𐴊𐴢𐴢𐴘𐴊𐴠𐴐𐴥𐴡𐴌 𐴔𐴝𐴎𐴥𐴠 𐴔𐴦𐴝𐴙𐴕 𐴁𐴢𐴢𐴔𐴡𐴃 𐴌𐴢𐴢𐴇𐴝𐴙𐴚𐴒𐴙𐴝𐴌 𐴔𐴡𐴖𐴃 𐴱𐴱 𐴴 𐴲 / 𐴏𐴠𐴃𐴡𐴔𐴁𐴡𐴌 𐴹 𐴱 𐴰 𐴲 // 𐴰 𐴱 / 𐴀𐴝𐴐𐴥𐴞𐴕 𐴔𐴝𐴐𐴢 𐴱 𐴳 𐴲 𐴱 𐴌𐴢𐴢 / 𐴔𐴡𐴚𐴒𐴡𐴓 𐴁𐴝𐴌

𐴁𐴡𐴌𐴔𐴝𐴌 𐴔𐴠𐴓𐴠𐴄𐴠𐴌𐴞 𐴀𐴝𐴌 𐴐𐴥𐴞𐴔𐴝𐴏𐴦𐴡𐴛 𐴉𐴢𐴢𐴓𐴞𐴐𐴢 𐴔𐴞𐴓𐴞 𐴇𐴥𐴡𐴑𐴢𐴢𐴔𐴡𐴃𐴡𐴌 𐴁𐴡𐴓𐴠 𐴱𐴱 𐴌𐴢𐴢𐴇𐴝𐴙𐴚𐴒𐴙𐴝𐴌 𐴕𐴡𐴏𐴥𐴡𐴓 𐴉𐴥𐴢𐴢𐴌𐴝 𐴑𐴝𐴌𐴖𐴝𐴘 𐴒𐴡𐴌𐴞 𐴱𐴱 𐴓𐴝𐴑 𐴓𐴝𐴑 𐴌𐴢𐴢𐴇𐴝𐴙𐴚𐴒𐴙𐴝 𐴁𐴝𐴚𐴓𐴝𐴊𐴠𐴐𐴥𐴡𐴃 𐴉𐴝𐴌𐴒𐴡𐴌𐴥𐴝𐴘 𐴊𐴞𐴁𐴦𐴝𐴊𐴠 𐴱𐴱 𐴀𐴥𐴞𐴃𐴝𐴌𐴝 𐴖𐴝𐴉𐴠𐴏𐴢 𐴀𐴝𐴌𐴑𐴝𐴕𐴡𐴃 𐴒𐴥𐴡𐴓𐴞 𐴕𐴡𐴉𐴝𐴌𐴥𐴠𐴉𐴦𐴝𐴕 𐴱𐴱 𐴁𐴡𐴌𐴔𐴝𐴌 𐴔𐴠𐴓𐴠𐴄𐴠𐴌𐴞 𐴀𐴝𐴌 𐴐𐴥𐴞𐴔𐴝 𐴏𐴦𐴡𐴛 𐴉𐴢𐴢𐴓𐴞𐴐𐴢 𐴀𐴥𐴡𐴑𐴧𐴡𐴓 𐴔𐴞𐴓𐴞 𐴱𐴱 𐴁𐴝𐴚𐴓𐴝𐴊𐴠𐴐𐴢 𐴀𐴝𐴌 𐴁𐴡𐴌𐴔𐴝 𐴊𐴢𐴢𐴘 𐴊𐴠𐴐𐴥𐴡𐴌 𐴐𐴥𐴞𐴔𐴝𐴌 𐴔𐴝𐴎𐴠 𐴔𐴦𐴝𐴙𐴕 𐴁𐴢𐴢𐴔 𐴁𐴢𐴢𐴖𐴥𐴝𐴘 𐴌𐴢𐴢𐴇𐴝𐴚𐴒𐴙𐴝 𐴀𐴥𐴡𐴑𐴧𐴡𐴓 𐴔𐴝𐴌𐴞𐴉𐴥𐴠𐴓𐴝𐴌 𐴱𐴱 𐴒𐴡𐴃𐴡 𐴈𐴝𐴓𐴞𐴘𐴝 𐴐𐴥𐴡𐴔𐴁𐴝𐴌𐴠 𐴁𐴡𐴌𐴔𐴝𐴌 𐴀𐴥𐴠𐴑𐴢𐴢𐴓𐴠 𐴁𐴢𐴢𐴖𐴝𐴘𐴧𐴠𐴊𐴠 𐴔𐴦𐴝𐴙𐴕 𐴀𐴢𐴢𐴒𐴧𐴗𐴝 𐴉𐴥𐴢𐴢𐴍𐴞 𐴌𐴢𐴢𐴇𐴝𐴙𐴚𐴒𐴙𐴝 𐴌𐴞𐴉𐴢𐴢𐴎𐴞 𐴀𐴠𐴑𐴎𐴡𐴕 𐴔𐴝𐴌𐴝𐴒𐴞𐴘𐴠𐴊𐴠 𐴀𐴥𐴞𐴁𐴝 𐴓𐴡𐴘 𐴀𐴢𐴢𐴊𐴧𐴝 𐴀𐴠𐴔𐴝𐴐𐴥𐴡𐴃𐴢 𐴁𐴡𐴌𐴔𐴝𐴌 𐴔𐴠𐴓𐴠𐴄𐴠𐴌𐴞𐴌 𐴔𐴦𐴝𐴙𐴕 𐴉𐴥𐴢𐴢𐴍𐴞 𐴊𐴢𐴢𐴘𐴎𐴡𐴕𐴌 𐴔𐴡𐴖𐴃𐴢 𐴀𐴥𐴡𐴘𐴧𐴠 𐴱𐴱 𐴀𐴥𐴠𐴃𐴡𐴓𐴧𐴝 𐴎𐴞𐴌𐴢𐴢𐴂𐴢𐴢𐴖𐴝𐴘𐴕𐴡𐴃𐴢 𐴀𐴝𐴏𐴠𐴊𐴠 𐴌𐴢𐴢𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴁𐴠𐴐𐴥𐴞 𐴋𐴡𐴌𐴡𐴃𐴢 𐴀𐴝𐴏𐴦𐴠 𐴱𐴱 𐴀𐴠 𐴔𐴦𐴝𐴙𐴕 𐴁𐴢𐴢𐴔𐴡𐴌 𐴁𐴝𐴁𐴡𐴃𐴠 𐴱𐴱 𐴘𐴦𐴝𐴌 𐴀𐴝𐴒𐴠 𐴁𐴝𐴚𐴓𐴝𐴊𐴠𐴐𐴠 𐴁𐴡𐴌𐴔𐴝𐴌𐴠 𐴁𐴠𐴐𐴥𐴞𐴒𐴡𐴌𐴞 𐴇𐴥𐴢𐴢𐴐𐴞𐴘𐴝𐴌𐴞 𐴎𐴝𐴕𐴝𐴀𐴙𐴓 𐴱𐴱 𐴁𐴡𐴌𐴔𐴝𐴌 𐴔𐴠𐴓𐴠𐴄𐴠𐴌𐴞𐴘𐴠 𐴊𐴢𐴢𐴘𐴊𐴠𐴐𐴡𐴌 𐴐𐴥𐴞𐴔𐴝𐴃 𐴔𐴦𐴝𐴙𐴕 𐴁𐴢𐴢𐴖𐴥𐴝𐴘 𐴌𐴢𐴢𐴇𐴝𐴙𐴚𐴒𐴙𐴝𐴌𐴠 𐴔𐴝𐴌𐴠𐴊𐴧𐴠 𐴱𐴱 𐴀𐴥𐴞𐴕𐴡𐴌 𐴏𐴥𐴡𐴁𐴢𐴢𐴃𐴢 𐴀𐴥𐴡𐴑𐴧𐴡𐴓 𐴱𐴱 𐴀𐴠𐴔𐴕𐴠𐴏𐴄𐴞 𐴀𐴞𐴕𐴄𐴝𐴌𐴕𐴠𐴙𐴐𐴕𐴝𐴓𐴠 𐴊𐴡𐴓𐴝𐴒𐴡𐴌𐴞 𐴌𐴝𐴙𐴑𐴧𐴙𐴠 𐴈𐴦𐴡𐴘 𐴷 𐴹 𐴹 𐴱 𐴐𐴥𐴡𐴕𐴡𐴌 𐴑𐴝𐴕𐴢𐴢𐴕 𐴔𐴡𐴎𐴞𐴀𐴕 𐴱𐴱 𐴂𐴝𐴂𐴓𐴞𐴑𐴡𐴌 𐴎𐴝𐴒𐴝𐴃𐴢 𐴔𐴦𐴝𐴙𐴕 𐴁𐴢𐴢𐴔 𐴉𐴥𐴞𐴄𐴒𐴡𐴌𐴡𐴕𐴧𐴝𐴕 𐴋𐴦𐴡𐴣𐴌 𐴈𐴡𐴏𐴢𐴢𐴌𐴞 𐴁𐴡𐴓𐴞 𐴈𐴡𐴘𐴧𐴠 𐴱𐴱 𐴁𐴡𐴌𐴔𐴝𐴌 𐴔𐴠𐴓𐴠𐴄𐴠𐴌𐴞𐴌 𐴕𐴡𐴏𐴥𐴡𐴓 𐴉𐴥𐴢𐴢𐴌𐴝 𐴑𐴝𐴌𐴖𐴝𐴙𐴌 𐴎𐴡𐴌𐴞𐴘𐴝 𐴓𐴝𐴑 𐴓𐴝𐴑 𐴌𐴢𐴢𐴇𐴝𐴙𐴚𐴒𐴙𐴝 𐴱𐴱 𐴁𐴝𐴚𐴓𐴝𐴊𐴠𐴐𐴥𐴡𐴃 𐴏𐴝𐴀𐴝 𐴌𐴝 𐴓𐴡𐴘 𐴁𐴠𐴐𐴥𐴞 𐴊𐴢𐴢𐴑𐴧𐴡𐴌 𐴎𐴞𐴕𐴊𐴞𐴒𐴞 𐴈𐴝𐴍𐴝𐴊𐴧𐴠 𐴀𐴥𐴠𐴃𐴧𐴢𐴢 𐴱𐴱 𐴀𐴡𐴙𐴕𐴧𐴡 𐴔𐴞𐴑𐴧𐴙𐴝 𐴎𐴝𐴙𐴁𐴝𐴌 𐴐𐴡𐴑𐴧𐴡𐴌𐴡𐴃𐴢 𐴏𐴥𐴡𐴏𐴡𐴁𐴢𐴢𐴃 𐴁𐴝𐴕𐴝𐴊𐴧𐴠 𐴀𐴥𐴠𐴍𐴠 𐴱𐴱 𐴁𐴡𐴖𐴃𐴢 𐴌𐴢𐴢𐴇𐴝𐴙𐴚𐴒𐴙𐴝𐴌𐴠 𐴁𐴝𐴚𐴓𐴝𐴊𐴠𐴐𐴥𐴢 𐴇𐴥𐴡𐴑𐴢𐴢𐴔𐴡𐴃𐴠 𐴁𐴡𐴕𐴒𐴡𐴙𐴅𐴧𐴠𐴊𐴠 𐴀𐴝𐴏𐴥𐴠 𐴱𐴱
𐴲 𐴱 𐴰 𐴲 𐴐𐴥𐴡𐴕𐴡𐴃 𐴁𐴡𐴌𐴔𐴝𐴌 𐴔𐴠𐴓𐴠𐴄𐴠𐴌𐴞 𐴀𐴝𐴌 𐴁𐴢𐴢𐴋𐴧𐴞𐴇𐴏𐴢 𐴀𐴝𐴃𐴡𐴚𐴖𐴝𐴊𐴞 𐴀𐴥𐴡𐴑𐴧𐴡𐴓𐴠 𐴇𐴥𐴡𐴑𐴢𐴢𐴔𐴡𐴃𐴡𐴌 𐴔𐴡𐴊𐴡𐴊𐴢 𐴓𐴡𐴘 𐴀𐴠𐴑𐴃𐴡𐴌𐴉𐴝 𐴑𐴥𐴢𐴢𐴕𐴞 𐴇𐴥𐴝𐴔𐴓𐴝 𐴐𐴥𐴢𐴢𐴌𐴢𐴢 𐴒𐴡𐴙𐴅𐴧𐴠 𐴱𐴱 𐴀𐴥𐴠 𐴇𐴥𐴝𐴔𐴓𐴝 𐴀𐴥𐴞𐴁𐴝 𐴀𐴝𐴌𐴑𐴝𐴕 𐴁𐴦𐴝𐴊𐴠 𐴀𐴡𐴙𐴕𐴧𐴡 𐴋𐴞𐴐𐴥𐴄𐴞𐴑 𐴀𐴥𐴡𐴑𐴧𐴡𐴓𐴡𐴃 𐴀𐴥𐴡 𐴏𐴥𐴡𐴌𐴝𐴘 𐴒𐴦𐴞𐴓𐴒𐴥𐴡𐴘 𐴱𐴱 𐴀𐴥𐴠 𐴕𐴡𐴃𐴞𐴅𐴝𐴃 𐴁𐴡𐴌𐴔𐴝𐴌 𐴰 𐴱 𐴐𐴥𐴝𐴕 𐴋𐴞𐴐𐴥𐴄𐴞𐴑 𐴔𐴞𐴓𐴝𐴘 𐴰 𐴴 𐴐𐴥𐴝𐴕𐴡𐴌 𐴖𐴡𐴌𐴠 𐴔𐴡𐴏𐴡𐴙𐴃𐴢 𐴇𐴥𐴡𐴑𐴢𐴢𐴔𐴡𐴃𐴠 𐴁𐴡𐴕𐴒𐴡𐴌𐴞 𐴊𐴦𐴞𐴓𐴢 𐴱𐴱 𐴀𐴥𐴠 𐴔𐴡𐴏𐴥𐴡𐴙𐴃𐴢 𐴀𐴥𐴡𐴑𐴧𐴡𐴓𐴡𐴌 𐴁𐴥𐴢𐴢𐴃𐴡𐴌𐴠 𐴱𐴱 𐴀𐴠𐴑 𐴐𐴥𐴡 𐴇𐴥𐴝𐴙𐴄 𐴁𐴡𐴏𐴥𐴡𐴌 𐴀𐴝𐴒𐴠 𐴹 𐴵 𐴸 𐴱 𐴀𐴞𐴚𐴌𐴝𐴎𐴞 / 𐴱 𐴷 𐴰 𐴱 𐴌𐴢𐴢𐴇𐴝𐴙𐴚𐴒𐴙𐴝 𐴐𐴥𐴡𐴕𐴡𐴃 𐴁𐴝𐴕𐴦𐴝𐴙𐴓𐴊𐴠 𐴀𐴝𐴙𐴑𐴧𐴙𐴝𐴉𐴡𐴌 𐴅𐴝𐴔𐴠 𐴔𐴡𐴏𐴥𐴙𐴃𐴡 𐴀𐴝𐴐𐴧𐴞𐴓 𐴱𐴱 𐴀𐴥𐴠 𐴔𐴡𐴏𐴡𐴙𐴃 𐴀𐴥𐴞𐴕𐴡𐴌𐴠 𐴑𐴥𐴢𐴢𐴓𐴞𐴁𐴝𐴌 𐴁𐴝𐴁𐴡𐴃𐴠 𐴱𐴱 𐴀𐴠𐴈𐴥𐴡𐴕 𐴁𐴡𐴌𐴔𐴝𐴃 𐴀𐴝𐴏𐴠𐴊𐴥𐴠 𐴔𐴢𐴢𐴏𐴡𐴓𐴔𐴝𐴕 𐴀𐴥𐴡𐴑𐴧𐴡𐴓𐴠 𐴉𐴡𐴃𐴧𐴞 𐴋𐴞𐴐𐴄𐴞𐴑𐴡𐴃𐴧𐴢𐴢 𐴔𐴝𐴕𐴥𐴢𐴢𐴙𐴐𐴢 𐴓𐴡𐴘 𐴀𐴢𐴢𐴒𐴧𐴗𐴝 𐴃𐴡𐴙𐴃𐴧𐴝 𐴑𐴡𐴔𐴞𐴄𐴞 𐴁𐴝𐴕𐴝𐴘𐴧𐴠 𐴱𐴱 𐴎𐴞𐴁𐴥𐴝𐴘𐴧𐴠 𐴁𐴡𐴕𐴒𐴡𐴙𐴅𐴧𐴝 𐴔𐴡𐴏𐴡𐴙𐴃 𐴀𐴥𐴡𐴑𐴧𐴡𐴓𐴡𐴌 𐴓𐴞𐴏𐴄𐴞 𐴁𐴝𐴕𐴝𐴘 𐴊𐴢𐴢𐴖𐴝𐴌𐴝 𐴑𐴥𐴢𐴢𐴓𐴞𐴁𐴡𐴓𐴧𐴝 𐴇𐴥𐴡𐴑𐴢𐴢𐴔𐴡𐴃𐴡𐴌𐴠 𐴊𐴡𐴌𐴈𐴦𐴝𐴏𐴢 𐴒𐴡𐴌𐴞𐴁𐴡 𐴁𐴡𐴓𐴞 𐴑𐴡𐴔𐴞𐴄𐴞𐴌 𐴎𐴞𐴔𐴧𐴝𐴊𐴝𐴌 𐴔𐴡𐴚 𐴔𐴡𐴚 𐴔𐴞𐴕𐴄 𐴘𐴠 𐴈𐴡𐴘𐴧𐴠𐴊𐴠 𐴘𐴦𐴝𐴕 𐴎𐴝𐴕𐴝 𐴒𐴞𐴘𐴠 𐴱𐴱