐴢𐴢𐴓𐴢𐴢𐴔 𐴒𐴡𐴌𐴠𐴊𐴧𐴠 𐴱 𐴀𐴥𐴠𐴃𐴡𐴓𐴧𐴝 𐴃𐴝𐴙𐴊 𐴒𐴡𐴙𐴅𐴧𐴠𐴊𐴠 𐴱 𐴌𐴢𐴢𐴇𐴝𐴙𐴚𐴒𐴙𐴌 𐴏𐴥𐴝𐴣𐴀𐴃𐴠 𐴀𐴠𐴃𐴧𐴠𐴉𐴝𐴑 𐴀𐴥𐴡𐴘 𐴒𐴡𐴙𐴅𐴧𐴠𐴊𐴠 𐴕𐴡𐴀 𐴱𐴱

𐴑𐴙𐴡𐴓𐴧𐴝 𐴈𐴡𐴘𐴓𐴠 𐴌𐴢𐴢𐴇𐴝𐴙𐴚𐴒𐴙𐴝𐴌𐴠 𐴀𐴥𐴞𐴃𐴝𐴌𐴝 𐴘𐴥𐴡 𐴊𐴢𐴢𐴐𐴧𐴡𐴕 𐴁𐴢𐴢𐴎𐴠 𐴱𐴱 𐴌𐴢𐴢𐴇𐴝𐴙𐴚𐴒𐴙𐴝 𐴁𐴠𐴙𐴒𐴧𐴢𐴢𐴕𐴡𐴃𐴧𐴢𐴢 𐴈𐴦𐴝𐴏𐴢𐴒𐴡𐴌𐴞 𐴓𐴦𐴞𐴋𐴝𐴌 𐴀𐴝𐴌 𐴈𐴝𐴔𐴒𐴡𐴌𐴥𐴡𐴘𐴧𐴝 𐴀𐴥𐴡𐴑𐴧𐴡𐴓𐴡𐴃𐴧𐴢𐴢 𐴁𐴥𐴝𐴉𐴝 𐴉𐴡𐴌𐴞𐴁𐴡𐴊𐴠 𐴱 𐴔𐴡𐴒𐴢 𐴁𐴝𐴒𐴞 𐴀𐴝𐴌𐴑𐴝𐴕𐴡𐴌 𐴁𐴠𐴐𐴥𐴞 𐴇𐴥𐴡𐴑𐴊𐴝𐴌 𐴁𐴢𐴢𐴎𐴞𐴘𐴡𐴌𐴠 𐴌𐴢𐴢𐴇𐴝𐴙𐴚𐴒𐴙𐴝𐴌 𐴀𐴥𐴞𐴑𐴧𐴙𐴝 𐴔𐴝𐴃𐴠𐴌𐴊𐴠 𐴱𐴱 𐴀𐴠𐴏𐴄𐴠𐴀𐴄𐴔𐴥𐴠𐴕𐴄 𐴘𐴥𐴝𐴕𐴠 𐴌𐴢𐴢𐴇𐴝𐴙𐴚𐴒𐴙𐴝𐴌 𐴁𐴥𐴢𐴢𐴃𐴡𐴌𐴠 𐴀𐴡𐴐𐴥𐴝𐴕𐴃𐴞 𐴁𐴝𐴌𐴥𐴝𐴘𐴊𐴞𐴘𐴠 𐴱𐴱 𐴔𐴝𐴕𐴢𐴢𐴙𐴐𐴢 𐴎𐴝𐴃𐴡𐴌 𐴎𐴡𐴕𐴡𐴔𐴞 𐴇𐴥𐴡𐴑 𐴀𐴦𐴡𐴓𐴡𐴌 𐴀𐴠𐴓𐴝𐴕𐴡𐴌 / 𐴊𐴤𐴝𐴌𐴝 𐴓𐴡𐴔𐴁𐴡𐴌 𐴱 𐴱 / 𐴁 𐴔𐴡𐴎𐴞𐴕 𐴌𐴢𐴢𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴠 𐴁𐴡𐴌𐴔𐴝 𐴘𐴠 𐴁𐴝𐴚𐴒𐴝𐴓𐴞 𐴈𐴦𐴡𐴊𐴧𐴠 𐴘𐴥𐴝𐴕𐴡 𐴅𐴠𐴕𐴡𐴏𐴥𐴝𐴙𐴋 𐴱 𐴀𐴝𐴌 𐴎𐴠 𐴈𐴡𐴕𐴥𐴡 𐴑𐴡𐴖𐴔𐴡𐴌 𐴔𐴞𐴔𐴁𐴡𐴌𐴡𐴌𐴠 𐴐𐴥𐴡𐴌𐴞𐴓𐴞 𐴘𐴝𐴃𐴡 𐴊𐴠𐴔𐴝𐴒𐴞 𐴐𐴥𐴝𐴎𐴝 𐴊𐴡𐴕𐴥𐴡 𐴅𐴠𐴕𐴡𐴏𐴥𐴝𐴙𐴋 𐴱 𐴁𐴡𐴓𐴞 / 𐴀𐴠𐴔 𐴂𐴞 𐴆𐴗𐴠𐴔𐴡𐴚𐴠 𐴈𐴡𐴘𐴧𐴠 𐴱𐴱

𐴌𐴢𐴢 𐴕𐴠𐴏𐴝𐴕 𐴓𐴗𐴞𐴕𐴠 / 𐴀𐴝𐴌 𐴀𐴠𐴉 𐴀𐴠𐴌 𐴇𐴥𐴝𐴖𐴝𐴓𐴝 𐴓𐴡𐴘 𐴀𐴡 𐴇𐴥𐴝𐴣𐴃 𐴉𐴝𐴄𐴞𐴌 𐴃𐴝𐴙𐴊𐴡𐴌𐴠 𐴇𐴥𐴠𐴔𐴝𐴘𐴡𐴃 𐴒𐴡𐴙𐴅𐴧𐴠 𐴔𐴡𐴕𐴃𐴡𐴌 𐴌𐴢𐴢𐴇𐴝𐴙𐴚𐴒𐴙𐴝𐴌𐴠 𐴁𐴝𐴚𐴒𐴝𐴓𐴞 𐴈𐴡𐴘𐴧𐴠𐴊𐴠 𐴘𐴦𐴝𐴕𐴡𐴌𐴠 𐴈𐴡𐴕𐴥𐴡𐴊𐴞𐴕 𐴑𐴡𐴁𐴢𐴢𐴓 𐴕𐴡𐴒𐴡𐴙𐴅𐴧𐴢𐴢𐴔 𐴁𐴡𐴓𐴞 𐴈𐴡𐴘𐴧𐴠 𐴱𐴱 𐴌𐴢𐴢𐴇𐴝𐴙𐴚𐴒𐴙𐴝𐴌 𐴈𐴝𐴔 𐴒𐴡𐴌𐴦𐴡𐴘𐴧𐴝 / 𐴄𐴥𐴠𐴓𐴗𐴠𐴚 𐴀𐴥𐴢𐴢 𐴀𐴝𐴌 𐴀𐴝𐴌𐴠𐴉 𐴑𐴝𐴏𐴞𐴔 / 𐴀𐴞𐴃𐴝𐴌𐴝 𐴀𐴠𐴏𐴄𐴠𐴀𐴄𐴔𐴥𐴠𐴕𐴄 𐴘𐴦𐴝𐴕𐴡𐴌 𐴇𐴥𐴠𐴔𐴝𐴘𐴡𐴃 𐴒𐴡𐴌𐴝 𐴕𐴡𐴎𐴥𐴝𐴘𐴁𐴡 𐴁𐴡𐴓𐴞 𐴈𐴡𐴘𐴧𐴠 𐴱𐴱 𐴀𐴠𐴈𐴥𐴡𐴕 𐴔𐴠𐴘𐴢𐴢 𐴋𐴞𐴐𐴄𐴞𐴑𐴡𐴃 𐴔𐴡𐴒𐴢 𐴀𐴝𐴃𐴡𐴚𐴁𐴝𐴊𐴞 𐴀𐴝𐴌 𐴔𐴡𐴒𐴢 𐴁𐴝𐴒𐴞 𐴀𐴥𐴡𐴑𐴧𐴡𐴓𐴠 𐴌𐴢𐴢𐴇𐴝𐴙𐴚𐴒𐴙𐴝𐴌𐴠 𐴁𐴠𐴐𐴥𐴞 𐴎𐴢𐴢𐴓𐴢𐴢𐴔 𐴒𐴡𐴌𐴠𐴌 𐴱 𐴁𐴝𐴊𐴠𐴘𐴥𐴡 𐴌𐴢𐴢𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴠 𐴔𐴞𐴓𐴞𐴎𐴢𐴢𐴓𐴞 𐴐𐴥𐴝𐴕𐴃𐴞𐴌 𐴏𐴥𐴝𐴣𐴀𐴃𐴠 𐴃𐴥𐴝𐴑𐴡𐴕𐴡𐴌 𐴔𐴡𐴕𐴐𐴥𐴝 𐴊𐴠𐴈𐴝𐴌 𐴱 𐴀𐴥𐴠𐴃𐴡𐴓𐴧𐴝 𐴀𐴠𐴏𐴄𐴠𐴀𐴄𐴔𐴥𐴠𐴕𐴄 𐴘𐴥𐴝𐴕𐴡𐴌𐴠 𐴀𐴝𐴣𐴀𐴌𐴝 𐴈𐴡𐴕𐴥𐴡𐴊𐴞𐴕 𐴇𐴥𐴠𐴔𐴝𐴘𐴡𐴃 𐴒𐴡𐴌𐴞 𐴕𐴡𐴉𐴝𐴙𐴅𐴧𐴢𐴢𐴔 𐴱𐴱