𐴁𐴡𐴌𐴔𐴝 𐴘𐴠 𐴁𐴝𐴕𐴝𐴀𐴡𐴄𐴞 𐴁𐴡𐴘𐴝𐴕𐴊𐴞 𐴊𐴢𐴢𐴕𐴞𐴘𐴝𐴘𐴌𐴠 𐴊𐴤𐴢𐴢𐴑𐴝 𐴊𐴠𐴌

𐴁𐴡𐴌𐴔𐴝 𐴇𐴥𐴡𐴑𐴢𐴢𐴔𐴡𐴃 𐴀𐴝𐴌 𐴔𐴠𐴓𐴠𐴄𐴠𐴌𐴞 𐴔𐴞𐴓𐴞 𐴕𐴡𐴏𐴥𐴡𐴓 𐴉𐴥𐴢𐴢𐴌𐴝 𐴑𐴝𐴌𐴖𐴝𐴘 𐴒𐴡𐴌𐴞 𐴁𐴝𐴚𐴓𐴝𐴊𐴠𐴐𐴡𐴃 𐴉𐴝𐴌𐴒𐴝𐴌𐴥𐴝𐴘 𐴊𐴞𐴘𐴠𐴊𐴠 𐴱𐴱 𐴁𐴡𐴌𐴔𐴝𐴌 𐴊𐴠𐴐𐴥𐴡𐴙𐴃𐴧𐴝 𐴈𐴡𐴔𐴐𐴥𐴡𐴙𐴚𐴒𐴙𐴝 𐴌𐴢𐴢𐴇𐴝𐴙𐴚𐴒𐴙𐴝 𐴑𐴡𐴖𐴔𐴡𐴌𐴠 𐴇𐴥𐴠𐴉𐴝𐴎𐴡𐴃 𐴀𐴝𐴌 𐴀𐴞𐴎𐴧𐴡𐴃𐴡𐴌 𐴏𐴥𐴝𐴣𐴀𐴃𐴠 𐴱𐴱 𐴌𐴢𐴢𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴠 𐴁𐴞𐴐𐴧𐴝𐴐𐴢𐴒𐴡𐴌𐴞 𐴉𐴝𐴌𐴠𐴊𐴠 𐴀𐴥𐴠𐴕𐴋𐴞𐴓𐴧𐴝 𐴒𐴡𐴌𐴞 𐴖𐴝𐴉𐴠𐴏𐴢 𐴕𐴞𐴁𐴝𐴌 𐴎𐴞𐴔𐴧𐴝𐴊𐴝𐴌𐴞𐴃𐴧𐴢𐴢 𐴁𐴝𐴏𐴞𐴁𐴡𐴓𐴧𐴝 𐴱𐴱 𐴏𐴝𐴁𐴢𐴢𐴃𐴏𐴥𐴝𐴌𐴝 / 𐴁𐴝𐴕𐴝𐴀𐴡𐴄𐴞 / 𐴀𐴝𐴏𐴡𐴓 𐴏𐴥𐴝𐴌𐴝 𐴀𐴥𐴡𐴄𐴊𐴤𐴌𐴔𐴞 𐴒𐴡𐴌𐴞 𐴁𐴝𐴚𐴓𐴝𐴊𐴠𐴐𐴡𐴌 𐴖𐴡𐴌𐴞 𐴀𐴠𐴓𐴎𐴝𐴔 𐴓𐴝𐴒𐴝𐴘 𐴀𐴝𐴌 𐴇𐴥𐴝𐴑𐴞𐴑𐴡𐴃 𐴏𐴥𐴝𐴌𐴝 𐴔𐴝𐴓𐴢𐴢𐴔𐴝𐴀𐴃 𐴀𐴥𐴡𐴑𐴧𐴡𐴓 𐴓𐴡𐴘 𐴊𐴢𐴢𐴕𐴞𐴘𐴝𐴘𐴌𐴠 𐴁𐴠𐴑𐴢𐴢𐴉𐴢 𐴁𐴝𐴕𐴝𐴘𐴁𐴡𐴓𐴧𐴝 𐴀𐴝𐴌 𐴊𐴤𐴢𐴢𐴑𐴝 𐴊𐴞𐴁𐴡𐴓𐴧𐴝 𐴑𐴢𐴢𐴐𐴥𐴞𐴐𐴢 𐴒𐴡𐴌𐴠𐴊𐴧𐴠 𐴘𐴦𐴝𐴕𐴡𐴃 𐴱𐴱 𐴁𐴝𐴚𐴓𐴝𐴊𐴠𐴐𐴠 𐴁𐴠𐴐𐴞 𐴊𐴡𐴌𐴡𐴒𐴡𐴌𐴞 𐴀𐴞𐴕𐴑𐴝𐴌 𐴒𐴡𐴙𐴅𐴧𐴠 𐴱𐴱

𐴁𐴡𐴌𐴔𐴝𐴃𐴧𐴢𐴢 𐴈𐴥𐴝𐴔𐴝𐴈𐴥𐴝 𐴈𐴥𐴝𐴄𐴞 𐴒𐴡𐴌𐴞 𐴀𐴝𐴌 𐴇𐴥𐴝𐴑𐴞𐴑𐴡𐴃𐴡𐴌𐴠 𐴔𐴦𐴢𐴢𐴕𐴃𐴢𐴢 𐴀𐴝𐴕𐴞 𐴈𐴝𐴔 𐴒𐴡𐴌𐴦𐴡𐴕 𐴏𐴝𐴀 𐴱𐴱 𐴎𐴦𐴞𐴕 𐴊𐴠𐴑𐴥𐴞𐴓𐴠 𐴌𐴢𐴢𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴕𐴞𐴎𐴡𐴌 𐴑𐴥𐴢𐴢𐴐𐴞𐴘𐴠 𐴖𐴝𐴉𐴠𐴏𐴢 𐴀𐴝𐴘𐴁𐴡𐴓𐴧𐴝 𐴌𐴝𐴎𐴞 𐴀𐴥𐴡 𐴱𐴱 𐴁𐴝𐴚𐴓𐴝𐴊𐴠𐴐𐴢 𐴁𐴡𐴘𐴊𐴠𐴐𐴢 𐴔𐴝𐴀𐴝𐴔𐴠𐴓𐴝𐴌 𐴀𐴡𐴉𐴞𐴏𐴡𐴃𐴧𐴢𐴢 𐴈𐴡𐴘𐴧𐴠 𐴱𐴱 𐴀𐴝𐴌 𐴁𐴡𐴌𐴔𐴝𐴌 𐴏𐴝𐴙𐴓 𐴀𐴦𐴞𐴕 𐴁𐴡𐴌𐴔𐴝𐴌 𐴀𐴥𐴡𐴄𐴋𐴡𐴌𐴔𐴞 𐴑𐴢𐴢𐴐𐴥𐴞𐴐𐴢 𐴎𐴞𐴀𐴕 𐴓𐴡𐴘 𐴁𐴡𐴌𐴔𐴝𐴘𐴠 𐴊𐴢𐴢𐴕𐴞𐴘𐴝𐴘𐴌𐴠 𐴁𐴠𐴑𐴢𐴢𐴉𐴢 𐴁𐴝𐴕𐴝𐴊𐴧𐴠 𐴀𐴥𐴞𐴕𐴡𐴌 𐴏𐴥𐴝𐴉𐴢 𐴏𐴥𐴝𐴉𐴢 𐴒𐴡𐴁𐴥𐴝 𐴁𐴡𐴓𐴞 𐴘𐴥𐴡 𐴈𐴡𐴘𐴧𐴠 𐴱𐴱

𐴊𐴢𐴢𐴕𐴞𐴘𐴝𐴘𐴌 𐴔𐴡𐴊𐴡𐴊 𐴉𐴝𐴘𐴁𐴡𐴓𐴧𐴝 𐴁𐴡𐴌𐴔𐴝𐴌 𐴔𐴡𐴌𐴑𐴡𐴎𐴞 𐴀𐴢𐴢𐴎𐴞𐴌 / 𐴀𐴦𐴢𐴢 𐴑𐴙𐴡 𐴄𐴞𐴕𐴡𐴌 𐴀𐴝𐴌 𐴀𐴠𐴑𐴧𐴝𐴕 𐴔𐴞𐴏𐴥𐴝 𐴑𐴢𐴢𐴐𐴞𐴐𐴢 𐴱𐴱 𐴀𐴥𐴠 𐴀𐴢𐴢𐴎𐴞𐴌𐴠 𐴀𐴝𐴎𐴡𐴌𐴁𐴝𐴘𐴅𐴝𐴕𐴡𐴌 𐴁𐴝𐴑𐴢𐴢 𐴐𐴥𐴡𐴀𐴌𐴡𐴃 𐴳 𐴲 𐴀𐴡𐴑𐴄𐴢𐴢𐴁𐴡𐴌𐴡𐴃 𐴀𐴥𐴡𐴙𐴓𐴊𐴠 𐴀𐴢𐴢𐴎𐴞𐴌𐴞 𐴃𐴡𐴘𐴧𐴝𐴌𐴞 𐴔𐴞𐴄𐴞𐴚𐴡𐴃 / 𐴁𐴝𐴚𐴓𐴝𐴊𐴠𐴐𐴡𐴌 𐴁𐴡𐴘𐴊𐴠𐴐𐴢 𐴀𐴢𐴢𐴎𐴞𐴌𐴠 𐴱𐴱 𐴌𐴢𐴢𐴇𐴝𐴙𐴚𐴒𐴙𐴝𐴌 𐴐𐴥𐴡𐴚𐴑𐴡𐴄𐴡𐴌 𐴁𐴝𐴁𐴡𐴃𐴠 𐴐𐴥𐴢𐴢𐴕𐴊𐴡𐴌 𐴒𐴡𐴌𐴞 𐴌𐴞𐴔𐴝𐴌𐴑 𐴒𐴡𐴙𐴅𐴧𐴠𐴊𐴠 𐴀𐴥𐴞𐴀𐴕𐴡𐴌𐴠 𐴁𐴝𐴃𐴠𐴓 𐴒𐴡𐴌𐴞𐴁𐴡𐴓𐴧𐴝 𐴱𐴱 𐴌𐴢𐴢𐴇𐴝𐴙𐴚𐴒𐴙𐴝𐴌 𐴉𐴢𐴢𐴌𐴝 𐴔𐴝𐴀𐴝𐴔𐴠𐴓𐴝𐴌𐴠 𐴀𐴥𐴞𐴃𐴝𐴌 𐴊𐴤𐴢𐴢𐴑𐴝𐴁𐴝𐴎𐴞𐴓𐴧𐴡 𐴔𐴞𐴘𐴝𐴘 𐴁𐴝𐴚𐴓𐴝𐴊𐴠𐴐𐴡𐴌 𐴖𐴡𐴌𐴠 𐴔𐴞𐴏𐴥𐴝 𐴀𐴥𐴝𐴣𐴏𐴝 𐴀𐴠𐴓𐴎𐴝𐴔 𐴀𐴥𐴡𐴑𐴧𐴡𐴓 𐴊𐴞𐴘𐴠 𐴱𐴱 𐴁𐴡𐴌𐴔𐴝𐴌 𐴀𐴢𐴢𐴎𐴞𐴌 / 𐴑𐴙𐴡 𐴄𐴥𐴞𐴕𐴠 𐴀𐴥𐴠 𐴀𐴠𐴓𐴎𐴝𐴔 𐴀𐴥𐴡𐴑𐴧𐴡𐴓𐴡𐴌 𐴁𐴥𐴢𐴢𐴃𐴡𐴌𐴠 𐴘𐴥𐴝𐴕𐴡 𐴈𐴡𐴘𐴧𐴠𐴊𐴠 𐴱𐴱 𐴌𐴢𐴢𐴇𐴝𐴙𐴚𐴒𐴙𐴝𐴌 𐴔𐴝𐴀𐴝𐴔𐴠𐴓𐴝 𐴀𐴠𐴑𐴧𐴝𐴕 𐴊𐴤𐴌𐴔𐴞𐴘𐴡 𐴀𐴡𐴐𐴥𐴝𐴕𐴃𐴞𐴌 𐴔𐴝𐴀𐴝𐴔𐴠𐴓𐴝 𐴱𐴱 𐴘𐴦𐴝𐴕𐴡𐴌𐴠 𐴁𐴝𐴚𐴓𐴝𐴊𐴠𐴐𐴠 𐴀𐴢𐴢𐴒𐴧𐴗𐴝 𐴈𐴡𐴔𐴐𐴥𐴡𐴙𐴚𐴒𐴙𐴝 𐴑𐴡𐴖𐴔𐴡𐴌𐴠 𐴕𐴡𐴏𐴥𐴡𐴓 𐴉𐴥𐴢𐴢𐴌𐴝 𐴑𐴝𐴌𐴖𐴝𐴘𐴌 𐴀𐴥𐴞𐴑𐴧𐴙𐴝 𐴕𐴞𐴎𐴝𐴘 (𐴅𐴡𐴕𐴢𐴢𐴏𐴦𐴝𐴙𐴋 ) 𐴈𐴡𐴘 𐴊𐴢𐴢𐴕𐴞𐴘𐴝𐴘𐴌𐴠 𐴊𐴠𐴈𐴥𐴝𐴘𐴧𐴠 𐴱𐴱

𐴇𐴥𐴝𐴑𐴞𐴑𐴡𐴃𐴡𐴃 𐴊𐴢𐴢𐴕𐴞𐴘𐴝𐴘𐴌 𐴔𐴦𐴢𐴢𐴕𐴃𐴢𐴢 𐴁𐴠𐴐𐴥𐴞 𐴏𐴝𐴁𐴢𐴢𐴃 𐴀𐴥𐴡𐴑𐴧𐴡𐴓 𐴀𐴝𐴏𐴠 𐴎𐴞𐴀𐴕𐴠 𐴁𐴢𐴢𐴎𐴝𐴘 𐴊𐴠𐴌 𐴱𐴱 𐴀𐴢𐴢𐴒𐴧𐴗𐴝 𐴀𐴝𐴌𐴑𐴝𐴕𐴡𐴌 𐴕𐴡𐴏𐴥𐴡𐴓𐴞 𐴑𐴡𐴖𐴔𐴡𐴌𐴠 𐴎𐴢𐴢𐴓𐴢𐴢𐴔 𐴒𐴡𐴌𐴞 𐴕𐴞𐴎𐴡𐴌 𐴊𐴠𐴐𐴡𐴃𐴧𐴢𐴢 𐴕𐴠𐴓𐴝𐴘 𐴊𐴞𐴘𐴠 𐴱𐴱 𐴷 𐴱 𐴰 𐴲 𐴐𐴥𐴡𐴕𐴡𐴃 𐴌𐴢𐴢𐴇𐴝𐴙𐴚𐴒𐴙𐴝𐴌𐴠 𐴒𐴡𐴙𐴅𐴧𐴠𐴊𐴠 𐴎𐴢𐴢𐴓𐴢𐴢𐴔 𐴀𐴥𐴞𐴕𐴡𐴌 𐴔𐴢𐴢𐴑𐴝𐴁𐴠𐴓𐴝𐴃 𐴀𐴝𐴒𐴡𐴌 𐴒𐴦𐴞𐴕 𐴑𐴠𐴙𐴧𐴏𐴢𐴢𐴕𐴡𐴀 𐴱𐴱
Report of Dhaka Tribune