𐴌𐴢𐴢𐴇𐴝𐴙𐴚𐴒𐴙𐴝 𐴈𐴡𐴊𐴦𐴢𐴢𐴕 𐴊𐴥𐴡𐴌𐴝 𐴉𐴡𐴙𐴅𐴧𐴠

𐴀𐴠𐴌𐴝𐴖𐴡𐴋𐴧𐴞 𐴋𐴞𐴐𐴄𐴞𐴑𐴡𐴌 𐴚𐴡𐴂𐴧𐴢𐴢 𐴋𐴡 𐴐𐴥𐴡𐴀𐴌 𐴀𐴠𐴓𐴝𐴑𐴝𐴌 𐴉𐴢𐴢𐴓𐴞𐴐𐴠 𐴱𐴱 𐴚𐴡𐴘𐴥𐴡𐴑 𐴑𐴥𐴡𐴚 𐴐𐴥𐴡𐴀𐴌𐴡𐴌 𐴘𐴥𐴠𐴑𐴙𐴥𐴡 𐴉𐴝𐴌𐴝𐴃𐴧𐴢𐴢 𐴱𐴱 𐴏𐴥𐴡𐴉𐴡𐴌 𐴒𐴡𐴌𐴦𐴡𐴕𐴡𐴌 𐴀𐴠𐴅𐴝𐴎𐴡𐴃 𐴕𐴝𐴔𐴝 𐴊𐴠𐴈𐴥𐴝𐴘 𐴕𐴦𐴡𐴉𐴝𐴌𐴠𐴊𐴠 𐴀𐴥𐴠𐴃𐴡𐴓𐴧𐴝 𐴰 𐴳 𐴎𐴡𐴕 𐴌𐴢𐴢𐴇𐴝𐴙𐴚𐴒𐴙𐴝 𐴁𐴡𐴕 𐴒𐴡𐴙𐴅𐴧𐴠 𐴱𐴱 𐴁𐴡𐴕 𐴀𐴥𐴡𐴘𐴧𐴠𐴊𐴠 𐴀𐴥𐴠𐴍𐴠 𐴰 𐴲 𐴎𐴡𐴕 𐴔𐴝𐴘𐴧𐴝 𐴉𐴢𐴢𐴖𐴝 𐴰 𐴱 𐴎𐴡𐴕 𐴔𐴡𐴌𐴡𐴃 𐴉𐴢𐴢𐴖𐴝 𐴱𐴱 𐴀𐴠 𐴃𐴞𐴌𐴥𐴞𐴐 𐴎𐴡𐴕𐴡𐴌 𐴁𐴥𐴢𐴢𐴃𐴡𐴌𐴠 𐴀𐴠𐴁𐴧𐴠𐴌𐴠 𐴐𐴥𐴡𐴣𐴍𐴡𐴖𐴧𐴝 𐴴 𐴁𐴡𐴏𐴥𐴡𐴌 𐴋𐴡𐴣𐴀𐴌 𐴒𐴗𐴝 𐴷 𐴲 𐴁𐴡𐴏𐴥𐴡𐴌 𐴱𐴱 𐴁𐴦𐴠𐴙𐴐 𐴀𐴥𐴞𐴏𐴧𐴝 𐴸 𐴱 𐴁𐴡𐴏𐴡𐴌𐴡𐴌 𐴕𐴞𐴏𐴠 𐴱𐴱 𐴉𐴢𐴢𐴓𐴞𐴐𐴡𐴌 𐴈𐴢𐴢𐴖𐴝 𐴔𐴡𐴎𐴞𐴕 𐴀𐴥𐴞𐴃𐴝𐴌𐴝 𐴀𐴝𐴙𐴑𐴧𐴙𐴝𐴉𐴡𐴌 𐴏𐴝𐴑𐴧𐴞𐴁𐴝𐴎𐴝𐴌 𐴀𐴝𐴌 𐴃𐴝𐴘𐴐𐴥𐴡𐴚 𐴉𐴝𐴌𐴝𐴃𐴧𐴢𐴢 𐴊𐴝𐴓𐴝𐴓𐴡𐴌𐴠 𐴎𐴡𐴕𐴉𐴞𐴏𐴠 𐴵 𐴓𐴝𐴑𐴡𐴃𐴧𐴢𐴢 𐴷 𐴓𐴝𐴑𐴡𐴌 𐴁𐴥𐴢𐴢𐴃𐴡𐴌𐴠 𐴁𐴡𐴌𐴔𐴝 𐴄𐴞𐴛𐴝 𐴊𐴞𐴘𐴡𐴌𐴠 𐴱𐴱 𐴑𐴠𐴙𐴧𐴏𐴢𐴢 𐴌𐴠𐴚𐴒𐴢𐴢𐴕𐴡𐴃 𐴃𐴥𐴝𐴑𐴞 𐴈𐴝𐴔 𐴈𐴡𐴌𐴡𐴏𐴢 𐴒𐴡𐴌𐴞𐴁𐴥𐴡 𐴱𐴱 𐴀𐴝𐴌 𐴑𐴠𐴙𐴏𐴧𐴢𐴢 𐴔𐴡𐴓𐴠𐴐𐴥𐴞𐴘𐴝 𐴎𐴝𐴘𐴁𐴝𐴌 𐴕𐴞𐴘𐴡𐴃 𐴓𐴡𐴘 𐴀𐴝𐴘𐴧𐴠𐴊𐴧𐴠 𐴱𐴱 𐴀𐴥𐴞𐴃𐴝𐴌𐴝𐴌𐴠 𐴊𐴝𐴓𐴝𐴓𐴠 𐴀𐴝𐴙𐴑𐴧𐴙𐴝𐴉𐴡𐴃𐴧𐴢𐴢 𐴁𐴢𐴢𐴄𐴓𐴡𐴘 𐴀𐴝𐴕𐴞 𐴱𐴱 𐴀𐴠𐴌𐴝𐴖𐴡𐴋𐴧𐴞 𐴋𐴞𐴐𐴄𐴞𐴑𐴡𐴃 𐴃𐴢𐴢𐴓𐴥𐴞 𐴱𐴱 𐴘𐴥𐴠𐴑𐴙𐴥𐴡 𐴉𐴝𐴌𐴝𐴌 𐴋𐴥𐴝𐴑𐴠 𐴚𐴡𐴘𐴡𐴑 𐴆𐴥𐴡𐴚𐴡𐴌 𐴉𐴢𐴢𐴓𐴡𐴌 𐴖𐴡𐴌𐴠 𐴓𐴡𐴘𐴎𐴝𐴘 𐴱𐴱 𐴁𐴠𐴙𐴒𐴧𐴢𐴢𐴕𐴡𐴌𐴠 𐴈𐴝𐴙𐴣𐴄𐴧𐴝𐴘 𐴈𐴝𐴙𐴣𐴄𐴧𐴝𐴘 𐴀𐴠𐴑𐴧𐴝𐴕

𐴔𐴞𐴄𐴏𐴢𐴢𐴁𐴞𐴐𐴞 𐴂𐴝𐴅𐴞𐴌𐴢𐴢 𐴒𐴝𐴌𐴥𐴞𐴃 𐴁𐴤𐴡𐴌𐴞 𐴌𐴠𐴕𐴒𐴢𐴢𐴕𐴡𐴌 𐴀𐴢𐴢𐴎𐴢𐴢 𐴓𐴡𐴘𐴎𐴝𐴌𐴒𐴥𐴡𐴘𐴊𐴠 𐴀𐴡𐴑𐴃𐴡𐴃 𐴊𐴤𐴡𐴌𐴝 𐴉𐴡𐴙𐴅𐴧𐴠 𐴁𐴡𐴓𐴞 𐴔𐴞𐴕𐴄 𐴏𐴢𐴢𐴖𐴠 𐴘𐴠 𐴈𐴡𐴘𐴧𐴠 𐴱𐴱 𐴌𐴢𐴢𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴕𐴞𐴎𐴡𐴌 𐴊𐴠𐴐𐴢 𐴀𐴝𐴌𐴑𐴝𐴕𐴡𐴃 𐴀𐴡𐴙𐴕𐴧𐴡 𐴑𐴡𐴖𐴔𐴡𐴌 𐴋𐴡𐴀𐴙𐴓𐴧𐴝 𐴁𐴡𐴌𐴝𐴁𐴡𐴙𐴅𐴧𐴝 𐴒𐴡𐴌𐴞 𐴔𐴞𐴓𐴞𐴎𐴢𐴢𐴓𐴞 𐴉𐴥𐴢𐴢𐴣𐴖𐴝𐴣𐴃𐴞 𐴃𐴥𐴝𐴑𐴞 𐴉𐴝𐴌𐴠𐴉𐴦𐴝𐴕 𐴱𐴱 𐴁𐴡𐴌𐴔𐴝 𐴇𐴥𐴡𐴑𐴢𐴢𐴔𐴡𐴃𐴡𐴃𐴧𐴢𐴢 𐴀𐴞𐴏𐴧𐴝 𐴀𐴝𐴏𐴥𐴠𐴊𐴠 𐴘𐴦𐴝𐴕 𐴊𐴠𐴈𐴥𐴝𐴘𐴁𐴡𐴓𐴧𐴝 𐴱𐴱 𐴁𐴝𐴚𐴓𐴝𐴊𐴠𐴐𐴥𐴡𐴌 𐴁𐴡𐴌 𐴀𐴢𐴢𐴎𐴞 𐴐𐴠𐴙𐴑 𐴇𐴥𐴝𐴏𐴞𐴕𐴝 𐴘𐴠 𐴀𐴝𐴌𐴡𐴎 𐴒𐴡𐴙𐴅𐴧𐴠 𐴱𐴱 𐴌𐴢𐴢𐴇𐴝𐴙𐴚𐴒𐴙𐴝𐴌 𐴔𐴝𐴀𐴝𐴔𐴠𐴓𐴝 𐴐𐴥𐴝𐴕𐴃𐴞𐴌 𐴏𐴦𐴝𐴣𐴃𐴠 𐴓𐴝𐴔𐴁𐴝 𐴄𐴝𐴙𐴔 𐴉𐴡𐴙𐴅𐴧𐴡𐴕𐴃𐴡 𐴄𐴞𐴑𐴠 𐴉𐴦𐴝𐴕 𐴱𐴱 𐴇𐴥𐴡𐴓𐴡𐴓𐴧𐴝 𐴐𐴠𐴙𐴑 𐴇𐴥𐴝𐴏𐴞𐴕𐴝 𐴘𐴠 𐴒𐴡𐴃𐴡 𐴈𐴝𐴙𐴓𐴧𐴝 𐴷 𐴲 / 𐴏𐴠𐴃𐴡𐴔𐴁𐴡𐴌𐴡𐴃 𐴀𐴥𐴡𐴘𐴧𐴠𐴊𐴠 𐴴 𐴷 𐴀𐴡𐴔 𐴘𐴢𐴢 𐴀𐴠𐴕𐴡𐴌 𐴁𐴡𐴘𐴍𐴡𐴑𐴡𐴃 𐴏𐴝𐴙𐴌𐴒𐴝𐴕 𐴐𐴡𐴌𐴡𐴃𐴥𐴡 𐴂𐴠𐴙𐴐𐴢 𐴒𐴡𐴙𐴅𐴧𐴠 𐴱𐴱 𐴀𐴝𐴌 𐴀𐴥𐴠 𐴔𐴞𐴄𐴞𐴚𐴡𐴃 𐴆𐴞𐴕𐴝𐴌 𐴁𐴡𐴙𐴊𐴠𐴐𐴢 𐴀𐴢𐴢𐴎𐴞𐴌 𐴖𐴝𐴚𐴇𐴥𐴞 𐴘𐴠 𐴌𐴢𐴢𐴇𐴝𐴙𐴚𐴒𐴙𐴝 𐴕𐴞𐴎𐴡𐴌 𐴊𐴠𐴐𐴥𐴡𐴃 𐴎𐴝𐴘𐴉𐴝𐴌𐴠𐴉𐴦𐴝𐴕 𐴔𐴡𐴊𐴡𐴊 𐴒𐴡𐴌𐴞𐴁𐴡𐴓𐴧𐴝 𐴈𐴡𐴘𐴧𐴠 𐴱𐴱 𐴀𐴥𐴠

𐴐𐴡𐴌𐴥𐴡𐴃 𐴀𐴥𐴡𐴙𐴓𐴊𐴠 𐴱 / 𐴌𐴢𐴢𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴁𐴡𐴌𐴔𐴝𐴌 𐴐𐴥𐴡𐴔𐴝𐴎 𐴓𐴡𐴘 𐴓𐴝𐴔𐴁𐴝 𐴄𐴝𐴙𐴔 𐴐𐴥𐴝𐴕𐴃𐴞𐴌 𐴏𐴦𐴣𐴝𐴃𐴠 𐴔𐴞𐴓𐴞 𐴎𐴢𐴢𐴓𐴞 𐴃𐴦𐴝𐴘𐴉𐴝𐴌𐴞𐴁𐴡𐴓𐴧𐴝 𐴱𐴱 𐴏𐴞𐴘𐴝𐴏𐴞 𐴔𐴡𐴃𐴝𐴁𐴠𐴑 𐴀𐴞𐴏𐴧𐴝 𐴀𐴝𐴏𐴠𐴊𐴠 𐴘𐴦𐴝𐴕 𐴁𐴡𐴌𐴔𐴝 𐴇𐴥𐴡𐴑𐴢𐴢𐴔𐴡𐴃𐴡𐴃𐴧𐴢𐴢 𐴏𐴦𐴝𐴉 𐴏𐴦𐴝𐴉 𐴒𐴡𐴌𐴞 𐴊𐴠𐴈𐴥𐴝𐴘 𐴔𐴡𐴎𐴁𐴢𐴢𐴃𐴒𐴡𐴌𐴞 𐴈𐴝𐴔𐴒𐴡𐴌𐴝 𐴉𐴡𐴌𐴞𐴁𐴡 𐴱𐴱 𐴲 / 𐴌𐴢𐴢𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴠 𐴁𐴞𐴐𐴧𐴝𐴐𐴢 𐴊𐴞𐴉𐴝𐴌𐴞𐴁𐴡𐴓𐴧𐴝 𐴑𐴡𐴖𐴔 𐴉𐴡𐴌𐴥𐴡𐴑 𐴔𐴝𐴀𐴝𐴔𐴠𐴓𐴝 𐴒𐴡𐴌𐴠𐴊𐴠 𐴑𐴝𐴕𐴢𐴢𐴕 𐴀𐴥𐴡𐴑𐴧𐴡𐴓 𐴁𐴝𐴚𐴞 𐴉𐴥𐴠𐴓𐴝𐴘 𐴌𐴢𐴢𐴇𐴝𐴙𐴚𐴒𐴙𐴝𐴌 𐴕𐴡𐴔𐴙𐴕𐴊𐴝 𐴀𐴥𐴡𐴑𐴧𐴡𐴓𐴡𐴌𐴠 𐴀𐴝𐴌𐴑𐴝𐴕𐴡𐴌 𐴁𐴥𐴢𐴢𐴃𐴡𐴌𐴠 𐴏𐴝𐴘𐴁𐴡𐴓𐴧𐴝 𐴎𐴝𐴘𐴃𐴡 𐴊𐴦𐴡𐴕 𐴱𐴱 𐴳 / 𐴌𐴢𐴢𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴇𐴠𐴉𐴝𐴎𐴡𐴃𐴡𐴌 𐴒𐴠𐴌𐴝𐴕𐴄𐴞 𐴓𐴡𐴀𐴕 / 𐴀𐴝𐴌𐴑𐴝𐴕𐴡𐴌 𐴁𐴥𐴢𐴢𐴃𐴡𐴌𐴠 𐴊𐴠𐴐𐴁𐴞𐴊𐴠𐴐𐴡𐴌 𐴋𐴦𐴝𐴘 𐴀𐴝𐴌 𐴀𐴦𐴝𐴔 𐴔𐴝𐴙𐴕𐴐𐴥𐴡𐴌 𐴖𐴡𐴌𐴠 𐴕𐴡𐴎𐴡𐴌 𐴌𐴝𐴑𐴠𐴊𐴠 𐴋𐴦𐴝𐴘 𐴀𐴥𐴡𐴑𐴧𐴡𐴓 𐴁𐴢𐴢𐴖𐴝𐴒𐴝𐴌𐴦𐴡𐴕 𐴱𐴱 𐴴 / 𐴊𐴠𐴐𐴁𐴞𐴊𐴠𐴐𐴥𐴞 𐴐𐴥𐴡𐴔𐴝𐴎 𐴀𐴥𐴡𐴑𐴧𐴡𐴓𐴡𐴌𐴠 𐴌𐴢𐴢𐴇𐴝𐴙𐴚𐴒𐴙𐴝𐴌 𐴔𐴝𐴀𐴝𐴔𐴠𐴓𐴝𐴌 𐴇𐴥𐴝𐴑𐴞𐴑𐴡𐴃𐴡𐴌𐴠 𐴏𐴥𐴝𐴁𐴢𐴢𐴃 𐴒𐴡𐴌𐴠𐴁𐴡𐴓𐴧𐴝 𐴀𐴝𐴌 𐴎𐴝𐴓𐴠𐴔𐴡𐴌𐴠 𐴏𐴥𐴝𐴎𐴝 𐴊𐴞𐴉𐴝𐴌𐴞𐴁𐴝𐴌 𐴐𐴥𐴢𐴢𐴎𐴢𐴢𐴑 𐴒𐴡𐴌𐴞𐴊𐴦𐴡𐴕 𐴱𐴱 𐴌𐴢𐴢𐴇𐴝𐴙𐴚𐴒𐴙𐴝 𐴌𐴞𐴉𐴢𐴢𐴎𐴞 𐴀𐴥𐴡𐴑𐴡𐴓 𐴕𐴞𐴎𐴡𐴌 𐴊𐴠𐴐𐴥𐴡𐴃 𐴇𐴥𐴠𐴉𐴝𐴎𐴡𐴃 𐴀𐴝𐴌 𐴀𐴝𐴎𐴝𐴊𐴞𐴌 𐴒𐴠𐴌𐴝𐴕𐴄𐴞 𐴕𐴥𐴝𐴘𐴊𐴠 𐴀𐴥𐴠𐴃𐴡𐴓𐴧𐴝 𐴎𐴝𐴘𐴕𐴡𐴉𐴝𐴠𐴊𐴧𐴠 𐴘𐴦𐴝𐴕 𐴊𐴠𐴐𐴁𐴞𐴊𐴠𐴐𐴥𐴠 𐴁𐴢𐴢𐴎𐴞𐴉𐴝𐴌𐴠𐴉𐴦𐴝𐴕