𐴌𐴢𐴢𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴠 𐴉𐴞𐴏𐴡𐴃𐴧𐴢𐴢 𐴀𐴡𐴙𐴕𐴧𐴡 𐴏𐴦𐴞𐴔𐴡𐴌 𐴌𐴝𐴏𐴧𐴐 𐴑𐴥𐴢𐴢𐴙𐴓𐴧𐴠

𐴁𐴝𐴚𐴓𐴝𐴊𐴠𐴐𐴢 𐴇𐴥𐴡𐴑𐴢𐴢𐴔𐴡𐴃𐴠 𐴑𐴠𐴀𐴠𐴔𐴡𐴃 𐴕𐴠𐴄𐴖𐴝𐴌𐴑 𐴈𐴡𐴔𐴝𐴘 𐴉𐴥𐴠𐴓𐴝𐴘 𐴁𐴝𐴊𐴠 𐴱𐴱 𐴌𐴢𐴢𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴠 𐴀𐴠𐴏𐴃𐴠𐴔𐴝𐴓 𐴒𐴡𐴌𐴠𐴊𐴧𐴠 𐴁𐴡𐴌𐴔𐴝𐴌 𐴏𐴦𐴞𐴔 𐴑𐴦𐴝𐴌𐴋 𐴱𐴱 𐴀𐴥𐴞𐴀𐴕 𐴁𐴠𐴐𐴥𐴞 𐴀𐴝𐴏𐴥𐴝𐴕𐴞𐴌 𐴏𐴝𐴣𐴀𐴃𐴠 𐴑𐴠𐴀𐴠𐴔𐴡𐴌 𐴁𐴥𐴢𐴢𐴃𐴡𐴌 𐴒𐴢𐴢𐴌𐴝 𐴒𐴝𐴌𐴝 𐴊𐴢𐴢𐴖𐴝𐴕𐴡𐴃 𐴀𐴥𐴢𐴢𐴊𐴧𐴝 𐴉𐴝𐴎𐴝𐴀 𐴱𐴱 𐴀𐴢𐴢𐴑𐴞𐴘𐴝 𐴀𐴥𐴡𐴘𐴃𐴠 𐴄𐴠𐴑𐴕𐴝𐴉𐴢 𐴓𐴦𐴡𐴃 𐴱 𐴀𐴠𐴍𐴠 𐴔𐴝𐴎𐴠 𐴃𐴥𐴝𐴑𐴠𐴊𐴠 𐴌𐴢𐴢𐴇𐴝𐴙𐴚𐴒𐴙𐴝 𐴌𐴞𐴉𐴢𐴢𐴎𐴞 𐴀𐴥𐴡𐴑𐴧𐴡𐴓𐴠 𐴱𐴱 𐴃𐴝𐴌𐴝𐴌 𐴉𐴡𐴙𐴃𐴧𐴡 𐴊𐴞𐴕𐴧𐴝 𐴎𐴡𐴌𐴢𐴢𐴌𐴡𐴃 𐴉𐴢𐴢𐴌𐴝 𐴒𐴡𐴌𐴞𐴁𐴡𐴓𐴧𐴝 𐴁𐴝𐴚𐴓𐴝𐴊𐴠𐴐𐴥𐴞 𐴏𐴦𐴞𐴔𐴡𐴌 𐴕𐴦𐴠𐴄𐴖𐴝𐴌𐴑 𐴱𐴱 𐴉𐴥𐴠𐴓𐴝𐴘 𐴊𐴡𐴕𐴡𐴌 𐴁𐴝𐴊𐴠 𐴁𐴡𐴌𐴔𐴝𐴌 (𐴀𐴠𐴔 𐴂𐴞 𐴄𐴞 ) 𐴏𐴦𐴞𐴔 𐴀𐴠𐴏𐴃𐴠𐴔𐴝𐴓 𐴒𐴡𐴌𐴠𐴌 𐴱𐴱 𐴁𐴡𐴌𐴔𐴝𐴌 (𐴀𐴠𐴔 𐴂𐴞 𐴄𐴞 ) 𐴏𐴦𐴞𐴔 𐴑𐴦𐴝𐴌𐴋 𐴉𐴡𐴙𐴃𐴧𐴡𐴊𐴞𐴕 𐴒𐴝𐴙𐴌 𐴑𐴝𐴕𐴢𐴢𐴕𐴞 𐴃𐴡𐴌𐴠 𐴁𐴝𐴚𐴓𐴝𐴊𐴠𐴐𐴥𐴡𐴃 𐴁𐴠𐴐𐴥𐴞𐴒𐴡𐴌𐴞 𐴒𐴡𐴓𐴠𐴌 𐴱𐴱

𐴁𐴝𐴚𐴓𐴝𐴊𐴠𐴐𐴢 𐴇𐴥𐴡𐴑𐴢𐴢𐴔𐴡𐴃𐴠 𐴑𐴠𐴀𐴠𐴔𐴡𐴃 𐴳 𐴅𐴞 𐴴 𐴅𐴞 𐴕𐴦𐴠𐴄𐴖𐴝𐴌𐴑 𐴁𐴡𐴕𐴒𐴡𐴌𐴞 𐴊𐴡𐴕𐴡𐴌 𐴁𐴝𐴊𐴠 𐴱𐴱 𐴌𐴢𐴢𐴇𐴝𐴙𐴚𐴒𐴙𐴝 𐴌𐴞𐴉𐴢𐴢𐴎𐴞𐴌 𐴑𐴠𐴀𐴠𐴔𐴡𐴃 𐴀𐴝𐴌 𐴑𐴠𐴀𐴠𐴔𐴡𐴌 𐴀𐴝𐴃𐴠 𐴈𐴝𐴣𐴏𐴠 ( 𐴀𐴠𐴔 𐴂𐴞 𐴄𐴞 ) 𐴁𐴡𐴌𐴔𐴝 𐴏𐴦𐴞𐴔𐴡𐴌 𐴕𐴦𐴠𐴄𐴖𐴝𐴌𐴑 𐴁𐴠𐴐𐴥𐴞 𐴁𐴤𐴝𐴓𐴝𐴁𐴝𐴉𐴠 𐴉𐴝 𐴎𐴝𐴌 𐴱𐴱 𐴀𐴥𐴠 𐴁𐴡𐴌𐴔𐴝 𐴏𐴦𐴞𐴔𐴡𐴃 𐴉𐴥𐴠𐴌𐴞 𐴔𐴞𐴓𐴡𐴄 𐴀𐴝𐴌 𐴉𐴥𐴠𐴌𐴞 𐴀𐴞𐴕𐴄𐴝𐴌𐴕𐴥𐴠𐴄 𐴀𐴝𐴏𐴠𐴊𐴠 𐴀𐴥𐴠𐴃𐴡𐴓𐴧𐴝 𐴌𐴞𐴉𐴢𐴢𐴎𐴞 𐴀𐴥𐴡𐴑𐴧𐴡𐴓𐴠 𐴁𐴠𐴐𐴥𐴞 𐴀𐴠𐴏𐴃𐴠𐴔𐴝𐴓 𐴒𐴡𐴌𐴠 𐴱𐴱 𐴀𐴢𐴢𐴑𐴞𐴘𐴝 / 𐴁𐴝𐴓𐴢𐴢𐴈𐴝𐴓𐴞 𐴑𐴠𐴀𐴠𐴔𐴡𐴌 𐴓𐴝𐴓𐴢𐴢 𐴔𐴝𐴎𐴞𐴘𐴠 𐴋𐴤𐴝𐴑𐴝 𐴄𐴠𐴌𐴞𐴁𐴙𐴢𐴢𐴕𐴡𐴌𐴠 𐴈𐴡𐴘𐴧𐴠𐴊𐴠 𐴁𐴡𐴌𐴔𐴝𐴌 𐴏𐴦𐴞𐴔 𐴁𐴠𐴐𐴥𐴞 𐴀𐴝𐴏𐴝𐴕𐴞𐴌 𐴏𐴥𐴝𐴣𐴀𐴃𐴠 𐴑𐴠𐴀𐴠𐴔𐴡𐴌 𐴁𐴥𐴢𐴢𐴃𐴡𐴌𐴠 𐴎𐴞𐴛𐴡𐴃 𐴀𐴞𐴛𐴡𐴃 𐴉𐴝𐴎𐴝𐴀 𐴱𐴱 𐴀𐴢𐴢𐴑𐴞𐴘𐴝 𐴐𐴡𐴉𐴞𐴀𐴢𐴢𐴓𐴧𐴝 𐴈𐴝𐴍𐴝𐴌 𐴌𐴞𐴉𐴢𐴢𐴎𐴞 𐴑𐴠𐴀𐴠𐴔𐴡𐴌 𐴔𐴝𐴎𐴞 𐴀𐴝𐴁𐴢𐴢𐴓 𐴑𐴝𐴓𐴝𐴔𐴠 𐴋𐴤𐴝𐴑𐴝 𐴄𐴠𐴌𐴞𐴁𐴙𐴢𐴢𐴕𐴡𐴌𐴠 𐴈𐴡𐴘𐴧𐴠𐴊𐴠 𐴐𐴥𐴡𐴊𐴡𐴌 𐴀𐴥𐴡𐴑𐴧𐴡𐴓𐴠 𐴱𐴱 𐴁𐴡𐴌𐴔𐴝 𐴏𐴦𐴞𐴔 𐴀𐴠𐴑𐴧𐴝𐴕 𐴰 𐴳 – 𐴰 𐴴 𐴄𐴞𐴛𐴝𐴌 𐴊𐴡𐴌𐴠 𐴑𐴞𐴕𐴞 𐴘𐴡𐴌𐴠 𐴌𐴞𐴉𐴢𐴢𐴎𐴞𐴌 𐴑𐴠𐴀𐴠𐴔𐴡𐴃 𐴰 𐴰 𐴱 – 𐴰 𐴷 𐴄𐴞𐴛𐴝 𐴁𐴠𐴏𐴠 𐴱𐴱 𐴎𐴞𐴀𐴞𐴕 𐴁𐴝𐴚𐴓𐴝𐴊𐴠𐴐𐴥𐴞 𐴏𐴦𐴞𐴔𐴡𐴃𐴧𐴢𐴢𐴁𐴝𐴌𐴥𐴡 𐴀𐴥𐴡𐴣𐴏𐴧𐴝 𐴱𐴱 𐴘𐴦𐴝𐴌 𐴁𐴝𐴊𐴠 𐴉𐴥𐴠𐴌𐴞 𐴔𐴞𐴓𐴡𐴄 𐴀𐴝𐴌 𐴉𐴥𐴠𐴌𐴞 𐴀𐴞𐴕𐴄𐴝𐴌𐴕𐴥𐴠𐴄𐴡 𐴀𐴝𐴏𐴠 𐴁𐴡𐴓𐴞 𐴀𐴥𐴞𐴁𐴝𐴘𐴠 𐴈𐴡𐴘𐴧𐴠 𐴱𐴱

𐴒𐴡𐴃𐴡 𐴲 / 𐴏𐴠𐴃𐴡𐴔𐴁𐴡𐴌 𐴹 𐴱 𐴰 𐴲 𐴀𐴥𐴡𐴘𐴃𐴠 𐴑𐴠𐴀𐴠𐴔 𐴀𐴝𐴌 𐴑𐴠𐴀𐴠𐴔𐴡𐴌 𐴀𐴝𐴃𐴌𐴝𐴉𐴡𐴃 𐴳 𐴅𐴞 𐴴 𐴅𐴞 𐴀𐴥𐴝𐴣𐴎𐴡𐴙𐴕𐴧𐴝 𐴵 𐴁𐴝𐴎𐴡𐴃𐴧𐴢𐴢 𐴁𐴠𐴙𐴕𐴧𐴝 𐴶 𐴁𐴝𐴎𐴠 𐴉𐴡𐴙𐴅𐴧𐴡𐴕 𐴉𐴥𐴠𐴓𐴝𐴘 𐴊𐴞𐴘𐴠 𐴱𐴱 𐴁𐴥𐴡𐴓𐴑𐴥𐴞 𐴔𐴢𐴢𐴁𐴝𐴘𐴓𐴡𐴌 𐴓𐴝𐴙𐴕 𐴀𐴥𐴢𐴢𐴊𐴧𐴝 𐴊𐴞𐴕𐴡𐴃 𐴑𐴡𐴔𐴎𐴢𐴢𐴌𐴒𐴡𐴌𐴞 𐴉𐴥𐴠𐴓𐴝𐴘𐴧𐴠 𐴱𐴱 𐴐𐴥𐴠𐴐𐴢𐴈𐴝𐴍𐴝𐴓𐴠 𐴌𐴞𐴉𐴢𐴢𐴎𐴞 𐴀𐴥𐴡𐴑𐴧𐴡𐴓𐴠 𐴁𐴡𐴌𐴔𐴝𐴌 𐴏𐴦𐴞𐴔 𐴓𐴡𐴘 𐴱 𐴀𐴥𐴞𐴃𐴝𐴌𐴝 𐴊𐴢𐴢𐴕𐴞𐴘𐴝𐴘 𐴁𐴠𐴙𐴒𐴧𐴢𐴢𐴓𐴧𐴝 𐴃𐴝𐴀𐴝𐴓𐴧𐴢𐴢𐴑 𐴁𐴝𐴑𐴞 𐴌𐴝𐴙𐴑𐴧𐴠 𐴱𐴱

𐴒𐴝𐴙𐴌𐴑𐴝𐴕𐴢𐴢𐴕𐴞 𐴁𐴡𐴌𐴔𐴝 𐴏𐴦𐴞𐴔𐴑𐴦𐴝𐴌𐴋𐴡𐴌 𐴁𐴠𐴏𐴝𐴑𐴞𐴕𐴝 𐴁𐴠𐴐𐴥𐴞 𐴀𐴥𐴡𐴘𐴧𐴠 𐴎𐴠𐴈𐴡𐴕 𐴇𐴥𐴡𐴑𐴢𐴢𐴔𐴡𐴃𐴠 𐴑𐴝𐴕𐴢𐴢𐴕𐴞 𐴑𐴝𐴌𐴖𐴝𐴘 𐴒𐴡𐴌𐴞 𐴁𐴡𐴖𐴃 𐴌𐴢𐴢𐴇𐴝𐴙𐴚𐴒𐴙𐴝 𐴊𐴤𐴡𐴌𐴞 𐴎𐴞𐴘𐴡𐴓𐴡𐴃 𐴊𐴞𐴘𐴠 𐴱𐴱 𐴀𐴢𐴢𐴑𐴞𐴘𐴝𐴌 ( 𐴀𐴡 𐴏𐴞 ) 𐴀𐴝𐴁𐴊𐴢𐴢𐴓 𐴔𐴡𐴕𐴏𐴢𐴢𐴌𐴠 𐴈𐴡𐴘𐴧𐴠𐴊𐴠 𐴱 𐴀𐴝𐴣𐴀𐴌𐴝 𐴀𐴢𐴢𐴒𐴧𐴗𐴝 𐴌𐴢𐴢𐴇𐴝𐴙𐴚𐴒𐴙𐴝 / 𐴔𐴢𐴢𐴇𐴝𐴔𐴧𐴡𐴊𐴢 𐴑𐴡𐴌𐴞𐴔𐴡𐴌𐴠 𐴰 𐴳 𐴲 𐴐𐴥𐴝𐴕 𐴁𐴡𐴌𐴔𐴝 𐴏𐴦𐴞𐴔 𐴓𐴡𐴘 𐴊𐴤𐴡𐴌𐴞 𐴁𐴡𐴕𐴒𐴡𐴙𐴅𐴧𐴞 𐴱𐴱 𐴄𐴠𐴑𐴕𐴝𐴉𐴡𐴌 𐴉𐴢𐴢𐴓𐴞𐴐𐴠 𐴈𐴡𐴘𐴧𐴠𐴊𐴠 𐴀𐴝𐴣𐴀𐴌𐴝 𐴃𐴞𐴕 𐴎𐴡𐴕 𐴌𐴢𐴢𐴇𐴝𐴙𐴚𐴒𐴙𐴝 𐴲 𐴲 𐴲 𐴐𐴥𐴝𐴕 𐴏𐴦𐴞𐴔 𐴓𐴡𐴘 𐴊𐴤𐴡𐴌𐴞 𐴁𐴡𐴕𐴒𐴡𐴙𐴅𐴧𐴞 𐴱𐴱

𐴀𐴢𐴢𐴑𐴞𐴘𐴝 / 𐴑𐴢𐴢𐴃𐴢𐴢𐴉𐴝𐴓𐴡𐴚𐴡𐴌 𐴁𐴝𐴎𐴝𐴌𐴡𐴌 𐴑𐴡𐴔𐴞𐴄𐴞𐴌 𐴆𐴙𐴝𐴌𐴔𐴠𐴕 / 𐴇𐴠𐴓𐴝𐴓𐴢𐴢𐴊𐴧𐴞𐴕𐴠 𐴋𐴤𐴝𐴑𐴝 𐴄𐴠𐴌𐴞𐴁𐴙𐴢𐴢𐴕𐴡𐴌𐴠 𐴈𐴡𐴘𐴧𐴠𐴊𐴠 𐴱𐴱 𐴇𐴥𐴡𐴑𐴢𐴢𐴔𐴡𐴃𐴠 𐴕𐴦𐴠𐴄 𐴁𐴡𐴕𐴒𐴡𐴌𐴡𐴕𐴡𐴌 𐴎𐴡𐴌𐴞𐴘𐴝 𐴀𐴢𐴢𐴑𐴞𐴘𐴝 𐴀𐴝𐴌 𐴄𐴠𐴑𐴕𐴝𐴉𐴡𐴌 𐴊𐴠𐴐𐴥𐴡𐴙𐴃𐴧𐴝 𐴀𐴥𐴡𐴑𐴧𐴡𐴓𐴡𐴃𐴧𐴢𐴢 𐴁𐴠𐴐𐴥𐴞 𐴓𐴢𐴢𐴏𐴧𐴝𐴕 𐴀𐴥𐴡𐴘𐴧𐴠 𐴱𐴱 𐴀𐴝𐴒𐴡𐴌 𐴀𐴢𐴢𐴑𐴞𐴘𐴝 𐴂𐴠𐴌𐴠𐴏 𐴑𐴠𐴓𐴝𐴁𐴡𐴌 𐴁𐴡𐴌𐴡 / 𐴏𐴡𐴌𐴖𐴝𐴌 𐴀𐴝𐴓𐴡𐴔 𐴐𐴝𐴇𐴞𐴕𐴠 𐴈𐴡𐴘𐴧𐴠𐴊𐴠 𐴀𐴝𐴣𐴀𐴌 𐴎𐴝𐴕𐴝𐴔𐴡𐴃𐴠 𐴵 𐴓𐴝𐴑 𐴉𐴡𐴙𐴅𐴧𐴡𐴕𐴃𐴡 𐴌𐴞𐴉𐴢𐴢𐴎𐴞 𐴁𐴡𐴖𐴃 ( 𐴀𐴠𐴕 𐴅𐴞 𐴀𐴡 ) 𐴐𐴦𐴡𐴣 𐴁𐴡𐴌𐴔𐴝𐴌 𐴏𐴦𐴞𐴔 𐴀𐴠𐴏𐴃𐴠𐴔𐴝𐴓 𐴒𐴡𐴌𐴠𐴌 𐴱𐴱 𐴀𐴢𐴢𐴑𐴞𐴘𐴝𐴌 𐴀𐴢𐴢 𐴉𐴢𐴢 𐴎𐴞𐴓𐴝𐴌 𐴕𐴞𐴌𐴁𐴝𐴇𐴞 𐴀𐴡𐴉𐴞𐴏𐴝𐴌 / 𐴔𐴢𐴢𐴇𐴝𐴔𐴧𐴡𐴊𐴢 𐴕𐴞𐴑𐴝𐴌𐴢𐴢𐴎𐴧𐴡𐴔𐴝 𐴘𐴠 𐴈𐴡𐴘𐴧𐴠𐴊𐴠 𐴌𐴢𐴢𐴇𐴝𐴙𐴚𐴒𐴙𐴝 𐴌𐴞𐴉𐴢𐴢𐴎𐴞𐴌 𐴑𐴠𐴀𐴠𐴔𐴡𐴌 𐴁𐴥𐴢𐴢𐴃𐴡𐴌𐴠 𐴁𐴦𐴝𐴌𐴠 𐴎𐴠𐴊𐴦𐴢𐴢𐴕𐴠 𐴁𐴡𐴌𐴔𐴝𐴌 𐴏𐴦𐴞𐴔 𐴀𐴠𐴏𐴃𐴠𐴔𐴝𐴓 𐴒𐴡𐴌𐴠𐴌 𐴁𐴠𐴙𐴒𐴧𐴞𐴕 𐴒𐴝𐴙𐴌𐴑𐴝𐴕𐴢𐴢𐴕𐴞 𐴱𐴱 𐴎𐴞𐴘𐴝𐴕𐴡𐴓𐴧𐴝 𐴕𐴦𐴠𐴄 𐴁𐴡𐴕𐴒𐴡𐴌𐴝 𐴒𐴞𐴀𐴓 𐴘𐴦𐴝𐴕𐴡𐴃 𐴎𐴠𐴈𐴡𐴕 𐴑𐴝𐴔𐴞𐴘𐴝𐴁 𐴕𐴦𐴡 𐴀𐴥𐴡 𐴱𐴱 𐴔𐴠𐴌𐴁𐴝𐴕𐴞 𐴒𐴡𐴌𐴞 𐴕𐴦𐴠𐴄 𐴑𐴥𐴢𐴢𐴓𐴞 𐴊𐴞𐴁𐴡𐴓𐴧𐴝 𐴊𐴠𐴐𐴥𐴡𐴙𐴃𐴧𐴝 𐴀𐴥𐴡𐴑𐴧𐴡𐴓𐴠 𐴇𐴥𐴡𐴑𐴢𐴢𐴔𐴡𐴃𐴡𐴌 𐴈𐴝𐴣𐴏𐴠 𐴀𐴝𐴌𐴡𐴎 𐴒𐴡𐴌𐴦𐴠𐴌 𐴱𐴱

Dhaka Tribune

𐴳 / 𐴈𐴝𐴃𐴞𐴔𐴝𐴐𐴢 𐴱 𐴳 𐴲 𐴱 𐴌𐴢𐴢𐴇𐴝𐴙𐴚𐴒𐴙𐴝 𐴁𐴞𐴐𐴥𐴞𐴃 𐴁𐴝𐴌