𐴌𐴢𐴢𐴇𐴝𐴙𐴚𐴒𐴙𐴝𐴌𐴠 𐴔𐴝𐴌𐴞𐴊𐴤𐴡𐴌𐴞 𐴔𐴡𐴒𐴠 𐴌𐴢𐴢𐴇𐴝𐴙𐴚𐴒𐴙𐴝𐴌 𐴊𐴤𐴝𐴕 𐴊𐴦𐴝𐴘 𐴓𐴡𐴘𐴎𐴝𐴌𐴒𐴡𐴘 𐴱𐴱

𐴒𐴡𐴃𐴡 𐴐𐴥𐴢𐴢𐴑𐴧𐴢𐴢𐴌 𐴁𐴝𐴌𐴠 𐴵 𐴱 / 𐴕𐴡𐴖𐴡𐴔𐴁𐴡𐴌 𐴹 𐴱 𐴰 𐴲 𐴁𐴠𐴙𐴕𐴧𐴝 𐴰 𐴲 𐴎𐴡𐴕 𐴔𐴡𐴒𐴢 𐴶 𐴖𐴝 𐴀𐴥𐴝𐴣𐴃𐴞𐴘𐴝𐴌 𐴀𐴝𐴌 𐴓𐴝𐴔𐴁𐴝 𐴊𐴡𐴀 𐴓𐴡𐴘 𐴐𐴥𐴝𐴀𐴉/ 𐴏𐴝𐴕 𐴐𐴗𐴠 𐴔𐴡𐴚𐴡𐴌 𐴀𐴝𐴕𐴋𐴝𐴌𐴠 𐴌𐴝𐴏𐴞𐴊𐴡𐴚 𐴀𐴠𐴓𐴝𐴑𐴝𐴌 𐴀𐴢𐴢𐴃𐴧𐴡𐴌 𐴏𐴥𐴝𐴘𐴍𐴠 ( 𐴏𐴞𐴕 𐴈𐴡𐴕 𐴄𐴝𐴙𐴕 ) 𐴌𐴢𐴢𐴇𐴝𐴙𐴚𐴒𐴙𐴝 𐴉𐴝𐴌𐴝𐴃 𐴒𐴥𐴡𐴓𐴞 𐴱𐴱 𐴀𐴥𐴝𐴣𐴃𐴞𐴘𐴡𐴌𐴡𐴌 𐴁𐴡𐴓𐴠 𐴔𐴝𐴕𐴢𐴢𐴙𐴝𐴢 𐴈𐴡𐴊𐴢𐴢𐴕 𐴊𐴡𐴓𐴝𐴒𐴡𐴌𐴞 𐴱𐴱 𐴃𐴝𐴌𐴝𐴌 𐴀𐴥𐴝𐴃𐴝 𐴌𐴢𐴢𐴇𐴝𐴙𐴚𐴒𐴙𐴝𐴌 𐴊𐴤𐴝𐴕 𐴊𐴝𐴀 𐴐𐴥𐴢𐴢𐴌𐴢𐴢 𐴒𐴡𐴙𐴅𐴧𐴠 𐴱𐴱

𐴏𐴝𐴘𐴉𐴢𐴢𐴓 𐴀𐴞𐴏𐴓𐴝𐴔 𐴁𐴝𐴉𐴢 𐴓𐴝𐴓𐴢𐴢 𐴲 𐴲 𐴁𐴡𐴏𐴡𐴌 / 𐴀𐴞𐴔𐴝𐴔𐴇𐴢𐴢𐴏𐴝𐴙𐴕 𐴁𐴝𐴉𐴢 𐴔𐴢𐴢𐴇𐴝𐴔𐴧𐴡𐴊 𐴏𐴡𐴓𐴝𐴔 𐴶 𐴲 𐴁𐴡𐴏𐴡𐴌 / 𐴀𐴝𐴁𐴊𐴢𐴢𐴐𐴧𐴢𐴢𐴑𐴢𐴢𐴌𐴡 𐴁𐴠𐴍𐴞 𐴕𐴢𐴢𐴌𐴁𐴠𐴒𐴡𐴔 𐴷 𐴳 𐴁𐴡𐴏𐴡𐴌 𐴱𐴱 𐴀𐴞𐴃𐴝𐴌𐴝𐴌𐴠 𐴔𐴡𐴒𐴡𐴌 𐴐𐴥𐴝𐴀𐴉𐴢 𐴏𐴝𐴕 𐴐𐴗𐴠 𐴔𐴡𐴚 𐴐𐴥𐴡𐴣𐴀 𐴀𐴝𐴌𐴥𐴡 𐴵 𐴎𐴡𐴕 𐴔𐴡𐴒𐴢 𐴀𐴥𐴝𐴣𐴃𐴞𐴘𐴝𐴌 𐴀𐴡𐴓𐴝 𐴀𐴦𐴝𐴘 𐴊𐴤𐴡𐴌𐴞 𐴱𐴱 𐴀𐴞𐴀𐴕 𐴏𐴦𐴡𐴌 𐴑𐴥𐴙𐴝 / 𐴀𐴞𐴑𐴧𐴙𐴝 𐴏𐴝𐴘𐴧𐴡𐴏𐴢 𐴑𐴙𐴝 𐴈𐴡𐴘 𐴀𐴥𐴡𐴊𐴡𐴌 𐴁𐴦𐴝𐴌𐴝 𐴔𐴝𐴙𐴅𐴧𐴙𐴠 𐴱𐴱 𐴕𐴢𐴢𐴌𐴁𐴠𐴒𐴡𐴔𐴡𐴌𐴠 𐴔𐴝𐴌𐴠𐴌𐴝𐴌 𐴀𐴥𐴞𐴁𐴝𐴌 𐴁𐴤𐴝𐴘 / 𐴇𐴝𐴏𐴡𐴕 𐴀𐴝𐴌 𐴎𐴞𐴘𐴠 𐴑𐴠𐴏𐴑𐴠𐴏𐴝𐴌𐴝𐴌 𐴀𐴥𐴞𐴃𐴝𐴌𐴝 𐴊𐴢𐴢𐴕𐴡𐴎𐴡𐴕𐴡𐴌𐴠 𐴘𐴥𐴡 𐴁𐴠𐴐𐴥𐴞 𐴉𐴞𐴄𐴧𐴙𐴠 𐴱𐴱

𐴀𐴝𐴌 𐴀𐴥𐴠 𐴒𐴢𐴢𐴕𐴋𐴝 𐴔𐴡𐴒𐴢 𐴀𐴥𐴢𐴢𐴀𐴕𐴠 𐴀𐴞𐴃𐴝𐴌𐴝𐴌𐴠 𐴎𐴝𐴕𐴠 𐴔𐴝𐴌𐴞𐴉𐴥𐴠𐴓𐴝𐴘𐴁𐴡 𐴁𐴡𐴓𐴞 𐴊𐴤𐴡𐴔𐴑𐴞 𐴊𐴞𐴘𐴠𐴊𐴠 𐴀𐴥𐴠𐴃𐴡𐴓𐴧𐴝 𐴒𐴤𐴡𐴌𐴒𐴢𐴢𐴐𐴧𐴞 𐴁𐴠𐴙𐴒𐴧𐴢𐴢𐴕 𐴉𐴝𐴌𐴝𐴃𐴧𐴢𐴢 𐴓𐴢𐴢𐴖𐴝𐴘 𐴒𐴞𐴘𐴡𐴘 𐴱𐴱 𐴀𐴥𐴠 𐴒𐴢𐴢𐴕𐴋𐴝 𐴔𐴡𐴒𐴢 𐴀𐴥𐴢𐴢𐴀𐴕 𐴃𐴝𐴌𐴉𐴡𐴊𐴧𐴞𐴕𐴥𐴡 𐴀𐴦𐴝𐴘𐴧𐴡𐴌𐴠 𐴀𐴝𐴌𐴥𐴡 𐴁𐴠𐴐𐴥𐴞 𐴒𐴡𐴌𐴞 𐴊𐴤𐴝𐴕 𐴊𐴝𐴀𐴘𐴧𐴡𐴌𐴠 𐴉𐴝𐴌𐴝𐴌 𐴋𐴥𐴝𐴑𐴡𐴌 𐴔𐴡𐴒𐴡𐴌𐴠 𐴀𐴥𐴡𐴣𐴀𐴏𐴧𐴝𐴒𐴡𐴌𐴞 𐴁𐴠𐴏𐴞𐴉𐴥𐴠𐴓𐴝𐴘𐴧𐴠 𐴱𐴱 𐴀𐴠 𐴏𐴞𐴕 𐴈𐴡𐴕 𐴄𐴝𐴙𐴕 𐴉𐴝𐴌𐴝𐴌 𐴌𐴢𐴢𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴇𐴥𐴝𐴔𐴞𐴐𐴝 𐴔𐴡𐴒𐴡𐴌 𐴎𐴢𐴢𐴓𐴢𐴢𐴔𐴡𐴃 𐴱 𐴉𐴝𐴌𐴝𐴌 𐴀𐴞𐴐𐴑𐴢𐴢𐴓 𐴒𐴞𐴕 𐴀𐴥𐴢𐴢𐴊𐴧𐴝 𐴔𐴡𐴒𐴠 𐴁𐴡𐴓𐴒𐴡𐴌𐴞 𐴁𐴡𐴕𐴒𐴡𐴌𐴞 𐴊𐴞𐴘𐴠 𐴱𐴱

𐴀𐴝𐴘 𐴏𐴞 𐴅𐴠 𐴌 𐴑𐴦𐴢𐴢𐴍𐴡𐴃 𐴰 𐴱 𐴋𐴞𐴏𐴡𐴔𐴁𐴡𐴌𐴡𐴃 𐴌𐴢𐴢𐴇𐴝𐴙𐴚𐴒𐴙𐴝𐴌 𐴔𐴡𐴀𐴊𐴧𐴞𐴔𐴝𐴌 𐴃𐴝𐴌𐴞𐴑 𐴱𐴱
𐴒𐴠𐴔𐴁𐴞𐴘𐴝 𐴘𐴠 𐴕𐴠 𐴊𐴝𐴌 𐴓𐴥𐴠𐴕𐴋𐴡𐴌 𐴇𐴥𐴠𐴒𐴢 𐴐𐴥𐴡𐴀𐴌𐴡𐴃 𐴀𐴝𐴏𐴠𐴊𐴠 𐴀𐴝𐴘 𐴏𐴞 𐴅𐴠 𐴌 𐴑𐴦𐴢𐴢𐴍𐴡𐴃 𐴌𐴢𐴢𐴇𐴝𐴙𐴚𐴒𐴙𐴝𐴌 𐴅𐴠𐴕𐴡𐴏𐴥𐴝𐴙𐴋𐴡𐴌 𐴁𐴝𐴁𐴡𐴃𐴠 𐴁𐴡𐴌𐴔𐴝𐴓𐴧𐴝 𐴑𐴥𐴢𐴢𐴙𐴓𐴧𐴠𐴊𐴠 𐴔𐴡𐴀𐴊𐴧𐴞𐴔𐴝 𐴊𐴤𐴡𐴌𐴞𐴁𐴡𐴓𐴧𐴝 𐴋𐴞𐴏𐴡𐴔𐴁𐴡𐴌𐴡𐴌 𐴰 𐴱 𐴃𐴝𐴌𐴞𐴑 𐴁𐴡𐴓𐴞 𐴑𐴦𐴢𐴢𐴍𐴠 𐴀𐴝𐴙𐴅𐴧𐴝 𐴀𐴠𐴓𐴝𐴕 𐴒𐴡𐴙𐴅𐴧𐴠 𐴱𐴱 𐴰 𐴱 𐴃𐴝𐴌𐴞𐴑𐴡𐴌 𐴊𐴞𐴕𐴡𐴃 𐴰 𐴱 𐴐𐴧𐴗𐴝 𐴁𐴝𐴎𐴡𐴃𐴧𐴢𐴢 𐴒𐴠𐴔𐴔𐴁𐴞𐴘𐴝𐴌 𐴊𐴡𐴌𐴈𐴝𐴏𐴢 𐴉𐴥𐴢𐴢𐴕𐴞𐴁𐴡 𐴱 𐴱 𐴃𐴝𐴌𐴞𐴑𐴡𐴌 𐴊𐴞𐴕𐴡𐴃 𐴊𐴡𐴐𐴧𐴗𐴝 𐴁𐴝𐴎𐴡𐴃𐴧𐴢𐴢 𐴁𐴡𐴌𐴔𐴝𐴌 𐴅𐴢𐴢𐴖𐴝𐴁 𐴉𐴥𐴢𐴢𐴕𐴞𐴁𐴡 𐴲 𐴱 𐴃𐴝𐴌𐴞𐴑𐴡𐴌 𐴊𐴞𐴕 𐴊𐴢𐴢𐴘𐴄𐴝𐴙𐴔 𐴒𐴡𐴌𐴞 𐴀𐴠𐴑𐴎𐴡𐴕𐴡𐴌 𐴒𐴞𐴕 𐴀𐴝𐴌𐴀𐴠𐴑 𐴎𐴡𐴕𐴡𐴌𐴠 𐴉𐴥𐴢𐴢𐴕𐴝𐴘𐴁𐴡

https://www.rfa.org/burmese/news/icj-hearing-dec10-11192019051317.html