𐴀𐴝𐴌𐴅𐴠𐴕𐴄𐴞𐴕𐴝𐴃 𐴑𐴥𐴢𐴢𐴙𐴓𐴧𐴠𐴊𐴠 𐴌𐴢𐴢𐴇𐴝𐴙𐴚𐴒𐴙𐴝𐴌 𐴁𐴠𐴌𐴢𐴢𐴃𐴤𐴞 𐴎𐴢𐴢𐴓𐴢𐴢𐴔𐴡𐴌 𐴔𐴡𐴀𐴊𐴧𐴞𐴔𐴝𐴃 𐴏𐴥𐴢𐴢𐴑𐴞 𐴀𐴝𐴌 𐴔𐴥𐴞𐴚𐴀𐴡𐴚𐴓𐴝𐴙𐴚𐴡𐴌 𐴕𐴝𐴔 𐴀𐴐𐴏𐴠

𐴀𐴥𐴠 𐴕𐴝𐴓𐴞𐴐𐴡𐴌 𐴊𐴝𐴁𐴞 𐴀𐴥𐴡𐴙𐴓𐴊𐴠 𐴔𐴠𐴓𐴠𐴄𐴠𐴌𐴞 𐴀𐴝𐴌 𐴖𐴡𐴌𐴡𐴌 𐴃𐴡𐴑𐴧𐴝𐴌 𐴏𐴞𐴘𐴝𐴏𐴞 𐴓𐴞𐴋𐴝𐴌 𐴐𐴥𐴡𐴣𐴀 𐴏𐴥𐴢𐴢𐴑𐴞 𐴀𐴝𐴌 𐴔𐴥𐴞𐴚𐴀𐴡𐴚𐴓𐴝𐴙𐴚 𐴁𐴠𐴙𐴒𐴧𐴢𐴢𐴕𐴠 𐴔𐴞𐴓𐴞 𐴈𐴡𐴔𐴐𐴥𐴡𐴙𐴚𐴒𐴙𐴝 𐴑𐴡𐴖𐴔 𐴌𐴢𐴢𐴇𐴝𐴙𐴚𐴒𐴙𐴝 𐴔𐴢𐴢𐴏𐴡𐴓𐴔𐴝𐴕𐴡𐴌𐴠 𐴱𐴱 𐴀𐴠 𐴊𐴠𐴐𐴡𐴃 𐴃𐴥𐴝𐴑𐴞 𐴕𐴡𐴉𐴝𐴌𐴞𐴁𐴞 𐴈𐴦𐴡𐴘 𐴊𐴤𐴡𐴔𐴑𐴞 𐴊𐴞𐴊𐴞 𐴊𐴠𐴐𐴡𐴃𐴧𐴢𐴢 𐴕𐴠𐴓𐴞𐴎𐴝𐴘𐴁𐴡𐴙𐴓𐴧𐴝 𐴋𐴦𐴡𐴙𐴓𐴧𐴝 𐴁𐴡𐴋𐴦𐴡𐴙𐴓𐴧𐴝 𐴎𐴢𐴢𐴓𐴢𐴢𐴔 𐴀𐴥𐴡𐴑𐴧𐴡𐴓 𐴒𐴡𐴙𐴅𐴧𐴠𐴊𐴠 𐴀𐴥𐴞𐴕𐴡𐴌 𐴀𐴞𐴕𐴏𐴝𐴉𐴢 𐴏𐴦𐴡𐴕 𐴱𐴱

𐴀𐴝𐴌𐴅𐴠𐴕𐴄𐴞𐴕𐴝𐴃 𐴒𐴡𐴃𐴡 𐴳 𐴱 / 𐴕𐴡𐴖𐴡𐴔𐴁𐴡𐴌 𐴹 𐴱 𐴰 𐴲 𐴁𐴢𐴢𐴙𐴃 𐴁𐴝𐴌𐴠 𐴌𐴢𐴢𐴇𐴝𐴙𐴚𐴒𐴙𐴝𐴌𐴠 𐴅𐴠𐴕𐴡𐴏𐴥𐴝𐴙𐴋 𐴒𐴡𐴙𐴅𐴧𐴠𐴊𐴠 𐴱𐴱 𐴘𐴥𐴝𐴕𐴡𐴓𐴧𐴝 𐴌𐴢𐴢𐴇𐴝𐴙𐴚𐴒𐴙𐴝 𐴀𐴝𐴌 𐴓𐴝𐴃𐴞𐴕𐴞 𐴀𐴝𐴔𐴠𐴌𐴞𐴑𐴝𐴌 𐴀𐴞𐴕𐴏𐴝𐴕𐴞 𐴇𐴥𐴡𐴑𐴧𐴡𐴌 𐴋𐴦𐴝𐴘 𐴔𐴞𐴓𐴞 𐴔𐴡𐴀𐴊𐴧𐴞𐴔𐴝 𐴑𐴥𐴢𐴢𐴙𐴓𐴧𐴠𐴊𐴠 𐴘𐴥𐴝𐴕𐴡𐴃 𐴱𐴱 𐴀𐴡𐴙𐴕𐴧𐴡 𐴀𐴝𐴐𐴝 𐴔𐴞 𐴀𐴥𐴡𐴑𐴧𐴡𐴓𐴡𐴌 𐴉𐴢𐴢𐴣𐴖𐴝𐴣𐴃𐴞 / 𐴔𐴥𐴞𐴚𐴀𐴡𐴚𐴓𐴝𐴙𐴚 𐴀𐴝𐴌 𐴊𐴢𐴢𐴕𐴞𐴘𐴝𐴘𐴧𐴠 𐴐𐴥𐴝𐴕𐴃𐴞𐴌 𐴕𐴡𐴁𐴠𐴓 𐴁𐴡𐴑𐴐𐴞𐴐𐴡𐴌 𐴇𐴥𐴝𐴣𐴌 𐴉𐴞𐴣𐴊𐴝𐴙𐴓𐴊𐴠 / 𐴀𐴡𐴚𐴏𐴝𐴕 𐴏𐴢𐴢𐴑𐴞𐴌 𐴕𐴝𐴔𐴥𐴡 𐴀𐴝𐴏𐴠 𐴱𐴱

𐴀𐴥𐴠 𐴔𐴡𐴀𐴊𐴧𐴞𐴔𐴝𐴌 𐴔𐴡𐴑𐴏𐴡𐴊 𐴀𐴥𐴡𐴙𐴓𐴊𐴠 𐴅𐴠𐴕𐴡𐴏𐴥𐴝𐴙𐴋 𐴒𐴡𐴌𐴦𐴡𐴙𐴕𐴧𐴝 𐴀𐴝𐴌 𐴃𐴝𐴌𐴝𐴌 𐴉𐴢𐴢𐴣𐴖𐴝𐴣𐴃𐴞 𐴔𐴞𐴓𐴝𐴘𐴧𐴝 𐴀𐴝𐴏𐴠𐴊𐴠 𐴀𐴥𐴢𐴢𐴕 𐴁𐴠𐴙𐴒𐴧𐴢𐴢𐴕𐴡𐴌𐴠 𐴐𐴥𐴝𐴎𐴝 𐴊𐴡𐴀𐴕 𐴀𐴝𐴌 𐴅𐴠𐴕𐴡𐴏𐴥𐴝𐴙𐴋𐴡𐴌 𐴇𐴥𐴝𐴑𐴞𐴑𐴡𐴃𐴡𐴌𐴠 𐴁𐴦𐴝𐴙𐴌 𐴒𐴡𐴌𐴡𐴕 𐴱𐴱 𐴀𐴡𐴙𐴕𐴧𐴡 𐴎𐴝𐴒𐴝𐴃𐴧𐴢𐴢 𐴔𐴡𐴀𐴊𐴧𐴞𐴔𐴝 𐴑𐴥𐴢𐴢𐴓𐴞𐴁𐴝𐴌 𐴐𐴥𐴢𐴢𐴎𐴢𐴢𐴑 𐴈𐴡𐴔𐴊𐴠𐴀 𐴀𐴥𐴠𐴃𐴡𐴓𐴧𐴝 𐴀𐴝𐴣𐴀𐴌𐴝 𐴀𐴠𐴕𐴃𐴢𐴢 𐴑𐴥𐴢𐴢𐴓𐴧𐴞𐴊𐴠 𐴁𐴡𐴓𐴞 𐴀𐴢𐴢𐴑𐴞𐴓 / 𐴄𐴡𐴔𐴝𐴏𐴢 𐴀𐴡𐴅𐴞 𐴘𐴠 𐴈𐴡𐴘𐴧𐴠 𐴱𐴱

𐴁𐴡𐴌𐴔𐴝 𐴇𐴥𐴡𐴑𐴢𐴢𐴔𐴡𐴃𐴠 𐴁𐴡𐴖𐴃 𐴎𐴢𐴢𐴒𐴢 𐴀𐴥𐴡𐴙𐴃𐴠 𐴑𐴢𐴢𐴐𐴞𐴐𐴢 𐴒𐴡𐴌𐴠𐴊𐴧𐴠 𐴱𐴱 𐴀𐴝𐴣𐴀𐴌𐴝𐴌𐴠 𐴕𐴞𐴎𐴡𐴌 𐴊𐴠𐴐𐴢 𐴀𐴝𐴌𐴑𐴝𐴕𐴡𐴃 𐴓𐴡𐴌𐴝 𐴏𐴡𐴌𐴝 𐴁𐴡𐴕𐴒𐴡𐴌𐴞 𐴀𐴠𐴑𐴎𐴝𐴒𐴝𐴃 𐴁𐴝𐴣𐴊𐴞𐴌𐴝𐴑𐴞 𐴱𐴱 𐴈𐴝𐴍𐴞 𐴔𐴝𐴌𐴞 𐴀𐴝𐴌 𐴎𐴠𐴃𐴡 𐴋𐴦𐴡𐴙𐴓𐴧𐴝 𐴎𐴢𐴢𐴓𐴢𐴢𐴔 𐴀𐴝𐴏𐴠 𐴁𐴠𐴙𐴒𐴧𐴞𐴕 𐴒𐴡𐴌𐴞 𐴀𐴝𐴌 𐴃𐴝𐴓𐴦𐴞𐴔 / 𐴊𐴝𐴁𐴝𐴘 𐴁𐴡𐴕𐴒𐴡𐴌𐴞 𐴊𐴤𐴡𐴔𐴑𐴞 𐴀𐴥𐴡𐴑𐴧𐴡𐴓 𐴊𐴞 𐴀𐴝𐴌𐴑𐴝𐴕𐴡𐴃𐴧𐴢𐴢 𐴀𐴝𐴣𐴀𐴌𐴝𐴌𐴠 𐴊𐴤𐴝𐴉𐴝𐴘𐴁𐴡𐴓𐴧𐴝 𐴁𐴡𐴓𐴞 𐴈𐴡𐴘𐴧𐴠 / 𐴁𐴡𐴌𐴡𐴑𐴡𐴌 𐴂𐴠𐴌𐴠𐴏𐴞𐴋𐴥𐴠𐴕𐴄 / 𐴀𐴥𐴢𐴢 𐴄𐴥𐴢𐴢𐴚 𐴑𐴞𐴚