𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴀𐴥𐴡𐴑𐴧𐴡𐴓 𐴂𐴝𐴁𐴡𐴕𐴊𐴞 𐴁𐴠𐴐𐴥𐴞𐴊𐴠 𐴀𐴥𐴠𐴃𐴡𐴓𐴧𐴝 𐴑𐴠𐴀𐴠𐴔𐴃𐴧𐴟 𐴕𐴠𐴓𐴞𐴃𐴠 𐴋𐴦𐴡𐴌𐴝

𐴑𐴠𐴀𐴠𐴔𐴡𐴌 𐴎𐴞𐴔𐴧𐴝𐴊𐴝𐴌 𐴀𐴥𐴡𐴑𐴧𐴡𐴓𐴡𐴌 𐴃𐴡𐴌𐴉𐴡𐴃𐴧𐴟 𐴎𐴠𐴃𐴡 𐴎𐴠𐴃𐴡 𐴂𐴝𐴁𐴡𐴕𐴊𐴞 𐴓𐴝𐴒𐴝 𐴁𐴝𐴌𐴥𐴠𐴊𐴧 𐴀𐴥𐴠𐴃𐴡𐴓𐴧𐴝 𐴱𐴱 𐴁𐴠𐴐𐴥𐴞 𐴌𐴞𐴉𐴟𐴎𐴞 𐴀𐴥𐴡𐴑𐴧𐴡𐴓 𐴑𐴠𐴀𐴠𐴔𐴡𐴃𐴧𐴟 𐴕𐴠𐴓𐴞𐴃𐴠 𐴋𐴦𐴡𐴌𐴝 𐴱𐴱 𐴀𐴥𐴠 𐴂𐴝𐴁𐴡𐴕𐴊𐴞 𐴀𐴥𐴡𐴑𐴧𐴡𐴓𐴡𐴌 𐴁𐴥𐴟𐴃𐴡𐴌𐴠 𐴱 𐴑𐴠 𐴀𐴠𐴱𐴔𐴡𐴌 𐴖𐴡𐴌𐴠 𐴕𐴡𐴎𐴡𐴌 𐴌𐴝𐴑𐴦𐴡𐴘𐴧𐴝𐴌 𐴉𐴦𐴝 𐴔𐴡𐴎𐴞𐴕 𐴱 𐴔𐴟𐴁𐴦𐴝𐴙𐴓 𐴉𐴥𐴟𐴕𐴡𐴌 𐴀𐴠𐴏𐴃𐴠𐴔𐴝𐴓 𐴱 𐴑𐴠𐴣𐴍𐴝 𐴏𐴞𐴘𐴡𐴓𐴡𐴌 𐴒𐴥𐴞𐴌𐴝 𐴱 𐴁𐴥𐴝𐴐𐴡𐴕 𐴏𐴡𐴌𐴡𐴃 𐴕𐴞𐴎𐴡𐴕𐴡𐴌 𐴂𐴡𐴌𐴟𐴒𐴠𐴌𐴝𐴔 𐴱 𐴄𐴝𐴙𐴔𐴡𐴌 𐴀𐴝𐴒𐴠 𐴁𐴡𐴌𐴔𐴝𐴃 𐴖𐴝𐴉𐴠𐴏𐴢 𐴊𐴞𐴉𐴠𐴍𐴦𐴡𐴕 𐴱 𐴊𐴝𐴁𐴝𐴘 𐴀𐴡𐴐𐴥𐴟𐴃𐴡𐴌 𐴈𐴡𐴔𐴞 𐴱 𐴐𐴥𐴡𐴣𐴍𐴡 𐴔𐴡𐴣𐴍𐴡 𐴎𐴞𐴘𐴝𐴕𐴡𐴃 𐴛𐴥𐴝𐴕𐴡𐴃 𐴒𐴦𐴝𐴌 𐴖𐴡𐴌𐴠 𐴁𐴠𐴀𐴞𐴎𐴧𐴡𐴃𐴞 𐴱 𐴓𐴡𐴌𐴝𐴏𐴡𐴌𐴝𐴌 𐴂𐴝𐴁𐴡𐴕𐴊𐴞 𐴱 𐴐𐴟𐴁𐴝𐴌 𐴖𐴡𐴌𐴠 𐴐𐴥𐴝𐴣𐴎𐴝 𐴊𐴞𐴘𐴝 𐴱 𐴁𐴠𐴙𐴒𐴧𐴞𐴕𐴡𐴃𐴧𐴟𐴁𐴝𐴌𐴡 𐴋𐴦𐴡𐴣𐴌 𐴀𐴥𐴡𐴙𐴓𐴊𐴠 𐴔𐴟𐴁𐴦𐴝𐴙𐴓𐴡𐴌 𐴂𐴝𐴁𐴡𐴕𐴊𐴞 𐴱𐴱

𐴐𐴥𐴟𐴌𐴟𐴃 𐴳 𐴅𐴞 𐴀𐴝𐴌 𐴴 𐴅𐴞 𐴀𐴞𐴕𐴄𐴝𐴌𐴕𐴥𐴠𐴄 𐴀𐴠𐴑𐴧𐴟𐴁𐴝𐴌𐴠 𐴁𐴡𐴕𐴒𐴡𐴌𐴞 𐴊𐴞𐴘𐴠 𐴱𐴱 𐴋𐴦𐴝𐴌𐴞𐴑 𐴑𐴦𐴡𐴓 𐴀𐴠𐴑𐴔𐴞𐴕𐴠𐴄 𐴌𐴝𐴙𐴑𐴧𐴙𐴠 𐴱𐴱 𐴘𐴦𐴝𐴌𐴁𐴝𐴊𐴠 𐴀𐴠𐴓𐴝𐴕 𐴒𐴡𐴌𐴞𐴊𐴞𐴓𐴡𐴊𐴠 𐴑𐴦𐴞 𐴌𐴞𐴉𐴟𐴎𐴞 𐴀𐴥𐴡𐴑𐴧𐴡𐴓 𐴃𐴟𐴣𐴖𐴝𐴣𐴌𐴝 𐴕𐴦𐴡 𐴁𐴝𐴚𐴓𐴝𐴊𐴠𐴐𐴥𐴞 𐴏𐴦𐴞𐴔 𐴀𐴠𐴏𐴃𐴠𐴔𐴝𐴓 𐴒𐴡𐴌𐴞𐴉𐴝𐴌𐴞𐴁𐴝 𐴕𐴦𐴡 𐴁𐴡𐴌𐴔𐴝𐴏𐴦𐴞𐴔 𐴀𐴠𐴏𐴃𐴠𐴔𐴝𐴓 𐴒𐴡𐴌𐴞𐴉𐴝𐴌𐴞𐴁𐴥𐴝 𐴱𐴱 𐴘𐴦𐴝𐴌 𐴖𐴡𐴌𐴠 𐴁𐴝𐴚𐴓𐴝𐴊𐴠𐴐𐴥𐴞 𐴀𐴥𐴡𐴑𐴧𐴡𐴓𐴡𐴌𐴠 𐴔𐴝𐴕𐴥𐴝𐴒𐴡𐴌𐴞𐴊𐴞𐴓𐴡𐴊𐴠 𐴱𐴱 𐴊𐴠𐴐𐴥𐴡𐴙𐴃𐴧𐴝 𐴀𐴥𐴡𐴑𐴧𐴡𐴓 𐴃𐴟𐴣𐴖𐴝𐴣𐴌𐴝 𐴌𐴞𐴉𐴟𐴎𐴞 𐴀𐴥𐴡𐴑𐴧𐴡𐴓𐴡𐴌𐴠 𐴏𐴦𐴞𐴔𐴑𐴦𐴝𐴌𐴋 𐴁𐴠𐴏𐴞𐴘𐴥𐴡 𐴕𐴡𐴉𐴝𐴌𐴥𐴞𐴁𐴝 𐴱𐴱 𐴀𐴥𐴠𐴁𐴝𐴁𐴡𐴃𐴠 𐴈𐴡𐴕𐴥𐴡 𐴔𐴡𐴊𐴡𐴃𐴥𐴡 𐴒𐴡𐴌𐴞 𐴕𐴡𐴉𐴝𐴌𐴥𐴞𐴁𐴝 𐴱𐴱 𐴐𐴥𐴠𐴐𐴢 𐴑𐴝𐴍𐴝𐴓𐴠 𐴔𐴟𐴁𐴦𐴝𐴙𐴓 𐴊𐴤𐴡𐴌𐴝 𐴎𐴠𐴈𐴡𐴕 𐴐𐴥𐴟𐴌𐴟 𐴀𐴥𐴡𐴙𐴓 𐴱 𐴃𐴦𐴡𐴘 𐴌𐴞𐴉𐴟𐴎𐴞 𐴀𐴥𐴡𐴑𐴧𐴡𐴓 𐴑𐴠𐴙𐴧𐴏𐴟𐴘𐴠 𐴔𐴟𐴁𐴦𐴝𐴙𐴓 𐴓𐴟𐴖𐴝𐴘𐴉𐴥𐴠𐴓𐴝𐴘𐴧𐴠 𐴀𐴝𐴌 𐴑𐴠𐴙𐴧𐴏𐴟𐴘𐴠 𐴔𐴟𐴁𐴦𐴝𐴙𐴓 𐴁𐴥𐴝𐴚𐴞 𐴉𐴥𐴠𐴓𐴝𐴘𐴧𐴠 𐴱𐴱 𐴐𐴥𐴠𐴐𐴢 𐴑𐴝𐴌 𐴸 𐴱 𐴀𐴡𐴑𐴄𐴟𐴁𐴡𐴌𐴡𐴃 𐴑𐴠𐴀𐴠𐴔𐴡𐴌 𐴎𐴞𐴔𐴧𐴝𐴊𐴝𐴌 (𐴏𐴞 𐴀𐴝𐴘 𐴏𐴞 ) 𐴘𐴠 𐴑𐴠 𐴀𐴠𐴔𐴡𐴌 𐴇𐴥𐴠𐴋𐴔𐴝𐴎𐴞 𐴀𐴥𐴡𐴑𐴧𐴡𐴓𐴡 𐴌𐴠 𐴀𐴡𐴍𐴝𐴌 𐴊𐴞𐴓𐴡𐴊𐴠 𐴃𐴟𐴣𐴖𐴝𐴣𐴌𐴝 𐴔𐴝𐴙𐴕𐴐𐴥𐴡𐴌𐴠 𐴏𐴦𐴞𐴔𐴑𐴦𐴕𐴕𐴝𐴌𐴋 𐴎𐴞𐴔𐴧𐴝𐴊𐴝𐴌𐴡𐴌 𐴀𐴡𐴉𐴞𐴏𐴡𐴃 𐴒𐴡𐴏𐴥𐴝𐴘𐴊𐴞𐴃𐴡 𐴈𐴦𐴡𐴀 𐴱𐴱 𐴕𐴦𐴡𐴘𐴓𐴠 𐴃𐴟𐴣𐴖𐴝𐴣𐴌𐴝𐴌𐴠 𐴐𐴥𐴝𐴎𐴝 𐴊𐴞𐴘𐴝 𐴎𐴝𐴘𐴁𐴡

𐴒𐴡𐴃𐴡 𐴈𐴝𐴓𐴞𐴘𐴝 𐴓𐴡𐴃𐴞 𐴉𐴟𐴓𐴞𐴐𐴠 𐴀𐴥𐴡𐴑𐴧𐴡𐴓 𐴌𐴞𐴉𐴟𐴎𐴞𐴌 𐴒𐴤𐴡𐴌𐴡𐴃 𐴒𐴥𐴡𐴓𐴞 𐴒𐴤𐴡𐴌𐴡𐴌 𐴑𐴟𐴕𐴠𐴈𐴝𐴕𐴠 𐴀𐴝𐴌 𐴔𐴝𐴙𐴕𐴐𐴡𐴌𐴒𐴦𐴝 𐴀𐴝𐴒𐴝 𐴒𐴟𐴌𐴝 𐴔𐴟𐴁𐴦𐴝𐴙𐴓 𐴃𐴟𐴖𐴝 𐴐𐴥𐴌𐴟𐴒𐴡𐴙𐴅𐴧𐴠 𐴱𐴱 𐴏𐴟𐴑 𐴊𐴠𐴈𐴝 𐴒𐴡𐴁𐴝 𐴔𐴡𐴎𐴞𐴕 𐴁𐴠𐴍𐴞𐴘𐴥𐴝𐴙𐴕𐴊𐴡𐴌𐴠 𐴁𐴠𐴍𐴞 𐴉𐴟𐴓𐴞𐴐𐴠 𐴒𐴦𐴝 𐴒𐴟𐴣𐴍𐴝 𐴏𐴠𐴑 𐴒𐴡𐴌𐴠𐴌 𐴁𐴡𐴓𐴞 𐴓𐴝𐴔𐴁𐴝 𐴆𐴥𐴞𐴘𐴝 𐴱 – 𐴲 𐴓𐴡𐴔𐴁𐴡𐴌 𐴑𐴠 𐴀𐴠𐴔𐴡𐴃𐴧𐴟 𐴈𐴡𐴘𐴧𐴠 𐴱𐴱 𐴁𐴠𐴐𐴥𐴞 𐴏𐴦𐴞𐴔𐴑𐴦𐴝𐴌𐴋 𐴀𐴝𐴌 𐴒𐴟𐴌𐴝 𐴔𐴟𐴁𐴦𐴝𐴙𐴓 𐴋𐴦𐴡𐴣𐴌 𐴔𐴟𐴁𐴦𐴝𐴙𐴓 𐴎𐴡𐴁𐴊𐴥𐴡 𐴒𐴡𐴌𐴞 𐴉𐴥𐴠𐴓𐴝𐴘𐴧𐴠 𐴱𐴱 𐴀𐴝𐴌 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴀𐴠𐴑𐴧𐴝𐴕 𐴑𐴡𐴔𐴂𐴙𐴟𐴄𐴝𐴌 𐴄𐴠𐴕𐴧𐴞𐴚 𐴏𐴠𐴕𐴄𐴝𐴌𐴡𐴃𐴧𐴟 𐴈𐴡𐴊𐴦𐴟𐴕 𐴑𐴡𐴔𐴂𐴙𐴟𐴄𐴝𐴌𐴥𐴡 𐴓𐴡𐴘𐴒𐴞𐴘𐴥𐴡𐴘 𐴉𐴥𐴟𐴣𐴖𐴝𐴣𐴃𐴞 𐴔𐴝𐴕𐴟𐴙𐴐𐴥𐴡 𐴶 𐴎𐴡𐴕 𐴁𐴡𐴕𐴒𐴡𐴌𐴞 𐴓𐴡𐴘𐴒𐴞𐴘𐴥𐴡𐴘𐴁𐴡𐴓𐴞 𐴎𐴝𐴕𐴝 𐴒𐴞𐴘𐴠