𐴔𐴡𐴚𐴋𐴥𐴢𐴢𐴃 𐴌𐴢𐴢𐴇𐴝𐴙𐴚𐴒𐴙𐴝 𐴀𐴞𐴐𐴑𐴢𐴢𐴙𐴓𐴧𐴝 𐴉𐴢𐴢𐴖𐴝 𐴀𐴢𐴢𐴒𐴧𐴗𐴝𐴌𐴠 𐴔𐴡𐴒𐴠 𐴁𐴠𐴐𐴥𐴞 𐴔𐴝𐴙𐴌𐴉𐴞𐴄 𐴒𐴡𐴙𐴅𐴧𐴠 𐴱𐴱

𐴐𐴥𐴢𐴢𐴑𐴧𐴢𐴢𐴌 𐴁𐴝𐴌𐴠 𐴁𐴠𐴙𐴕𐴧𐴝 𐴰 𐴱 𐴁𐴝𐴎𐴠 𐴔𐴡𐴚𐴋𐴥𐴢𐴢𐴌 𐴄𐴡𐴀𐴕𐴡𐴃 𐴊𐴡𐴐𐴢𐴀𐴡𐴔 𐴑𐴠𐴓𐴝𐴙𐴧𐴏𐴝 𐴌𐴢𐴢𐴇𐴝𐴙𐴚𐴒𐴙𐴝 𐴉𐴢𐴢𐴖𐴝 𐴀𐴢𐴢𐴒𐴧𐴗𐴝𐴌𐴠 𐴔𐴡𐴒𐴢 𐴀𐴝𐴃𐴡𐴚𐴁𐴝𐴊𐴞 𐴀𐴥𐴡𐴑𐴧𐴡𐴓𐴠 𐴁𐴠𐴐𐴥𐴞 𐴔𐴝𐴌𐴝𐴊𐴤𐴡𐴌𐴝 𐴒𐴡𐴙𐴅𐴧𐴠 𐴱𐴱 𐴉𐴢𐴢𐴖𐴝 𐴀𐴥𐴞𐴁𐴝𐴌 𐴕𐴝𐴔 𐴀𐴥𐴡𐴙𐴓𐴊𐴠 / 𐴅𐴝𐴇𐴝𐴚𐴒𐴞𐴌 𐴁𐴝𐴉𐴢 𐴑𐴥𐴢𐴢𐴙𐴓𐴧𐴝 𐴔𐴞𐴛𐴝 𐴁𐴡𐴐𐴢 𐴶 𐴱 𐴁𐴡𐴏𐴡𐴌 𐴱 𐴔𐴡𐴚𐴋𐴥𐴢𐴢𐴌 𐴀𐴢𐴢𐴃𐴧𐴡𐴌𐴡𐴌 𐴀𐴦𐴢𐴢 𐴐𐴠𐴑𐴙𐴝 𐴉𐴝𐴌𐴝𐴌 𐴱𐴱 𐴀𐴥𐴞𐴃𐴠 𐴑𐴠𐴕𐴞𐴕 𐴄𐴠𐴕 𐴉𐴝𐴌𐴝𐴌 𐴖𐴡𐴌𐴡𐴌 𐴀𐴞𐴐𐴑𐴢𐴢𐴓𐴡𐴃 𐴉𐴡𐴕𐴧𐴝 𐴉𐴡𐴌𐴠 𐴀𐴝𐴌 𐴀𐴥𐴠 𐴉𐴝𐴌𐴝𐴃 𐴃𐴥𐴝𐴑𐴠 𐴱𐴱

𐴀𐴥𐴞𐴃𐴠 𐴄𐴙𐴢𐴢𐴐𐴥𐴞𐴕 𐴉𐴡𐴌𐴠𐴊𐴠 𐴀𐴥𐴠𐴃𐴧𐴢𐴢 𐴏𐴝𐴙𐴌𐴑𐴠𐴓 𐴓𐴡𐴘 𐴀𐴝𐴘𐴧𐴠𐴊𐴧𐴠 𐴀𐴥𐴠𐴍𐴠 𐴱 𐴔𐴡𐴒𐴢 𐴀𐴝𐴃𐴡𐴚𐴁𐴝𐴊𐴞 𐴈𐴡𐴊𐴢𐴢𐴕𐴠 𐴄𐴡𐴀𐴕𐴡𐴌 𐴔𐴝𐴎𐴠 𐴄𐴡𐴖𐴌𐴡𐴌 𐴑𐴙𐴝𐴚𐴡𐴌 𐴔𐴢𐴢𐴀𐴕𐴃𐴢𐴢 𐴊𐴤𐴡𐴌𐴞 𐴏𐴝𐴙𐴌𐴑𐴠𐴓𐴡𐴃𐴧𐴢𐴢 𐴓𐴝𐴔𐴝𐴘 𐴓𐴝𐴃𐴞 𐴱 𐴒𐴥𐴢𐴢𐴐𐴝 𐴔𐴝𐴌𐴞 𐴀𐴝𐴊𐴤𐴝 𐴉𐴡𐴌𐴝𐴙𐴕𐴧𐴝 𐴒𐴡𐴌𐴞 𐴉𐴥𐴠𐴓𐴝𐴘𐴧𐴠 𐴱𐴱 𐴔𐴝𐴌𐴠𐴊𐴧𐴠 𐴛𐴥𐴡𐴀𐴃 𐴄𐴥𐴡𐴖𐴌 𐴀𐴥𐴡𐴑𐴧𐴡𐴓 𐴀𐴝𐴌 𐴋𐴦𐴡𐴣𐴌 𐴔𐴡𐴒𐴢 𐴀𐴥𐴡𐴑𐴧𐴡𐴓 𐴉𐴢𐴢𐴌𐴝𐴘𐴧𐴝 𐴱𐴱 𐴏𐴢𐴢𐴑 𐴊𐴠𐴈𐴥𐴝 𐴒𐴡𐴁𐴝 𐴘𐴠 𐴈𐴦𐴡𐴊𐴧𐴠 𐴱 𐴈𐴡𐴕𐴞𐴑𐴙𐴝 𐴕𐴥𐴡 𐴌𐴢𐴢𐴇𐴝𐴙𐴚𐴒𐴙𐴝 𐴉𐴢𐴢𐴖𐴝 𐴖𐴥𐴝𐴌𐴠 𐴔𐴡𐴊𐴡𐴃 𐴒𐴡𐴙𐴓𐴧𐴡 𐴱 𐴕𐴥𐴡 𐴔𐴡𐴒𐴢 𐴀𐴝𐴃𐴡𐴚𐴁𐴝𐴊𐴞 𐴒𐴥𐴢𐴢𐴕𐴡𐴌𐴠 𐴌𐴢𐴢𐴑𐴞𐴓𐴥𐴡 𐴱𐴱

𐴀𐴢𐴢𐴒𐴧𐴗𐴝 𐴏𐴢𐴢𐴑 𐴊𐴠𐴈𐴥𐴝 𐴒𐴡𐴁𐴝𐴘𐴠 𐴈𐴡𐴘𐴧𐴠𐴊𐴠 𐴀𐴠𐴊𐴦𐴢𐴢𐴕 𐴔𐴝𐴕𐴢𐴢𐴙𐴐𐴢 𐴀𐴝𐴌 𐴄𐴥𐴡𐴖𐴌𐴡𐴌 𐴐𐴥𐴝𐴙𐴑𐴧𐴝𐴃 𐴀𐴝𐴌 𐴑𐴥𐴢𐴢𐴓𐴝 𐴎𐴝𐴒𐴝𐴃 𐴀𐴢𐴢𐴒𐴧𐴗𐴝 𐴒𐴢𐴢𐴌𐴝 𐴉𐴢𐴢𐴖𐴝𐴌𐴠 𐴔𐴝𐴌𐴠𐴊𐴧𐴠 𐴘𐴥𐴝𐴕𐴠 𐴁𐴢𐴢𐴎𐴝𐴊𐴧𐴠 𐴱 𐴁𐴝𐴕𐴝𐴘𐴧𐴝 𐴂𐴡𐴌𐴢𐴢𐴒𐴠𐴌𐴝𐴔𐴡𐴌 𐴀𐴝𐴕𐴋𐴝𐴌𐴠 𐴀𐴥𐴡𐴀𐴌 𐴱𐴱 𐴀𐴥𐴞𐴁𐴝𐴘𐴠 𐴀𐴝𐴌𐴥𐴡 𐴈𐴡𐴘𐴧𐴠𐴊𐴠 𐴱 𐴇𐴥𐴡𐴑𐴢𐴢𐴔𐴡𐴃𐴠 𐴇𐴥𐴝𐴔𐴞𐴐𐴝 𐴈𐴦𐴡𐴊𐴠 𐴱 𐴀𐴝𐴃𐴡𐴚𐴁𐴝𐴊𐴞 𐴀𐴥𐴡𐴑𐴧𐴡𐴓𐴡𐴌𐴠 𐴃𐴢𐴢𐴖𐴝𐴘 𐴊𐴤𐴡𐴌𐴞 𐴑𐴝𐴕𐴢𐴢𐴕 𐴔𐴡𐴎𐴞𐴕 𐴏𐴥𐴝𐴎𐴝 𐴊𐴞𐴘𐴝𐴉𐴡𐴌𐴞𐴁𐴡 𐴀𐴝𐴌 𐴀𐴠𐴑𐴐𐴥𐴠𐴕 𐴓𐴗𐴝𐴉𐴡𐴌𐴞𐴁𐴡 𐴱𐴱

𐴔𐴡𐴕𐴃𐴡𐴌 𐴀𐴥𐴠 𐴑𐴝𐴕𐴢𐴢𐴕 𐴘𐴥𐴝𐴕 𐴎𐴝𐴌𐴞 𐴕𐴡𐴒𐴡𐴌𐴠 𐴱𐴱 𐴀𐴝𐴃𐴡𐴚𐴁𐴝𐴊𐴞 𐴀𐴥𐴢𐴢𐴕𐴡𐴌𐴠 𐴏𐴥𐴝𐴎𐴝 𐴘𐴥𐴡 𐴕𐴡𐴊𐴠 𐴱𐴱 𐴃𐴦𐴡𐴘𐴓𐴠 𐴁𐴢𐴢𐴎𐴝 𐴎𐴝𐴊𐴧𐴠 𐴇𐴥𐴡𐴑𐴢𐴢𐴔𐴡𐴃𐴠 𐴖𐴡𐴌𐴠 𐴖𐴡𐴌𐴠 𐴑𐴝𐴕𐴢𐴢𐴕𐴡𐴌 𐴈𐴡𐴃𐴝 𐴈𐴦𐴡𐴘 𐴁𐴥𐴢𐴢𐴃𐴡𐴌𐴃𐴢𐴢 𐴌𐴢𐴢𐴇𐴝𐴙𐴚𐴒𐴙𐴝 𐴉𐴥𐴢𐴢𐴌𐴝𐴘 𐴉𐴥𐴠𐴓𐴝𐴘𐴁𐴡𐴓𐴧𐴝 𐴀𐴠𐴅𐴝𐴎𐴡𐴃 𐴊𐴞𐴌𐴝𐴙𐴑𐴧𐴙𐴠 𐴱𐴱