𐴌𐴢𐴢𐴇𐴝𐴙𐴚𐴒𐴙𐴝𐴌 𐴔𐴝𐴀𐴝𐴔𐴠𐴓𐴝𐴌 𐴇𐴥𐴡𐴓𐴡𐴓𐴧𐴝 𐴀𐴝𐴏𐴞𐴘𐴠𐴕𐴡𐴌𐴠 𐴈𐴡𐴘𐴧𐴠

𐴁𐴡𐴌𐴔𐴝𐴌 𐴔𐴠𐴓𐴠𐴄𐴠𐴌𐴞𐴘𐴠 𐴕𐴡𐴏𐴥𐴡𐴓 𐴉𐴥𐴢𐴢𐴌𐴝 𐴑𐴝𐴌𐴖𐴝𐴘 𐴒𐴡𐴌𐴞 𐴕𐴞𐴎𐴡𐴌 𐴊𐴠𐴐𐴥𐴡𐴃𐴧𐴢𐴢 𐴕𐴠𐴓𐴝𐴘𐴊𐴞𐴘𐴠𐴊𐴠 𐴱𐴱 𐴌𐴢𐴢𐴇𐴝𐴙𐴚𐴒𐴙𐴝𐴌 𐴔𐴝𐴀𐴝𐴔𐴠𐴓𐴝 𐴔𐴢𐴢𐴓𐴥𐴝𐴃𐴧𐴢𐴢 𐴀𐴥𐴢𐴢𐴊𐴧𐴝 𐴀𐴥𐴝𐴣𐴌𐴞 𐴎𐴝𐴒𐴡𐴘𐴉𐴦𐴝𐴕 𐴒𐴡𐴌𐴞 𐴇𐴥𐴡𐴓 𐴒𐴡𐴌𐴞𐴁𐴡𐴓𐴧𐴝 𐴀𐴝𐴏𐴞𐴘𐴠𐴕𐴡𐴌 𐴀𐴢𐴢𐴎𐴞𐴌 𐴀𐴥𐴡𐴑𐴧𐴡𐴓𐴡𐴌𐴠 𐴱𐴱 𐴘𐴢𐴢 𐴀𐴠 𐴕𐴡𐴌 𐴅𐴡𐴕𐴡𐴌𐴡𐴓 𐴏𐴠𐴒𐴠𐴄𐴠𐴌𐴞 𐴀𐴠𐴕𐴄𐴞𐴕𐴞𐴘𐴡 𐴒𐴢𐴢𐴄𐴠𐴌𐴠𐴏𐴠 𐴴 𐴷 𐴀𐴡𐴔 𐴘𐴢𐴢 𐴀𐴠𐴕𐴡𐴌 𐴁𐴡𐴙𐴍𐴡𐴑𐴡𐴃 𐴈𐴡𐴘𐴧𐴠 𐴱𐴱 𐴕𐴡𐴏𐴥𐴡𐴓 𐴉𐴥𐴢𐴢𐴌𐴝 𐴎𐴢𐴢𐴓𐴢𐴢𐴔𐴡𐴌 𐴐𐴥𐴞𐴑𐴝𐴌 𐴀𐴥𐴡𐴘𐴧𐴝 𐴌𐴢𐴢𐴇𐴝𐴙𐴚𐴒𐴙𐴝 𐴁𐴝𐴚𐴓𐴝𐴊𐴠𐴐𐴥𐴡𐴃 𐴎𐴝𐴘 𐴒𐴤𐴡𐴌 𐴏𐴥𐴝𐴌𐴝 𐴃𐴥𐴡𐴌𐴏𐴝𐴌𐴝 𐴀𐴥𐴡𐴘𐴧𐴠𐴊𐴠 𐴀𐴦𐴢𐴢𐴕 𐴱𐴱 𐴀𐴝𐴌 𐴊𐴠𐴐𐴥𐴡𐴌 𐴁𐴥𐴢𐴢𐴃𐴡𐴌𐴠 𐴒𐴤𐴡𐴌 𐴏𐴥𐴝𐴌𐴝 𐴀𐴥𐴡𐴘𐴧𐴠𐴊𐴠 𐴀𐴦𐴢𐴢𐴕𐴀𐴥𐴢𐴢𐴊𐴧𐴝 𐴔𐴞𐴓𐴝𐴘 𐴌𐴢𐴢𐴇𐴝𐴙𐴚𐴒𐴙𐴝 𐴁𐴠𐴙𐴒𐴧𐴢𐴢𐴕𐴀𐴝𐴎𐴝𐴊𐴞 𐴀𐴝𐴌 𐴐𐴥𐴝𐴕𐴃𐴞𐴌 𐴏𐴦𐴝𐴣𐴃𐴠 𐴃𐴥𐴝𐴑𐴞 𐴉𐴝𐴌𐴠𐴊𐴠 𐴀𐴥𐴠𐴕𐴋𐴞𐴓𐴧𐴝 𐴉𐴝𐴑𐴧𐴝 𐴔𐴝𐴇𐴡𐴖𐴓 𐴁𐴝𐴕𐴝𐴘

𐴀𐴞𐴎𐴧𐴡𐴃𐴡𐴌 𐴏𐴦𐴝𐴣𐴃𐴠 𐴕𐴞𐴎𐴡𐴌 𐴕𐴞𐴎𐴡𐴌 𐴒𐴤𐴡𐴌𐴡𐴃 𐴖𐴝𐴉𐴠𐴏 𐴎𐴝𐴘 𐴉𐴝𐴌𐴦𐴡𐴕 𐴏𐴦𐴝 𐴁𐴡𐴓𐴞𐴘𐴥𐴡 𐴘𐴢𐴢 𐴀𐴠𐴕𐴡𐴌 𐴏𐴠𐴒𐴠𐴄𐴞𐴌𐴞 𐴘𐴠 𐴈𐴡𐴘𐴧𐴠 𐴱𐴱 𐴁𐴝𐴚𐴓𐴝𐴊𐴠𐴐𐴥𐴡𐴃 𐴏𐴦𐴝𐴀𐴝𐴌𐴝 𐴓𐴡𐴘𐴧𐴠𐴊𐴠 𐴀𐴥𐴞𐴃𐴝𐴌𐴝 𐴁𐴞𐴐𐴧𐴝𐴐𐴢 𐴒𐴡𐴌𐴞 𐴉𐴝𐴌𐴠𐴊𐴠 𐴀𐴥𐴠𐴕𐴋𐴞𐴓𐴧𐴝 𐴔𐴝𐴇𐴡𐴖𐴓 𐴁𐴝𐴕𐴝𐴀𐴡𐴕 𐴁𐴠𐴐𐴥𐴞 𐴎𐴡𐴌𐴢𐴢𐴌𐴞 𐴁𐴡𐴓𐴞 𐴘𐴥𐴡 𐴈𐴡𐴘𐴧𐴠 𐴱𐴱 𐴁𐴡𐴌𐴔𐴝 𐴇𐴥𐴡𐴑𐴢𐴢𐴔𐴡𐴃𐴠 𐴕𐴡𐴏𐴥𐴡𐴓 𐴉𐴥𐴢𐴢𐴌𐴝 𐴑𐴝𐴌𐴖𐴝𐴘 𐴒𐴡𐴌𐴞 𐴓𐴝𐴑 𐴓𐴝𐴑 𐴌𐴢𐴢𐴇𐴝𐴙𐴚𐴒𐴙𐴝 𐴔𐴝𐴙𐴅𐴧𐴙𐴠 / 𐴔𐴝𐴘𐴧𐴝𐴉𐴢𐴢𐴖𐴝𐴙𐴕𐴊𐴡𐴌𐴠 𐴎𐴥𐴝𐴑𐴧𐴗𐴝 𐴎𐴢𐴢𐴓𐴢𐴢𐴔 𐴒𐴡𐴙𐴅𐴧𐴙𐴠 / 𐴁𐴦𐴝𐴊𐴠 𐴔𐴝𐴌𐴞 𐴘𐴥𐴡 𐴉𐴥𐴠𐴓𐴝𐴘𐴧𐴠 𐴱𐴱 𐴉𐴢𐴢𐴖𐴝 𐴁𐴢𐴢𐴌𐴥𐴝 𐴈𐴡𐴙𐴆𐴧𐴙𐴝 𐴎𐴞𐴛𐴝𐴃𐴝 𐴉𐴢𐴢𐴌𐴝𐴊𐴞𐴘𐴥𐴠 𐴱𐴱 𐴀𐴠 𐴎𐴝𐴓𐴠𐴔 𐴀𐴥𐴡𐴑𐴧𐴡𐴓𐴡𐴌𐴠 𐴏𐴥𐴝𐴎𐴝𐴊𐴞𐴁𐴡𐴓𐴧𐴝 ( 𐴀𐴝𐴘 𐴏𐴞 𐴏𐴞 / 𐴀𐴝 𐴏𐴞 𐴅𐴠 ) 𐴊𐴢𐴢𐴕𐴥𐴡 𐴋𐴦𐴝𐴘𐴧𐴠 𐴔𐴦𐴡𐴊𐴧𐴞𐴔𐴝 𐴃𐴡𐴘𐴧𐴝𐴌 𐴒𐴡𐴌𐴠𐴌

𐴀𐴝𐴘 𐴏𐴞 𐴏𐴞𐴌 𐴁𐴡𐴌𐴡 𐴐𐴦𐴝𐴉 / 𐴀𐴝𐴃𐴢𐴢𐴁𐴦𐴠𐴙𐴕 𐴏𐴢𐴢𐴌𐴝 / 𐴒𐴠𐴙𐴔𐴁𐴞𐴘𐴝𐴌 𐴊𐴢𐴢𐴘𐴧𐴡𐴔 𐴌𐴝𐴎𐴝 / 𐴀𐴞𐴏𐴝𐴃𐴢𐴢 𐴃𐴡𐴖𐴌 𐴀𐴝𐴌 𐴒𐴠𐴙𐴔𐴁𐴞𐴘𐴝𐴌 𐴁𐴡𐴘𐴊𐴠𐴐𐴢 𐴀𐴢𐴢𐴎𐴞𐴌 𐴱𐴱 𐴀𐴞𐴃𐴝𐴌𐴥𐴝 𐴊𐴠𐴐𐴁𐴞𐴊𐴠𐴐𐴢 𐴓𐴡𐴘 𐴔𐴞𐴓𐴞 𐴏𐴥𐴡𐴓𐴧𐴝 𐴔𐴡𐴐𐴢𐴢𐴖𐴝𐴌𐴝 𐴒𐴡𐴙𐴅𐴧𐴙𐴠 𐴱𐴱 𐴴 𐴷 𐴀𐴡𐴔 𐴘𐴢𐴢 𐴀𐴠𐴕𐴡𐴌 𐴁𐴡𐴘𐴍𐴡𐴑𐴡𐴃 𐴁𐴡𐴌𐴔𐴝𐴌 𐴕𐴡𐴔𐴝𐴙𐴕𐴊𐴝𐴌 𐴎𐴞𐴔𐴧𐴝𐴊𐴝𐴌 / 𐴀𐴦𐴢𐴢 𐴆𐴙𐴡 𐴃𐴥𐴞𐴚 𐴏𐴢𐴢𐴖𐴠 𐴘𐴠 / 𐴘𐴢𐴢 𐴀𐴠𐴕𐴡𐴌 𐴁𐴡𐴘𐴍𐴡𐴑𐴡𐴃 𐴱𐴱 𐴁𐴡𐴌𐴔𐴝𐴌 𐴋𐴞𐴔𐴢𐴢𐴑𐴠𐴌𐴠𐴏𐴞 𐴁𐴡𐴊𐴡𐴓𐴝 / 𐴸 𐴰 𐴰 𐴲 𐴐𐴥𐴡𐴕𐴡𐴌 𐴀𐴝𐴙𐴕 𐴑𐴝𐴕𐴢𐴢𐴕 𐴁𐴡𐴊𐴡𐴓𐴝 / 𐴊𐴠𐴐𐴥𐴡𐴌 𐴀𐴠𐴃𐴧𐴠𐴉𐴝𐴑 𐴐𐴥𐴝𐴕𐴃𐴞 𐴀𐴝𐴌 𐴀𐴝𐴌𐴑𐴝𐴕𐴡𐴌 𐴁𐴝𐴁𐴡𐴃𐴠 𐴁𐴠𐴐𐴥𐴞 𐴓𐴝𐴔𐴁𐴝 𐴈𐴡𐴃𐴥𐴝 𐴈𐴡𐴘𐴧𐴠 𐴱𐴱 𐴎𐴠𐴍𐴥𐴠 𐴌𐴢𐴢𐴇𐴝𐴙𐴚𐴒𐴙𐴝𐴌 𐴖𐴝𐴉𐴠𐴏𐴞 𐴀𐴝𐴌 𐴊𐴠𐴐𐴥𐴡𐴙𐴃𐴧𐴝 𐴁𐴡𐴕𐴝𐴌 𐴁𐴝𐴁𐴡𐴃𐴠 𐴘𐴥𐴡 𐴀𐴝𐴏𐴠 𐴱𐴱 𐴀𐴝𐴘 𐴏𐴞 𐴏𐴞𐴌 𐴃𐴡𐴌𐴉𐴡𐴃𐴧𐴢𐴢 𐴶 𐴱 𐴀𐴡𐴒𐴥𐴏𐴄𐴡𐴃 𐴕𐴠𐴓𐴝𐴘𐴧𐴠𐴊𐴠 𐴉𐴥𐴝𐴌𐴡𐴔𐴡𐴌 𐴕𐴡𐴔𐴢𐴢𐴕𐴝 𐴱𐴱 𐴎𐴦𐴞𐴕𐴡𐴌𐴠 𐴅𐴠𐴕𐴢𐴢𐴏𐴥𐴝𐴘𐴄𐴡𐴌 𐴏𐴥𐴝𐴁𐴢𐴢𐴃 𐴀𐴥𐴡𐴑𐴧𐴡𐴓 𐴊𐴡𐴓𐴝 𐴒𐴡𐴌𐴞 𐴱𐴱 𐴀𐴝𐴘 𐴏𐴞 𐴏𐴞𐴃 𐴉𐴦𐴡𐴣𐴏𐴝𐴘𐴁𐴝𐴌 𐴀𐴝𐴈𐴠𐴌𐴞 𐴃𐴝𐴌𐴥𐴞𐴑 𐴸 𐴲 𐴀𐴡𐴑𐴃𐴢𐴢𐴁𐴡𐴌 𐴹 𐴱 𐴰 𐴲 𐴈𐴝𐴣𐴏𐴠 𐴀𐴝𐴘𐴧𐴠𐴊𐴧𐴠 𐴀𐴥𐴠𐴃𐴡𐴓𐴧𐴝 𐴏𐴥𐴡𐴓𐴝𐴔𐴡𐴃𐴞 𐴈𐴝𐴔 𐴒𐴡𐴌𐴡𐴘𐴧𐴝 𐴌𐴢𐴢𐴇𐴝𐴙𐴚𐴒𐴙𐴝 𐴅𐴢𐴢𐴖𐴝𐴕 𐴀𐴥𐴡𐴑𐴧𐴡𐴓𐴠 𐴑𐴠𐴀𐴠𐴔𐴡𐴃 𐴉𐴥𐴝𐴌𐴡𐴔 𐴀𐴥𐴞𐴕 𐴁𐴝𐴍𐴝 𐴐𐴥𐴢𐴢𐴌𐴢𐴢 𐴒𐴡𐴙𐴅𐴧𐴙𐴠 𐴱𐴱