𐴁𐴡𐴌𐴔𐴝𐴌 𐴔𐴠𐴓𐴠𐴄𐴠𐴌𐴞 𐴘𐴠 𐴕𐴞𐴎𐴌𐴠 𐴕𐴞𐴎𐴠 𐴓𐴢𐴢𐴏𐴧𐴝𐴕 𐴒𐴡𐴌𐴠𐴊𐴧𐴠

𐴀𐴝𐴌𐴑𐴝𐴕𐴡𐴃 𐴀𐴝𐴁𐴧𐴝𐴌𐴥𐴡 𐴕𐴡𐴏𐴥𐴡𐴓 𐴉𐴥𐴢𐴌𐴝 𐴑𐴝𐴌𐴖𐴝𐴘 𐴀𐴥𐴡𐴕𐴡𐴌 𐴈𐴥𐴡𐴃𐴡𐴌𐴝𐴌 𐴁𐴝𐴁𐴡𐴃𐴠 𐴑𐴡𐴖𐴔𐴞 𐴏𐴥𐴡𐴔𐴡𐴒𐴝𐴌 𐴀𐴠𐴓𐴝𐴕 𐴀𐴝𐴌 𐴁𐴡𐴌𐴔𐴝𐴃 𐴇𐴠𐴉𐴝𐴎𐴡𐴃𐴞 𐴄𐴥𐴞𐴑 𐴀𐴥𐴡𐴘 𐴀𐴝𐴘𐴧𐴡𐴕𐴡𐴌 𐴉𐴡𐴓𐴡𐴏𐴞 𐴈𐴥𐴝𐴔𐴝𐴈𐴥𐴝 𐴖𐴦𐴝𐴉𐴡𐴌𐴞𐴁𐴡𐴕𐴠𐴑𐴦𐴞 𐴈𐴦𐴡𐴘 𐴏𐴢𐴢𐴖𐴝𐴓 𐴃𐴢𐴢𐴓𐴞 𐴀𐴝𐴌𐴄𐴞𐴑𐴠𐴓 𐴓𐴠𐴙𐴑𐴧𐴠𐴊𐴠 𐴘𐴦𐴝𐴕𐴡𐴃 ” 𐴁𐴡𐴌𐴔𐴝𐴌 𐴔𐴠𐴓𐴠𐴄𐴠𐴌𐴞 𐴘𐴠 𐴕𐴞𐴎𐴡𐴌𐴠 𐴕𐴞𐴎𐴠 𐴓𐴢𐴢𐴏𐴧𐴝𐴕 𐴒𐴡𐴌𐴠𐴊𐴧𐴠 ” 𐴈𐴦𐴡𐴘 𐴇𐴥𐴠𐴋𐴓𐴝𐴙𐴕 𐴊𐴞𐴘𐴡𐴌𐴠 𐴱𐴱 𐴀𐴝𐴔𐴠𐴌𐴞𐴑𐴝𐴌 𐴁𐴡𐴘𐴊𐴠𐴐𐴢 𐴉𐴡𐴓𐴡𐴏𐴞𐴌 𐴁𐴝𐴁𐴡𐴃𐴠 𐴓𐴠𐴑𐴠𐴊𐴠 𐴔𐴠𐴒𐴎𐴞𐴕𐴡𐴕𐴡𐴃 𐴒𐴡𐴃𐴡 𐴈𐴝𐴙𐴓𐴧𐴝 𐴓𐴠𐴙𐴑𐴧𐴠 𐴱𐴱 𐴁𐴡𐴌𐴔𐴝𐴌 𐴔𐴠𐴓𐴠𐴄𐴠𐴌𐴞 𐴘𐴠 𐴊𐴠𐴐𐴢𐴏𐴥𐴡𐴉𐴝𐴘𐴌 𐴕𐴝𐴔𐴊𐴞𐴘𐴡𐴌𐴠 𐴕𐴡𐴏𐴥𐴡𐴓 𐴉𐴥𐴢𐴢𐴌𐴝 𐴑𐴝𐴌𐴖𐴝𐴘 𐴒𐴡𐴌𐴞 𐴇𐴥𐴝𐴣𐴃 𐴓𐴝𐴑𐴡𐴌 𐴖𐴡𐴌𐴠 𐴌𐴢𐴢𐴇𐴝𐴙𐴚𐴒𐴙𐴝𐴌𐴠 𐴁𐴝𐴚𐴓𐴝𐴊𐴠𐴐𐴡𐴃 𐴉𐴝𐴌 𐴒𐴡𐴌𐴝𐴘𐴊𐴞 𐴌𐴞𐴉𐴢𐴢𐴎𐴞 𐴁𐴝𐴕𐴝𐴘 𐴌𐴝𐴙𐴑𐴧𐴠𐴊𐴠 𐴱𐴱 𐴊𐴢𐴢𐴘 𐴁𐴡𐴏𐴡𐴌𐴡𐴌 𐴖𐴡𐴌𐴠 𐴀𐴥𐴡𐴘𐴧𐴠𐴊𐴠 𐴁𐴠𐴀𐴒𐴧𐴢𐴢𐴕𐴠 𐴎𐴝𐴕𐴠𐴊𐴠 𐴈𐴡𐴃𐴥𐴝 𐴱𐴱 𐴔𐴡𐴕𐴃𐴡𐴌 𐴌𐴞𐴉𐴢𐴢𐴎𐴞 𐴕𐴡𐴁𐴡𐴕𐴞 𐴀𐴝𐴌𐴑𐴝𐴕𐴡𐴃 𐴃𐴥𐴝𐴑𐴞 𐴒𐴞𐴘𐴡𐴘𐴊𐴠 𐴏𐴥𐴡𐴓𐴝𐴑 𐴉𐴡𐴙𐴅𐴧𐴡𐴕𐴃𐴡 𐴌𐴢𐴢𐴇𐴝𐴙𐴚𐴒𐴙𐴝 𐴱𐴱 𐴌𐴞𐴉𐴢𐴢𐴎𐴞 𐴀𐴥𐴡𐴘𐴧𐴠𐴊𐴠 𐴀𐴥𐴞𐴃𐴝𐴌𐴝𐴃𐴧𐴢𐴢𐴁𐴝𐴌𐴥𐴡 𐴁𐴠𐴐𐴥𐴞 𐴋𐴡𐴌𐴡𐴃 𐴀𐴏𐴠𐴊𐴠 𐴘𐴦𐴝𐴕 𐴈𐴡𐴔 𐴔𐴝𐴙𐴕𐴐𐴠 𐴎𐴝𐴕𐴠 𐴁𐴡𐴓𐴞 𐴓𐴠𐴙𐴑𐴧𐴠

𐴱𐴱 𐴑𐴡𐴖𐴔𐴞 𐴏𐴥𐴡𐴔𐴡𐴒𐴝 𐴏𐴠𐴃𐴡𐴔𐴁𐴡𐴌𐴡𐴌 𐴶 𐴱 𐴃𐴝𐴌𐴞𐴑𐴡𐴃 𐴕𐴠𐴓𐴝𐴘𐴧𐴠𐴊𐴠 𐴹 𐴱 𐴰 𐴲 𐴐𐴥𐴡𐴕𐴡𐴌 𐴀𐴡𐴉𐴞𐴐𐴞𐴘𐴠𐴓 𐴃𐴤𐴝𐴑𐴞𐴑𐴞 𐴌𐴠𐴂𐴢𐴢𐴄𐴡𐴃 𐴓𐴠𐴙𐴑𐴧𐴠𐴊𐴠 𐴱𐴱 𐴀𐴝𐴌𐴑𐴝𐴕𐴡𐴌 𐴁𐴥𐴢𐴢𐴃𐴡𐴌𐴠 𐴀𐴝𐴏𐴠𐴊𐴠 𐴌𐴢𐴢𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴀𐴝𐴁𐴧𐴝𐴌𐴥𐴡 𐴁𐴡𐴌𐴔𐴝𐴌 𐴔𐴠𐴓𐴠𐴄𐴠𐴌𐴞𐴌 𐴃𐴡𐴌𐴉𐴡𐴃𐴧𐴢𐴢 𐴕𐴡𐴏𐴥𐴡𐴓 𐴉𐴥𐴢𐴢𐴌𐴝 𐴑𐴝𐴌𐴖𐴝𐴙𐴌 𐴋𐴡𐴌𐴡𐴃 𐴀𐴝𐴏𐴠 𐴈𐴦𐴡𐴘 𐴌𐴠𐴂𐴢𐴢𐴄𐴡𐴃 𐴏𐴦𐴝𐴉𐴒𐴡𐴌𐴞 𐴓𐴠𐴙𐴑𐴧𐴠 𐴱𐴱 𐴌𐴢𐴢𐴇𐴝𐴙𐴚𐴒𐴙𐴝𐴌𐴠 𐴈𐴝𐴍𐴞 𐴔𐴝𐴌𐴞 𐴉𐴥𐴢𐴢𐴌𐴝𐴘 𐴉𐴥𐴠𐴓𐴝𐴊𐴧𐴠 𐴁𐴝𐴊𐴠𐴘𐴦𐴡 𐴊𐴠𐴐𐴥𐴙𐴃𐴧𐴝 𐴀𐴥𐴡𐴑𐴧𐴡𐴓𐴡𐴌𐴠 𐴁𐴡𐴓𐴝𐴎𐴢𐴢𐴌𐴞 𐴈𐴝𐴔𐴒𐴡𐴌𐴝𐴁𐴡𐴀𐴕 / 𐴎𐴢𐴢𐴓𐴢𐴢𐴔𐴒𐴡𐴌𐴦𐴡𐴕 / 𐴎𐴥𐴝𐴑 𐴎𐴥𐴝𐴑 𐴈𐴝𐴍𐴡𐴕 𐴔𐴝𐴌𐴡𐴕 / 𐴎𐴥𐴝𐴑𐴧𐴗𐴝 𐴁𐴡𐴓𐴡𐴃𐴑𐴝𐴌𐴞 𐴒𐴡𐴌𐴡𐴕 𐴱𐴱 𐴀𐴞𐴀𐴕 𐴁𐴠𐴙𐴒𐴧𐴞𐴕 𐴖𐴦𐴝𐴌 𐴑𐴠𐴌𐴝𐴙𐴔𐴡𐴌 𐴁𐴥𐴢𐴢𐴃𐴡𐴌𐴠 𐴁𐴡𐴓𐴞 𐴓𐴠𐴙𐴑𐴧𐴠𐴊𐴠 𐴘𐴥𐴝𐴕𐴡𐴌𐴠 𐴁𐴡𐴌𐴔𐴝𐴌 𐴔𐴠𐴓𐴠𐴄𐴠𐴌𐴞𐴘𐴠 𐴀𐴞𐴕𐴑𐴝𐴌 𐴒𐴡𐴙𐴓𐴧𐴠 𐴘𐴦𐴡 𐴱𐴱 𐴁𐴝𐴑𐴞 𐴀𐴝𐴏𐴠𐴊𐴠 𐴌𐴢𐴢𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴀𐴝𐴌𐴑𐴝𐴕𐴡𐴃 𐴁𐴠𐴐𐴥𐴞 𐴋𐴦𐴡𐴣𐴌 𐴋𐴦𐴡𐴣𐴌 𐴈𐴥𐴡𐴃𐴡𐴌𐴝𐴃 𐴀𐴝𐴏𐴠 𐴀𐴝𐴌 𐴊𐴞𐴕 𐴁𐴡𐴊𐴞𐴕 𐴃𐴝𐴌𐴝𐴌 𐴇𐴝𐴓𐴡𐴃 𐴈𐴥𐴡𐴌𐴝𐴉𐴢 𐴀𐴥𐴡𐴘 𐴀𐴝𐴘𐴧𐴠𐴌𐴊𐴠 𐴘𐴦𐴝𐴕 𐴊𐴠𐴐𐴢 𐴁𐴞𐴊𐴠𐴐𐴠 𐴎𐴝𐴕𐴠 𐴁𐴡𐴓𐴞 𐴔𐴠𐴒𐴠𐴎𐴞𐴕𐴡𐴃 𐴀𐴝𐴌𐴄𐴞𐴑𐴠𐴓 𐴓𐴠𐴑𐴦𐴡𐴘𐴧𐴝 𐴘𐴠 𐴈𐴡𐴘𐴧𐴠 𐴱𐴱

𐴌𐴢𐴢𐴇𐴝𐴙𐴚𐴒𐴙𐴝𐴌𐴠 𐴎𐴢𐴢𐴓𐴢𐴢𐴔𐴒𐴡𐴌𐴞𐴁𐴝𐴊𐴠 𐴁𐴡𐴌𐴔𐴝𐴌 𐴔𐴠𐴓𐴠𐴄𐴠𐴌𐴞 𐴘𐴠 𐴁𐴝𐴒𐴞 𐴏𐴥𐴝𐴉𐴒𐴡𐴌𐴞 𐴊𐴠𐴐𐴡𐴃 𐴐𐴥𐴝𐴕𐴃𐴞 𐴀𐴝𐴌 𐴇𐴠𐴉𐴝𐴎𐴡𐴃𐴞 𐴀𐴝𐴕𐴞𐴊𐴧𐴠 𐴁𐴡𐴓𐴞 𐴔𐴠𐴓𐴠𐴄𐴠𐴌𐴞 𐴘𐴠 𐴈𐴡𐴘𐴓𐴠 𐴘𐴦𐴡 𐴱𐴱 𐴊𐴠𐴐𐴡𐴙𐴃𐴧𐴝𐴌 𐴇𐴥𐴡𐴑 𐴔𐴝𐴍𐴞𐴒𐴡𐴌𐴞 𐴐𐴥𐴝𐴕𐴃𐴞 𐴀𐴝𐴕𐴞𐴁𐴝𐴌 𐴏𐴠𐴐𐴃𐴝 𐴒𐴡𐴌𐴡𐴕𐴡𐴃 𐴊𐴠𐴐𐴡𐴌 𐴐𐴥𐴝𐴕𐴃𐴞 𐴀𐴝𐴌𐴥𐴡 𐴁𐴠𐴀𐴐𐴢 𐴈𐴥𐴡𐴌𐴝𐴉𐴢 𐴀𐴥𐴡𐴘𐴎𐴝𐴌𐴒𐴡𐴘 𐴁𐴡𐴓𐴞 𐴓𐴠𐴙𐴑𐴧𐴠 𐴱𐴱 𐴊𐴠𐴐𐴡𐴙𐴃𐴧𐴝 𐴀𐴞𐴕𐴏𐴝𐴕𐴞𐴘𐴡𐴃𐴞 𐴇𐴥𐴡𐴑 𐴔𐴝𐴍𐴞 𐴒𐴡𐴌𐴡𐴕𐴡𐴌 𐴎𐴡𐴌𐴞𐴘𐴝 𐴂𐴝𐴁𐴡𐴕𐴊𐴞 𐴓𐴝𐴙𐴒𐴧𐴠𐴊𐴠 𐴀𐴥𐴠𐴃𐴡𐴓𐴧𐴝 𐴁𐴡𐴌𐴔𐴝𐴌 𐴁𐴡𐴖𐴃 𐴔𐴦𐴠𐴓 𐴈𐴝𐴌𐴈𐴝𐴕𐴝 𐴁𐴡𐴕 𐴀𐴥𐴡𐴘 𐴒𐴡𐴌𐴞𐴂𐴢 𐴀𐴥𐴡𐴘𐴧𐴠 𐴁𐴡𐴓𐴞 𐴓𐴠𐴙𐴑𐴧𐴠 𐴱𐴱 𐴈𐴡𐴔 𐴐𐴥𐴡𐴙𐴚𐴒𐴙𐴝 𐴊𐴠𐴐𐴡𐴙𐴃𐴧𐴝 𐴀𐴥𐴡𐴑𐴧𐴡𐴓𐴡𐴌𐴠 𐴎𐴝𐴃 / 𐴊𐴤𐴌𐴔𐴡 𐴉𐴡𐴌𐴡𐴑 𐴕𐴡𐴒𐴡𐴌𐴞 𐴔𐴞𐴓𐴞𐴎𐴢𐴢𐴓𐴞 𐴊𐴠𐴐𐴡𐴌 𐴏𐴞𐴘𐴝𐴏𐴡𐴃𐴡𐴃 𐴀𐴥𐴞𐴧𐴏𐴝 𐴓𐴡𐴘 𐴀𐴝𐴃𐴡𐴚𐴁𐴝𐴊𐴞𐴌𐴠 𐴈𐴥𐴡𐴃𐴡𐴔𐴒𐴡𐴌𐴞 𐴊𐴠𐴐𐴡𐴃 𐴐𐴥𐴝𐴕𐴃𐴞 𐴀𐴝𐴕𐴡𐴕 𐴁𐴠𐴐𐴥𐴞 𐴎𐴡𐴌𐴢𐴢𐴌𐴞 𐴁𐴡𐴓𐴞 𐴓𐴠𐴙𐴑𐴧𐴠 𐴱𐴱 𐴌𐴢𐴢𐴇𐴝𐴙𐴚𐴒𐴙𐴝 𐴌𐴠 𐴒𐴡𐴙𐴅𐴧𐴠𐴊𐴠 𐴎𐴢𐴢𐴓𐴢𐴢𐴔 𐴀𐴥𐴞𐴀𐴕 𐴀𐴞𐴕𐴏𐴝𐴕𐴞 𐴇𐴥𐴡𐴑 𐴓𐴡𐴘 𐴃𐴝𐴀𐴓𐴧𐴢𐴢𐴑 𐴌𐴝𐴑𐴠𐴊𐴠 𐴀𐴥𐴠𐴃𐴡𐴓𐴧𐴝 𐴁𐴡𐴕𐴒𐴡𐴌𐴞 𐴉𐴥𐴠𐴓𐴝 𐴉𐴡𐴌𐴞𐴁𐴡 𐴁𐴡𐴓𐴞 𐴀𐴝𐴌𐴄𐴞𐴑𐴠𐴓 𐴓𐴠𐴑𐴦𐴡𐴘𐴧𐴝 ( 𐴀𐴞𐴓𐴦𐴞𐴏𐴢 𐴑𐴝𐴌𐴓𐴏𐴡𐴕 𐴌𐴝𐴘𐴕𐴝𐴌 ) 𐴀𐴞𐴁𐴝𐴘𐴠 𐴓𐴠𐴙𐴑𐴧𐴠