𐴁𐴥𐴢𐴢𐴏𐴞𐴊𐴡𐴚𐴡𐴃 𐴔𐴠𐴓𐴠𐴄𐴠𐴌𐴞𐴘𐴠 𐴌𐴢𐴢𐴇𐴝𐴙𐴚𐴒𐴙𐴝𐴌 𐴀𐴢𐴢𐴓𐴋𐴝 𐴈𐴥𐴡𐴌𐴝𐴉𐴢 𐴔𐴝𐴙𐴕𐴐𐴡𐴌 𐴏𐴦𐴝𐴣𐴃 𐴊𐴠𐴌

𐴀𐴝𐴌𐴑𐴝𐴕𐴡𐴃 / 𐴁𐴥𐴢𐴢𐴏𐴞𐴊𐴡𐴚 𐴄𐴦𐴡𐴕𐴡𐴌 𐴀𐴢𐴢𐴃𐴡𐴌𐴠 – 𐴉𐴡𐴏𐴞𐴔𐴠 𐴃𐴝𐴙𐴔𐴧𐴡𐴚 𐴈𐴥𐴝𐴓𐴞𐴃 𐴁𐴢𐴢𐴖𐴝𐴒𐴡𐴌𐴝𐴘𐴧𐴠𐴃𐴠 𐴲 𐴵 𐴳 𐴓𐴡𐴔𐴁𐴡𐴌 𐴁𐴠𐴄𐴝𐴓𐴞𐴘𐴠𐴕𐴡𐴌 𐴊𐴢𐴢𐴘𐴀𐴡𐴔 𐴑𐴡𐴔𐴝𐴕𐴋𐴝𐴌𐴠 𐴱𐴱 𐴀𐴥𐴠 𐴎𐴝𐴒𐴝𐴌 𐴈𐴥𐴡𐴌𐴝𐴉𐴢 𐴔𐴝𐴙𐴕𐴐𐴡𐴌𐴠 𐴉𐴥𐴢𐴢𐴣𐴖𐴝𐴣𐴃𐴞 𐴔𐴞𐴓𐴝𐴘 𐴌𐴢𐴢𐴇𐴝𐴙𐴚𐴒𐴙𐴝𐴃𐴧𐴢𐴢 𐴁𐴡𐴓𐴝𐴎𐴢𐴢𐴌𐴞 𐴄𐴞𐴛𐴝 𐴓𐴡𐴘𐴁𐴡𐴓𐴧𐴝 𐴱𐴱 𐴌𐴢𐴢𐴇𐴝𐴙𐴚𐴒𐴙𐴝𐴌 𐴒𐴡𐴌𐴢𐴢 𐴀𐴝𐴕𐴞 𐴔𐴠𐴓𐴠𐴄𐴠𐴌𐴞𐴌 𐴒𐴥𐴝𐴣𐴄𐴞𐴌 𐴒𐴥𐴞𐴌𐴝 𐴁𐴢𐴢𐴃𐴡𐴌 𐴁𐴝𐴣𐴊𐴞 𐴌𐴝𐴙𐴑𐴧𐴠 𐴱𐴱 𐴎𐴝𐴌 𐴒𐴡𐴌𐴢𐴢 𐴃𐴠 𐴏𐴥𐴢𐴢𐴌𐴝𐴘𐴃𐴡 𐴕𐴡 𐴀𐴝𐴘𐴓𐴠 𐴔𐴠𐴓𐴠𐴄𐴠𐴌𐴞𐴘𐴠 𐴁𐴠𐴏𐴞 𐴉𐴥𐴠𐴓𐴝 𐴱𐴱

𐴀𐴥𐴠 𐴒𐴥𐴝𐴣𐴄𐴞𐴌 𐴀𐴝𐴃𐴠 𐴈𐴝𐴣𐴏𐴠 𐴒𐴢𐴢𐴌𐴥𐴢𐴂𐴧𐴗𐴝𐴙𐴕𐴊𐴠 𐴏𐴡𐴌𐴝𐴊𐴧𐴠 / 𐴀𐴝𐴁𐴊𐴢𐴢𐴐𐴥𐴢𐴢𐴑𐴧𐴢𐴢𐴌 /𐴁𐴝𐴉𐴢 / 𐴀𐴞𐴓𐴞𐴘𐴝𐴏𐴡𐴌 𐴒𐴡𐴌𐴢𐴢 𐴈𐴡𐴊𐴦𐴢𐴢𐴕 𐴔𐴠𐴓𐴠𐴄𐴠𐴌𐴞𐴌 𐴂𐴞𐴄𐴧𐴢𐴢 𐴃𐴝𐴁𐴧𐴠/ 𐴏𐴝𐴘𐴉𐴢𐴢𐴓𐴧𐴝𐴇𐴢 / 𐴁𐴝𐴉𐴢 / 𐴊𐴞𐴓 𐴔𐴢𐴢𐴇𐴝𐴔𐴧𐴡𐴊𐴠 𐴱𐴱 𐴒𐴢𐴢𐴌𐴥𐴢𐴢𐴂𐴧𐴗𐴝𐴃𐴧𐴢𐴢 𐴈𐴝𐴌𐴞 𐴓𐴡𐴘 𐴊𐴢𐴢𐴘𐴀𐴡𐴔 𐴑𐴡𐴔𐴝𐴕𐴋𐴝𐴌𐴡𐴌 𐴀𐴥𐴝𐴃𐴡𐴃 𐴀𐴝𐴕𐴞 𐴒𐴡𐴏𐴥𐴝𐴘 𐴊𐴞𐴘𐴠 𐴱𐴱 𐴃𐴝𐴌 𐴉𐴡𐴌𐴡𐴌 𐴊𐴞𐴕 𐴒𐴡𐴌𐴢𐴢𐴌 𐴒𐴞𐴌𐴥𐴡𐴏𐴠 𐴲 𐴵 𐴳 𐴀𐴡𐴔 𐴒𐴥𐴝𐴣𐴄𐴞𐴌 𐴁𐴥𐴢𐴢𐴃𐴡𐴌𐴠 𐴒𐴡𐴌𐴢𐴢 𐴁𐴝𐴣𐴊𐴝 𐴊𐴠𐴑𐴞 𐴊𐴢𐴢𐴘𐴀𐴡𐴔 𐴑𐴡𐴔𐴝𐴕𐴋𐴝𐴌𐴡𐴌𐴠 𐴐𐴥𐴠𐴑𐴝𐴘𐴡𐴃 𐴒𐴡𐴙𐴅𐴧𐴠 𐴘𐴝𐴌 𐴱𐴱 𐴑𐴡𐴔𐴝𐴕𐴋𐴝𐴌𐴠 𐴒𐴡𐴌𐴢𐴢𐴌 𐴒𐴞𐴌𐴡𐴏𐴥𐴡𐴌𐴠 𐴁𐴠𐴐𐴥𐴞 𐴁𐴢𐴢𐴌𐴝 𐴁𐴤𐴝𐴓𐴝 𐴈𐴦𐴡𐴘 𐴊𐴇𐴡𐴔𐴑𐴞 𐴊𐴞𐴘𐴠 𐴱𐴱 𐴐𐴥𐴠𐴐𐴢 𐴑𐴝𐴓𐴠 𐴳 𐴓𐴥𐴝𐴑 𐴄𐴞𐴛𐴝 𐴊𐴞𐴘𐴡𐴌𐴠 𐴒𐴡𐴌𐴢𐴢 𐴏𐴥𐴢𐴢𐴌𐴝𐴘 𐴓𐴡𐴘𐴎𐴝 𐴉𐴡𐴙𐴅𐴧𐴠 𐴱𐴱 𐴀𐴠𐴕𐴋𐴞𐴓𐴧𐴝 𐴔𐴠𐴓𐴠𐴄𐴠𐴌𐴞 𐴀𐴥𐴡𐴑𐴧𐴡𐴓𐴠 𐴏𐴝𐴘𐴉𐴢𐴢𐴓𐴧𐴝𐴇𐴢𐴌 𐴋𐴡𐴙𐴓𐴧𐴝 𐴀𐴝𐴌𐴥𐴡 𐴁𐴡𐴖𐴃 𐴂𐴞𐴄𐴧𐴢𐴢 𐴀𐴥𐴡𐴑𐴧𐴡𐴓 𐴒𐴝𐴙𐴌 𐴑𐴝𐴕𐴢𐴢𐴕𐴞 𐴄𐴞𐴛𐴝 𐴈𐴝𐴔𐴝𐴘𐴁𐴡𐴓𐴧𐴝 𐴉𐴝𐴓𐴦𐴠𐴌 𐴱𐴱

𐴔𐴠𐴓𐴠𐴄𐴠𐴌𐴞 𐴘𐴠 𐴀𐴥𐴝𐴣𐴃𐴞𐴘𐴝𐴌 𐴔𐴝𐴌𐴞 𐴔𐴝𐴌𐴞 𐴉𐴝𐴌𐴝𐴃 𐴒𐴥𐴡𐴓𐴡𐴕𐴡𐴌 𐴎𐴡𐴌𐴞𐴘𐴝 𐴊𐴢𐴢𐴘𐴎𐴡𐴕 𐴔𐴝𐴘𐴧𐴝 𐴒𐴥𐴝𐴙𐴓 𐴱𐴱
𐴁𐴥𐴢𐴢𐴏𐴞𐴊𐴡𐴚 𐴀𐴠𐴓𐴝𐴑𐴝𐴌 𐴏𐴞𐴣𐴊𐴡𐴚 𐴉𐴝𐴌𐴝𐴃 𐴸 𐴲 / 𐴃𐴝𐴌𐴞𐴑𐴡𐴌 𐴊𐴞𐴕 𐴁𐴠𐴙𐴕𐴧𐴝 𐴔𐴠𐴓𐴠𐴄𐴠𐴌𐴞𐴘𐴠 𐴈𐴡𐴕𐴥𐴡 𐴓𐴝𐴌𐴥𐴝𐴘 𐴏𐴥𐴝𐴌𐴝 𐴒𐴢𐴢𐴓𐴞 𐴔𐴝𐴌𐴞 𐴔𐴝𐴌𐴞 𐴉𐴝𐴌𐴝𐴃 𐴒𐴥𐴡𐴓𐴡𐴕𐴠 𐴱𐴱 𐴰 𐴰 𐴲 / 𐴉𐴡𐴙𐴅𐴧𐴡𐴕𐴃𐴡 𐴉𐴝𐴙𐴅𐴧𐴝 𐴔𐴝𐴕𐴢𐴢𐴙𐴐𐴢 𐴁𐴢𐴢𐴎𐴞 𐴕𐴡𐴉𐴝𐴌𐴞 𐴋𐴦𐴡𐴌𐴠 𐴉𐴝𐴌𐴝𐴃𐴧𐴢𐴢 𐴊𐴥𐴝𐴘 𐴓𐴢𐴢𐴖𐴝𐴘 𐴒𐴞𐴘𐴡𐴘 𐴱𐴱 𐴀𐴥𐴠 𐴒𐴢𐴢𐴓𐴞𐴌 𐴎𐴡𐴌𐴞𐴘𐴝 𐴔𐴦𐴝𐴣 𐴎𐴥𐴞 𐴊𐴢𐴢𐴘𐴎𐴡𐴕 / 𐴋𐴡 𐴆𐴝 𐴏𐴞𐴚 𐴵 𐴴 𐴁𐴡𐴏𐴡𐴌 / 𐴋𐴦𐴡 𐴀𐴥𐴠 𐴆𐴙𐴡 𐴑𐴞𐴚 𐴰 𐴷 𐴁𐴡𐴏𐴡𐴌 𐴒𐴥𐴝𐴙𐴓 𐴀𐴥𐴡𐴘𐴧𐴠 𐴱𐴱 𐴔𐴠𐴓𐴠𐴄𐴠𐴌𐴞 𐴀𐴥𐴡𐴑𐴧𐴡𐴓 𐴉𐴝𐴌𐴝𐴃 𐴃𐴥𐴝𐴑𐴞 𐴎𐴡𐴕𐴠 𐴱 𐴊𐴥𐴝𐴘 𐴕𐴦𐴡𐴉𐴝𐴌𐴠𐴊𐴠 𐴉𐴝𐴙𐴅𐴧𐴝 𐴔𐴝𐴕𐴢𐴢𐴙𐴐𐴢 𐴒𐴤𐴡𐴌𐴡𐴌 𐴁𐴥𐴢𐴢𐴃𐴡𐴌𐴠 𐴁𐴡𐴕 𐴈𐴥𐴝𐴘 𐴃𐴥𐴝𐴑𐴞 𐴒𐴞𐴘𐴡𐴘 𐴱𐴱 𐴉𐴝𐴌𐴝𐴌 𐴁𐴥𐴢𐴢𐴃𐴡𐴌 𐴁𐴡𐴕𐴈𐴥𐴝𐴘 𐴌𐴡𐴘𐴧𐴠𐴊𐴠 𐴀𐴦𐴢𐴢𐴕𐴡𐴌 𐴁𐴥𐴢𐴢𐴃𐴡𐴌𐴠 𐴒𐴥𐴝𐴙𐴓 𐴀𐴥𐴡𐴘𐴧𐴠𐴊𐴠 𐴁𐴠𐴍𐴞 𐴊𐴢𐴢𐴕𐴥𐴡𐴎𐴡𐴕 𐴀𐴝𐴌 𐴀𐴢𐴢𐴒𐴧𐴗 𐴁𐴦𐴞𐴓𐴞 𐴁𐴠𐴍𐴞 𐴀𐴝𐴏𐴠 𐴱𐴱 𐴀𐴦𐴞𐴕𐴡𐴌𐴠 𐴅𐴡𐴓𐴊𐴞 𐴕𐴠𐴓𐴝𐴘 𐴊𐴝𐴁𐴝𐴘 𐴒𐴡𐴙𐴃𐴧𐴡 𐴕𐴞𐴁𐴡𐴓𐴧𐴝 𐴁𐴥𐴢𐴢𐴏𐴞𐴊𐴡𐴚𐴡𐴌 / 𐴀𐴠𐴔 𐴂𐴞 / 𐴀𐴦𐴢𐴢 𐴏𐴥𐴡𐴚 𐴐𐴗𐴠 𐴘𐴠 𐴑𐴢𐴢𐴐𐴥𐴞𐴐𐴢 𐴒𐴡𐴌𐴠𐴌 𐴁𐴡𐴓𐴞 𐴈𐴡𐴘𐴧𐴠 𐴱𐴱